Mga Reperensia Para sa Pagkabuhi kag Pagministeryo nga Workbook Para sa Miting
NOBIEMBRE 2-8
MGA BAHANDI SA PULONG SANG DIOS | EXODO 39-40
“Ginsunod Gid ni Moises ang mga Instruksion”
(Exodo 39:32) Gani natapos ang tanan nga hilikuton para sa tabernakulo, nga amo ang tolda nga tilipunan, kag ginhimo sang mga Israelinhon ang tanan nga ginsugo ni Jehova kay Moises. Amo gid ini ang ginhimo nila.
Kilala Ka Bala ni Jehova?
13 Sa pihak nga bahin, si Moises ang “pinakamahagop sa tanan nga tawo sa duta.” (Num. 12:3) Ginpakita niya ini paagi sa pagsunod sing bug-os sa panuytoy ni Jehova. (Ex. 7:6; 40:16) Maathag nga wala nagduhaduha ukon nagreklamo si Moises sa mga pamaagi kag mga instruksion ni Jehova. Halimbawa, ginhatagan sia sing instruksion bisan sa pinakadiutay nga detalye sa pagtukod sang tabernakulo, subong sang kolor sang hilo kag kon daw ano kadamo ang kalaw-itan sang tolda. (Ex. 26:1-6) Kon may manugtatap sa organisasyon sang Dios nga puerte ka uti kon nagahatag sing mga instruksion, mahimo nga maugot ka. Apang si Jehova isa ka himpit nga manugtatap, nga nagabahinbahin sang hilikuton kag nagasalig sa iya mga alagad. May maayo gid nga rason ang paghatag niya sing madamo nga detalye. Talupangda nga si Moises wala maugot kay Jehova, ukon nagbatyag nga ginapakanubo ukon ginapunggan sa iya diskarte ukon kahilwayan. Sa baylo, ginpat-od ni Moises nga ginasunod sang mga nagaobra ang “amo gid” suno sa sugo sang Dios. (Ex. 39:32) Mapainubuson gid sia! Nahibaluan ni Moises nga hilikuton ini ni Jehova kag instrumento lamang sia agod matapos ini.
(Exodo 39:43) Sang gin-usisa ni Moises ang tanan nga ginhimo nila, nakita niya nga ginhimo gid nila ang ginsugo ni Jehova; dayon ginpakamaayo sila ni Moises.
(Exodo 40:1, 2) Dayon nagsiling si Jehova kay Moises: 2 “Sa una nga adlaw sang una nga bulan, patindugon mo ang tabernakulo, ang tolda nga tilipunan.
(Exodo 40:16) Ginhimo ni Moises ang tanan nga ginsugo ni Jehova sa iya. Amo gid ini ang ginhimo niya.
Matutom Ka Bala sa Tanan nga Butang?
3 “Si Moises matutom nga alagad,” siling sang Hebreo 3:5. Paano nangin matutom si manalagna Moises? Sang ginpatindog kag ginhanda ang tabernakulo, “ginhimo ni Moises ang tanan nga ginsugo sa iya ni Jehova. Amo gid ini ang ginhimo niya.” (Exodo 40:16) Subong mga sumilimba ni Jehova, nagapakita kita sing katutom paagi sa matinumanon nga pag-alagad sa iya. Nagalakip gid ini sang aton pagpabilin nga mainunungon kay Jehova walay sapayan sang mabudlay ukon mabaskog nga mga pagtilaw. Apang, indi ang kadalag-an sa pagpakig-atubang sa dalagku nga mga pagtilaw ang lamang nga ginabasihan sang aton katutom. “Ang matutom sa gamay nga butang matutom man sa dalagku nga butang,” siling ni Jesus, “kag ang indi matutom sa gamay nga butang indi man matutom sa dalagku nga butang.” (Lucas 16:10) Dapat kita magpabilin nga matutom bisan sa daw gamay nga mga butang.
