Kapitulo Disiseis

Isa ka Mensahe Sang Paglaum Para sa Nagakasubo nga mga Bihag

Isaias 55:1-13

1. Ilaragway ang kahimtangan sang Judiyong mga tinapok sa Babilonia.

ISA yadto ka masubo nga panahon sa maragtas sang Juda. Ang nakigkatipan nga katawhan sang Dios pilit nga ginkuha sa ila dutang natawhan kag nagaantos karon subong mga bihag sa Babilonia. Matuod, ginhatagan sila sing diutay nga kahilwayan sa paghimo sang ila mga hilikuton sa adlaw-adlaw. (Jeremias 29:​4-7) Ang iban nakatigayon sing propesyonal nga mga kalantip ukon nagnegosyo.a (Nehemias 3:​8, 31, 32) Walay sapayan, ang kabuhi sang Judiyong mga bihag indi mahapos. Ulipon sila, sa pisikal kag sa espirituwal. Tan-awon naton kon paano.

2, 3. Paano ang pagkatinapok nakaapektar sa pagsimba sang mga Judiyo kay Jehova?

² Sang ginlaglag sang Babilonianhon nga mga hangaway ang Jerusalem sang 607 B.C.E., indi lamang nga ginhapay nila ang pungsod; ginhalitan man nila ang matuod nga pagsimba. Ginpanguha nila ang mga gamit sa templo ni Jehova kag ginguba ini, ginhalitan nila ang kahimusan sang pagkasaserdote sang ginbihag nila ang pila ka saserdote sa tribo ni Levi kag ginpatay ang iban. Bangod wala sing balay para sa pagsimba, wala sing altar, kag wala sing organisado nga pagkasaserdote, imposible nga makahalad ang mga Judiyo sa matuod nga Dios subong ginapatuman sang Kasuguan.

³ Sarang gihapon mapadayon sang matutom nga mga Judiyo ang relihioso nga identidad paagi sa pagpasirkunsidar kag pagsunod sa Kasuguan tubtob sa mahimo nila. Halimbawa, sarang nila malikawan ang ginadumilian nga mga pagkaon kag bantayan ang Adlaw nga Inugpahuway. Apang sa paghimo sini, mahimo nga yagutaon sila sang mga nagbihag sa ila, bangod ginatamod sang mga Babilonianhon ang relihioso nga mga rito sang mga Judiyo subong kabuangan. Ang masubo nga kahimtangan sang mga tinapok sarang makita sa mga pulong sang salmista: “Sa ubay sang mga suba sang Babilonia​​—didto naglingkod kami. Naghibi man kami sang madumduman namon ang Sion. Sa mga kahoy nga alamo sa tunga niya ginsang-at namon ang amon mga arpa. Kay didto ang mga nagbihag sa amon nagpangayo sa amon sing mga ambahanon, kag ang mga nagauligyat sa amon​—sing pagkasadya: ‘Ambahi kami sing isa sang mga ambahanon sang Sion.’ ”​—Salmo 137:​1-3.

4. Ngaa mangin walay pulos nga magpaabot ang mga Judiyo sing kaluwasan gikan sa iban nga mga pungsod, apang kay sin-o sila makapangayo sing bulig?

⁴ Kay sin-o, nian, makadangop ang Judiyong mga bihag agod malugpayan? Sa diin magagikan ang ila kaluwasan? Pat-od nga indi sa bisan diin sa mga pungsod nga nagapalibot sa ila! Ini tanan wala sing mahimo batok sa mga hangaway sang Babilonia, kag madamo ang nagakontra sa mga Judiyo. Apang indi walay paglaum ang kahimtangan. Si Jehova, nga ila ginbatuan sang sila isa ka hilway nga katawhan, mainayuhon nga naghatag sa ila sing makalilipay nga pangagda, bisan pa tinapok sila.

