Baldado—Apang Mabungahon
1 Kon isa ka sang mga Saksi ni Jehova nga baldado, mahimo mangin mabungahon gihapon ang imo ministeryo. Ang matuod, ang imo kahimtangan mahimo maghatag sing pinasahi nga mga kahigayunan agod makapanaksi ka kag makapalig-on sa iban.
2 Pagpanaksi: Madamo sang mga baldado ang nagapakigbahin sing bug-os sa ministeryo. Halimbawa, nasapwan sang isa ka utod nga babayi, nga nahalitan ang paglakat kag paghambal bangod sang operasyon, nga sarang sia makapakigbahin sa pagpanagtag sing magasin kon iparada sang iya bana ang ila salakyan sa higad sang dalan nga madamo sing nagaagi. Sang isa ka higayon, nakapahamtang sia sing 80 ka magasin sa sulod lamang sang duha ka oras! Bangod sang imo kahimtangan mahimo nga makapakig-angot ka sa mga tawo nga mahimo mabudlay masugilanon. Kon amo, tamda sila subong imo espesyal nga teritoryo.
3 Mahimo nga mangin epektibo gid ang imo pagbantala! Samtang ginapanilagan sang iban ang imo determinasyon kag ang maayo nga epekto sa imo kabuhi sang kamatuoran sa Biblia, mahimo sila maganyat sa mensahe sang Ginharian. Dugang pa, kon masugilanon mo ang mga tawo nga nagaantos, ang imo eksperiensia sa kabuhi mahimo magasangkap sa imo sa paghatag sa ila sing lugpay gikan sa Pulong sang Dios.—2 Cor. 1:4.
4 Pagpalig-on sa Iban: Wala ka bala mapalig-on sang sugilanon sa kabuhi ni Laurel Nisbet, nga yara sa iron lung sa sulod sang 37 ka tuig apang nakabulig sing 17 ka tawo nga makatigayon sing sibu nga ihibalo sa Biblia? Sing kaanggid, ang imo halimbawa sarang makapalig-on sa mga masigkatumuluo nga manikasog sa pag-alagad kay Jehova.—g93 1/22 p. 18-21.
5 Bisan pa ang imo mga kahimtangan magapugong sa imo nga makagua sa ministeryo suno sa luyag mo, sarang mo gihapon mapalig-on ang iban. Ang isa ka utod nga lalaki nagsiling: “Nahisayran ko nga bisan ang baldado na kaayo makabulig pa sing daku sa iban. Nangin suportar kami nga mag-asawa sa mga katapo sang kongregasyon. Bangod sang amon kahimtangan yara kami pirme, sarang makabulig.” Apang, bangod sang imo pagkabaldado, halangpunon nga indi mo pirme mahimo ang suno sa imo kakugi. Apang, paagi sa bulig sang iban sarang ka makapakigbahin sing aktibo sa ministeryo. Busa, kon kinahanglan mo ang bulig sang iban, indi magpangalag-ag sa pagpahibalo sa mga gulang ukon sa iban sa kongregasyon nga makabulig sa imo.
6 Makita ni Jehova ang tanan nga imo ginahimo agod alagaron sia, kag nalipay sia sa imo bug-os kalag nga pag-alagad. (Sal. 139:1-4) Samtang nagasandig ka sa iya, sarang ka niya mapabaskog agod mangin mabungahon kag mapuslanon ang imo ministeryo.—2 Cor. 12:7-10.