Ang Paglakat sa Banas ni Jehova Nagadala sing Bugana nga Padya

NAKATAKLAD ka na bala sa mga bukid? Kon amo, mahimo nga nagbatyag ka sing tuman gid nga kalipay. Makalilipay gid nga makahaklo sing preska nga hangin, makita ang malayo nga mga duog, mawili sa katahom sang kinaugali! Ayhan ang mga problema sa ubos daw indi na tanto ka importante.

Malaka lang maglakbay sing amo sini ang kalabanan nga tawo, apang kon ikaw isa ka dedikado nga Cristiano, mahimo nga nagataklad na ikaw sa kabukiran​—⁠sa espirituwal nga kahulugan. Kaangay sang salmista sang una, walay duhaduha nga nangamuyo ka: “Ipahibalo sa akon ang imo mga dalanon, O Jehova; tudlui ako sang imo mga banas.” (Salmo 25:⁠4) Madumduman mo bala kon ano ang imo ginbatyag sang una ka nga nagtaklad sa bukid sang balay ni Jehova kag nagsugod sa paglakat sa mataas nga mga duog? (Miqueas 4:⁠2; Habacuc 3:19) Walay duhaduha nga nakita mo sa gilayon nga ang paglakat sa sining mataas nga mga banas sang matuod nga pagsimba nagdala sa imo sing proteksion kag kalipay. Naeksperiensiahan mo ang ginbatyag sang salmista: “Malipayon ang katawhan nga nakahibalo sang malipayon nga pagsinggit. O Jehova, sa kapawa sang imo nawong padayon sila nga nagalakat.”​—⁠Salmo 89:15.

Apang, kon kaisa ang mga nagataklad sa bukid nabudlayan sa malawig, taklaron nga mga banglid. Nagapalanakit ang ila mga batiis, kag ginalapyo sila. Makaeksperiensia man kita sing mga kabudlayan sa aton pag-alagad sa Dios. Mahimo nga daw kakapoy na magtikang sining ulihi lang. Paano naton mabalik ang aton kapagsik kag ang aton kalipay? Ang una nga tikang amo ang pagkilala sa pagkasupremo sang mga dalanon ni Jehova.

Ang Mataas nga mga Kasuguan ni Jehova

Ang mga dalanon ni Jehova ‘mataas pa sa mga dalanon sang tawo,’ kag ang pagsimba sa iya ‘ginpatindog sing malig-on nga mataas pa sa mga bukid kag ginbayaw nga mataas pa sa kabakuluran.’ (Isaias 55:⁠9; Miqueas 4:⁠1) Ang kaalam ni Jehova “kaalam nga gikan sa hitaas.” (Santiago 3:17) Ang iya mga kasuguan superyor sa tanan. Halimbawa, sang mapintas nga nagahalad ang mga Canaanhon sing mga bata, ginhatag ni Jehova sa mga Israelinhon ang mga kasuguan nga may mataas nga moral kag talalupangdon bangod sang kaawa. Ginsilingan niya sila: “Dili ka magpasulabi sa imol, kag dili pagpalabiha ang daku nga tawo. . . . Ang dumuluong . . . sa inyo dapat mangin subong sang tumandok sa tunga ninyo; kag higugmaon mo sia subong sang imo kaugalingon.”​—⁠Levitico 19:​15, 34.

Pagligad sang 15 ka siglo, naghatag si Jesus sang dugang pa nga halimbawa sang ‘dungganon nga kasuguan’ ni Jehova. (Isaias 42:21) Sa Sermon sa Bukid, ginsilingan niya ang iya mga disipulo: “Padayon nga higugmaa ang inyo mga kaaway kag ipangamuyo ang mga nagahingabot sa inyo; agod mapamatud-an ninyo ang inyo kaugalingon nga mga anak sang inyo Amay nga yara sa mga langit.” (Mateo 5:​44, 45) “Busa, ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila,” siling pa niya. “Ini, sa katunayan, amo ang kahulugan sang Kasuguan kag sang mga Manalagna.”​—⁠Mateo 7:12.

