Pagpanaksi sing Di-pormal sa Nagahambal sing Ingles nga mga Tawo sa Mexico

NAGAHIMULOS sang kahigayunan samtang nagahulat sa iya mga kaupod sa paglakbay sa Atenas, si apostol Pablo nagpanaksi sing di-pormal. Ang Biblia nagreport: “Nagpakigbais sia . . . sa mga masugata niya sa balaligyaan sa adlaw-adlaw.” (Binuhatan 17:17) Sa iya pagpanglakaton gikan sa Judea pakadto sa Galilea, nagpanaksi si Jesus sing di-pormal sa isa ka Samaritana sa tupad sang bubon. (Juan 4:3-26) Ginahimuslan mo bala ang tanan nga kahigayunan nga ibantala ang maayong balita sang Ginharian sang Dios?

Maayo gid panaksihan sing di-pormal ang nagahambal sing Ingles nga mga tawo sa Mexico. Ang mga turista nagapamasyar sa mga resort, may yara pirme bag-o nga mga estudyante sa unibersidad, kag ang mga dumuluong nga nagpuyo na sa Mexico pirme nagakadto sa mga parke kag mga restawran. Madamo nga mga Saksi ni Jehova nga makahibalo mag-Ingles ang nangin eksperto sa pagpakighambal sa ila. Ang matuod, alisto sila pirme sa pagpakighambal kay bisan sin-o nga daw dumuluong tan-awon ukon nagahambal sing Ingles. Tan-awon naton kon paano nila ini ginahimo.

Ang mga Saksi halin sa iban nga pungsod nga nagapanaksi sa mga tawo nga nagahambal sing Ingles masami nga nagapakilala lamang sang ila kaugalingon sa mga dumuluong kag nagapamangkot kon tagadiin sila. Nagadul-ong ini sa pamangkot kon ano ang ginahimo sang Saksi sa Mexico kag nagahatag ini sa iya sing kahigayunan nga mapaambit ang Cristianong mga pagpati. Halimbawa, nasapwan ni Gloria, nga nagaalagad kon diin daku ang kinahanglanon sa nagahambal sing Ingles nga mga tawo sa Oaxaca, nga mas mahapos makasugod sing paghambalanay sa sini nga paagi. Samtang nagapauli halin sa plasa diin nagpanaksi sia sing di-pormal, ginpalapitan si Gloria sang taga-Inglaterra nga mag-asawa. Ang babayi nagtuaw: “Daw indi gid ako magpati nga may itom nga babayi nga nagalakat sa dalan sang Oaxaca!” Sa baylo nga maakig, nagkadlaw si Gloria, kag nagsugod sila sa paghambalanay kon ngaa yara sia sa Mexico. Gin-agda si Gloria sang babayi sa ila balay agod mangape. Pagkatapos magsugtanay kon san-o sia mabalik, nagtanyag si Gloria sang Lalantawan kag Magmata! nga mga magasin, apang ginpangindian ini sang babayi, nagasiling nga ateista sia. Si Gloria nagsabat nga nalipay sia nga makighambal sa mga ateista kag luyag niya mahibaluan kon ano ang iya opinyon sa artikulo nga “Mga Duog Sang Pagsimba​—⁠Kinahanglan Bala Naton Ini?” Ginbaton ini sang babayi, nga nagasiling: “Kon makumbinsi mo ako nga may Dios, makatilingala gid ini.” Ginsundan ini sang pila pa ka paghambalanay samtang nagapangape. Sang ulihi nagpauli ang mag-asawa sa Inglaterra, apang nagpadayon ang paghambalanay paagi sa E-mail.

Nakapakighambal man si Gloria kay Saron, isa ka estudyante halin sa Washington, D.C., nga yara sa Oaxaca bangod nagboluntaryo sia upod sa tumandok nga mga babayi agod matapos ang iya master’s degree. Pagkatapos dayawon si Saron sa iya mga panikasog, ginpaathag ni Gloria kon ngaa yara sia sa Mexico. Nagdul-ong ini sa maayo nga paghambalanay tuhoy sa Biblia kag kon ano ang himuon sang Dios indi lamang para sa mga imol kundi para sa tanan. Si Saron nagkomento nga naham-ot sia kay samtang wala gid sia makapakighambal sa mga Saksi ni Jehova sa Estados Unidos, isa sang una nga mga tawo nga iya nasugilanon sa Mexico isa sa mga Saksi ni Jehova! Nagtuon sa Biblia si Saron kag nagtambong dayon sa Cristianong mga miting.

