Tudlui ang Iban Sang Putli nga Hambal
1 Bisan pa nga naghalin gikan sa madamo nga ‘pungsod, tribo, katawhan kag hambal,’ ang mga Saksi ni Jehova isa ka nahiusa nga katawhan, isa ka matuod internasyonal nga paghiliutod. (Bug. 7:9) Sa sining nabahinbahin nga kalibutan karon, talalupangdon gid ini. Paano ini nangin posible? Bangod ginhatagan kita sing “pagbag-o padulong sa isa ka putli nga hambal.”—Sof. 3:9.
2 Makatilingala nga mga Epekto: Ano ining putli nga hambal? Amo ini ang nagakaigo nga paghangop sa kamatuoran nga masapwan sa Pulong sang Dios tuhoy kay Jehova kag sa iya mga katuyuan, ilabi na ang kamatuoran tuhoy sa Ginharian sang Dios. Subong sang gintagna ni Jesus, ining kamatuoran ginahatag paagi sa isa ka makita nga palaagyan sa duta, “ang matutom kag mainandamon nga ulipon,” nga nagaresulta sa pagbaton sang mga tawo “gikan sa tanan nga hambal sang mga pungsod” sa matuod nga pagsimba.—Mat. 24:45; Zac. 8:23.
3 Samtang ginatun-an sang mga tawo ang putli nga hambal, napahulag sila nga ipahisuno ang ila kabuhi sa mga talaksan ni Jehova. Natun-an nila nga ‘maghiusa sa isa ka painuino kag isa ka panghunahuna.’ (1 Cor. 1:10) Ang panudlo sang Dios nagapatubas man sa ila sing matadlong nga paggawi kag maayo, matuod nga hambalanon, ilabi na kon tuhoy sa pagsugid sa iban sang maayong balita. (Tito 2:7, 8; Heb. 13:15) Ining makatilingala nga pagbag-o nagapadungog kay Jehova.
4 Halimbawa, ang isa ka tawo nga nakabati sing maayong balita gikan sa isa ka manugbantala may madamo nga pamangkot, nga ginsabat tanan gikan sa Biblia. Napahulag sang iya nabatian, nagsugod sia sa pagtuon sing duha ka beses kada semana kag nagtambong sa mga miting. Nakibot sia sa mainit nga pag-abiabi sa iya sa Kingdom Hall, bangod madamo sang tumalambong ang tuhay sing rasa. Sa malip-ot lamang nga tion, nagbag-o sila sang iya asawa kag nagpabawtismo. Sugod sadto nabuligan niya ang mga 40 pa agod mag-alagad kay Jehova, lakip ang madamo nga katapo sang iya pamilya. Walay sapayan sang balatian, nagpayunir sia sining kasan-o lang.
5 Pagtudlo sa Iban: Bangod sang mga hitabo sa kalibutan, madamo sang bunayag nga mga tawo ang nag-usisa liwat sang ila pagtamod kag sang ila kabuhi. Kaangay ni Jesus, dapat naton tinguhaan nga buligan sila. Ang epektibo nga mga pagduaw liwat kag mga pagtuon sa Biblia amo ang isa ka yabi sa pagbulig sa mga sinsero nga makatuon sang putli nga hambal.
6 Ang isa ka paagi nga nangin epektibo sa masako nga mga tawo amo ang pagdumala sing isa ka malip-ot nga pagtuon sa Biblia dira mismo sa ila ganhaan. (km 5/02 p. 1) Natilawan mo na bala ini? Kon nagahanda ka sa pagduaw liwat, magpili gikan sa suplemento sang Mayo 2002 nga Ang Aton Ministeryo sa Ginharian sing isa ka presentasyon nga nagakabagay sa tagbalay. Madamo sang mga presentasyon sa sini nga suplemento ang gindesinyo para sa direkta nga paghinun-anon sa Ginapatuman nga brosyur ukon sa Ihibalo nga libro. Ensayuha ang presentasyon agod makapadayon ka sing talunsay gikan sa introduksion pakadto sa paghinun-anon sa isa sang mga parapo. Magpili sing isa ukon duha ka kasulatan gikan sa parapo agod basahon kag hinun-anunan, kag maghanda sing isa ka pamangkot para sa paghinakop. Magabulig ini dul-ong sa parapo nga ginaplano mo nga hambalan sa masunod nga pagduaw.
7 Nakatigayon sing madamo nga mga pagpakamaayo ang katawhan ni Jehova bangod sang paghibalo sa putli nga hambal. Kabay nga mangin makugi kita sa pagbulig sa iban nga magbuylog sa aton sa ‘pagtawag sa ngalan ni Jehova’ kag sa ‘pag-alagad sa iya sing abaga sa abaga.’—Sof. 3:9.