Pagkutkot sing Espirituwal nga mga Hiyas
(Exodo 39:34) ang tabon sini nga mga panit sang karnero nga lalaki nga linugom sa pula, ang tabon sini nga mga panit sang poka, ang nagalipon nga kurtina;
it-2-E 884 ¶3
Panit sang poka
Kon diin ini makuha sang mga Israelinhon. Kon ang ginasiling sang Biblia nga taʹchash isa ka sahi sang poka ukon seal, diin makuha sang mga Israelinhon ang panit sini? Kinaandan nga makita ang mga poka sa mga rehiyon sang Arctic kag Antarctic, pero may pila nga makita sa indi masyado tugnaw nga mga rehiyon. Subong, may pila pa ka monk seal ukon poka sa Dagat Mediteraneo kag sa pila ka indi masyado tugnaw nga mga dagat. Pagligad sang mga siglo, bangod sa ginahimo sang mga tawo nagdiutay ang mga poka, pero sang panahon sang Biblia mahimo madamo sang poka sa Mediteraneo kag Pula nga Dagat. Sang 1832, ang English nga edisyon sang Calmet’s Dictionary of the Holy Bible (p. 139) nagsiling: “Sa magagmay nga mga isla sa Pula nga dagat, sa palibot sang Sinai, may mga poka.”—Tan-awa man ang The Tabernacle’s Typical Teaching, ni A. J. Pollock, London, p. 47.
(Exodo 40:34) Naglikop ang panganod sa tolda nga tilipunan, kag napuno sang himaya ni Jehova ang tabernakulo.
Importante Bala Kon Sin-o ang Nakakita sang Imo Hinimuan?
Sang nahuman ang tabernakulo, “naglikop ang panganod sa tolda nga tilipunan, kag napuno sang himaya ni Jehova ang tabernakulo.” (Ex. 40:34) Maathag gid ini nga pamatuod sang kahamuot ni Jehova! Ano sa banta mo ang ginbatyag nanday Bezalel kag Oholiab sina nga tion? Bisan pa nga wala gintigib ang ila ngalan sa ila mga hinimuan, mahimo nga nalipay sila kay ginpakamaayo sang Dios ang ila mga panikasog. (Hulu. 10:22) Pagligad sang mga tinuig, pat-od nga nalipay sila nga makita nga padayon nga ginagamit sa pag-alagad kay Jehova ang ila mga hinimuan. Kon mabanhaw sanday Bezalel kag Oholiab sa bag-ong kalibutan, wala sing duhaduha nga malipay sila nga mahibaluan nga gingamit ang tabernakulo sa matuod nga pagsimba sing mga 500 ka tuig!
Pagbasa sa Biblia
(Exodo 39:1-21) Naghimo sila sing hinabol sing maayo nga mga panapton nga human sa asul nga hilo, purpura nga de-lana, kag eskarlata nga hilo para sa pag-alagad sa balaan nga duog. Naghimo man sila sing balaan nga mga panapton para kay Aaron, suno sa ginsugo ni Jehova kay Moises. 2 Naghimo sia sing efod nga ang gingamit bulawan, asul nga hilo, purpura nga de-lana, eskarlata nga hilo, kag maayo nga klase sang linubid nga linen. 3 Ginpulpog nila ang bulawan tubtob magnipis ini, kag gingihaygihay ini nga daw hilo kag gingamit ini upod sa asul nga hilo, purpura nga de-lana, eskarlata nga hilo, kag maayo nga klase sang linen, kag ginburdahan ini. 4 Naghimo sila sing mga taklap sa abaga, kag ginsugpon nila ang duha ka punta sang efod sa abaga. 5 Ang hinabol nga paha nga nahigot sa efod agod indi ini mahukas, human sa pareho man nga materyales, bulawan, asul nga hilo, purpura nga de-lana, eskarlata nga hilo, kag maayo nga klase sang linubid nga linen, suno sa ginsugo ni Jehova kay Moises. 