Indi Pagdayaa ang Imo Kaugalingon Paagi sa Sayop nga Pangatarungan

“ANO bala ining nahimo mo?” pamangkot sang Dios kay Eva pagkatapos niya makaon ang ginadumilian nga bunga. “Ang man-ug nagdaya sa akon, kag nagkaon ako,” sabat ni Eva. (Gen. 3:13) Si Satanas, “ang orihinal nga man-ug” nga naghaylo sa iya nga maglapas sa Dios, amo karon ang “nagapatalang sa bug-os napuy-an nga duta.”—Bug. 12:9.

Ang rekord sang Genesis nagasugid sa aton nga si Satanas madaya kag nagagamit sia sang kabutigan agod patalangon ang mga wala nagabantay. Si Eva nadala sa iya pagpangdaya. Apang, indi kita dapat maghunahuna nga si Satanas lang ang makadaya sa aton. Ang Biblia nagapaandam man tuhoy sa ‘pagdaya naton sa aton kaugalingon paagi sa butig nga pangatarungan.’—Sant. 1:22.

Mahimo kita maghunahuna nga imposible nga madaya naton ang aton kaugalingon. Apang, ang Dios indi magpaandam sa aton tuhoy sa sini kon wala ini nagakatabo. Gani binagbinagon naton kon paano kita madaya sang aton kaugalingon kag kon anong sayop nga pangatarungan ang mahimo magpatalang sa aton. Mabuligan kita sang halimbawa sa Biblia.

Gindaya Nila ang Ila Kaugalingon

Sang mga 537 B.C.E., si Ciro nga Daku sang Persia nagmando nga ang mga Judiyo nga gintapok sa Babilonia makabalik na sa Jerusalem agod magtukod sang templo. (Esd. 1:1, 2) Pagkasunod nga tuig, ginpasad sang katawhan ang pundasyon sang bag-o nga templo nahisuno sa katuyuan ni Jehova. Ang katawhan nalipay gid kag gindayaw nila si Jehova bangod ginpakamaayo niya ang una nga hugna sining importante nga proyekto. (Esd. 3:8, 10, 11) Apang wala madugay, ginpamatukan ang ila pagtukod amo nga ginluyahan sila sing buot. (Esd. 4:4) Pagligad sang mga 15 ka tuig, gindumilian sang gobierno sang Persia ang tanan nga hilikuton sang pagtukod sa Jerusalem. Nag-abot sa Jerusalem ang mga opisyal sang rehiyon agod ipatuman ang pagdumili kag “ginpauntat [ang mga Judiyo] paagi sa kusug kag gahum.”—Esd. 4:21-24.

Sa idalom sining mabudlay nga kahimtangan, gindaya sang mga Judiyo ang ila kaugalingon paagi sa sayop nga pangatarungan. “Ang tion wala pa mag-abut nga patindugon ang balay sang GINOO,” siling nila sa ila kaugalingon. (Hag. 1:2) Naghunahuna sila nga indi luyag sang Dios nga matukod sa gilayon ang templo. Sa baylo nga mangita sing paagi agod matuman ang iya kabubut-on, ginbiyaan nila ang ila sagrado nga asaynment kag nagkonsentrar sa pagpatahom sang ila mga balay. Gani, prangka sila nga ginpamangkot sang manalagna sang Dios nga si Hageo: “Tion bala ini sa inyo sa pagpuyo sa inyo mga balay nga nakisamihan, samtang ining balay [templo ni Jehova] guba?”—Hag. 1:4.

May matun-an ka bala sa sini? Kon sayop ang aton pagtamod sa gintalana nga tion sang katumanan sang katuyuan sang Dios mahimo madula ang aton pagpabalor sa espirituwal nga mga hilikuton. Mahimo magkonsentrar na lang kita sa aton personal nga mga hilikuton. Sa pag-ilustrar, hunahunaa nga may ginapaabot ka nga mga bisita. Mahimo nga masako ka gid sa paghanda sang ila mga kinahanglanon. Apang, ano abi kon nabalitaan mo nga maatrasar sila, mauntat ka na bala sa paghanda?

