“Padayon nga Usisaa Ninyo ang Inyo Kaugalingon kon Yara Kamo sa Pagtuo”

Mga Talalupangdon Gikan sa Ikaduhang Corinto

NABALAKA si apostol Pablo nahanungod sa mga Cristiano sa Corinto. Paano nila tamdon ang laygay nga ginhatag sa ila sa iya nahaunang sulat? Yara sia sa Macedonia sang nag-abot si Tito dala ang maayo nga balita nga ang sulat nagdul-ong sa mga taga-Corinto nga maghinulsul. Nagpahalipay gid yadto kay Pablo!​—⁠2 Corinto 7:​8-13.

Ginsulat ni Pablo ang Ikaduhang Corinto gikan sa Macedonia, ayhan pagkatapos sang tungatunga sang tuig 55 C.E. Sa sining sulat, ginhambalan niya ang mga tikang nga kinahanglanon agod huptan ang kongregasyon nga matinlo, ginpalig-on ang handum nga mag-amot sa imol nga mga tumuluo sa Judea, kag ginpangapinan ang iya pagkaapostol. Ang kalabanan nga ginsiling ni Pablo makabulig sa aton sa ‘pag-usisa sang aton kaugalingon kon yara kita sa pagtuo.’ (13:⁠5) Gani, ano ang mapulot naton gikan sa sini nga sulat?

Mag-alagad Para sa Dios sang Paumpaw

Ginpakita sang apostol nga subong nga ang Dios nagapaumpaw sa aton sa tanan naton nga kapipit-an, dapat naton paumpawan ang iban kag ipangamuyo sila. (1:1–2:11) Bisan pa si ­Pablo kag ang iya mga kaupdanan napaidalom sa daku nga pag-ipit, ginluwas sila sang Dios. Apang, ang mga taga-Corinto sarang makabulig paagi sa pagpangamuyo tungod sa ila, subong nga dapat kita magpangamuyo tungod sa iban nga nagbaton sang matuod nga pagsimba. Apang kamusta ang imoral nga tawo nga ginsambit sa 1 Corinto kapitulo 5? Ayhan ginpaguwa sia apang naghinulsul. Mahimo nga napaumpawan gid sia sing daku sang ang mga taga-Corinto nagpatawad kag mahigugmaon nga nagpasag-uli sa iya sa tunga nila.

Ang pinamulong ni Pablo sarang makapauswag sang aton apresasyon para sa Cristianong ministeryo, nagapabakud sang aton tindog para sa matuod nga pagtuo. (2:12–6:10) Ti, ang mga ministro sang bag-ong katipan may pribilehiyo nga mangin yara sa “prosesyon sang kadalag-an” upod sa Dios nga nagapangulo! Natigayon ni Pablo kag sang iya mga masigkamanugpangabudlay ang hamili nga ministeryo bangod sang kaluoy nga ginpakita sa ila. Kaangay nila, ang karon nga mga hinaplas may ministeryo sang pagpasag-uli. Apang, ang tanan nga mga Saksi ni Jehova nagapamanggaranon sa iban paagi sa ila minis­teryo.

Paghimpit sang Pagkabalaan kag Mangin Maalwan

Ginapakita sa aton ni Pablo nga ang Cristianong mga ministro dapat maghimpit sang pagkabalaan sa kahadlok kay Jehova. (6:11–7:16) Agod magtindog kita nga malig-on sa pagtuo, dapat naton likawan ang magpagota sa mga ditumuluo, kag dapat kita magpaninlo sa undanon kag espirituwal nga pagkanadagtaan. Ang mga taga-Corinto naghimo sing pagpaninlo paagi sa pagsikway paguwa sa imoral nga makasasala, kag nagkalipay si Pablo nga ang iya sulat nagpatubas sa ila sing kasubo padulong sa paghinulsul para sa kaluwasan.

Natun-an man naton nga ang nagakahadlok sa Dios nga mga ministro ginpadyaan tungod sang ila kaalwan. (8:1–9:15) Nahanungod sa mga amot para sa imol nga “mga balaan,” ginhatag ni Pablo ang maayong halimbawa sang mga taga-Macedonia. Maalwan sila labaw sa ila masarangan, kag naglaum sia nga makita ina man nga ­kaalwan sa mga taga-Corinto. Ang paghatag nila​—⁠kag naton​—⁠dapat nga naghalin sa tagipusuon, kay ang “Dios nagahigugma sa malipayon nga nagahatag” kag nagapahalipay sa iya katawhan bangod sang tanan nga sari sang kaalwan.

Si Pablo​—⁠Isa ka Mainulikdon nga Apostol

Kon may nahimo kita sa pag-alagad kay Jehova subong mga ministro, magpabugal kita nahanungod sa iya, indi sa aton kaugalingon. (10:1–12:13) Total, paagi lamang sa espirituwal nga mga hinganiban nga “may gahom sang Dios” kita makalumpag sang dimatuod nga mga pangatarungan. Ang bugalon nga “lutaw nga mga apostoles” sa tunga sang mga taga-Corinto indi gid makatumbas sa rekord sang pagbatas ni Pablo subong ministro ni Cristo. Apang, agod indi sia mapakataas sing sobra, ang Dios wala magkuha sang iya “ungon sa unod”​—⁠ayhan ang mapigaw nga panulok ukon ang dimatuod nga mga apostoles. Mahimo ipabugal ni Pablo ang iya kaluyahon agod “ang gahom ni Cristo” magpabilin sa ibabaw niya subong sang kayangkayang. Subong isa ka tawo nga nagtindog nga malig-on sa pagtuo, wala sia napamatud-an nga kubos sa lutaw nga mga apostoles. Nakita sang mga taga-Corinto ang mga pamatuod nga ginpatubas sang pagkaapostol ni Pablo sa tunga nila “paagi sa tanan nga pagbatas, kag paagi sa mga tanda kag mga kalatingalahan kag gamhanan nga mga buhat.”