6 Dayon ginbutang nila ang oniks nga mga bato sa mga enggaste nga bulawan, kag gintigib nila sa sini ang mga ngalan sang mga anak ni Israel, pareho sang pagtigib sa selyo. 7 Ginbutang niya ini sa mga taklap sa abaga sang efod bilang nagapahanumdom nga mga bato para sa mga anak ni Israel, suno sa ginsugo ni Jehova kay Moises. 8 Dayon naghimo sia sing tabon sa dughan nga ginburdahan man pareho sa pagburda sa efod, nga ang gingamit bulawan, asul nga hilo, purpura nga de-lana, eskarlata nga hilo, kag maayo nga klase sang linubid nga linen. 9 Kuadrado ini kon piluon. Ang tabon sa dughan nga ila ginhimo, kon piluon, isa ka dangaw ang kalabaon kag isa ka dangaw ang kasangkaron. 10 Gintampukan nila ini sing apat ka raya sang mga bato. Ang una nga raya rubi, topasio, kag esmeralda. 11 Ang ikaduha nga raya turkesa, sapiro, kag jaspe. 12 Ang ikatlo nga raya lesh′em nga bato, agata, kag amatista. 13 Ang ikap-at nga raya krisolito, oniks, kag jade. Ginbutang ini sa mga enggaste nga bulawan. 14 Ang mga bato katumbas sang mga ngalan sang 12 ka anak ni Israel. Gintigib ang ila ngalan pareho sang pagtigib sa selyo, ang tagsa ka ngalan nagarepresentar sa isa sa 12 ka tribo. 15 Ginhimuan nila ang tabon sa dughan sing sinalapid nga kulukadena, pareho sang mga higot nga puro nga bulawan. 16 Dayon naghimo sila sing duha ka enggaste nga bulawan kag duha ka sulusingsing nga bulawan kag ginbutang nila ang duha ka sulusingsing sa duha ka pamusod sang tabon sa dughan. 17 Dayon gin-angot nila ang duha ka higot nga bulawan sa duha ka sulusingsing sa mga pamusod sang tabon sa dughan. 18 Dayon gin-angot nila ang duha ka punta sang duha ka higot sa duha ka enggaste kag gintakod nila ini sa mga taklap sa abaga sa atubangan sang efod. 19 Naghimo man sila sing duha ka sulusingsing nga bulawan kag gintakod ini sa duha ka pamusod sang tabon sa dughan sa sulod nayon nga nagaduot sa efod. 20 Dayon naghimo sila sing duha pa ka sulusingsing nga bulawan kag gintakod ini sa efod sa atubangan, sa ubos sang mga taklap sa abaga kag sa ibabaw sang hinabol nga paha sang efod. 21 Pagkatapos sini tanan, ginhigot nila ang asul nga higot sa mga sulusingsing sang tabon sa dughan kag sa mga sulusingsing sang efod, agod magpabilin ini sa iya naplastaran sa efod sa ibabaw sang hinabol nga paha, suno sa ginsugo ni Jehova kay Moises.
NOBIEMBRE 9-15
MGA BAHANDI SA PULONG SANG DIOS | LEVITICO 1-3
“Ang Katuyuan sang mga Dulot”
(Levitico 1:3) “‘Kon maghalad sia sing baka bilang dulot nga sinunog, dapat nga lalaki ini kag wala sing diperensia. Ihalad niya ini sing kinabubut-on sa atubangan ni Jehova sa puertahan sang tolda nga tilipunan.
(Levitico 2:1) “‘Kon may isa ka tawo nga maghalad sing uyas kay Jehova, dapat pino nga harina ang ihalad niya, kag bubuan niya ini sing lana kag butangan ini sing olibano.