May epekto ining mataas nga mga kasuguan sa tagipusuon sang mabinatunon nga mga tawo, nagapahulag sa ila nga ilugon ang Dios nga ila ginasimba. (Efeso 5:⁠1; 1 Tesalonica 2:13) Hunahunaa ang pagbag-o ni Pablo. Sang una sia nga ginsambit sa Biblia, ‘nagpahanugot sia sa kamatayon’ ni Esteban kag “mapintas nga nakig-angot sa kongregasyon.” Pagligad sang pila lamang ka tuig, nakig-angot sia sing mainayuhon sa mga Cristiano sa Tesalonica kaangay sang “nagabatiti nga iloy nga nagaatipan sang iya kaugalingon nga mga anak.” Bangod sang panudlo nga nabaton ni Pablo halin sa Dios, nagbag-o sia halin sa isa ka manughingabot pakadto sa isa ka mainulikdon nga Cristiano. (Binuhatan 8:​1, 3; 1 Tesalonica 2:⁠7) Mapinasalamaton gid sia bangod gindihon sang panudlo ni Cristo ang iya personalidad. (1 Timoteo 1:​12, 13) Paano makabulig ang kaanggid nga apresasyon agod makapadayon kita sa paglakat sa mataas nga banas sang Dios?

Paglakat sing Mainapresyahon

Nalipay ang mga nagataklad sa matahom nga mga talan-awon sa kabukiran. Nagapaayaw man sila sa paghimutad sa magagmay nga mga butang nga ila maagyan, subong sang di-kinaandan nga bato, matahom nga bulak, ukon sa pagpasiplat sa ilahas nga sapat. Sa espirituwal, dapat man kita mangin alisto sa mga padya​—⁠dalagku kag magagmay⁠​—⁠​nga resulta sang paglakat upod sa Dios. Ang paghibalo sini makapabaskog sa aton kag ang makalalapyo nga paglakat mahimo mangin makapapagsik. Magaugyon kita sa ginsiling ni David: “Sa kaagahon papamatia ako sang imo mahigugmaon nga kaayo, kay sa imo nagasalig ako. Sugiri ako sang dalan nga dapat ko laktan.”​—⁠Salmo 143:8.

Si Mary, nga nagalakat sa sulod sang madamong tinuig sa banas ni Jehova, nagsiling: “Kon ginatulok ko ang tinuga ni Jehova, makita ko indi lamang ang masibod nga desinyo kundi ang mahigugmaon man nga personalidad sang Dios. Isa man ini ka sapat, pispis, ukon insekto, ang tagsa may tumalagsahon nga mga kinaiya kag makawiwili gid. Kaanggid man nga kalipay ang resulta sang espirituwal nga mga kamatuoran nga nangin maathag pa sa pagligad sang mga tinuig.”

Paano naton mapadalom ang aton apresasyon? Sing bahin, paagi sa indi pagpasapayan sa ginahimo ni Jehova para sa aton. “Indi mag-untat sa pagpangamuyo,” sulat ni Pablo. “May kaangtanan sa tanan nga butang magpasalamat kamo.”​—⁠1 Tesalonica 5:​17, 18; Salmo 119:62.

Ang personal nga pagtuon nagabulig sa aton nga mapalambo ang pagkamapinasalamaton. Ginpalig-on ni Pablo ang mga Cristiano sa Colosas: “Magpadayon kamo sa paglakat nga nahiusa [kay Cristo Jesus], . . . nga nagaawas sa pagtuo sa pagpasalamat.” (Colosas 2:​6, 7) Ang pagbasa sa Biblia kag ang pagpamalandong sa aton ginabasa nagapabakod sang aton pagtuo kag nagapasuod sa aton sa Awtor sang Biblia. Ang mga bahandi nga yari diri makapalig-on sa aton nga ‘mag-awas sa pagpasalamat.’

Ang pag-alagad kay Jehova kaupod sang aton mga kauturan nagapahapos man sa paglakat. Ginlaragway sang salmista ang iya kaugalingon: “Kaupod ako sang tanan nga nagakahadlok sa imo.” (Salmo 119:63) Lakip sa aton pinakamalipayon nga mga tinion amo ang tion sang aton Cristianong mga asambleya ukon iban pa nga mga okasyon nga kaupod ang aton mga kauturan. Ginakilala naton nga ang aton hamili bug-os kalibutan nga Cristianong pamilya nagluntad bangod kay Jehova kag sang iya mataas nga dalanon.​—⁠Salmo 144:⁠15b.

Dugang pa sa apresasyon, ang pagbatyag sing responsabilidad magapabakod sa aton nga magpadayon sa mataas nga banas ni Jehova.

Paglakat sing Responsable

Ginakilala sang mga nagataklad nga nagabatyag sing responsabilidad nga dapat sila maglakat sing mahalungon agod indi sila magtalang ukon makapalapit sa delikado nga mga pil-as. Gintugutan kita ni Jehova sing makatarunganon nga kahilwayan kag pagkamapahituon. Apang ini nga kahilwayan dapat updan sing pagbatyag sing responsabilidad samtang ginatuman naton ang aton Cristianong mga obligasyon.

