May Klase Na Naman
1 Sa Hunyo ang aton kabataan magasugod sing bag-ong tuig sa pag-eskwela. May makalilipay nga mga butang nga paabuton, apang may pila man ka butang nga dapat kahangaw-an. Madamong pamatan-on ang igatangdo sa lainlain nga mga manunudlo, makuha sang bag-ong mga kurso, kag makig-upod sa mga estudyante nga mga estranghero. Luyag sang aton kabataan mangin mabinuligon sa mga awtoridad sang eskwelahan kag mainabyanon sa ila mga masigka-estudyante, apang dapat sila magbantay batok sa bisan ano nga butang nga mahimo makahalit sa espirituwal.—1 Cor. 15:33.
2 Ang panguna nga ginakabalak-an sang Saksi nga mga kabataan kag mga pamatan-on amo ang paglikaw sa malain nga impluwensia sang kalibutan, nga nagalatom sa mga sistema sang edukasyon sa karon. Ang mga Cristiano dapat mangin maisog sa pagsikway sa kalibutanon nga mga talaksan kag panghunahuna nga ginapasanyog karon nahanungod sa moral, kag dapat sila ‘padayon nga magbantay’ paagi sa pagbinagbinag pirme kag sa pagpatuytoy sa Pulong ni Jehova. (Sal. 119:9) Ang nabalaka nga mga ginikanan dapat pahibaluon sa kon ano ang ginalakip sa kurikulum sang eskwelahan agod makahatag sila sing nagakaigo nga panuytoy sa ila kabataan. Kon ang ginatudlo sa eskwelahan nagasumpakil sa pagkabalaan kag pagkaputli nga ginakinahanglan sa mga alagad ni Jehova, dapat ini likawan.—1 Ped. 1:15, 16.
3 Kinaandan man ang makasumalang sing mga isyu may kaangtanan sa nasyonalistiko nga mga seremonya, mga selebrasyon, mga hampang, ukon sosyal nga mga pagtinipon. Ang brosyur nga Jehovah’s Witnesses and Education makabulig sa mga pamatan-on may kaangtanan sining mga butang. Ang mabudlay nga mga sitwasyon mahimo mabuhinan kon hatagan sang mga ginikanan sang lanubo nga kabataan ang mga manunudlo sang isa ka kopya sining publikasyon. Mapaathag nila nga magabulig ini sa manunudlo nga mahangpan kon ngaa ang mga Saksi ni Jehova wala nagapakigbahin sa pila ka hilikuton. Daku ang mahimo sini agod matigayon ang espiritu sang kooperasyon.
4 Dugang pa, ang Cristianong mga estudyante dapat magdala sing personal nga kopya sang Education nga brosyur upod sang ila materyal nga ginatun-an sa eskwelahan. Masunson nagautwas ang mga kahigayunan nga makapanaksi sa iban nga mga estudyante nga nagapamangkot kon ginahambalan ang aton mga pagtuluuhan. Subong man, ang Saksi nga kabataan dapat magdala sa tanan nga tion sang ila bag-o, nasaksihan sing nagakaigo, kag napirmahan nga Advance Medical Directive/Release card ukon Identity Card. Ang mga nagasunod sini nga laygay pat-od gid nga mangin kaangay sang ‘mga mahalungon nga nakakita sang kalamidad kag nagapanago sia.’—Hulu. 22:3.