(Levitico 2:12) “‘Mahimo ninyo ini ihalad kay Jehova bilang dulot halin sa inyo una nga patubas, apang indi ninyo ini pagdalhon sa halaran bilang makapahamuot nga kahumot.
it-2-E 525
Mga Dulot
Dulot nga sinunog. Ginahalad ang kabug-usan sang dulot nga sinunog sa Dios; wala sang bahin sang sapat ang mabilin sa nagahalad. (Ipaanggid ang Huk 11:30, 31, 39, 40.) Nalakip sa sini ang pangabay nga batunon ukon ipakita nga ginbaton ni Jehova ang dulot tungod sa sala nga kon kaisa ginalakip sa paghalad. Bilang “dulot nga sinunog” ginhatag ni Jesucristo sing bug-os ang iya kaugalingon.
it-2-E 528 ¶4
Mga Dulot
Dulot nga mga uyas. Ang dulot nga mga uyas ginahalad upod sa mga halad sa pag-ambitanay, dulot nga sinunog, kag dulot tungod sa sala, kag subong man una nga bunga; kon kaisa separar ini nga ginahalad. (Ex 29:40-42; Le 23:10-13, 15-18; Nu 15:8, 9, 22-24; 28:9, 10, 20, 26-28; kap 29) Ginahalad ini para apresyahon ang mga pagpakamaayo kag kabuganaan nga halin sa Dios. Masami nga ginalakipan ini sang lana kag olibano. Ang dulot nga uyas puede nga pino nga harina, ginsanlag nga uyas, ukon korte-pulseras nga mga tinapay ukon manipis nga mga tinapay nga ginluto sa pugon, matapan nga lutuan, ukon malapad nga takuri. Ang pila ka dulot nga uyas ginabutang sa halaran sang dulot nga sinunog, ang pila ginakaon sang mga saserdote, kag kon ginahalad ini upod sa halad sa pag-ambitanay nagakaon man ang nagahalad sini. (Le 6:14-23; 7:11-13; Nu 18:8-11) Ang tanan nga ginahalad nga dulot nga uyas sa halaran dapat wala sing lebadura ukon “dugos” (nagapatuhoy sa duga sang mga igos ukon mga prutas) nga posible magapaalsa sini.—Le 2:1-16.
(Levitico 3:1) “‘Kon ang iya dulot isa ka halad sa pag-ambitanay kag halin ini sa mga baka, lalaki man ukon babayi, dapat ihalad niya sa atubangan ni Jehova ang sapat nga wala sing diperensia.
it-2-E 526 ¶1
Mga Dulot
Halad sa pag-ambitanay (ukon dulot para sa paghidait). Ang pagbaton ni Jehova sang halad sa pag-ambitanay nagapahangop sang maayo ukon mahidaiton nga kaagtanan sa iya. Ang naghalad upod sa iya panimalay nagasalo sa pagkaon sang halad (sa luwang sang tabernakulo; suno sa tradisyon, may mga payagpayag nga ginatukod sa luwang nga ginkurtinahan ang palibot; sa templo, may gin-aman nga mga kuarto nga puede makan-an). May parte ang saserdote nga naghalad, kag ang mga saserdote nga nagaalagad sa sina nga tion. Daw pareho lang nga ginbaton ni Jehova ang mahumot nga aso sang ginsunog nga sapay. Ang dugo nga nagarepresentar sang kabuhi ginahatag sa Dios bilang iya parte. Gani ang mga saserdote, ang naghalad nga mga sumilimba, kag si Jehova daw pareho lang nga nagasalo sa pagkaon, nga nagapahangop sang ila maayo nga kaangtanan sa isa kag isa. Ang indi matinlo (ang tanan nga pagkadimatinlo nga ginsambit sa Kasuguan) ukon ang nagkaon sang unod nga sobra na sa gintalana nga tion (sa mainit nga klima ang unod maumpisa na dunot) nga nagapakigbahin sa sini pagapatyon. Ginhigkuan niya ukon wala ginpakabalaan ang pagkaon, bangod indi sia matinlo ukon nagkaon sia sang indi matinlo sa atubangan ni Jehova nga Dios. Pagpakita ini sang indi pagtahod sa sagrado nga mga butang.—Le 7:16-21; 19:5-8.