“Kari Kamo sa Tubig”

5. Ano ang kahulugan sang mga pulong nga “kari kamo sa tubig”?

⁵ Paagi kay Isaias, matagnaon nga naghambal si Jehova sa Judiyong mga bihag sa Babilonia: “Kamo dira, tanan kamo nga ginauhaw! Kari kamo sa tubig. Kag ang mga wala sing kuwarta! Kari kamo, magbakal kag magkaon. Huo, kari kamo, magbakal sing alak kag gatas bisan wala sing kuwarta kag wala sing bayad.” (Isaias 55:1) Madamo sing simbulismo ining mga pulong. Halimbawa, binagbinaga ang pangagda nga: “Kari kamo sa tubig.” Kon wala sing tubig, imposible ang kabuhi. Kon wala ining bilidhon nga likido, kita nga mga tawo mabuhi sa sulod lamang sang mga isa ka semana. Gani, nagakaigo nga gingamit ni Jehova ang tubig subong kaanggid sa mangin epekto sang iya mga pulong sa Judiyong mga bihag. Ang iya mensahe magapapresko sa ila, kaangay sang mabugnaw nga ilimnon sa isa ka mainit nga adlaw. Tapuson sini ang ila kasubo, bulngon ang ila kauhaw sa kamatuoran kag pagkamatarong. Kag magahatag ini sa ila sing paglaum nga mahilway gikan sa pagkabihag. Walay sapayan, agod makabenepisyo, ang Judiyong mga tinapok dapat mag-inom sing mensahe sang Dios, mamati sa sini, kag himuon ini.

6. Paano makabenepisyo ang mga Judiyo kon magbakal sila sing “alak kag gatas”?

⁶ Nagtanyag man si Jehova sing “alak kag gatas.” Ang gatas nagapabakod sa lamharon nga mga lawas kag nagabulig sa kabataan sa pagdaku. Sing kaanggid, ang mga pulong ni Jehova magapabakod sa iya katawhan sa espirituwal kag magabulig sa ila sa pagpalig-on sang ila kaangtanan sa iya. Kamusta naman ang alak? Ang alak masami nga ginagamit sa mga kinasadya. Sa Biblia, ginaangot ini sa kahamungayaan kag pagkasadya. (Salmo 104:15) Sa pagsugo sa iya katawhan nga “magbakal sing alak,” ginapasalig sila ni Jehova nga ang bug-os tagipusuon nga pagpanumbalik sa matuod nga pagsimba magahimo sa ila nga ‘malipayon sing bug-os.’​​—Deuteronomio 16:​15; Salmo 19:​8; Hulubaton 10:22.

7. Ngaa talalupangdon ang kaawa ni Jehova sa mga tinapok, kag ano ang ginatudlo sini sa aton tuhoy sa iya?

⁷ Maluluy-on gid si Jehova sa pagtanyag sining espirituwal nga pangpapresko sa tinapok nga mga Judiyo! Labi pa nga talalupangdon ang iya kaawa kon dumdumon naton ang maragtas sang pagkabatinggilan kag pagrebelde sang mga Judiyo. Indi sila takus sa kahamuot ni Jehova. Apang, ang salmista nga si David nagsulat mga siglo antes sini: “Si Jehova maluluy-on kag mainayuhon, makuli sa pagpangakig kag bugana sa mahigugmaon nga kaayo. Indi sia magpangita sing sayop sa tanan nga tion, ni maghinakit sia tubtob sa tion nga walay latid.” (Salmo 103:​8, 9) Sa baylo nga makigbulag sa iya katawhan, si Jehova ang magahimo sang una nga tikang para sa pag-uliay. Sa pagkamatuod, sia isa ka Dios nga “nagakahamuot sa mahigugmaon nga kaayo.”​​—Miqueas 7:18.

Sayop nga Pagsalig

8. Sa diin nagsalig ang madamo nga Judiyo, walay sapayan sang ano nga paandam?

⁸ Tubtob sa sini nga tion madamo nga Judiyo ang wala nagasalig sing bug-os kay Jehova para sa ila kaluwasan. Sang wala pa mapukan ang Jerusalem, halimbawa, ang iya mga manuggahom nangayo sing bulig sa gamhanan nga mga pungsod, sa amo daw subong bala nga nakighilawas sila sa Egipto kag sa Babilonia. (Ezequiel 16:​26-​29; 23:14) May maayo nga rason nga ginpaandaman sila ni Jeremias: “Sumpaon ang mabukod nga tawo nga nagabutang sang iya pagsalig sa dutan-on nga tawo kag nagahimo gid sang unod nga iya butkon, kag ang iya tagipusuon nagatalikod kay Jehova.” (Jeremias 17:5) Apang, amo gid sina ang ginhimo sang katawhan sang Dios!

