ginti

14 tab mandli ke sab log ye baatein sunkar zor-zor se chillane lage aur saari raat rote rahe.+ 2 sabhi israeli moosa aur haaroon ke khilaf kudkudane lage.+ unki poori mandli kehne lagi, “kaash, hum misra mein hi mar jaate ya is veerane mein hi mar jaate! 3 yahova kyon hamein us desh mein le jaa raha hai?+ bas isliye ki dushman aakaar hamein talvar se maar daalein aur hamare beevi-bachchon ko bandi banakar le jaayen?+ isse to achha hai ki hum misra laut jaayen.”+ 4 yahaan tak ki woh ek-doosre se kehne lage, “aao hum apne liye ek aguva chun lete hain aur misra laut jaate hain!”+

5 tab moosa aur haaroon, israeliyon ki poori mandli ke dekhte munh ke bal zameen par gire. 6 aur noon ke bete yahoshoo+ aur yapunne ke bete kaaleb+ ne, jo desh ki jaasoosi karnevalon mein se the, maare dukh ke apne kapde faade 7 aur unhonne israeliyon ki poori mandli ko samjhaya, “hum jis desh ki jaasoosi karke aaye hain woh bahot hi badhiya desh hai.+ 8 agar yahova ki manzoori hum par bani rahi, to woh zaroor hamein us desh mein le jaayega jahaan doodh aur shehad ki dhaarayen behti hain+ aur hamein woh desh de dega. 9 magar tum log yahova ke khilaf bagavat mat karo aur us desh ke logon se mat daro+ kyonki hum unhein aasani se hara sakte hain.* unki hifazat karnevala koi nahin hai jabki hamare saath yahova hai.+ isliye tum unse mat darna.”

10 magar logon ki poori mandli kehne lagi ki hum in donon ko pattharon se maar daalte hain.+ lekin yahova ki mahima bheint ke tamboo par israel ke sabhi logon ke saamne prakat hui.+

11 yahova ne moosa se kaha, “ye log aur kab tak meri beizzati karte raheinge?+ mainne inke beech kitne chinh dikhaye hain, magar woh sab dekhne ke baad bhi ye log kab tak mujh par vishvas karne se inkar karte raheinge?+ 12 ab main in par mahamari le aaunga aur inka naamo-nishan mita doonga. aur inke badle tujhse ek bada raashtra banaunga jo inse kahin zyada mahan aur taakatvar hoga.”+

13 magar moosa ne yahova se kaha, “agar toone aisa kiya to yah khabar misriyon tak pahunch jaayegi jinke beech tu apni shakti se in logon ko yahaan le aaya hai.+ 14 aur woh zaroor yah baat is desh ke logon ko batayenge, jo pehale se jaante hain ki tu yahova in logon ke saath hai+ aur tu inke saamne saaf-saaf prakat hota hai.+ unhonne suna hai ki tu yahova hai aur tera baadal tere logon ke oopar khada rehta hai aur tu din ke vakt baadal ke khambhe mein aur raat ke vakt aag ke khambhe mein hokar unke aage-aage chalta hai.+ 15 ab agar tu in logon ko ek hi baar mein maar daale to ye saari jaatiyaan, jinhonne tere pratap ke baare mein suna hai, tere baare mein kya kaheingi? woh yahi kaheingi, 16 ‘yahova ne un logon se shapath khaakaar kaha to tha ki woh unhein yah desh de dega, magar woh unhein us desh mein le jaane mein naakam ho gaya. isliye usne un sabko veerane mein hi maar daala.’+ 17 isliye hey yahova, meharbani karke tu apni mahashakti dikha, theek jaise toone us vakt vaada kiya tha jab toone kaha tha, 18 ‘yahova krodh karne mein dheema aur atal pyar se bharpoor hai.+ woh gunahon aur apradhon ko maaf karta hai, magar jo doshi hai use saza diye bagair hargiz nahin chhodega aur pita ke gunah ki saza uske beton, poton aur parpoton tak ko deta hai.’+ 19 isliye daya karke in logon ka gunah maaf kar de, jaise tu inhein misra se nikaal laane ke samay se lekar ab tak maaf karta aaya hai. aisa karke dikha ki tera atal pyar kitna mahan hai.”+

