ginti

31 iske baad yahova ne moosa se kaha, 2 “midyaniyon ne israeliyon ke saath jo kiya uska unse badla le.+ iske baad teri maut ho jaayegi.”*+

3 tab moosa ne logon se kaha, “tum apne beech se kuch aadmiyon ko taiyar karo taaki woh midyan se ladein aur yahova ki taraf se usse badla lein. 4 tum israel ke har gotra mein se 1,000 aadmi chunna aur unhein yuddh ke liye bhejna.” 5 israeli laakhon ki taadad mein the+ aur har gotra mein se sena ke liye hazar-hazar aadmi chune gaye. yuddh ke liye taiyar sainikon ki kul ginti 12,000 ho gayi.

6 fir moosa ne har gotra se chune gaye un hazar-hazar aadmiyon ki sena ko yuddh ke liye ravana kiya aur uske saath eliazar ke bete finehas+ ko bhi bheja jo is sena ka yaajak tha. finehas ke haath mein pavitra bartan aur yuddh ki pukar ke liye turhiyaan thi.+ 7 in aadmiyon ne jaakaar midyaniyon se yuddh kiya, theek jaise yahova ne moosa ko aagya di thi aur unhonne har midyani aadmi ko maar daala. 8 unhonne midyan ke paanch raajaon ko bhi maar daala jinke naam the evi, rekem, soor, hoor aur reba. unhonne baor ke bete bilam+ ko bhi talvar se maar daala. 9 magar unhonne midyani aurton aur bachchon ko bandi bana liya. aur unhonne midyaniyon ke sabhi paaltoo jaanvaron aur sabhi maveshiyon ko aur unka saara maal loot liya. 10 unhonne midyaniyon ki sabhi chhaavniyon* aur un sabhi shehron ko jalakar raakh kar diya jahaan woh base huye the. 11 aur woh loot ka saara maal aur jaanvaron aur sabhi bandiyon ko lekar nikaal pade. 12 yah sab lekar woh moosa, eliazar yaajak aur israeliyon ki mandli ke paas aaye jo yareeho ke saamne yardan ke paas, moab ke veeranon mein dera daale huye the.+

13 fir moosa, eliazar yaajak aur mandli ke sabhi pradhan sena se milne chhaavni ke baahar gaye. 14 moosa yuddh se laute un adhikariyon par bahot gussa hua jo hazaron aur saikdon ki tukdiyon ke pradhan chune gaye the. 15 moosa ne unse kaha, “tumne sabhi aurton ko kyon zinda chhod diya? 16 unhonne hi to bilam ke kehne par israeli aadmiyon ko apne jaal mein fansaya tha aur por ke maamle mein+ yahova se vishvasghat karvaya tha+ aur is vajah se yahova ki mandli par kehar toot pada tha.+ 17 isliye ab tum aisi har midyani aurat ko maar daalo jisne kisi aadmi ke saath yaun-sambandh rakha ho aur unke bachchon mein se sabhi ladkon ko bhi maar daalo. 18 sirf unki ladkiyon ko zinda chhod do jinhonne kabhi kisi aadmi ke saath yaun-sambandh nahin rakha.+ 19 aur tum sab chhaavni ke baahar saat din tak dera daale rehna. tummein se jis-jisne kisi ko maar daala hai ya kisi laash ko chhua hai,+ use teesre aur saatvein din khud ko shuddh karna hoga.+ tum aur woh sabhi jinhein tum bandi banakar laaye ho, khud ko shuddh karein. 20 aur tum har kapde, chamde ki har cheez, bakri ke baal ki bani har cheez aur lakdi ki har cheez ko shuddh karna.”

21 iske baad eliazar yaajak ne yuddh se laute sainikon se kaha, “yahova ne moosa ko jo kaanoon diya tha usmein yah niyam hai: 22 ‘sona, chaandi, taamba, loha, teen, seesa 23 aur aisi har cheez jo aag se shuddh ki jaa sakti hai, sirf usi ko tum aag mein daalkar shuddh karna aur woh shuddh ho jaayegi. iske baad tum unhein paani se bhi shuddh karna.+ lekin jo cheezen aag se shuddh nahin ki jaa saktin, unhein tum paani se dhona. 24 aur tum saatvein din apne kapde dhona. tab tum shuddh ho jaaoge aur chhaavni mein aa sakte ho.’”+