9. Paano ang madamo nga Judiyo ‘magabayad sing kuwarta para sa indi tinapay’?

⁹ Ulipon sila karon sa isa sang mga pungsod nga ila ginsaligan. Nakatuon bala sila sing leksion? Mahimo nga madamo ang wala manuto sa sini, kay si Jehova namangkot: “Ngaa padayon kamo nga nagabayad sing kuwarta para sa indi tinapay, kag ngaa ang inyo pagpangabudlay para sa wala nagapabusog?” (Isaias 55:​2a) Kon ang bihag nga mga Judiyo wala nagasalig kay Jehova kundi sa iban, “nagabayad [sila] sing kuwarta para sa indi tinapay.” Pat-od nga indi sila pagbuy-an sang Babilonia bangod may pagsulundan ini nga indi gid pagpapulion ang iya mga bihag. Sa kamatuoran, ang Babilonia, bangod sang iya imperyalismo, komersialismo, kag butig nga pagsimba, wala sing bisan ano nga mahatag sa tinapok nga mga Judiyo.

10. (a) Paano padyaan ni Jehova ang tinapok nga mga Judiyo kon mamati sila sa iya? (b) Ano nga katipan ang ginhimo ni Jehova kay David?

¹⁰ Nakitluoy si Jehova sa iya katawhan: “Pamati sing maayo sa akon, kag magkaon kon ano ang maayo, kag tuguti nga ang inyo kalag makasapo sing tuman nga kalipay sini sa katambok. Ihuyog ang inyo igdulungog kag kari sa akon. Pamati kamo, kag ang inyo kalag padayon nga magakabuhi, kag handa ako makigkatipan sa inyo sing isa ka katipan nga magapadayon sing walay pat-od may kaangtanan sa matutom nga mga mahigugmaon nga kaayo kay David.” (Isaias 55:2b, 3) Ang lamang nga paglaum sining maluya sa espirituwal nga katawhan amo si Jehova, nga sing matagnaon nagapakighambal karon sa ila paagi kay Isaias. Ang ila mismo kabuhi nasandig sa ila pagpamati sa mensahe sang Dios, kay nagsiling sia nga kon himuon nila ini, ang ila “kalag padayon nga magakabuhi.” Apang, ano ang “katipan nga magapadayon sing walay pat-od” nga himuon ni Jehova upod sa mga magapamati sa iya? Ina nga katipan “may kaangtanan sa matutom nga mga mahigugmaon nga kaayo kay David.” Mga siglo antes sini, ginsaaran ni Jehova si David nga ang iya trono “matukod nga malig-on tubtob sa tion nga walay latid.” (2 Samuel 7:16) Busa, ang “katipan nga magapadayon sing walay pat-od” nga ginsambit diri nagapatuhoy sa pagginahom.

Isa ka Permanente nga Manunubli sa Isa ka Walay Katapusan nga Ginharian

11. Ngaa ang katumanan sang saad sang Dios kay David daw isa ka imposible nga butang para sa mga tinapok sa Babilonia?

¹¹ Matuod, mahimo nga para sa Judiyong mga tinapok daw imposible matabo ang ideya nga ang isa gikan sa kaliwat ni David magagahom. Nadula nila ang ila pungsod kag bisan gani ang ila pungsudnon nga kaliwat! Apang temporaryo lamang yadto. Wala malipatan ni Jehova ang iya katipan kay David. Bisan pa daw imposible ini gikan sa pagtamod sang tawo, ang katuyuan sang Dios tuhoy sa isa ka walay katapusan nga Ginharian sa kaliwat ni David magamadinalag-on. Apang paano kag san-o? Sang 537 B.C.E., ginhilway ni Jehova ang iya katawhan gikan sa pagkabihag sa Babilonia kag ginpasag-uli sila sa ila dutang natawhan. Nagresulta bala ini sa pagtukod sing isa ka ginharian nga magapadayon sing walay pat-od? Wala, nangin sakop sila gihapon sang isa pa ka pagano nga emperyo, ang Medo-Persia. “Ang gintalana nga tion” sang paggahom sang mga pungsod wala pa matapos. (Lucas 21:24) Bangod wala sing nagahari sa Israel, ang ginsaad ni Jehova kay David magapabilin nga indi matuman sa sulod sang mga siglo nga maabot.

