Paglaum Walay Sapayan sang Kabudlayan—Isa ka Asambleya sa “Refugee Camp”

ANG refugee camp sa Kakuma nahamtang sa naaminhan nga bahin sang Kenya, malapit sa dulunan sang Sudan. Nagapuyo diri ang kapin sa 86,000 ka tawo. Hanayak ini, kag ang temperatura nagalab-ot kon adlaw sa 50°C. Lapnag ang kasingki sa mga refugee camp. Para sa madamo, ang kampo isa ka lugar sang kabudlayan. Apang, ang iban nga mga refugee may paglaum.

Lakip sa mga refugee amo ang pila ka Saksi ni Jehova, nga makugi nga nagabantala sing maayong balita sang Ginharian. Bahin sila sang isa ka gamay nga kongregasyon sa Lodwar, nga 120 kilometros sa bagatnan sang kampo. Walo ka oras ang biyahe sa salakyan pakadto sa pinakamalapit nga kongregasyon.

Bangod indi makaguagua sa kampo ang mga refugee, madamo ang indi makatambong sa mga asambleya kag mga kombension sang mga Saksi ni Jehova. Gani, ginhimo ang mga kahimusan agod hiwaton ang isa ka adlaw sang pinasahi nga asambleya sa sulod sang kampo.

Pagbiyahe sa Aminhan

Agod suportahan ang asambleya kag walay sapayan sang mabudlay nga pagbiyahe, nagboluntaryo ang 15 ka taga-Eldoret nga mga Saksi, isa ka banwa nga 480 kilometros sa bagatnan sang kampo, sa pagkadto sa hanayak nga rehiyon sang Lodwar, upod sa isa ka estudyante sang Biblia nga nagpagamit sang iya minibus kag tsuper. Handum gid nila nga palig-unon kag pabakuron ang ila mga kauturan.

Nagsugod ang biyahe sa isa ka mabugnaw nga kaagahon sa kabukiran sang nakatundan nga Kenya. Ang batsihon nga dalan nagtaklaron sa kaumhan kag kagulangan antes magdulhog sa mainit nga klima sa katamnan sa desyerto. Ang pinanong nga mga kanding kag mga kamelyo nagahalab sa kigang nga duta. Ang mga taga-tribo nagalakat nga nagasuksok sing tradisyunal nga mga panapton, nga ang madamo may dala nga batuta, baslay, kag pana. Pagkatapos sang 11 ka oras nga biyahe, ang mga Saksi nag-abot sa Lodwar, nga isa ka mainit kag yab-ukon nga komunidad nga may halos 20,000 ka pumuluyo. Pagkatapos maabiabi sing mainit sang ila Saksi nga mga tagbalay, ang mga nagbiyahe nagtulog agod makapahuway kag agod makahanda para sa hilikuton sa bug-os nga talipuspusan sang semana.

Pagkaaga, ang mga bisita naglagaw sa pila ka lugar. Ang una nga ginlagawan nila amo ang Lake Turkana, ang pinakadaku nga linaw sa Kenya. Napalibutan ini sang kinilometro nga katamnan sa desyerto kag makita man diri ang pinakamadamo nga mga buaya sa kalibutan. Ang may alkaline nga tubig sini nagabulig nga mabuhi ang pila ka tawo nga nagapuyo sa pangpang. Pagkagab-i, ang mga bisita nagtambong sa Teokratikong Eskwelahan Para sa Ministeryo kag Miting sa Serbisyo upod sa lokal nga kongregasyon. May matahom sila nga Kingdom Hall, nga ginpatindog sang 2003 paagi sa programa sa konstruksion sang mga Saksi para sa mga pungsod nga may limitado lang nga kuarta.

