Iluga si Jehova Paagi sa Matuod nga Pag-ulikid sa Iban
1 Si Jehova amo ang labing maayo nga halimbawa sang isa nga nagapakita sing matuod nga pag-ulikid sa iban. (1 Ped. 5:7) Ginpalig-on ni Jesus ang iya mga sumulunod nga ipakita ang mga kinaiya sang iya Amay. (Mat. 5:45) Sarang mo mailog si Jehova paagi sa pagpakita sing matuod nga pag-ulikid sa iban—subong handa nga ipaambit ang mensahe sang Ginharian sa tanan nga masugilanon mo. Paagi sa paghibalo sing maayo sa mga brosyur nga pagagamiton sa ministeryo sa Hulyo, makahatag ka sing mas maayong espirituwal nga bulig sa iban. Ang masunod nga mga panugda nagahatag sing pila ka ideya sa kon paano ka makahanda para sa nahaunang pagduaw kag nian sa pagtatap sa interes paagi sa nagakaigo sa tion nga mga pagduaw liwat.
2 Kon nagatanyag sing brosyur nga “Nagaulikid Gid Bala ang Dios sa Aton?” mahimo makasiling ka:
◼ “Napaligban mo na bala kon ngaa ginapahanugutan sang Dios nga mag-antos ang tawo kon tunay sia nga nagaulikid sa ila? [Pasabta sia.] Wala lamang ginasabat sining brosyur ini nga pamangkot kundi ginapakita man nga nagsaad ang Dios nga dulaon niya ang tanan nga halit nga ginhimo sang tawo sa iya kaugalingon kag sa iya dutan-on nga puluy-an.” Basaha ang parapo 23 sa pahina 27. Ipakita ang ilustrasyon sa ubos sini, kag basaha ang Salmo 145:16 halin sa parapo 22. Itanyag ang brosyur. Kon ginbaton ini, maghatag sing isa ka pamangkot nga sarang masabat sa masunod nga pagduaw, subong sang: “Luyag mo bala mahibaluan kon paano tumanon sang Dios ang iya katuyuan nga himuon ang duta nga isa ka paraiso?”
3 Kon nagabalik sa mga napahamtangan mo sang brosyur nga “Nagaulikid Gid Bala ang Dios sa Aton?” masugdan mo ang paghambalanay sa sining paagi:
◼ “Sang nagligad ko nga pagduaw, ginhambalan naton nga ang Dios nagaulikid gid sa aton kag nga katuyuan niya nga dulaon ang tanan nga halit nga ginhimo sang tawo sa iya kaugalingon kag sa iya dutan-on nga puluy-an.” Buksi ang brosyur sa ilustrasyon sa pahina 2-3 kag magsiling: “Sang nagligad ginpamangkot naton ang pakiana, Paano tumanon sang Dios ang iya katuyuan nga himuon ang duta nga isa ka paraiso? Ano ang masiling mo?” Pasabta sia. Buksi sa pahina 17, kag basaha ang parapo 2 kag ang Daniel 2:44. Pagkatapos sini, basaha ang parapo 12 sa pahina 18. Kon magpasugot ang tagbalay, tun-i ang bahin 9 sang brosyur upod sa iya.
4 Yari ang isa ka paagi nga mahimo magamit sa pagtanyag sang brosyur nga “Kon ang Isa nga Ginahigugma Mo Mapatay.” Ipakita ang panghapin sini kag magsiling:
◼ “Ginatanyag namon karon ining brosyur nga nakahatag sing lugpay kag paglaum sa minilyon ka tawo nga namatyan sing mga hinigugma. Napaligban mo na bala kon ano ang paglaum sang mga patay? [Pasabta sia.] Ang Biblia maathag nga nagasugid sang saad sang Dios nga pagkabanhaw.” Basaha ang Juan 5:28, 29. Buksi ang brosyur kag kumentuhi ang katapusan nga parapo sa pahina 28 kag ang nahaunang parapo sa pahina 31. Mahanda mo ang dalan para sa isa ka pagduaw liwat paagi sa pagpamangkot, “Paano kita makapat-od nga ang kamatayon pagadulaon sing bug-os sa ulihi?”