Madamo nga dumuluong ang nagpuyo sa mga baybayon sang Mexico bangod luyag nila ang tulad-paraiso nga kahimtangan. Gingamit ni Laurel ini nga handum sa pagsugod sing paghambalanay sa Acapulco, nagapamangkot sa mga tawo kon bala ang Acapulco daw mas paraiso sangsa duog nga ila ginhalinan kag kon ano ang ila naluyagan sa sini. Ginpaathag niya dayon nga sa dili madugay ang bug-os nga duta mangin isa gid ka matuod nga paraiso. Ining pamaagi nga gingamit niya sa isa ka taga-Canada nga babayi nga iya nasugilanon sa opisina sang beterinaryo nagdul-ong sa pagtuon sa Biblia. Mangin epektibo man bala ini nga introduksion sa inyo duog?

Sa mga Kalye kag mga Plasa

Masami nga masugdan ang paghambalanay sa mga kalye kag mga plasa paagi sa pagpamangkot: “Kahibalo ka mag-Iningles?” Madamo nga mga Mexicano ang makahibalo mag-Ingles bangod sang ila propesyon ukon bangod nagpuyo sila anay sa Estados Unidos.

Ginpalapitan sang mag-asawa nga Saksi ang isa ka naka-wheelchair nga tigulang nga babayi nga ginatulod sang isa ka nars. Ginpamangkot nila ang tigulang kon makahibalo sia mag-Iningles. Nagsabat sia nga makahibalo sia mag-Ingles bangod madugay sia nga nagpuyo sa Estados Unidos. Ginbaton niya Ang Lalantawan kag Magmata!, nga wala pa gid niya mabasa, kag ginhatag niya ang iya ngalan, nga Consuelo, kag ang iya direksion. Sang ginkadtuan ang direksion pagligad sang apat ka adlaw, natukiban nila nga nursing home gali ini nga ginapalakat sang Katoliko nga mga madre. Sang primero mabudlay makontak si Consuelo bangod wala salig sa ila ang mga madre kag nagsiling nga indi sila maabiabi ni Consuelo. Ginpangabay sang mag-asawa ang mga madre nga pahibaluon si Consuelo nga yara sila kag nga luyag nila tamyawon sia. Ginpasulod dayon sila ni Consuelo. Sugod sadto, nagtuon sing regular sa Biblia ining 86-anyos nga babayi walay sapayan sang negatibo nga mga komento sang mga madre. Nagtambong man sia sa Cristianong mga miting.

Ang Hulubaton 1:20 nagasiling: “Ang kaalam nagasinggit sing mabaskog sa dalan; ginamitlang niya ang iya tingog sa masangkad nga mga duog.” Talupangda kon paano ini natabo sa plasa sang San Miguel de Allende. Isa ka aga, ginpalapitan ni Ralph ang isa ka tawo nga singkwentahon ang edad nga nagapungko sa bangko. Nakibot gid ang tawo nga gintanyagan sia sang Ang Lalantawan kag Magmata! kag ginsugid sang tawo ang iya kabuhi kay Ralph.

Beterano sia sa Vietnam apang nangin nerbioso sia bangod sang tuman kadamo nga kamatay samtang yara sia sa militar. Ginsaylo sia halin sa patag-awayan pakadto sa kampo. Didto, gin-asayn sia nga maghugas sang mga lawas sang patay nga mga soldado nga dalal-on sa Estados Unidos. Karon, 30 ka tuig sang ulihi, pirme gihapon sia nagadamgo sing makasiligni kag ginahadlukan. Sina nga aga, samtang nagapungko sa plasa, mahipos sia nga nangamuyo sing bulig.

Ginbaton sang beterano ang literatura subong man ang imbitasyon sa pagtambong sa Kingdom Hall. Pagkatapos sang miting, nagsiling sia nga sa sulod sang duha ka oras nga yara sia sa Kingdom Hall, karon pa lang niya naeksperiensiahan ang kalinungan paglipas sang 30 ka tuig. Pila lang ka semana sa San Miguel de Allende ini nga tawo, apang nagtuon sia sing pila ka beses sa Biblia kag nakatambong sang tanan nga miting tubtob nagpauli sia. Ginhimo ang mga kahimusan agod makapadayon sia sa pagtuon.