Ang Adlaw sang Pinasahi nga Asambleya

Ang Domingo gintigana para sa adlaw sang pinasahi nga asambleya. Ang kongregasyon sa Lodwar kag ang bisita nga mga kauturan, ginhatagan sing permiso sa pagsulod sa kampo sang alas 8:00 sa aga, gani, nalangkag gid ang mga Saksi sa pagsugod sing temprano. Ang dalan nagalikoliko sa kigang nga rehiyon padulong sa dulunan sang Sudan. Mataas ang mga kabukiran. Ang minuro sang Kakuma kitaon sa malayo. Nag-ulan kag ang indi sementado nga dalan padulong sa kampo nagdanaw. Ang kalabanan nga kabalayan human sa tisa nga lunang nga may atop nga sin ukon trapal. Ang grupo-grupo nga mga taga-Etiopia, taga-Somalia, taga-Sudan, kag ang iban pa masigpuyo sa ila kaugalingon nga mga duog. Ang mga nagbiyahe mapagsik nga gintamyaw sang mga refugee.

Ang asambleya ginhiwat sa training center. Ginlaragway sang mga drowing sa dingding ang makakulugmat nga pangabuhi sa refugee camp, apang ang panimuot sa tilipunan sadto nga adlaw nagpabutyag sing paglaum. Ang tagsa ka pamulongpulong ginhatag sa Ingles kag Swahili. Ang iban nga mga humalambal nagpamulongpulong sa duha ka lenguahe. Ang isa ka utod nga refugee halin sa Sudan naghatag sang nagabukas nga pamulongpulong, “Pag-usisa sa Aton Malaragwayon nga Tagipusuon.” Ang iban nga mga bahin ginhatag sang nagbisita nga mga gulang.

Ang pinasahi gid nga bahin sa tagsa ka asambleya amo ang bawtismo. Pagkatapos sang diskurso sa bawtismo, natuon ang tanan nga mata sa isa ka kandidato sang nagtindog sia. Si Gilbert nagpalagyo upod sa iya amay gikan sa ila tumandok nga lugar sa tion sang pagpapas sa rasa sang 1994. Sang primero, naglaum sila nga mangin maayo ang ila kahimtangan sa Burundi, apang narealisar nila sang ulihi nga yara gihapon sila sa katalagman. Si Gilbert nagpalagyo padulong sa Zaire, nian padulong sa Tanzania​​​—kon kaisa nagpanago sa kagulangan​​​—kag sang ulihi padulong sa Kenya. Nagtulo ang luha sang madamo sang gin-abiabi sia sang humalambal subong isa ka utod sa kongregasyon. Nagtindog sa atubangan sang gamay nga grupo sang 95 ka tawo, maathag kag puno sing pagtuo nga ginsabat ni Gilbert sing “Ndiyo!”​​​—“Huo!” sa Swahili​​​—ang duha ka pamangkot nga ginpamangkot sa iya sang humalambal. Sia kag ang pila pa ka utod manumano nga nagkutkot sing gamay nga buho kag ginhapinan ini sing trapal nga atop anay sang iya puluy-an sa kampo. Bilang pamatuod sang iya kalangkag nga mabawtismuhan, isahanon sia nga nagsag-ub gamit ang isa ka balde sadto nga aga kag ginpuno ang pool nga gingamit sa bawtismo!

Ang isa sa talalupangdon nga mga punto sa sesyon sa hapon amo ang pagsugid sing mga eksperiensia tuhoy sa pinasahi nga kahimtangan sang mga refugee nga Saksi. Ginsugid sang isa ka utod nga lalaki kon paano niya nasugilanon ang isa ka tawo nga nagapahunayhunay sa idalom sang kahoy.

“Indi bala delikado sa tanan nga tion ang magpungko sa idalom sang kahoy?”

“Indi gid man,” sabat sang tawo. Dayon nagsiling pa sia: “Magluwas lang kon gab-i.”

Ginbasa sa iya sang utod ang Miqueas 4:​3, 4: “Magalingkod sila, ang tagsatagsa sa idalom sang iya puno sang ubas kag sa idalom sang iya kahoy nga igos, kag wala sing magapakurog sa ila.” “Ti,” paathag niya, “sa bag-ong kalibutan sang Dios, indi na ini delikado sa tanan nga tion.” Ang tawo nagbaton sing isa ka bulig sa pagtuon sa Biblia.