25 fir yahova ne moosa se kaha, 26 “tu eliazar yaajak aur mandli ke kulon ke mukhiyaon ke saath milkar loot ke saare maal ki ginti lena. insanon aur jaanvaron donon ki ginti lena. 27 saara maal do hisson mein baantna, ek hissa un sabhi sainikon ko dena jo yuddh mein gaye the aur doosra hissa mandli ke baaki logon ko dena.+ 28 aur jo sainik yuddh mein gaye the unse yahova ke liye kar lena. unko diye gaye har 500 bandiyon, 500 gaay-bailon, 500 gadhon aur 500 bhed-bakriyon mein se ek-ek lekar parmeshvar ko dena. 29 sainikon ko milnevale aadhe hisse mein se yah kar lekar tum yahova ke liye jo daan doge use tum eliazar yaajak ko dena.+ 30 aur israeliyon ko diye aadhe hisse mein jitne bandhuye, gaay-bail, gadhe, bhed-bakriyaan aur har tarah ke paaltoo jaanvar hain, unmein se har 50 mein se ek alag nikaalna aur leviyon ko dena+ jo yahova ke pavitra dere se judi zimmedariyaan nibhate hain.”+

31 moosa aur eliazar yaajak ne theek vaise hi kiya jaise yahova ne moosa ko aagya di thi. 32 yuddh mein gaye sainikon ne loot ke maal mein se jo kuch khaa liya tha, uske baad jo maal bacha uski ginti yah thi: bhed-bakriyaan 6,75,000 thi, 33 gaay-bail 72,000 the 34 aur gadhe 61,000 the. 35 jin ladkiyon ne kisi aadmi ke saath yaun-sambandh nahin rakha tha,+ unki ginti 32,000 thi. 36 yuddh mein gaye sainikon ko jo aadha hissa diya gaya usmein bhed-bakriyon ki ginti 3,37,500 thi. 37 inmein se 675 bhed-bakriyaan yahova ke liye kar mein di gayin. 38 gaay-bailon ki ginti 36,000 thi. inmein se 72 gaay-bail yahova ke liye kar mein diye gaye. 39 aur gadhon ki ginti 30,500 thi. inmein se 61 yahova ke liye kar mein diye gaye. 40 aur insanon ki ginti 16,000 thi. inmein se 32 log yahova ke liye kar mein diye gaye. 41 fir moosa ne yah saara kar liya jo yahova ke liye daan mein diya gaya tha aur use eliazar yaajak ko diya,+ theek jaise yahova ne moosa ko aagya di thi.

42 moosa ne yuddh mein gaye sainikon ko loot ka hissa dene ke baad jo aadha hissa israeliyon ko diya woh yah tha: 43 bhed-bakriyaan 3,37,500 thi, 44 gaay-bail 36,000 the, 45 gadhe 30,500 the 46 aur insan 16,000 the. 47 moosa ne israeliyon ke is hisse mein se kuch insanon aur jaanvaron ko alag nikaala. usne har 50 insanon aur jaanvaron mein se ek alag nikaala aur leviyon ko diya+ jo yahova ke pavitra dere se judi zimmedariyaan sambhaalte the.+ moosa ne theek vaise hi kiya jaise yahova ne use aagya di thi.

48 iske baad moosa ke paas woh sabhi adhikari aaye, jo hazaron+ aur saikdon ki tukdiyon ke pradhan chune gaye the. 49 unhonne moosa se kaha, “maalik, hamne un sabhi sainikon ki ginti li hai jo hamari kaman ke neeche hain. unki ginti poori hai, ek bhi sainik kam nahin hai.+ 50 isliye ab hammein se har koi yahova ko kuch bheint dena chahta hai. hamein loot mein jo kuch mila hai usmein se hum sone ki ye saari cheezen dena chahte hain: paayal, kangan, muharvali angoothiyaan, kaan ki baaliyaan aur doosre zevar taaki yahova ke saamne hamara prayashchit ho.”

51 tab moosa aur eliazar yaajak ne un adhikariyon se sone ke saare zevar sweekar kiye. 52 hazaron aur saikdon ki tukdiyon ke pradhanon ne jo sona yahova ko daan mein diya tha uska vazan 16,750 shekel* tha. 53 sena mein se har aadmi ko loot ke maal mein se hissa mila tha. 54 moosa aur eliazar yaajak ne hazaron aur saikdon ki tukdiyon ke pradhanon se sona sweekar kiya. unhonne yah saara sona laakaar bheint ke tamboo mein rakha taaki woh yahova ke saamne israeliyon ke liye yaadgar bana rahe.