Bag-o nga Kahimusan sa Pagrepaso sa mga Programa sang Asambleya

Samtang ang kalibutan ni Satanas labi nga nagalain, si Jehova nagapalig-on sa aton “nga sikwayon ang pagkadidiosnon kag kalibutanon nga mga handum kag magkabuhi nga may kaligdong sa hunahuna kag pagkamatarong kag diosnon nga debosyon sa tunga sining karon nga sistema sang mga butang.” (Tito 2:12) Lakip sa iya mga aman amo ang tuigan nga sirkito nga asambleya kag adlaw sang pinasahi nga asambleya nga ginhimos sang “matutom kag mainandamon nga ulipon.” (Mat. 24:45) Daw ano ka makapalig-on ining espirituwal nga pagtililipon!

Agod mabuligan kita nga madumduman kag maaplikar ang mga instruksion nga gin-aman, ang isa ka bag-o nga kahimusan sa pagrepaso sining mga programa sang asambleya gamiton sa 2005. Ang pahina 5-6 sini nga suplemento nagaunod sing mga artikulo kon ano ang ipresentar sa asambleya subong man ang mga pamangkot para sa repaso sa kada programa sang asambleya. Binagbinagon sang mga kongregasyon ini nga impormasyon sa Miting sa Serbisyo antes kag pagkatapos makatambong sa ila mga asambleya. Paano ini himuon?

Isa ukon duha ka semana antes magtambong ang kongregasyon sa sirkito nga asambleya, isa ka dies-minutos nga pamulongpulong sa artikulo nga “Bag-o nga Programa sa Sirkito nga Asambleya” ang ipresentar sa Miting sa Serbisyo agod malangkag sila sa programa. Ipatalupangod sang may bahin ang mga pamangkot para sa repaso kag palig-unon ang tanan sa pagkuha sing mga nota sa paghanda sa repaso nga pagahimuon pila ka semana pagkatapos sang asambleya.

Pila ka semana pagkatapos sang asambleya, ilakip ang 15 minutos nga repaso sa una nga adlaw nga programa sang asambleya sa Miting sa Serbisyo. Sa masunod nga semana, 15 minutos naman nga repaso ang pagahimuon para sa ikaduha nga adlaw nga programa. Ang mga pamangkot para sa repaso nga gin-aman sa sini nga suplemento amo ang sadsaran sa sini nga paghinun-anon. Ang repaso dapat nga magasentro sa praktikal nga kapuslanan sang impormasyon. Ang mga gulang mahimo nga magpalip-ot, magadula, ukon magaiskedyul liwat sang iban nga mga bahin sa Miting sa Serbisyo agod mahimo ining pagrepaso.

Amo man sini ang kahimusan sa programa sang adlaw sang pinasahi nga asambleya, luwas lamang nga isa lang ka 15 minuto nga pagrepaso sa bug-os nga programa ang pagahimuon. Dapat naton taguon ini nga suplemento kag gamiton ini agod makabenepisyo kita sing bug-os sa maayong pagtudlo nga ginaaman ni Jehova.​—⁠Isa. 48:​17, 18.