Halimbawa, nagasalig si Jehova nga tumanon sing responsable sang iya mga alagad ang ila mga obligasyon. Wala sia magsiling kon ano kadaku nga kusog kag tion ang dapat naton gamiton sa Cristianong mga hilikuton ukon kon pila ang aton iamot nga kuwarta ukon sa iban pa nga paagi. Sa baylo, ang pinamulong ni Pablo sa mga taga-Corinto naaplikar sa aton tanan: “Maghimo ang kada isa suno sa ginpamat-od niya sa iya tagipusuon.”​—⁠2 Corinto 9:⁠7; Hebreo 13:​15, 16.

Lakip sa responsable nga Cristianong paghatag ang pagpaambit sang maayong balita sa iban. Ginapakita man naton nga responsable kita paagi sa pag-amot sa bug-os kalibutan nga hilikuton sa Ginharian. Ginpaathag ni Gerhardt, isa ka gulang, nga gindugangan nila sang iya asawa ang ila mga amot sa tapos nga maduaw ang isa ka asambleya sa Nasidlangan nga Europa. “Nakita namon nga ang aton mga kauturan didto imol gid sa materyal; apang ginaapresyar gid nila sing daku ang aton mga literatura sa Biblia,” siling niya, “gani namat-od kami nga ihatag gid namon ang masarangan namon nga suporta sa aton imol nga mga kauturan sa iban nga mga pungsod.”

Padayon Kita nga Nagabatas

Kinahanglanon gid ang kabakod kon nagataklad sa kabukiran. Nagaehersisyo ang mga nagataklad sa masarangan nila, kag madamo ang nagapanglakaton sing malip-ot agod mangin handa sa mas malawig nga pagtaklad. Sing kaanggid, ginrekomendar ni Pablo nga mangin masako kita sa teokratikong mga hilikuton agod mahuptan ang aton espirituwal nga kapagros. Ang mga luyag “maglakat sing takus kay Jehova” kag ‘himuon nga gamhanan,’ siling ni Pablo, dapat ‘padayon nga nagapamunga sa tagsa ka maayong buhat.’​—⁠Colosas 1:​10, 11.

Ang motibasyon nagaapektar sa pagbatas sang nagataklad. Paano? May makapapagsik nga epekto ang pagsentro sang igtalupangod sa isa ka maathag nga tulumuron, subong sang malayo nga bukid. Kag kon makalambot ang nagataklad sa talalupangdon nga mga duog sa alagyan, matakus niya ang iya na nataklad padulong sa iya katapusan nga tulumuron. Kon balikdon niya ang iya na nataklad, nalipay gid sia.

Sing kaanggid, ang aton paglaum nga walay katapusan nga kabuhi nagasakdag kag nagapahulag sa aton. (Roma 12:12) Subong man, samtang nagalakat kita sa mga dalanon ni Jehova, makabatyag kita nga may hinimuan paagi sa pagpahamtang kag paglab-ot sang Cristianong mga tulumuron. Kag daku gid ang aton kalipay kon ginahinumdom naton ang mga tinuig sang matutom nga pag-alagad ukon makita ang mga pagbag-o sa aton personalidad!​—⁠Salmo 16:11.

Agod indi madali malapyo sa malayo nga distansia, nagalakat ang mga manugtaklad sa dalayon, alangay nga kadasigon. Sing kaanggid, ang maayong rutina nga nagalakip sang regular nga mga miting kag pag-alagad sa latagon magabulig sa aton nga magpadayon sa aton tulumuron. Gani, ginpalig-on ni Pablo ang iya mga masigka-Cristiano: “Magpadayon kita sa paglakat sing mahim-ong sa sini gihapon nga kinabatasan.”​—⁠Filipos 3:16.

Sa pagkamatuod, wala kita nagaisahanon sa paglakat sa banas ni Jehova. “Binagbinagon naton kon paano naton mapalig-on ang isa kag isa padulong sa gugma kag maayong mga buhat,” sulat ni Pablo. (Hebreo 10:​24, New International Version) Ang maayong kaupdanan sa espirituwal magabulig sa aton nga makapadayon samtang nagalakat kita kaupod sang aton mga masigkatumuluo.​—⁠Hulubaton 13:20.

Sa katapusan, kag pinakaimportante, indi gid naton pagkalimtan ang gahom nga ginahatag ni Jehova. Ang mga nagasandig sa kusog ni Jehova ‘magalakat sa kusog pa kusog.’ (Salmo 84:​5, 7) Bisan pa kon kaisa dapat naton atubangon ang mabudlay nga mga kahimtangan, sa 7bulig ni Jehova masarangan naton ini.