5 Sa imo napahamtangan sing brosyur nga “Kon ang Isa nga Ginahigugma Mo Mapatay,” ayhan luyag mo gamiton ining presentasyon sa pagduaw liwat:
◼ “Sang nagligad naton nga paghambalanay, ginhambalan naton ang makalilipay nga paglaum tuhoy sa pagkabanhaw. Ang brosyur nga ginbilin ko sa imo nagapaathag kon ngaa makapat-od kita nga ang kamatayon pagadulaon sing bug-os sa ulihi. Indi bala nga ang mga saad sang Dios makalulugpay kag makapalig-on?” Pasabta sia. Nian buksi ang pahina 31 sang brosyur, kag basaha ang ikaduha kag ikatlo nga mga parapo, subong man ang Bugna 21:1-4. Depende sa interes nga ginpakita, mahimo nimo matanyag ang isa ka pagtuon sa Biblia sa Ihibalo nga libro ukon makapamangkot sing isa pa ka pakiana nga magabukas sang dalan para sa masunod nga pagduaw.
6 Mahimo nimo masiling ang masunod kon nagatanyag sing brosyur nga “Ano ang Katuyuan sang Kabuhi?—Paano Mo Masapwan Ini?”:
◼ “Madamo nga tawo ang nagapalibog kon ano ang katuyuan sang kabuhi. Ginpamangkot nila ang ila kaugalingon: ‘Ngaa yari ako diri? Ano ang nagahulat sa akon sa palaabuton?’ Sa banta mo, diin naton makita ang mga sabat? [Pasabta sia.] Talupangda ang ginasiling sang Biblia. [Basaha ang Salmo 36:9.] Indi bala nga ang Manunuga sang tawo amo ang labing kalipikado sa pagpaathag kon ngaa yari kita diri? [Pasabta sia.] Ginapakita sining brosyur ang dalayawon nga katuyuan nga ginatigana sang Dios para sa aton.” Buksi ang pahina 20-1, basaha ang kapsion, kag kumentuhi ang ilustrasyon; nian itanyag ang brosyur. Kon ginbaton, mamangkot: “Paano kita makapat-od nga katuyuan gihapon sang Dios nga magkabuhi sing dayon ang tawo sa Paraiso sa duta?” Magtalana sing tion sa pagbalik.
7 Kon ang brosyur nga “Ano ang Katuyuan sang Kabuhi?—Paano Mo Masapwan Ini?” ang napahamtang, masiling mo ang kaangay sini sa imo pagbalik:
◼ “Sang nagligad ko nga pagduaw, nalipay gid ako sa pagpaathag sa imo nga ang tawhanon nga kabuhi may katuyuan gid.” Ipakita ang ilustrasyon sa pahina 31 kag mamangkot, “Paano kita makapat-od nga kabubut-on gihapon sang Dios nga magakabuhi sing dayon ang tawo sa Paraiso sa duta?” Basaha ang parapo 3 sa pahina 20. Hinun-anuni ang mga punto sa ubos sang subtitulo, “Katuyuan Gihapon sang Dios,” sa pahina 21. Magliton sa likod nga panghapin sang brosyur, kag basaha ang tuhoy sa tanyag nga walay bayad nga pagtuon sa Biblia sa puluy-an. Ipanugda nga ipakita mo ang isa ka pagtuon sa Ihibalo nga libro.
8 Dapat mabanaag sa aton ministeryo ang aton hanuot nga interes sa pagbulig sa mga bunayag-sing-tagipusuon nga “makadangat sa sibu nga ihibalo sang kamatuoran.” (1 Tim. 2:4) Busa, maghinguyang sing tion nga balikan ang kada tawo nga napahamtangan mo sing brosyur. Ang imo pagpakita sing tunay nga pag-ulikid sa ila mahimo magresulta sa pagbulig sa mga nagapanghayhay kag nagabakho sa kalangil-aran nga mga butang nga ginahimo sang butig nga relihion nga makilal-an para sa kaluwasan. (Ezeq. 9:4, 6) Maagom mo man ang kaayawan nga bunga sang pag-ilog kay Jehova paagi sa matuod nga pag-ulikid sa iban.—Ipaanggid ang Filipos 2:20.