School and Jehovah’s Witnesses—Ginagamit Mo Bala Ini?

ANG brosyur nga School and Jehovah’s Witnesses gin-aman agod buligan ang mga awtoridad sang eskwelahan sa paghangop kon ngaa ang Saksi nga mga pamatan-on wala nagapakigbahin sa pila ka hilikuton kag mga programa sang eskwelahan. Nagabulig man ini sa mga Saksi ni Jehova sa pagpaathag kon ngaa, subong resulta sang ila pagtuluohan, subong sina ang ila tindog.

Apang, agod matuman sang brosyur ang ginapahayag nga katuyoan sini, “sa pagpauswag sang paghangpanay kag pagbuligay sa ulot sang mga Saksi ni Jehova kag sang mga awtoridad sang eskwelahan,” dapat anay ton-an ini sang Saksi nga mga pamilya kag dayon pat-uron nga mahatagan sini ang mga manunudlo. Nakatigayon sing makalilipay nga resulta ang mga naggamit sing School nga brosyur.

Halimbawa, sang Mayo 6, 1983, ang Ministry of Education sa Bahamas nagpaguwa sing sulat nga naghimos sing ehersisyo kada aga para sa tanan nga eskwelahan. Ang katapusan nga dinalan sang sulat nagsiling: “Talupangda palihug nga wala sing pagpili ang tugutan sa mga butang may kaangtanan sa mga Simbulo sang Pungsod.”

Apang, sang tig-ilinit sang 1983, ang School nga brosyur ginpaguwa sa mga kombension sang mga Saksi ni Jehova kag gingamit sa Bahamas. Subong maathag nga resulta sina nga paggamit, sang ginpadala ang bag-o nga sulat sa mga prinsipal sang mga eskwelahan sang Enero 18, 1984, bug-os nga ginbaliskad ang bagay tuhoy sa mga simbulo sang pungsod. Sa katapusan nga parapo, sa idalom sang tig-ulo nga “STUDENT PARTICIPATION IN PATRIOTIC ACTIVITIES IN SCHOOL,” ang sulat nagsiling:

“Ang pagsaludo sa bandera kag ang pungsodnon nga ambahanon gintuyo sa pagpasalop sing pungsodnon nga bugal kag pagbatyag sing patriotismo sa katawhan kag sa pungsod. Tubtob may yara nanuhaytuhay nga mga pungsod, ang bandera kag ang pungsodnon nga mga ambahanon may yara sang ila bahin sa organisado nga katilingban. Apang, kon ang isa ka partikular nga grupo sang relihion nagatuo nga ang pag-amba sing pungsodnon nga ambahanon kag ang pagsaludo sa bandera pagano kag busa ginadumilian, nian ginapatuman sang konstitusyon nga hatagan sila sing kahilwayan sa pagpanudlo kag sa paghunahuna.”

Apresasyon sang mga Awtoridad sang Eskwelahan

Ginaapresyar gid sing daku sang mga awtoridad sang eskwelahan ang epekto sang pagtuluohan sang mga Saksi ni Jehova sa ila pagpakigbahin sa mga hilikuton sang eskwelahan. Ginhatagan sing kopya sang brosyur si G. Andre Lemieux, prinsipal sang Chibougamau School Board sa Quebec, Canada, kag sang ulihi ginsilingan niya ang Saksi nga naghatag sini: “Ginakinahanglan sang inyo panudlo nga ipuwera namon ang inyo kabataan gikan sa mga selebrasyon kag wala kami makahangop kon ngaa, bisan pa ginapaathag nila ini sa amon. Apang paagi sa sini nga brosyur, nahangpan namon sing mas maayo ang inyo kabataan kag binagbinagon namon ang inyo moral nga mga prinsipio.”

Nian namangkot sia: “Posible bala nga makatigayon kami sing walo pa para sa tanan nga eskwelahan, sa dimagkubos isa para sa tagsa ka eskwelahan?” Sang ginsingganan sia nga indi ini problema, sia nagsiling: “Kon amo, makuha ako sing 40 anay.” Sia nagdugang, “Kon ang tagsa ka relihion magpaathag sang ila panudlo, mabuhinan ang amon problema sa kabataan. Madamo gid nga salamat.”

