Ang Imo Bala mga Plano Nahisuno sa Katuyuan sang Dios?

ANG Clark’s nutcracker isa ka abuabuhon nga pispis nga nagakanta, makit-an ini sa mga kagulangan sa nakatundan sang Aminhan nga Amerika. Ini nga pispis nagatipon kag nagalubong sang halos 33,000 ka liso kada tuig sa mga 2,500 ka nagkalainlain nga mga lugar para sa mga binulan sang tuman nga tigtulugnaw. Matuod gid nga ini nga pispis “lakas kaalam” kon paano ini nagatigana sang pagkaon para sa palaabuton.​—Hulubaton 30:24.

Mas tumalagsahon pa gid ang ikasarang sang mga tawo. Sa tanan nga tinuga ni Jehova diri sa duta, indi matupungan ang ikasarang sang tawo nga makatuon sa ila mga inagihan kag gamiton ini nga mag-impluwensia sa ila mga plano sa palaabuton. Natalupangdan sang maalam nga si Hari Solomon nga “may madamu nga mga pahito sa tagiposoon sang tawo.”​—Hulubaton 19:21.

Bisan amo sina ang kahimtangan, ang mga tawo sa kabilugan daw wala na sing mahimo kundi nagabase na lang sang ila mga plano sa mga haumhaum sa palaabuton. Halimbawa, nagaplano ka sang imo buluhaton sa masunod nga adlaw, nagahaumhaum ka nga ang adlaw magabutlak kag buhi ka pa. Ang una mo nga ginahaumhaum may basihan; apang ang ikaduha indi ka sigurado. Sa pagkamatuod, ang manunulat sang Biblia nga si Santiago nagsiling: “Wala kamo makahibalo kon mangin ano ang inyo kabuhi buas.”​—Santiago 4:13, 14.

Wala si Jehova sing amo sina nga mga limitasyon. Nakahibalo sia “sang katapusan kutub sa ginsuguran.” Walay duhaduha nga kon ano man ang iya ginpahayag nga katuyuan, matuman gid ini. “Ang akon tinutuyo magapadayon,” nagsiling siya, “kag himoon ko ang tanan ko nga luyag.” (Isaias 46:10) Ano karon ang matabo kon ang mga plano sang mga tawo wala nahisuno sa katuyuan sang Dios?

Kon ang mga Plano sang Tawo Wala Nahisuno sa Katuyuan sang Dios

Mga 4,000 ka tuig na ang nagligad, nagplano ang mga manugpatindog sang Torre sang Babel nga papuy-on lamang sa isa ka duog ang katawhan. “Kari,” siling nila. “Magtukud kita sing isa ka banwa, kag isa ka torre nga ang iya ukbung maglambut sa mga langit, kag maghimo kita sa aton sing ngalan, basi mag-alaplaag kita sa bug-os nga kadaygan sang duta.”​—Genesis 11:4.

Apang, indi amo sina ang katuyuan sang Dios para sa duta. Ginsugo niya sanday Noe kag ang iya kabataan: “Magmabungahon kag magbuad, kag magtugub sang duta.” (Genesis 9:1) Ano ang ginhimo sang Dios sa plano sang mga rebelioso nga katawhan sang Babel? Gingumon niya ang ila mga lenguahe agod nga indi sila maghangpanay. Ano ang resulta? “Gani ginpaaplaag sila sang GINOO gikan didto sa kadaygan sang bug-os nga duta.” (Genesis 11:5-8) Ang mga manugpatindog sang Babel napilitan nga batunon ang isa ka importante nga leksion. Kon ang mga plano sang tawo wala nahisanto sa katuyuan sang Dios, “ang laygay sang GINOO magapadayon.” (Hulubaton 19:21) Ginatugutan mo bala ining mga leksion nga mag-impluwensia sa imo kabuhi?

Ang Kabuangan sang Manggaranon nga Tawo

Ayhan, wala ka man sing plano nga magtukod sang torre, apang madamo sa karon ang nagaplano nga magtipon sing madamo nga kuarta sa bangko kag sang materyal nga mga pagkabutang agod mangin matawhay ang ila pangabuhi sa tion nga magretiro na sila. Natural lamang nga magkalipay ang isa sa iya mga pinangabudlayan. Nagsulat si Solomon: “Ang tagsa ka tawo man magkaon kag mag-inum, kag magpangalipay sing kaayohan sa bug-os niya nga kinabudlayan nga amo ang hatag sang Dios.”​—Manugwali 3:13.