Pagpanaksi Sing Di-pormal sa Trabaho kag sa Eskwelahan

Nagapakilala ka bala nga isa sa mga Saksi ni Jehova sa imo ginatrabahuan? Amo sini ang ginhimo ni Adrián, nga nagapaarkila sing balakasyunan nga mga apartment sa Cape San Lucas. Subong resulta, ang iya kaupod sa trabaho nga si Judy nagsaysay: “Sang tatlo ka tuig lang nga nagligad, kon hambalan mo ako nga mangin Saksi ni Jehova ako, mahimo silingan ko ikaw, ‘Indi gid ina matabo!’ Apang namat-od ako nga luyag ko basahon ang Biblia. Nahunahuna ko, ‘Paano ini mangin mabudlay kay mahuyugon gid ako magbasa?’ Ambot kon natapos ko gid man ang anom ka pahina sang narealisar ko nga kinahanglan ko ang bulig. Ang napensaran ko lang nga makabulig amo ang akon kaupod sa trabaho nga si Adrián. Luyag ko sia masugilanon bangod sia lang ang disente nga tawo sa trabaho.” Nagtanyag dayon si Adrián nga maduaw sila sang iya nobya, nga si Katie, kag ginsabat ang tanan nga pamangkot ni Judy. Si Katie nagdumala sang pagtuon sing Biblia upod sa iya, kag wala magdugay nangin bawtismado nga Saksi si Judy.

Kamusta naman ang pagpanaksi sing di-pormal sa eskwelahan? Duha ka Saksi nga nagaeskwela sing Espanyol sa unibersidad ang nag-absent isa ka adlaw agod magtambong sa Cristianong asambleya. Sang nagbalik sila sa klase, ginpangabay sila nga isugid ang ila ginhimo sa pulong nga Espanyol. Ginhimuslan nila ang kahigayunan nga makapanaksi tubtob sa ila masarangan sa Espanyol. Ang maestra, si Silvia, interesado gid sa tagna sang Biblia. Nagtuon sia sa Biblia sa Ingles kag isa na karon ka manugbantala sang maayong balita. Ang pila ka katapo sang iya pamilya nagatuon man. Si Silvia nagsiling: “Nasapwan ko na ang akon madugay na nga ginapangita sa akon bug-os nga kabuhi.” Huo, ang di-pormal nga pagpanaksi makapatubas sing maayong bunga.

Paggamit Sing Iban nga Kahigayunan

Ang pagkamaabiabihon mahimo magresulta sa pagpanaksi. Natabo ini kanday Jim kag Gail, nga nagaalagad sa San Carlos, Sonora. Ang isa ka babayi nga nagapadayandayan sang iya mga ido kon alas 6:00 sang aga nagdulog agod dayawon ang ila ugsaran. Gin-agda sia nanday Jim kag Gail nga mangape. Sa nahauna nga tion sa sulod sang 60 ka tuig, nabatian niya ang tuhoy kay Jehova kag ang paglaum nga kabuhi nga wala sing katapusan. Nasugdan ang isa ka pagtuon sa Biblia.

Mainayuhon man si Adrienne sa mga estranghero. Nagakaon sia sa restawran sa Cancún sang ginpalapitan sia sang isa ka bata nga lalaki kag ginpamangkot kon taga-Canada sia. Sang nagsabat sia sing huo, ginpaathag sang bata nga ginabuligan nila sang iya iloy ang iya manghod nga babayi sa paghimo sing report sa eskwelahan tuhoy sa mga taga-Canada. Nagpalapit ang iloy, nga makahibalo mag-Iningles. Pagkatapos nga masabat sing mapailubon ang mga pamangkot sang iloy tuhoy sa mga taga-Canada, si Adrienne nagsiling: “Apang may importante gid nga rason kon ngaa halin sa Canada nagkadto ako diri​—⁠agod buligan ang mga tawo nga makatuon tuhoy sa Biblia. Interesado ka bala sa sini?” Nagsabat ang babayi nga interesado sia. Napulo na ka tuig nga naghalin sia sa iya relihion kag nagtilaw nga tun-an ang Biblia sing kinaugalingon. Ginhatag niya kay Adrienne ang iya direksion kag numero sang telepono, kag nasugdan ang isa ka mabungahon nga pagtuon sa Biblia.