12. Ano nga tikang ang ginhimo ni Jehova agod matuman ang katipan para sa Ginharian nga ginhimo niya kay David?

¹² Pagligad sang kapin sa 500 ka tuig sa tapos mahilway ang Israel gikan sa pagkabihag sa Babilonia, naghimo si Jehova sing isa ka daku nga tikang agod matuman ang katipan para sa Ginharian sang ginliton niya ang kabuhi sang iya panganay nga Anak, ang pamuno sang iya pagpanuga, gikan sa langitnon nga himaya padulong sa taguangkan sang Judiyo nga ulay nga si Maria. (Colosas 1:​15-​17) Sang ginpahibalo yadto nga hitabo, ang anghel ni Jehova nagsiling kay Maria: “Ining isa mangin daku kag tawgon nga Anak sang Labing Mataas; kag ihatag sa iya ni Jehova nga Dios ang trono ni David nga iya amay, kag magahari sia sa panimalay ni Jacob sing dayon, kag ang iya ginharian walay katapusan.” (Lucas 1:​32, 33) Gani natawo si Jesus sa harianon nga kaliwat ni David kag napanubli niya ang kinamatarong sa pagkahari. Kon makalingkod na sa trono, si Jesus magagahom “tubtob sa tion nga walay latid.” (Isaias 9:7; Daniel 7:14) Sa amo bukas na karon ang dalan agod matuman ang mga siglo na ang kadugayon nga saad ni Jehova nga hatagan si Hari David sing isa ka permanente nga manunubli.

“Kumandante sa Pungsudnon nga mga Grupo”

13. Paano si Jesus nangin “saksi sa pungsudnon nga mga grupo” sa tion sang iya ministeryo kag sa tapos sang iya pagkayab?

¹³ Ano ang himuon sining palaabuton nga hari? Si Jehova nagsiling: “Yari karon! Subong saksi sa pungsudnon nga mga grupo ginhatag ko sia, subong lider kag kumandante sa pungsudnon nga mga grupo.” (Isaias 55:4) Sang magdaku si Jesus, sia ang nangin tiglawas ni Jehova sa duta, ang saksi sang Dios sa mga pungsod. Sa iya pagkabuhi subong tawo, ginpatuhoy niya ang iya ministeryo sa “nadula nga mga karnero sang panimalay sang Israel.” Apang, sang buot na sia magkayab pa langit, si Jesus nagsiling sa iya mga sumulunod: “Busa lakat kamo kag maghimo sing mga disipulo sa mga tawo sa tanan nga kapungsuran . . . Yari karon! ako kaupod ninyo sa tanan nga adlaw tubtob sa katapusan sang sistema sang mga butang.” (Mateo 10:​5, 6; 15:​24; 28:​19, 20) Sa amo, sang ulihi, ang mensahe sang Ginharian gindala sa mga di-Judiyo, kag ang pila sa ila nakaambit sa katumanan sang katipan nga ginhimo kay David. (Binuhatan 13:46) Sa sining paagi, bisan sa tapos sang iya kamatayon, pagkabanhaw, kag pagkayab sa langit, padayon si Jesus nga nangin “saksi [ni Jehova] sa pungsudnon nga mga grupo.”

14, 15. (a) Paano ginpamatud-an ni Jesus ang iya kaugalingon subong “lider kag kumandante”? (b) Ano nga paglaum ang ginpaabot sang unang-siglo nga mga sumulunod ni Jesus?