Pagkutkot sing Espirituwal nga mga Hiyas
(Levitico 2:13) “‘Timplahan mo sing asin ang tanan mo nga dulot nga uyas; kag indi ka magtugot nga wala sing asin ang imo dulot nga uyas nga nagapahanumdom sa imo sang katipan sang Dios. Timplahi sing asin ang tanan mo nga dulot.
(Ezequiel 43:24) Idulot mo ini kay Jehova. Dapat ini sabwagan sing asin sang mga saserdote kag ihalad nila subong dulot nga sinunog kay Jehova.
Talalupangdon nga mga Punto Gikan sa Tulun-an nga Levitico
2:13—Ngaa dapat ‘timplahan sing asin ang tanan nga halad’? Wala ini ginhimo agod panamiton ang sabor sang mga halad. Sa bug-os nga kalibutan, ang asin ginagamit sa pagpreserbar. Mahimo nga gindulot ini upod sa mga halad bangod nagalaragway ini sing kahilwayan sa kaduluntan.
(Levitico 3:17) “‘Indi gid kamo magkaon sing bisan ano nga sapay ukon bisan ano nga dugo. Isa ini ka pagsulundan tubtob san-o sa inyo mga kaliwatan, bisan diin kamo mag-istar.’”
it-1-E 813
Sapay
Ang rason nga gindumili sang kasuguan. Sa Kasuguan nga katipan, ang dugo kag ang sapay para lamang kay Jehova. Ang kabuhi yara sa dugo. Si Jehova lamang ang makahatag sang kabuhi gani iya ini. (Le 17:11, 14) Ang sapay ginakabig nga pinakamaayo nga bahin sang unod sang sapat. Ang paghalad sang sapay sang sapat maathag nga nagakilala nga ang pinakamayo nga bahin iya ni Jehova, ang isa nga nagaaman sing kabuganaan. Magapakita man ini nga handom gid sang nagahalad nga ihatag ang pinakamaayo sa Dios. Bangod nagasimbolo ini sang debosyon sang mga Israelinhon nga ihatag ang ila pinakamaayo kay Jehova, ginsugo sila nga paasuhon ini sa halaran bilang “kalan-on” kag “kahumot” para sa iya. (Le 3:11, 16) Gani, ginakabig sang kasuguan ang pagkaon sang sapay nga pagkuha sang para sa Dios, kag pagpahilabot sa kinamatarong ni Jehova. Kamatayon ang silot sa pagkaon sang sapay. Pero, indi pareho sa dugo, ang sapay puede gamiton sa iban nga katuyuan. Halimbawa sini, ang sapay sang napatay nga sapat ukon sang sapat nga ginpatay sang iban nga sapat.—Le 7:23-25.
Talalupangdon nga mga Punto Gikan sa Tulun-an nga Levitico
3:17. Sanglit ang tambok ginakabig nga amo ang pinakaali nga bahin, ang pagdumili sa pagkaon sini maathag nga nagpatudok sa mga Israelinhon nga ang pinakamaayo nga bahin natungod kay Jehova. (Genesis 45:18) Nagapahanumdom ini sa aton nga dapat naton ihatag ang aton pinakaali kay Jehova.—Hulubaton 3:9, 10; Colosas 3:23, 24.