“Ihaboy ang Imo Tinapay sa mga Tubig”

Ang paghambal tuhoy sa kamatuoran sa Biblia sa tagsa ka okasyon masami nga nagaresulta sa pagpanaksi sa mga tawo nga halos wala sing kahigayunan nga makabati sang mensahe sang Ginharian. Sa isa ka masako nga restawran sa banwa nga pantalan sang Zihuatanejo, gin-agda sang Saksi ang duha ka dumuluong nga magpungko sa iya lamesa, kay puno ang restawran. Nagapanakayon ining mag-asawa sa lainlain nga duog sa sulod sang pito ka tuig. Ginpabutyag nila ang ila negatibo nga pagtamod sa mga Saksi ni Jehova. Pagkatapos sang paghambalanay sa restawran, ginduaw sang Saksi ang mag-asawa sa ila ginasakyan nga barko kag gin-agda sila sa iya puluy-an. Ginbaton nila ang kapin sa 20 ka magasin kag 5 ka libro kag nagsaad nga ila pangitaon ang mga Saksi sa masunod nila nga madungkaan.

Natalupangdan nanday Jeff kag Deb ang isa ka pamilya upod ang ila matahom nga lapsag nga babayi sa kalan-an sang daku nga balaligyaan sa Cancún. Sang nagkomento sila tuhoy sa lapsag, gin-agda sila sang mga ginikanan sang lapsag nga magkaon sang pizza. Taga-India gali ini nga pamilya. Wala pa gid sila makabati tuhoy sa mga Saksi ni Jehova, kag wala pa gid sila makakita sang aton literatura. Dala nila ang pila ka publikasyon sang mga Saksi sang magbiya sila sa balaligyaan.

Kaanggid man ang natabo sa isa ka isla malapit sa baybayon sang Yucatán. Isa ka bag-ong kasal nga Intsik ang naglihug kay Jeff nga retratuhan sila, nga ginhimo man niya. Nahibal-an niya sang ulihi nga bisan nagpuyo ining mag-asawa sa Estados Unidos sa sulod sang 12 ka tuig, wala pa gid sila nakakita ukon nakabati sa mga Saksi ni Jehova! Nasugdan ang isa ka makalilipay nga paghambalanay. Ginpalig-on sila ni Jeff nga pangitaon ang mga Saksi kon magpauli na sila.

Mahimo nga may isa ka pinasahi nga hitabo sa inyo lugar nga posible makapanaksi sing di-pormal. Sang nagduaw ang presidente sang Estados Unidos sa presidente sang Mexico sa iya rantsuhan malapit sa Guanajuato, madamo nga reporter gikan sa bug-os nga kalibutan ang nagkari agod ibalita ang hitabo. Namat-od ang isa ka pamilya nga Saksi nga himuslan ining kahigayunan nga makapanaksi sa Ingles. Maayo ang resulta. Halimbawa, ang isa ka reporter nagkadto kag nagbalita na tuhoy sa pila ka inaway, subong sang natabo sa Kosovo kag Kuwait. Ang iya kaupod sa trabaho napatay samtang iya ginahamil-ay pagkatapos nga maluthang sang sniper. Sang makabati tuhoy sa pagkabanhaw, nagahibi nga ginpasalamatan sang reporter ang Dios bangod ginpahibalo sia nga may katuyuan ang kabuhi. Nagsiling sia nga bisan indi na niya makita liwat ang mag-asawa nga Saksi, indi gid niya malipatan ining maayong balita gikan sa Biblia.

Ining eksperiensia nagapakita nga indi pirme mahibaluan ang resulta sining pagpanaksi. Apang, ang maalam nga si Hari Solomon nagsiling: “Ihaboy ang imo tinapay sa mga tubig, kag makita mo ini sa tapos ang madamo nga adlaw.” Nagsiling man sia: “Sa kaagahon isab-ug ang imo binhi, kag sa kahapunon dili pagpunggi ang imo kamot; kay wala ka makahibalo kon diin ang magauswag, kon ini ukon ina, ukon kon sila nga duha mangin-alangay nga maayo.” (Manugwali 11:​1, 6) Huo, makugi nga “ihaboy ang imo tinapay” sa madamo nga tubig kag “isab-ug ang imo binhi” sing bugana, subong sang ginhimo ni Pablo kag ni Jesus kag subong man sang modernong-adlaw nga mga Saksi sa nagahambal sing Ingles nga mga tawo sa Mexico.