¹⁴ Si Jesus nangin “lider [man] kag kumandante.” Nahisanto gid sa sining matagnaon nga paglaragway, sang si Jesus yari sa duta ginbaton niya sing bug-os ang mga salabton sang iya pagkaulo kag nanguna sia sa tanan nga paagi, nga nagaganyat sa daku nga mga kadam-an, ginatudluan sila sang mga pulong sang kamatuoran, kag ginapakita sa ila ang mga benepisyo nga matigayon sang mga nagasunod sa iya pagkalider. (Mateo 4:​24; 7:​28, 29; 11:5) Madinalag-on nga ginhanas niya ang iya mga disipulo, bilang paghanda sa ila sa pagbantala sa ulihi. (Lucas 10:​1-​12; Binuhatan 1:8; Colosas 1:23) Sa sulod lamang sang tatlo ka tuig kag tunga, napasad ni Jesus ang pundasyon para sa isa ka nahiusa, internasyonal nga kongregasyon nga may linibo ka katapo gikan sa madamo nga kaliwatan! Isa ka matuod nga “lider kag kumandante” ang lamang nga makahimo sining daku nga butang.b

¹⁵ Ang mga gintipon sa nahaunang-siglo nga Cristianong kongregasyon ginhaplasan sing balaan nga espiritu sang Dios, kag may paglaum sila nga mangin kaupod ni Jesus sa paggahom sa iya langitnon nga Ginharian. (Bugna 14:1) Apang, ang tagna ni Isaias nagadalahig sang tion nga lampas pa sa panahon sang paghimuno sang Cristianismo. Ginapakita sang ebidensia nga si Jesucristo nagsugod sa paggahom subong Hari sa Ginharian sang Dios sang 1914 lang. Wala madugay pagkatapos sadto, nagtuhaw ang isa ka kahimtangan sa tunga sang hinaplas nga mga Cristiano sa duta nga may madamo nga pagkaanggid sa kahimtangan sang tinapok nga mga Judiyo sang ikan-om nga siglo B.C.E. Sa katunayan, ang natabo sa sadtong mga Cristiano amo ang isa ka daku pa nga katumanan sang tagna ni Isaias.

Modernong-Adlaw nga Pagkabihag kag Kahilwayan

16. Ano nga kalisdanan ang natabo sa tapos si Jesus naglingkod sa trono sang 1914?

¹⁶ Ang paglingkod ni Jesus subong Hari sang 1914 gintandaan sang walay tupong nga kalisdanan sa kalibutan? Ngaa? Bangod sang mangin Hari si Jesus, gintabog niya si Satanas kag ang iban pa nga malaut nga mga espiritu nga tinuga gikan sa langit. Sang malimitehan sa duta, ginsugdan ni Satanas ang pagpakig-away batok sa nabilin nga mga balaan, ang nagkalabilin sang hinaplas nga mga Cristiano. (Bugna 12:​7-12, 17) Ang putukputukan nalab-ot sang 1918 sang ang pagbantala sa publiko halos nagdulog kag ang responsable nga mga opisyal sang Watch Tower Society ginbilanggo sa butig nga mga panumbungon nga sedisyon. Sa sining paagi, ang modernong-adlaw nga mga alagad ni Jehova nabihag sa espirituwal nga kahulugan, kaangay sang pisikal nga pagkabihag sang dumaan nga mga Judiyo. Nahuy-an sila sing daku.

17. Paano ang kahimtangan sang mga hinaplas nagbaliskad sang 1919, kag paano sila ginpalig-on sadto?

¹⁷ Apang, wala magdugay ang nabihag nga kahimtangan sang hinaplas nga mga alagad sang Dios. Sang Marso 26, 1919, ang nabilanggo nga mga opisyal ginpaguwa, kag sang ulihi ang tanan nga panumbungon batok sa ila ginbawi. Ginpasagahay ni Jehova ang balaan nga espiritu sa iya nahilway nga katawhan, agod papagsikon sila para sa hilikuton nga nagahulat sa ila. Malipayon nga ginbaton nila ang pangagda nga ‘magkuha sing tubig sang kabuhi nga walay bayad.’ (Bugna 22:17) Nagbakal sila sing “alak kag gatas bisan wala sing kuwarta kag wala sing bayad” kag ginpalig-on sa espirituwal para sa dalayawon nga pag-uswag nga mahanabo, nga wala makita sing abanse sang hinaplas nga nagkalabilin.

