Masaligan Bala ang Imo Relihion Parte sa Kuarta?

Pirme nagasimba si Estellea upod sa iya kabataan. “Ginsilingan ko ang amon ministro nga luyag ko magtuon sa Biblia,” siling niya. Pero wala sia gintudluan sini. Sang ulihi, wala na sia nagsimba. Nagdugang sia: “Ginsulatan ako sang mga opisyales sang simbahan nga kon indi ako makasimba, magpadala na lang ako sing kuarta. Naghunahuna ako, ‘Wala sila sing labot kon matambong ako; kuarta ko lang ang luyag nila.’”

Si Angelina, nga isa ka relihiosa, nagsiling: “Sa amon simbahan, tatlo ka beses nga ginapasa ang puyopuyo kon tion sang pagsimba, kag dapat maghulog kami kada paglibot sini. Pirme lang sila nagapangayo sing kuarta. Sa pamensar ko, ‘Wala sa ila ang espiritu sang Dios.’”

Ang mga relihion bala sa inyo lugar nagapamilit sa mga miembro sini nga maghatag sing kuarta? Ginatudlo bala ini sang Biblia?

ANO ANG GINATUDLO SANG BIBLIA?

Si Jesus, ang nagtukod sing Cristianismo, nagsiling: “Nagbaton kamo nga wala sing bayad, ihatag ninyo nga wala sing bayad.” (Mateo 10:8) Indi mabakal ang mensahe sang Biblia kag dapat ini ihatag sa tanan nga luyag magtigayon sini.

Paano ginasuportahan sang mga Cristiano sang una ang kagastuhanan sang kongregasyon?

Ang kada isa nagaamot “suno sa ginpamat-od niya sa iya tagipusuon, indi sing paganot ukon ginapilit, kay ginahigugma sang Dios ang nagahatag sing malipayon.” (2 Corinto 9:7) Si apostol Pablo nagsiling: “Ginabantala namon ang maayong balita sang Dios nga nagapangabudlay sa adlaw kag gab-i, agod indi kami magpabug-at sang daku nga kagastuhanan sa bisan isa sa inyo.” (1 Tesalonica 2:9) Nagapanghimo sing tolda si Pablo para masuportahan ang iya ministeryo.—Binuhatan 18:2, 3.

KAMUSTA ANG MGA SAKSI NI JEHOVA?

Ang mga Saksi ni Jehova masami nga nagatipon sa matahom nga mga Kingdom Hall. Paano ginasuportahan ang ila kagastuhanan? Wala sila nagapangolekta ukon nagapadala sing sobre agod magpangayo sing donasyon. Kundi, ang bisan sin-o nga nagaapresyar sang espirituwal nga programa mahimo maghulog sang ila donasyon sa kahon-alamutan sa Kingdom Hall.

Ini nga magasin ginagastuhan sa pag-imprinta kag pagpadala. Pero, wala ka sing makita nga pasayod ukon pagpangayo sing kuarta. Ginapadaku sini ang pagpalapnag sang kamatuoran sa Biblia.

Ano sa banta mo: Ini bala nga paagi sang pagsuporta sa mga kagastuhanan nahisanto sa ginsiling ni Jesus kag sa halimbawa sang mga Cristiano sang una?