Gamita ang Nanuhaytuhay nga mga Brosyur sa Inyo Ministeryo
1 Ang mga tawo karon interesado sa lainlain nga mga topiko. Samtang nagaalagad kamo sa latagon sa Hulyo, mahimo ninyo madala ang pila ka lainlain nga mga brosyur, nagagamit sang isa ka espisipiko nga brosyur nga makagalanyat sa mga tawo sa teritoryo. Ayhan luyag mo tilawan ang isa sining .mga presentasyon:
2 Sa pagtanyag sing brosyur nga “The Government That Will Bring Paradise,” mahimo ka mamangkot:
◼ “Mangin kaangay sang ano, sa banta mo, ang kalibutan kon ang Dios lamang ang nagagahom? [Pasabta sia.] Amo gid sina ang aton ginapangabay kon nagapangamuyo kita sing Amay Namon. [Buksi sa pahina 3, kag basaha ang nahaunang parapo, nga nagabalikwat sang Mateo 6:10.] Kon luyag mo magpuyo sa kalibutan nga kaangay sina, dapat mo mabasa ining brosyur.” Itanyag nga ibilin ini.
3 Ang “Kon ang Isa nga Ginahigugma Mo Mapatay”:
◼ “Sa banta mo, magaabot gid bala ang tion nga wala na sing isa sa aton ang mamatyan sing isa ka hinigugma? [Pasabta sia.] Ining brosyur naglugpay sa minilyon paagi sa saad sang Biblia nga ina nga tion magaabot sa dili madugay. [Buksi sa pahina 5, kag basaha ang ikalima nga parapo, lakip ang 1 Corinto 15:21,22. Nian buksi sa ilustrasyon sa pahina 30.] Ginapakita diri ang kalipay nga mahimo naton maeksperiensiahan sa pag-abiabi liwat sa aton napatay nga mga hinigugma sa pagkabanhaw. Apang diin ina mahanabo? Ipakita sa imo sining brosyur ang sabat sang Biblia.” Kon ginbaton ang brosyur, mahimo ka makadugang: “Luyag ko magbalik kag ipaathag sing dugang pa ining topiko.”
4 Mahimo mo matanyag ang brosyur nga “Toloka! Ginahimo Ko nga Bag-o ang Tanan nga Butang,” nga nagagamit sining direkta nga paagi sa pagsugod sing isa ka pagtuon sa Biblia:
◼ “Ginapamangkot ko ang akon mga kaingod kon may mga pamangkot sila tuhoy sa Biblia. Ginalista sini nga publikasyon ang pila sang ginpamangkot. [Patuhuyi ang pahina 30.] Ining katapusan nga pamangkot nagpukaw sang interes sang madamo: ‘Paano ka magahanda para sa kabuhi nga walay katapusan sa Paraiso?’” Ipaathag ang mga parapo 57-8 sa mga pahina 29-30 kag basaha ang Bugna 21:3, 4. Itanyag ang brosyur kag maghimos sa pagduaw liwat agod ipaathag ang pila sang iban pa nga mga pamangkot.
5 Ayhan luyag mo tilawan ining simple nga presentasyon sa brosyur nga “The Divine Name That Will Endure Forever”:
◼ “Ang isa sang nahaunang mga butang nga natun-an ko gikan sa Biblia amo ang ngalan sang Dios. Nahibaluan mo bala kon ano ini? [Pasabta sia.] Yari ini sa Biblia sa Salmo 83:18. [Basaha.] Ginapakita sini nga brosyur kon paano ang ngalan sang Dios, nga Jehova, makita sa madamong lainlain nga hambal. [Ipakita ang kahon sa pahina 8.] Kon luyag mo makatuon sing dugang pa nahanungod kay Jehova kag sa iya mga katuyuan, dapat mo mabasa ining brosyur.” Idaho ang brosyur sa tagbalay.
6 Paagi sa paggamit sa nanuhaytuhay nga matahom nga mga brosyur, pat-od gid nga nasangkapan kita sa “pagsugid sing maayong balita sa mga mahagop.”—Isa. 61:1.