Ang Dakung Kadam-an Nagadangop sa mga Hinaplas Sang Dios

18. Anong duha ka grupo ang masapwan sa tunga sang mga disipulo ni Jesucristo, kag ano ang ginahuman nila karon?

¹⁸ Ang mga disipulo ni Jesus nagapaabot sing isa sa duha ka paglaum. Una, ang isa ka “diutay nga panong” nga may kadamuon nga 144,000 natipon na​—ang hinaplas nga mga Cristiano gikan sa mga Judiyo kag mga Gentil, nga amo ang “Israel sang Dios” kag may paglaum nga maggahom upod kay Jesus sa iya langitnon nga Ginharian. (Lucas 12:​32; Galacia 6:​16; Bugna 14:1) Ikaduha, sa katapusan nga mga adlaw, isa ka “dakung kadam-an” sang “iban nga mga karnero” ang nagpakilala sang ila kaugalingon. May paglaum sila nga magkabuhi sing dayon sa isa ka paraiso nga duta. Samtang wala pa ang dakung kapipit-an, ining kadam-an​—nga ang ila kadamuon wala ginasambit​—​nagaalagad upod sa diutay nga panong, kag ining duha ka grupo nagahuman sing “isa ka panong” sa idalom sang “isa ka manugbantay.”​​—Bugna 7:​9, 10; Juan 10:16.

19. Paano ang “isa ka pungsod” nga wala anay makilala sang Israel sang Dios nagsabat sa panawagan sinang espirituwal nga pungsod?

¹⁹ Ang pagtipon sa sining dakung kadam-an sarang mahantop sa masunod nga mga pulong sang tagna ni Isaias: “Yari karon! Tawgon mo ang isa ka pungsod nga wala mo makilala, kag sila nga gikan sa isa ka pungsod nga wala makakilala sa imo magadalagan sa imo, tungod kay Jehova nga imo Dios, kag para sa Balaan sang Israel, bangod patahumon ka niya.” (Isaias 55:5) Sa sulod sang tinuig sa tapos sila mahilway gikan sa espirituwal nga pagkabihag, wala sang primero mahangpan sang hinaplas nga nagkalabilin nga sa wala pa ang Armagedon mangin instrumento sila sa pagtawag sa isa ka daku nga “pungsod” sa pagsimba kay Jehova. Apang, samtang nagaligad ang tion, madamo nga bunayag sing tagipusuon nga mga tawo nga wala sing langitnon nga paglaum ang nagsugod sa pagpakig-upod sa mga hinaplas kag sa pag-alagad kay Jehova nga may kakugi kaangay sa mga hinaplas. Natalupangdan sining mga bag-uhan ang ginpatahom nga kahimtangan sang katawhan sang Dios, kag ginkilala nila nga si Jehova kaupod nila. (Zacarias 8:23) Sang katuigan 1930, nahangpan na sang mga hinaplas ang matuod nga identidad sini nga grupo, nga nagadamo sa tunga nila. Nahangpan na nila nga isa ka daku nga hilikuton sa pagtipon ang magaabot. Ang dakung kadam-an nagdalidali sa pagpakig-upod sa nakigkatipan nga katawhan sang Dios, kag may maayo ini nga rason.

20. (a) Sa aton panahon, ngaa hilingagawon nga ‘pangitaon si Jehova,’ kag paano ini ginahimo? (b) Paano si Jehova magasabat sa mga nagapangita sa iya?

²⁰ Sang panahon ni Isaias, naglanog ang panawagan: “Pangitaa ninyo si Jehova samtang nga makita pa sia. Tawga ninyo sia samtang nga malapit pa sia.” (Isaias 55:6) Sa aton panahon, nagakaigo ining mga pulong, para sa mga nagahuman sa Israel sang Dios kag para sa nagadamo pa nga dakung kadam-an. Ang pagpakamaayo ni Jehova may kondisyon, kag ang iya pangagda indi tubtob san-o. Karon na ang tion nga pangitaon ang kahamuot sang Dios. Kon mag-abot na ang gintalana nga tion para sa paghukom ni Jehova, mangin atrasado na ang tanan. Busa, si Isaias nagasiling: “Magbiya ang malauton nga tawo sang iya dalanon, kag ang mahaliton nga tawo sang iya mga panghunahuna; kag magbalik sia kay Jehova, nga magakaluoy sa iya, kag sa aton Dios, kay sia magapatawad sing bugana.”​​—Isaias 55:7.