Pagbasa sa Biblia
(Levitico 1:1-17) Gintawag ni Jehova si Moises kag nagpakighambal sa iya halin sa tolda nga tilipunan. Nagsiling sia: 2 “Magpakighambal ka sa mga Israelinhon, kag isiling mo sa ila, ‘Kon ang bisan sin-o sa inyo maghalad sing sapat kay Jehova, dapat nga halin ini sa inyo mga baka ukon sa inyo mga karnero ukon mga kanding. 3 “‘Kon maghalad sia sing baka bilang dulot nga sinunog, dapat nga lalaki ini kag wala sing diperensia. Ihalad niya ini sing kinabubut-on sa atubangan ni Jehova sa puertahan sang tolda nga tilipunan. 4 Itungtong niya ang iya kamot sa ulo sang dulot nga sinunog, kag batunon ini agod mapatawad ang iya mga sala. 5 “‘Dayon ihawon ang torite nga baka sa atubangan ni Jehova. Ihalad sang mga saserdote nga mga anak ni Aaron ang dugo kag iwisik ini sa palibot sang halaran, nga yara sa puertahan sang tolda nga tilipunan. 6 Dapat panitan kag hiwahiwaon ang dulot nga sinunog. 7 Butangan sang mga saserdote nga mga anak ni Aaron sing kalayo ang halaran kag iplastar nila sing maayo ang mga kahoy sa kalayo. 8 Iplastar sang mga saserdote nga mga anak ni Aaron ang mga hiniwa lakip ang ulo kag ang sapay sa ibabaw sang mga kahoy nga yara sa kalayo sa halaran. 9 Hugasan ang mga tinai kag ang mga batiis sini, kag paasuhon ini tanan sang saserdote sa halaran bilang dulot nga sinunog, isa ka dulot nga sinunog sa kalayo nga ang kahumot sini makapahamuot kay Jehova. 10 “‘Kon maghalad sia sing tinday nga karnero ukon kanding bilang dulot nga sinunog, dapat nga lalaki ini kag wala sing diperensia. 11 Ihawon ini sa aminhan nga kilid sang halaran sa atubangan ni Jehova, kag iwisik sang mga saserdote nga mga anak ni Aaron ang dugo sini sa palibot sang halaran. 12 Hiwahiwaon niya ini pati ang ulo kag sapay sini, kag iplastar ini sang saserdote sa ibabaw sang mga kahoy nga yara sa kalayo sa halaran. 13 Hugasan niya ang mga tinai kag ang mga batiis, kag ihalad ini tanan sang saserdote kag paasuhon ini sa halaran. Isa ini ka dulot nga sinunog, isa ka dulot nga sinunog sa kalayo nga ang kahumot sini makapahamuot kay Jehova. 14 “‘Apang, kon maghalad sia sing mga pispis bilang dulot nga sinunog kay Jehova, maghalad sia sing tukmo ukon gamay pa nga pating. 15 Ihalad ini sang saserdote sa halaran kag pilasan niya ang liog sini kag paasuhon ini sa halaran, apang dapat patuluon ang dugo sini sa kilid sang halaran. 16 Dapat niya kuhaon ang butsi kag mga bulbol sini kag ihaboy niya ini sa tupad sang halaran, sa sidlangan nayon, sa ginabutangan sang abo. 17 Pihakon niya ini sa pakpak, apang indi niya ini pagtungaon. Dayon paasuhon ini sang saserdote sa halaran sa ibabaw sang mga kahoy nga yara sa kalayo. Isa ini ka dulot nga sinunog, isa ka dulot nga sinunog sa kalayo nga ang kahumot sini makapahamuot kay Jehova.
NOBIEMBRE 16-22
MGA BAHANDI SA PULONG SANG DIOS | LEVITICO 4-5
“Ihatag kay Jehova ang Imo Pinakamaayo”
(Levitico 5:5, 6) “‘Kon makasala sia may kaangtanan sa isa sini nga mga butang, dapat sia magtu-ad kon paano sia nakasala. 6 Magdala man sia kay Jehova sing dulot tungod sa kasal-anan, isa ka kordero nga babayi ukon isa ka tinday nga kanding nga babayi, bilang isa ka dulot tungod sa sala. Dayon ang saserdote magahimo sing pagtumbas para sa iya sala.