May salabton kita kay Jehova kon paano naton ginagamit ang resulta sang aton pinangabudlayan. Sang nagligad nga mga 2,000 ka tuig, ginpadaku ni Jesus ini nga punto sa iya mga disipulo paagi sa isa ka ilustrasyon. Nagsiling sia: “Ang duta sang isa ka manggaranon nga tawo nagapatubas sing maayo. Bangod sini nagpangatarungan sia sa iya kaugalingon, nga nagasiling, ‘Ano ang himuon ko, karon nga wala na ako sing tipunan sang akon patubas?’ Gani nagsiling sia, ‘Amo ini ang himuon ko: Gub-on ko ang akon mga tambubo kag magpatindog sang dalagku pa, kag didto ko tipunon ang tanan ko nga uyas kag ang tanan ko nga maayong butang; kag isiling ko sa akon kalag: “Kalag, may madamo ka nga maayong butang nga natigana para sa madamo nga tuig; magpatawhay ka, magkaon, mag-inom, kag magkasadya.”’” (Lucas 12:16-19) Daw makatarunganon man ang plano sang manggaranon nga tawo, indi bala? Kaangay sang pispis nga Clark’s nutcracker nga ginsambit kaina, ang tawo sa ilustrasyon daw nagatigana man sang iya mga kinahanglanon para sa palaabuton.

Apang may sala sa panghunahuna sadto nga tawo. Nagpadayon si Jesus: “Apang ang Dios nagsiling sa iya, ‘Ikaw nga di-makatarunganon, karon nga gab-i pangayuon nila sa imo ang imo kalag. Gani, sin-o ang magapanag-iya sa mga butang nga gintipon mo?’” (Lucas 12:20) Buot bala silingon sini nga wala nagaugyon si Jesus sa ginsiling ni Solomon nga ang pagpangabudlay kag ang maayo nga mga butang nga mahatag sini mga regalo sang Dios? Indi. Ano nian ang luyag ipahangop ni Jesus? “Amo man sina ang nagakatabo,” siling ni Jesus, “sa tawo nga nagatipon sang bahandi para sa iya kaugalingon apang indi manggaranon sa Dios.”​—Lucas 12:21.

Gintudluan ni Jesus ang iya tagpalamati nga luyag ni Jehova nga dumdumon naton Sia kon nagaplano kita. Ang manggaranon nga tawo mahimo kuntani mangin manggaranon sa Dios, kon nagtinguha sia nga pabakuron ang iya kaangtanan sa Dios kag pauswagon ang iya kaalam kag gugma. Ang mga ginpanghambal sang tawo nagapakita nga wala sia sing interes sa sini nga mga butang, ukon bisan sa pagbilin sang iban niya nga mga patubas para sa mga imol agod masaghaw, ukon sa paghatag sing mga halad nga dulot para kay Jehova. Wala niya gintinguhaan ining espirituwal nga mga tulumuron kag di-makagod nga mga buhat nga nahisanto sa kabubut-on sang Dios. Ang iya mga plano nasentro lamang sa iya kaugalingon nga mga handum kag kasulhayan.

Natalupangdan mo bala nga madamo man karon ang may tulumuron sa kabuhi kaangay sang manggaranon nga tawo nga ginlaragway ni Jesus? Manggaranon man kita ukon pigado, madali kita masiod sa materyalistiko nga panghunahuna kon pahanugutan naton ang aton mga kinahanglanon kag mga handum sa kabuhi nga ipahilayo kita sa Dios. Paano ka makapalagyo sa sini nga siod?

Pagplano sing “Normal” nga Kabuhi

Indi pareho sa manggaranon nga tawo sa ilustrasyon ni Jesus, mahimo nga yara ka sa kapigaduhon. Bisan pa amo sina, kon ikaw minyo, walay duhaduha nga plano mo iaman ang mga kinahanglanon sang imo pamilya kag kon mahimo, ang maayo nga edukasyon para sa imo kabataan. Kon di-minyo ka pa, mahimo nagaplano ka nga mangita sing obra ukon magpabilin sa imo ginaubrahan, agod nga indi ka mangin salaguron. Maayo ini nga mga tulumuron.​—2 Tesalonica 3:10-12; 1 Timoteo 5:8.