20 tab yahova ne usse kaha, “theek hai, jaise toone kaha hai main unhein maaf kar deta hoon.+ 21 magar mere jeevan ki shapath, poori dharti yahova ki mahima se bhar jaayegi.+ 22 jin logon ne misra mein aur is veerane mein apni aankhon se meri mahima aur mere chinh dekhe hain+ aur fir bhi baar-baar* meri pareeksha lete rahe+ aur meri baat maanne se inkar karte rahe,+ 23 woh us desh ko kabhi nahin dekh paayenge jise dene ke baare mein mainne unke purkhon se shapath khaayi thi. haan, jitne log meri beizzati karte hain unmein se koi bhi woh desh nahin dekh paayega.+ 24 magar main apne sevak kaaleb+ ko zaroor us desh mein le jaaunga jahaan woh jaakaar aaya hai, kyonki uske man ka swabhav baaki logon se alag hai aur woh poore dil se meri batayi raah par chalta aaya hai. uski santan us desh ko apne adhikar mein kar paayegi.+ 25 kal tum log yahaan se vaapas mud jaao aur laal saagar ke raaste se veerane mein jaao,+ kyonki yahaan ghaati ke paas amaleki aur kanaani log rehte hain.”+

26 fir yahova ne moosa aur haaroon se kaha, 27 “dushton ki yah mandli aur kab tak mere khilaf kudkudati rahegi?+ israeli mere khilaf kudkudate huye jo baatein keh rahe hain, woh sab mainne suni hain.+ 28 tum unse kehna ki yahova ne ailan kiya hai, ‘mere jeevan ki shapath, main tumhare saath theek vahi karoonga jo mainne tumhare munh se suna hai!+ 29 tum sab isi veerane mein dher ho jaaoge.+ tummein se jitnon ki umra 20 saal ya usse zyada hai aur jinke naam likhe gaye hain woh sab log, haan, jitnon ne mere khilaf kudkudaya hai woh sab-ke-sab maare jaayenge.+ 30 yapunne ke bete kaaleb aur noon ke bete yahoshoo ko chhod, tummein se koi bhi us desh mein kadam nahin rakh paayega+ jiske baare mein mainne shapath khaakaar kaha* tha ki main tumhein vahaan basaunga.+

31 main tumhare bachchon ko, jinke baare mein tumne kaha tha ki woh bandi bana liye jaayenge,+ us desh mein le jaaunga aur woh us desh ko dekh paayenge jise tumne thukra diya hai.+ 32 magar tum isi veerane mein dher ho jaaoge. 33 aur tumhare bete 40 saal tak isi veerane mein bhed-bakriyon ki charvahi kareinge+ aur tumhare vishvasghat* ka lekha unhein dena padega. unhein tab tak yah saza bhugatnee hogi jab tak ki tummein se har koi is veerane mein nahin mar jaata.+ 34 tumne jitne din us desh ki jaasoosi ki thi unmein se har din ke liye ek saal ke hisab se, yaani 40 din+ ke liye 40 saal tak tumhein apne gunahon ka lekha dena hoga.+ tab tum jaan loge ki mere khilaf kaam karne ka* anjam kya hota hai.

35 yah mera vachan hai, yahova ka vachan. in dushton ki mandli ne ekjut hokar mere khilaf bagavat ki hai isliye main inka yahi hashra karoonga: is veerane mein in sabka naash ho jaayega aur ye log yahin mar jaayenge.+ 36 aur woh aadmi jinhein moosa ne desh ki jaasoosi karne bheja tha aur jinhonne desh ke baare mein buri khabrein failakar+ logon ki poori mandli ko moosa ke khilaf kudkudane ke liye uksaya tha, 37 haan, woh aadmi jinhonne us desh ke baare mein buri khabar di, woh saza paayenge aur yahova ke saamne mar jaayenge.+ 38 magar jaasooson mein se sirf noon ka beta yahoshoo aur yapunne ka beta kaaleb zinda raheinge.’”+

39 jab moosa ne ye baatein sabhi israeliyon ko sunayin to unhonne bahot shok manaya. 40 itna hi nahin, woh agle din subah jaldi uthe aur pahad ki choti par chadhne lage. unhonne ek-doosre se kaha, “hamne paap kiya hai. magar ab hum us desh mein jaane ke liye taiyar hain jiske baare mein yahova ne hamein bataya hai.”+ 41 magar moosa ne unse kaha, “tum yahova ki aagya ke khilaf hokar vahaan kyon jaa rahe ho? tum ismein kaamyab nahin ho paaoge. 42 tum dushmanon se ladne ke liye pahad par mat jaao, kyonki yahova tumhare saath nahin hai. tum haar jaaoge.+ 43 vahaan tumhara saamna amaleki aur kanaani logon se hoga,+ woh tumhein talvar se maar daaleinge. tumne yahova ke peechhe chalna chhod diya hai, isliye yahova tumhara saath nahin dega.”+

44 lekin log itne gustakh the ki unhonne moosa ki ek na maani aur seedhe pahad par chadhne lage.+ magar yahova ke karar ka sandook chhaavni ke beech hi raha aur moosa bhi vahin thehra raha.+ 45 jab israeli pahad par jaane lage to vahaan rehnevale amaleki aur kanaani neeche utar aaye aur unhonne israeliyon ko maar bhagaya aur unhein door horma tak khaded diya.+