Ang isa ka utod nga babayi nga naglakbay pakadto sa Kakuma bag-o lang namatyan sing tatlo ka suod nga miembro sang pamilya. Nagsiling sia tuhoy sa mga kauturan sa kampo: “Mabudlay gid katama ang kahimtangan diri; apang nahuptan nila nga mabakod ang ila pagtuo. Nagapuyo sila sa di-makalilipay nga duog, apang malipayon sila nga nagaalagad kay Jehova. May mahidaiton nga kaangtanan sila sa Dios. Napalig-on ako nga padayon nga makighidait kag mag-alagad kay Jehova. Wala ako sing dapat ireklamo!”

Madasig nga natapos ang adlaw sang asambleya. Sa katapusan nga pamulongpulong, ginsambit sang humalambal nga may mga tiglawas gikan sa walo ka pungsod nga nagtambong. Ang isa sa mga Saksi nga refugee nagkomento nga ini nga asambleya pamatuod sang paghiusa kag gugma sa tunga sang mga Saksi ni Jehova sa nabahinbahin nga kalibutan. May yara gid sila matuod nga Cristianong paghiliutod.—Juan 13:35.

[Kahon/Retrato sa pahina 25]

ANG NADULA NGA MGA BATA NGA LALAKI SANG SUDAN

Kutob sang nagsugod ang inaway sibil sa Sudan sang 1983, lima ka milyon ka tawo ang nadulaan sing puluy-an. Lakip sa ila amo ang mga 26,000 ka bata, nga napahilayo sa ila mga pamilya. Linibo sa ila ang nagdangop sa mga refugee camp sa Etiopia, diin nagtener sila sing mga tatlo ka tuig. Bangod napilitan sila sa pagsaylo liwat, naglakat sila sing isa ka tuig kag naglabay sa Sudan pakadto sa naaminhan nga Kenya, kag naagihan nila ang kapintas sang mga soldado, mga bandido, mga balatian, kag talunon nga mga sapat. Katunga lang sang mga bata ang nakalampuwas sa sining mabudlay nga mga paglakbay, kag sang ulihi sila ang nagahuman sang daku nga bahin sang kampo sa Kakuma. Gintawag sila sang mga ahensia nga nagabulig sa ila subong ang nadula nga mga bata nga lalaki sang Sudan.

Ang refugee camp sa Kakuma isa na karon ka puluy-an sang mga refugee halin sa mga pungsod sang Sudan, Somalia, Ethiopia, kag iban pa nga mga pungsod. Sa pag-abot sa kampo, ang isa ka refugee ginahatagan sing mga materyales agod makapatindog sing isa ka balay kag sing trapal para pang-atop. Makaduha sa isa ka bulan, ang tagsa ka refugee ginahatagan sing mga anom ka kilo nga harina, isa ka kilo nga liso sang balatong, mantika kag asin. Ginabaligya sang madamo nga refugee ang iban nila nga rasyon agod ibakal sang iban pa nga mga kinahanglanon.

Ang pila sa sining nadula nga mga bata nga lalaki nahiusa liwat sa ila mga pamilya ukon nagpuyo na sa iban nga mga pungsod. Apang suno sa Office of Refugee Resettlement, “linibo pa ang yara gihapon sa yab-ukon kag langawon nga refugee camp sa Kakuma, diin dapat sila maghimakas sa pagpangita sing pagkaon kag sa pagkuha sing edukasyon.”

[Credit Line]

Courtesy Refugees International

[Mapa sa pahina 23]

(For fully formatted text, see publication)

KENYA

Kampo sa Kakuma

Lake Turkana

Lodwar

Eldoret

Nairobi

[Retrato sa pahina 23]

Ang kahimtangan sa kampo mabudlay gid

[Retrato sa pahina 23]

Ang tubig ginarasyon sa kampo sa Kakuma

[Retrato sa pahina 23]

Ang taga-Kenya nga mga Saksi naglakbay sing mabudlay sa aminhan agod palig-unon ang ila mga kauturan

[Retrato sa pahina 24]

Ginapatpat sang isa ka misyonero ang pamulongpulong sang espesyal payunir sa sini nga lugar

[Retrato sa pahina 24]

“Pool” nga gingamit sa bawtismo

[Credit Line sang retrato sa pahina 23]

Rationing water and Kakuma Refugee Camp: Courtesy Refugees International