Apang ang ginakabig nga “normal” nga pagkabuhi subong sang pagtrabaho, pagkaon, kag pag-inom, mahimo magdul-ong sa isa nga magkabuhi nga wala nahisuno sa katuyuan sang Dios. Paano? Si Jesus nagsiling: “Subong sang mga adlaw ni Noe, amo man ang presensia sang Anak sang tawo. Kay subong nga sila sadto nga mga adlaw sa wala pa ang anaw, nagakaon kag nagainom, ang mga lalaki nagapangasawa kag ang mga babayi nagapamana, tubtob sa adlaw nga nagsulod si Noe sa arka; kag wala sila magsapak tubtob nga nag-abot ang anaw kag nag-anod sa ila tanan, mangin amo man ang presensia sang Anak sang tawo.”​—Mateo 24:37-39.

Antes sang Anaw, ang mga tawo sa kabilugan nagkalipay sa ila ginatamod nga normal nga kabuhi. Ang ila problema amo nga “wala sila magsapak” sa tuyo sang Dios nga papason ang malaut nga kalibutan sadto paagi sa bug-os kalibutan nga anaw. Mahimo gid nga naghunahuna sila nga indi normal ang sahi sang pangabuhi ni Noe. Apang sang nag-abot na ang Anaw, napamatud-an nga mas maalam ang sahi sang pangabuhi ni Noe kag sang iya pamilya.

Sa karon, ang tanan nga ebidensia nagapakita nga nagakabuhi na kita sa panahon sang katapusan. (Mateo 24:3-12; 2 Timoteo 3:1-5) Sa dili madugay, “dugmokon . . . kag papason” sang Ginharian sang Dios ang presente nga sistema sang mga butang. (Daniel 2:44) Sa paggahom sina nga Ginharian, ang duta mangin paraiso. Dulaon sang Ginharian ang balatian kag kamatayon. (Isaias 33:24; Bugna 21:3-5) Ang tanan nga tinuga sa duta magakabuhi nga may paghidait kag indi na sila magutman.​—Salmo 72:16; Isaias 11:6-9.

Gintuyo ni Jehova nga antes sia magpanghikot, ang maayong balita sang iya Ginharian “ibantala sa bug-os napuy-an nga duta subong panaksi sa tanan nga pungsod.” (Mateo. 24:14) Nahisuno sa katuyuan sang Dios, mga pito ka milyon ka mga Saksi ni Jehova ang nagabantala sining maayong balita sa 236 ka kadutaan kag kapin sa kuatro sientos ka mga lenguahe.

Para sa mga tawo, ang pagkabuhi sang mga Saksi ni Jehova daw indi kinaandan sa pila ka paagi, ginayubit pa gani nila. (2 Pedro 3:3, 4) Pareho sadtong mga nagkabuhi antes sang Anaw, ang kalabanan sa karon masako man sa paghimo sang kon ano na ang ila naandan. Mahimo nga hangpon nila nga indi balanse ang bisan sin-o nga wala nagasunod sa sahi sang pagkabuhi nga ginatamod sang sosiedad nga normal. Apang, para sa nagatuo sa mga saad sang Dios, ang kabuhi nga nasentro sa pag-alagad sa Dios amo ang matuod nga balanse.

Busa, manggaranon man kita, pigado, ukon ara sa tungatunga, maalamon gid nga pirme usisaon ang aton mga plano sa palaabuton. Samtang ginahimo ini, pamangkuta ang imo kaugalingon, ‘Ang akon bala mga plano nahisuno sa katuyuan sang Dios?’

[Piktyur sa pahina 11]

Kon ang mga plano sang tawo wala nahisuno sa katuyuan sang Dios, ang tinutuyo ni Jehova magapadayon

[Piktyur sa pahina 12]

Sang nagaplano sia, wala gintalupangod sang manggaranon nga tawo sa parabola ni Jesus ang katuyuan sang Dios