Ang isa ka Saksi nga ginikanan sa estado sang Kentucky sa Estados Unidos nagpaathag nga bag-o ang prinsipal sang iya kabataan, gani nagkadto sia sa eskwelahan agod makighambal sa iya, kag nagdala sia sing School nga brosyur. “Gin-usisa niya ini sing maayo,” siling niya, “kag namangkot kon makakuha ako sing dugang pa. Nakibot ako sang mangabay sia sing 25 pa. Nagsiling sia nga luyag niya hatagan sing isa ka kopya ang tagsa ka manunudlo.”

Ginhambal man sining iloy ang mga manunudlo sang iya kabataan. Nagsiling sila sa iya nga wala nila ginaproblema ang pagpanghikot upod sa Saksi nga kabataan apang kon kaisa indi nila mahangpan ang rason sang ila mga buhat. Apang, ang iloy nagsulat: “Sa tapos mabasa ang brosyur, madamo sang ila mga pamangkot ang nasabat, kag bangod sini nangin mahapos ang pag-eskwela sang akon kabataan kag sang iban pa nga Saksi nga kabataan sa amo man nga eskwelahan.”

Ang isa ka iloy gikan sa Siudad sang Nueva York nagsulat nga ang iya 8-anyos nga kapid nga babayi may problema sa pagpahangop sa ila mga manunudlo sang ila mga pagtuluohan. “Ang isa ka manunudlo nga nagatudlo sa ila sing musika naakig gid tuhoy sa pungsodnon nga mga ambahanon kag mga piesta opisyal,” siling niya. “Nagtinguha ang amon kabataan sa pagpaathag sa iya sang ila tindog kag ginhatagan nila sia sing brosyur.” Upod ang anong resulta? Nagpasalamat sia sa ila, kag sang ulihi nagsulat sia sa ila tuhoy sa brosyur:

“Maathag nga ginapakita sini kon ano gid ang ginahunahuna sang mga Saksi nahanungod sa nanuhaytuhay nga mga piesta opisyal kag kon ngaa wala sila nagapakigbahin sa sini. Ang iban nga mga rason nahibaloan ko na anay, apang ang iban indi pa. Subong manunudlo ginabatyag ko nga sa dugang nga paghibalo ko tuhoy sa nanuhaytuhay nga relihion sang akon mga estudyante, mahangpan ko sila sing maayo pa.”

Apresasyon sang Saksi nga mga Pamatan-on

Ang brosyur ginaapresyar labi na sang mga pamatan-on. “Ang isa pa ka kaayohan amo ang mga reaksion sang akon kabataan,” sulat sang isa ka iloy gikan sa British Columbia, Canada. “Subong isa ka iloy nga may ditumuluo nga bana kon kaisa nabudlayan ako sa pagpalig-on sang pagtamod ni Jehova sa mga piesta opisyal, bandera, kbp. Apang bangod nahibaloan sang akon mga anak nga babayi nga ginapaabot na sang manunudlo nga tuhay sila, nabuksan ang dalan para sa ila. Nagapauli sila nga nagapanugid sang ila malig-on nga pagtindog, nga sang una ginakahadlokan nila nga himuon. Ginsugid man nila sa akon ang mga okasyon nga ginbuligan sila sang manunudlo nga makaluwas sa pila ka kahimtangan paagi sa malolo nga mga pulong.”

Madamo nga pamatan-on ang nagsulat agod isugid kon paano sila nabuligan sang brosyur. Ang isa ka pamatan-on gikan sa Chicago, Illinois, nagsugid nahanungod sa isa ka manunudlo nga nagapilit sa iya sa pagkandidata para sa homecoming queen. “Sang masunod nga adlaw nagdala ako sing brosyur,” siling sang lin-ay, “kag sang mabasa niya ang bahin tuhoy sa homecoming queen nagsiling sia nga indi na ako magbuylog sa paindisanay. Amo sina kahapos.”

Ang isa ka pamatan-on gikan sa Georgia, sa Estados Unidos, nagapaathag nga ang iya manunudlo, nga iya ginhatagan sing brosyur, nagpuwera sa iya gikan sa pagpakigbahin sa pila ka hilikuton sa tapos mabasa ini. “Ining brosyur importante gid sa mga pamatan-on sa eskwelahan,” sulat sang pamatan-on, “kag luyag ko pasalamatan kamo bangod sini. Makalilipay gid nga ginadumdom sang Sosiedad ang mga pamatan-on nga nagaatubang sining mga palaligban.”

Ang School nga brosyur isa gid ka maayong instrumento sa pagbulig pagpauswag sang paghangpanay kag pagbuligay sa ulot sang mga Saksi ni Jehova kag sang mga awtoridad sang eskwelahan. Ginagamit mo bala ini?