it-2-E 527 ¶9
Mga Dulot
Dulot tungod sa kasal-anan. Ginahalad man ang dulot tungod sa kasal-anan bangod sang sala. Para ini sa indi kinaandan nga mga sala, kag may gamay ini nga kinatuhayan sa iban nga dulot tungod sa sala kay paagi sini mapun-an ukon mapasag-uli ang isa ka kinamatarong. Posible nga ginlapas ang kinamatarong ni Jehova ukon ang kinamatarong sang iya balaan nga pungsod. Ang dulot tungod sa kasal-anan ginahatag para mapun-an ang nalapas nga kinamatarong ni Jehova, ukon mapasag-uli ukon matigayon liwat ang espisipiko nga kinamatarong sa katipan sang mahinulsulon nga nakasala kag indi na pag-ipadapat sa iya ang silot nga resulta sang iya sala.—Ipaangid ang Isa 53:10.
(Levitico 5:7) “‘Apang, kon indi niya masarangan ang isa ka karnero, magdala sia kay Jehova bilang iya dulot tungod sa kasal-anan sing duha ka tukmo ukon duha ka gamay pa nga pating, ang isa dulot tungod sa sala kag ang isa dulot nga sinunog.
Ginakonsiderar Niya ang Aton mga Limitasyon
Ang Kasuguan nagsiling parte sa mahigugmaon nga konsiderasyon ni Jehova: “Apang kon indi niya masarangan ang isa ka karnero, magdala sia kay Jehova bilang iya dulot tungod sa kasal-anan sing duha ka tukmo ukon duha ka gamay nga pating.” (Bersikulo 7) Ang mga tinaga nga “kon indi niya masarangan” nagapahangop nga ginabaton man sang Dios ang mga halad nga masarangan lang sang isa nga nakasala. Kon pigado gid ang isa ka Israelinhon kag indi makasarang maghalad sang karnero, ginabaton sang Dios ang iya masarangan nga amo lamang ang duha ka tukmo ukon duha ka gamay nga pating.
(Levitico 5:11) “‘Kon indi niya masarangan ang duha ka tukmo ukon duha ka gamay pa nga pating, magdala sia bilang dulot para sa iya sala sing ikanapulo nga bahin sang isa ka efa nga pino nga harina. Indi niya ini pagbutangan sing lana ukon sing olibano, kay isa ini ka dulot tungod sa sala.
Ginakonsiderar Niya ang Aton mga Limitasyon
Kamusta naman kon indi pa gid niya masarangan ang paghalad sing duha ka pispis? Ang Kasuguan nagsiling: “Magdala sia bilang dulot para sa iya sala sing ikanapulo nga bahin sang isa ka efa nga pino nga harina.” (Bersikulo 11) Para sa mga pigado gid, naghatag si Jehova sing konsiderasyon. Puede sila makahatag sing halad nga wala sing dugo para sa ila sala. Sa Israel, bisan pigado ang isa, matumbasan gihapon niya ang iya sala kag matigayon ang maayo nga kaangtanan sa Dios.
Pagkutkot sing Espirituwal nga mga Hiyas
(Levitico 5:1) “‘Kon ang isa ka tawo makasala bangod nabatian niya ang panawagan sa publiko sa pagtestigo kag saksi sia ukon nakita niya ukon nabatian niya ang tuhoy sini, apang wala niya ginsugid ini, manabat sia tungod sini nga sala.