Subong ministro kag apostol, si Pablo nagadumdom sang espirituwal nga kaayuhan sang mga masigkatumuluo, kag amo man kita. (12:14–13:14) ‘Nalipay gid [sia] maghinguyang sang iya kaugalingon tungod sa ila kalag.’ Apang nahadlok si Pablo nga basi pag-abot niya sa Corinto, makita niya ang iban nga wala naghinulsul sa mga buhat sang unod. Gani, naglaygay sia sa tanan nga mag-usisa sang ila kaugalingon kon yara sila sa pagtuo kag magpangamuyo nga sila “indi maghimo sing malaut.” Sa paghinakop, ginpalig-on niya sila nga magkalipay, magtadlong sang ila mga dalanon kag ­magpaumpaw, maghilisugot, kag magkabuhi sa paghidait. Daw ano kaayo nga laygay para man sa aton!

Padayon sa Pag-usisa!

Busa, ang ikaduha nga sulat ni Pablo sa mga Cristiano sa Corinto nagapakita sang lainlain nga paagi sa padayon nga pag-usisa kon yara kita sa pagtuo. Ang iya mga pulong pat-od gid nga magapahulag sa aton sa pagpaumpaw sa iban, subong nga ang Dios nagapaumpaw sa aton sa aton tanan nga kapipit-an. Ang ginsiling sang apostol nahanungod sa Cristianong ministeryo dapat magpahulag sa aton nga tumanon ini sing matutom samtang ginahimpit naton ang pagkabalaan sa kahadlok kay Jehova.

Ang pag-aplikar sa laygay ni Pablo magahimo sa aton nga labi kaalwan kag mabuligon. Apang, ang iya mga pulong dapat magtiklod sa aton nga magpabugal kay Jehova, indi sa aton kaugalingon. Dapat ini magdugang sang aton mahigugmaon nga kabalaka sa mga masigkatumuluo. Kag pat-od gid nga ini kag ang iban pa nga mga punto sa Ikaduhang Corinto magabulig sa aton sa ‘padayon nga pag-usisa kon yara kita sa pagtuo.’

[Kahon/Piktyur sa pahina 26]

IBANAAG ANG HIMAYA NI JEHOVA: Sang nanaug si Moises gikan sa Bukid Sinai dala ang mga tapitapi sang Testimoniya, ang iya guya nagsiga bangod nagpamulong sa iya ang Dios. (Exodo 34:​29, 30) Ginsambit ini ni Moises kag nagsiling: “Kita tanan, sa guya nga walay tabon nagabanaag kaangay sang salaming sang himaya ni Jehova, ginabalhin sa iya kaangay gikan sa isa ka himaya pa himaya, nga ginhimo gid ni Jehova nga Espiritu.” (2 Corinto 3:​7-18) Ang mga salaming anay nga ginauyatan sang kamot ginahuman sang mga metal subong sang bronse ukon saway kag ginpahining sing maayo agod makasalaming sing maayo. Kaangay sang salaming, ang mga hinaplas nagabanaag sang himaya sang Dios nga nagaiwag sa ila gikan kay Jesucristo, amat-amat nga ‘nagabalhin sa ila sa larawan’ nga ginpaalinton sang nagabanaag sang himaya sang Dios nga Anak. (2 Corinto 4:6; Efeso 5:⁠1) Paagi sa balaan nga espiritu kag Kasulatan, ang Dios nagatuga sa ila sing “bag-ong personalidad,” nagabanaag sang iya kaugalingon nga mga kinaiya. (Efeso 4:24; Colosas 3:10) Sa langit man ukon sa duta ang aton paglaum, ipakita naton ina nga personalidad kag pakabahandion ang pribilehiyo nga mapabanaag ang himaya sang Dios sa aton ministeryo.

[Kahon/Piktyur sa pahina 27]

“HINGANIB SANG PAGKAMATARONG”: Ang isa ka paagi nga ginrekomendar mismo ni Pablo kag sang iya mga kaupdanan subong mga ministro sang Dios amo ang paagi “sa hinganib sang pagkamatarong sa tuo kag sa wala.” (2 Corinto 6:​3-7) Ang tuo nga kamot gingamit sa pag-uyat sang espada, kag ang wala sa pag-uyat sang taming. Bisan pa salakayon sa tanan ­nga bahin, si Pablo kag ang iya mga kaupdanan armado sa pagpakig-away sang espirituwal nga inaway. Gingamit ini batok sa dimatuod nga mga manunudlo kag sa “lutaw nga mga apostoles” agod ang kongregasyon sang Corinto indi mapahilayo gikan sa debosyon kay Cristo. Wala gingamit ni Pablo ang mga hinganib sang makasasala nga unod​—⁠malimbungon, madayaon, ukon tuso. (2 Corinto 10:​8-10; 11:​3, 12-14; 12:​11, 16) Sa baylo, ang “mga hinganib” nga gingamit matarong, ukon makatarunganon, nga paagi sa pagpauswag sa kausa sang matuod nga pagsimba batok sa tanan nga pagsalakay. Ginagamit man karon sang mga Saksi ni Jehova ang “mga hinganib sa pagkamatarong” para sa sina man nga katuyuan.