21. Paano ang pungsod sang Israel nangin di-matutom sa ginpahayag sang ila mga katigulangan?

²¹ Ang dinalan nga “magbalik sia kay Jehova” nagapahangop nga ang mga dapat maghinulsol may kaangtanan anay sa Dios. Ang ekspresyon nagapahanumdom sa aton nga madamo nga butang sa sini nga bahin sang tagna ni Isaias ang may una nga aplikasyon sa Judiyong mga bihag sa Babilonia. Mga siglo sang una, ang mga katigulangan sining mga bihag nagpahayag sang ila determinasyon nga mangin matinumanon kay Jehova sang magsiling sila: “Malayo sa amon nga magbiya kami kay Jehova sa pag-alagad sa iban nga mga dios.” (Josue 24:16) Ginapakita sang maragtas nga ang “malayo” natabo gid​​—sing makapila! Ang kakulang sing pagtuo sang katawhan sang Dios amo ang kabangdanan kon ngaa gintapok sila sa Babilonia.

22. Ngaa nagasiling si Jehova nga ang iya mga panghunahuna kag mga dalanon mataas pa sa mga panghunahuna kag mga dalanon sang mga tawo?

²² Ano ang mahanabo kon maghinulsol sila? Paagi kay Isaias, nanaad si Jehova nga sia “magapatawad sing bugana.” Kag nagdugang pa sia: “ ‘Kay ang inyo mga panghunahuna indi akon mga panghunahuna, ni ang akon mga dalanon inyo mga dalanon,’ siling ni Jehova. ‘Kay subong nga ang mga langit mataas pa sa duta, sa amo ang akon mga dalanon mataas pa sa inyo mga dalanon, kag ang akon mga panghunahuna sa inyo mga panghunahuna.’ ” (Isaias 55:​8, 9) Si Jehova himpit, kag ang iya panghunahuna kag mga dalanon tuman kataas nga indi malab-ot. Bisan gani ang iya kaluoy indi gid matupungan naton nga mga tawo. Binagbinaga ini: Kon ginapatawad naton ang aton isigkatawo, isa ini ka kahimtangan nga ang makasasala nagapatawad sa isa nga makasasala man. Narealisar naton nga sa indi madugay ukon sa ulihi kita man nagakinahanglan sang pagpatawad sang aton isigkatawo. (Mateo 6:12) Apang si Jehova, bisan pa wala gid sia nagakinahanglan nga patawaron, nagapatawad “sing bugana”! Sa pagkamatuod, isa sia ka Dios nga may daku nga mahigugmaon nga kaayo. Kag sa iya kaluoy, ginabuksan ni Jehova ang mga talambuan sang langit, agod ipaulan ang mga pagpakamaayo sa mga nagapanumbalik sa iya sing bug-os tagipusuon.—Malaquias 3:10.

Mga Pagpakamaayo Para sa mga Nagapanumbalik kay Jehova

23. Paano ginailustrar ni Jehova ang pagkapat-od sang katumanan sang iya pulong?

²³ Si Jehova nagsaad sa iya katawhan: “Subong nga ang nagabubo nga ulan nagatupa, kag ang niebe, gikan sa mga langit kag wala nagabalik sa sina nga duog, luwas kon mahupog sini ang duta kag mapabunga kag mapasalingsing ini, kag ang binhi mahatag sa manugsab-ug kag ang tinapay sa manugkaon, mangin amo man ang akon pulong nga nagaguwa sa akon baba. Indi ini magabalik sa akon nga wala sing mga resulta, kundi himuon gid sini ang akon nahamut-an, kag pat-od nga magamadinalag-on ini sa butang nga tungod sina ginpadala ko ini.” (Isaias 55:​10, 11) Ang tanan nga ginasiling ni Jehova pat-od nga matuman. Subong nga ang ulan kag niebe nga nagakahulog gikan sa langit nagahimo sang ila katuyuan nga hupugon ang duta kag magpatubas sing bunga, ang pulong ni Jehova nga nagaguwa sa iya baba masaligan man sing bug-os. Kon ano ang ginsaad niya, pagatumanon niya​​—sing pat-od gid.​​—Numeros 23:19.