Dumduma nga ginbuligan nanday Hageo kag Zacarias ang mga Judiyo nga mahangpan nga luyag ni Jehova nga matapos gilayon ang pagtukod sang templo. “Magpakabakud, tanan kamo nga katawohan sang duta, . . . magpangabudlay,” palig-on ni Hageo. (Hag. 2:4) Kinahanglan nila padayunon ang ila hilikuton, kag magsalig nga buligan sila sang espiritu sang Dios. (Zac. 4:6, 7) Makabulig bala sa aton ining halimbawa nga malikawan ang sayop nga konklusion tuhoy sa adlaw ni Jehova?—1 Cor. 10:11.

Maghunahuna sing Maligdong

Sa ikaduha nga sulat ni apostol Pedro, ginbinagbinag niya kon san-o tukuron ni Jehova ang “bag-ong langit kag bag-ong duta.” (2 Ped. 3:13) Nagsiling sia nga duhaduhaan sang mga mayubiton kon bala ang Dios magapasilabot sa ginahimo sang tawo. Suno sa ila, wala sing matabo kay “ang tanan nga butang nagapadayon nga amo gid gihapon kutob sa ginsuguran sang pagpanuga.” (2 Ped. 3:4) Ginpatalupangod ni Pedro nga sayop ini nga pangatarungan. Nagsulat sia: “Ginapukaw ko paagi sini ang inyo ikasarang sa maathag nga paghunahuna paagi sa isa ka pahanumdom.” Ginsilingan niya ang iya mga masigka-Cristiano nga sayop ang mga mayubiton. Ang Dios nagpasilabot na anay sa tawo paagi sa bug-os kalibutan nga anaw.—2 Ped. 3:1, 5-7.

Kaanggid man sini ang ginlaygay ni Hageo sang 520 B.C.E. sa di-aktibo nga mga Judiyo nga ginluyahan sing buot. Ginpalig-on niya sila: “Patugsilingi [binagbinaga, NW] ang inyo mga dalanon.” (Hag. 1:5) Agod makapamensar sila sing maayo, ginpahanumdom sila ni Hageo tuhoy sa mga katuyuan kag saad sang Dios sa Iya katawhan. (Hag. 1:8; 2:4, 5) Pagkatapos nila mabaton inang pagpalig-on, ginpadayon nila gilayon ang pagtukod bisan pa sang mga pagdumili. Gintinguhaan liwat sang mga kaaway nga pauntaton ang pagtukod, apang wala ini nagmadinalag-on. Sang ulihi, ginbawi ang pagdumili, kag sa sulod sang lima ka tuig natapos ang templo.—Esd. 6:14, 15; Hag. 1:14, 15.

Binagbinagon Naton ang Aton mga Dalanon

Kaangay sa mga Judiyo sang panahon ni Hageo, magaluya man bala ang imo buot kon makaeksperiensia ka sing mga kabudlayan? Kon matabo ina, mahimo madula ang aton kakugi sa pagbantala. Apang ano ang mahimo magpaluya sa aton? Ayhan makaeksperiensia kita sing inhustisya sa sining sistema sang mga butang. Hunahunaa si Habacuc, nga namangkot: “Tubtob san-o ako manawag sa imo agod amligan mo ako sa mga nagapamintas?” (Hab. 1:2, NW) Mahimo madula sang isa ka Cristiano ang pagbatyag sing pagkahilingagawon kag magkonsentrar na lang sa matawhay nga pagkabuhi kon hunahunaon niya nga naatrasar ang adlaw ni Jehova. Amo bala sina ang nagakatabo sa imo? Kon amo sini ang aton pangatarungan, ginadaya naton ang aton kaugalingon. Daw ano ka importante nga binagbinagon naton ang aton mga dalanon kag ‘pukawon ang aton ikasarang sa maathag nga paghunahuna’! Pamangkuton naton ang aton kaugalingon, ‘Dapat bala ako matingala kon ngaa wala pa gihapon nalaglag ining malaut nga kalibutan suno sa akon ginapaabot?’

