Ang Pagpakamaayo ni Jehova Nagapamanggad sa Aton

¹ Ang kadalag-an sang isa ka tawo masunson ginatakus sa kadakuon sang iya suweldo. Amo ina kon ngaa ginatamod sang madamo ang mga tawo nga may kuwarta subong pinakamalipayon kag pinakakontento. Apang, nagsayop gid ang mga tawo nga nagahunahuna nga ang kalipay sarang mabakal sang kuwarta. (Manugw. 5:12) Ang “mga determinado nga magmanggaranon” sa materyal nga paagi wala sing dayon nga kalipay. (1 Tim. 6:9) Sa kabaliskaran, ang mga alagad ni Jehova malipayon gid kag amo ang pinakamanggaranon nga mga tawo sa kalibutan. (Hulu. 10:​22; Bug. 2:9) Paano?

² Pamatuod sang Aton Manggad: May yara kita bugana nga espirituwal nga paghantop kag paghangop sa Pulong sang Dios, ang Biblia. Paagi sa iya dutan-on nga organisasyon, si Jehova padayon nga nagatudlo sa aton tuhoy sa iya kaugalingon kag sa iya Anak, para sa aton walay katapusan nga kaayuhan. Ang sibu nga paghangop nagapaposible para sa aton nga makapalapit kay Jehova kag makaagom sing suod nga kaangtanan sa iya. (Sant. 4:8) Ang paghantop sang maayo gikan sa malain kag ang pagsunod sa mga kasuguan sang Dios nagaamlig sa aton gikan sa mga balatian kag mga katalagman. Makasalig kita nga si Jehova magaaman para sa aton, nga nagaresulta sa diosnon nga pagkakontento kag kalinong sang hunahuna.​—⁠Mat. 6:⁠33.

³ Nagaagom kita sing paghidait kag paghiusa sa sulod sang aton espirituwal nga paghiliutod bangod ginapalambo naton ang mga bunga sang espiritu sang Dios. Nahiusa bangod sang mabakod nga higot sang gugma, indi gid kita dapat magbatyag nga ginpabayaan sang Dios ukon sang aton mga kauturan kon nagaatubang kita sang kalamidad.​—⁠Gal. 6:⁠10.

⁴ Ang aton kabuhi may matuod nga kahulugan kag katuyuan. Ginakabig naton nga isa ka dalayawon nga pribilehiyo ang makigbahin sa pagbantala sing maayong balita sa bug-os nga kalibutan. Nagahatag ini sing walay katubtuban nga kalipay samtang ginabuligan naton ang iban nga makatigayon sing maayo nga kaangtanan sa Dios kag makaalagad sing nahiusa upod sa aton sa putli nga pagsimba. Ang aton hamili nga pagpakabahandi sa ministeryo nagapadungog kay Jehova kag nagapahalipay sa aton nga nakaamot sa pagpakabalaan sa iya ngalan. Nagahupot kita sing positibo nga panimuot sang hunahuna, sa pagkahibalo nga ang aton paglaum para sa palaabuton matuman sa dili madugay.

⁵ Pagpakita sang Aton Apresasyon: Kabay nga apresyahon naton pirme ang mga pagpakamaayo ni Jehova, nga nagahimo sa aton nga pinakamanggaranon gid nga mga tawo sa duta. (Hulu. 22:4) Ang pagtalana sing tion kada adlaw nga pamalandungan ang yara sa aton nagapahulag sa aton nga magpasalamat kay Jehova tungod sang iya bugana nga gugma kag magpadayon sa paghatag sa iya sang aton eksklusibo nga debosyon.