24, 25. Anong mga pagpakamaayo ang nagahulat para sa Judiyong mga tinapok nga nagasunod sa mensahe ni Jehova paagi kay Isaias?

²⁴ Busa, kon pamatian sang mga Judiyo ang mga pulong nga ginbungat sing matagnaon para sa ila paagi kay Isaias, pat-od nga mabaton nila ang kaluwasan nga ginsaad ni Jehova. Nian, makaeksperiensia sila sing daku nga kalipay. Si Jehova nagsiling: “Magaguwa kamo nga may kasadya, kag pasudlon kamo nga may paghidait. Ang kabukiran kag ang kabakuluran magkasadya sa atubangan ninyo nga may hugyaw sang kalipay, kag ang tanan nga kahoy sa latagon magapamalakpak sang ila mga kamot. Sa baylo sang tunukon nga mga puongpuong magatubo ang kahoy nga junipero. Sa baylo sang gilukon nga mga tanom magatubo ang kahoy nga mirto. Kag ini mangin isa ka butang nga bantog para kay Jehova, isa ka tanda tubtob sa tion nga walay latid nga indi pagautdon.”—Isaias 55:12, 13.

²⁵ Sang 537 B.C.E., ang Judiyong mga tinapok nagguwa matuod gikan sa Babilonia nga may kasadya. (Salmo 126:​1, 2) Pag-abot nila sa Jerusalem, ang naabtan nila isa ka duta nga gintubuan sang tunukon nga mga puongpuong kag gilukon nga mga tanom​—dumduma, ang duta nahapay sa sulod sang mga dekada. Apang makabulig karon ang nahilway nga katawhan sang Dios nga patahumon ini! Ang matag-as nga mga kahoy, subong sang junipero kag mirto, nagbulos sa mga tunok kag gilukon nga mga tanom. Ang pagpakamaayo ni Jehova nangin dayag gid samtang ang iya katawhan nagaalagad sa iya nga “may hugyaw sang kalipay.” Daw subong nga ang duta mismo nagkasadya.

26. Anong ginpakamaayo nga kahimtangan ang ginaagom sang katawhan sang Dios karon?

²⁶ Sang 1919 ang nagkalabilin sang hinaplas nga mga Cristiano ginhilway gikan sa ila espirituwal nga pagkabihag. (Isaias 66:8) Upod sa dakung kadam-an sang iban nga mga karnero, nagaalagad sila karon sa Dios nga may kasadya sa isa ka espirituwal nga paraiso. Hilway sa bisan ano nga mantsa sang Babilonianhon nga impluwensia, yara sila sa isa ka nahamut-an nga kahimtangan, nga para kay Jehova “butang nga bantog.” Ang ila espirituwal nga kauswagan nagahimaya sa iya ngalan kag nagabayaw sa iya subong ang Dios sang matuod nga tagna. Ang nahimo ni Jehova para sa ila nagapamatuod sa iya pagka-Dios kag ebidensia sang iya katutom sa iya pulong kag sang iya kaluoy sa mga mahinulsulon. Kabay nga kita tanan nga nagapadayon sa ‘pagbakal sing alak kag gatas bisan wala sing kuwarta kag wala sing bayad’ magkasadya sa pag-alagad sa iya tubtob sa walay katubtuban!

[Mga nota]

[Piktyur sa pahina 234]

Ang mga Judiyo nga nauhaw sa espirituwal ginaagda nga ‘magkari sa tubig’ kag “magbakal sing alak kag gatas”

[Piktyur sa pahina 239]

Ginpamatud-an ni Jesus ang iya kaugalingon nga isa ka “lider kag kumandante” sa pungsudnon nga mga grupo

[Mga retrato sa pahina 244, 245]

“Magbiya ang malauton nga tawo sang iya dalanon”