Ang Tion nga Gintagna sang Biblia

Binagbinaga sing makadali ang ginsiling ni Jesus tuhoy sa katapusan sining sistema sang mga butang. Ang rekord ni Marcos tuhoy sa tagna ni Jesus sa katapusan nga mga adlaw nagapakita nga sulitsulit kita nga ginapalig-on ni Jesus nga magbantay. (Mar. 13:33-37) Kaanggid man sini ang paandam nga mabasa naton sa mga tagna tuhoy sa dakung adlaw ni Jehova nga mahanabo sa Armagedon. (Bug. 16:14-16) Ngaa sulitsulit kita nga ginapaandaman? Bangod samtang nagadugay ang aton paghulat mahimo madula ang aton pagbatyag sing pagkahilingagawon.

Naghatag si Jesus sing ilustrasyon para ipakita kon daw ano ka importante nga magbantay samtang ginahulat ang katapusan sang sistema sang mga butang. Nagsiling sia nga may isa ka tawo nga ginkawatan. Paano niya ini kuntani nalikawan? Paagi sa pagpabilin nga nagamata sa bug-os nga gab-i. Naghinakop si Jesus sa iya ilustrasyon paagi sa paglaygay sa aton: “Pamatud-i man ninyo nga handa kamo, bangod sa oras nga wala ninyo ginahunahuna, magaabot ang Anak sang tawo.”—Mat. 24:43, 44.

Ginapakita sini nga ilustrasyon nga kinahanglan handa kita nga maghulat, bisan pa madugayan ini. Indi kita dapat magkabalaka kon ngaa daw kadugay malaglag ining malaut nga sistema. Indi naton dapat pagdayaon ang aton kaugalingon paagi sa sayop nga pangatarungan nga ‘ang tion ni Jehova indi pa mag-abut.’ Ina nga panghunahuna makadula sang aton gana sa pagbantala sang maayong balita sang Ginharian.—Roma 12:11.

Paggabot sa Sayop nga Pangatarungan

Ang prinsipio sa Galacia 6:7 naaplikar sa sayop nga pangatarungan: “Indi pagtuguti nga mapatalang kamo . . . Kon ano ang ginasab-ug sang tawo, ini man ang iya anihon.” Kon ang duta indi matamnan, madali lang ini tubuan sang hilamon. Sing kaanggid, kon indi kita magpalambo sing ikasarang sa maathag nga paghunahuna, madali lang manggamot sa aton ang sayop nga mga pangatarungan. Halimbawa, basi maghunahuna kita, ‘Huo, magaabot ang adlaw ni Jehova pero indi pa siguro sa gilayon.’ Kon amo sini ang aton hunahunaon, mahimo magpulupatawhay kita sa aton pag-alagad. Sa ulihi, mahimo amat-amat na naton nga mapabay-an ang aton espirituwal nga rutina kag maabtan kita sang adlaw ni Jehova nga indi makapangaman.—2 Ped. 3:10.

Ang sayop nga pangatarungan indi manggamot sa aton hunahuna kon pirme naton ginapamatud-an sa aton kaugalingon “ang maayo kag kalahamut-an kag himpit nga kabubut-on sang Dios.” (Roma 12:2) Ang isa sa pinakamaayo nga paagi sa paghimo sini amo ang regular nga pagbasa sang Pulong sang Dios. Ang Kasulatan makapabakod sang aton kombiksion nga si Jehova nagahulag sa iya gintalana nga tion.—Hab. 2:3.

Ang pagtuon, pangamuyo, tayuyon nga pagtambong sa mga miting, kag pagbantala, lakip ang maayo nga mga buhat, amo ang makabulig sa aton nga ‘dumdumon pirme ang presensia sang adlaw ni Jehova.’ (2 Ped. 3:11, 12) Makita gid ni Jehova ang aton katutom. Ginapahanumdom kita ni apostol Pablo: “Indi kita magpangampo sa paghimo sing maayo, kay sa nagakaigo nga panahon magaani kita kon indi kita paglapyuon.”—Gal. 6:9.

Indi karon ang tion nga tugutan naton nga madaya kita sang sayop nga pangatarungan kag maghunahuna nga naatrasar ang adlaw ni Jehova. Sa baylo, tion ini nga pabakuron naton ang aton tagipusuon, kay malapit na ang adlaw ni Jehova.

[Retrato sa pahina 4]

Ginpalig-on nanday Hageo kag Zacarias ang mga Judiyo sa pagtukod

[Retrato sa pahina 5]

Ano ang himuon sang tagbalay kon nahibaluan niya nga may manug-abot nga kawatan?