Magtuon sa Mainunungon nga mga Alagad ni Jehova
14 Ang kaayo makabulig sa imo kon nagapili kon sin-o dapat ang unahon nga unungan. Halimbawa, nahibal-an mo kag napat-od nga ang isa ka utod nakahimo sing serioso nga sala. Mahimo luyag mo mangin mainunungon sa iya, ilabi na kon suod mo sia nga abyan ukon paryente. Pero kon taguon mo ang iya sala, indi ka mainunungon sa Dios. Ang pagkamainunungon kay Jehova amo dapat ang imo unahon. Pareho kay Natan, mangin mainayuhon pero mangin malig-on man. Palig-una ang imo abyan ukon paryente nga magpabulig sa mga gulang. Kon indi niya ini paghimuon sa sulod sang makatarunganon nga kalawigon sang tion, ang pagkamainunungon sa Dios magapahulag sa imo nga isugid ini sa mga gulang. Kon himuon mo ini, mangin mainunungon ka kay Jehova kag mangin mainayuhon ka sa imo abyan ukon paryente, kay malulo sia nga tadlungon sang Cristiano nga mga gulang.—Basaha ang Levitico 5:1; Galacia 6:1.
(Levitico 5:15, 16) “Kon ang isa ka tawo mangin indi matutom bangod nakasala sia sing indi hungod batok sa balaan nga mga butang ni Jehova, magdala sia kay Jehova bilang dulot tungod sa kasal-anan sing isa ka karnero nga lalaki nga wala sing diperensia halin sa panong. Ang saserdote ang magasiling kon pila ka siklo nga pilak ang bili sang karnero nga lalaki kag dapat nga suno ini sa talaksan nga timbangan sang balaan nga duog. 16 Para sa sala nga nahimo niya batok sa balaan nga duog, amo sina ang ibayad niya kag dugangan niya ini sing 20 porsiento sang bili sini. Ihatag niya ini sa saserdote, agod ang saserdote maghimo sing pagtumbas para sa iya paagi sa karnero nga lalaki nga dulot tungod sa kasal-anan, kag patawaron sia.
it-1-E 1130 ¶2
Pagkabalaan
Mga Sapat kag Patubas. Ang panganay nga lalaki nga baka, karnero, kag kanding, ginatamod nga balaan para kay Jehova kag wala ginagawad. Ginahalad ini, kag may parte nga makadto sa mga saserdote nga ginpakabalaan. (Nu 18:17-19) Balaan ang una nga mga bunga kag ang ginahatag nga ikanapulo, pati ang tanan nga halad kag tanan nga dulot nga ginpakabalaan para sa pag-alagad sa santuaryo. (Ex 28:38) Ang tanan nga butang nga balaan kay Jehova sagrado kag indi dapat pagbalewalaon ukon gamiton sa kinaandan ukon indi balaan nga paagi. Ang isa ka halimbawa sini amo ang kasuguan parte sa paghatag sing ikanapulo. Kon ang isa ka tawo may ginpain para ihatag niya bilang ikanapulo, halimbawa, sa gin-ani niya nga trigo, kag sia ukon ang iya pamilya indi hungod nga naggamit sini sa ila balay, ibutang naton ginluto niya ini, nalapas sini nga tawo ang kasuguan sang Dios parte sa balaan nga mga butang. Ginapatuman sang Kasuguan nga ulian niya sa santuaryo ang pareho nga kantidad kag dugangan ini sing 20 porsiento sang bili sini. Mahalad pa gid sia sing lalaki nga karnero nga wala sing diperensia halin sa panong. Gani ginapakita sini nga dapat gid tahuron ang balaan nga mga butang nga para kay Jehova.—Le 5:14-16.
Pagbasa sa Biblia
(Levitico 4:27–5:4) “‘Kon ang isa ka tawo sa katawhan makasala sing indi hungod kag nakahimo sia sing butang nga ginsugo ni Jehova nga indi dapat paghimuon, 28 ukon kon mahibaluan niya nga nakasala sia, dapat sia maghalad sing isa ka tinday nga kanding nga babayi nga wala sing diperensia para sa sala nga iya nahimo. 29 Itungtong niya ang iya kamot sa ulo sang dulot tungod sa sala kag ihawon niya ang dulot tungod sa sala sa duog diin ginaihaw ang dulot nga sinunog. 30 Kuhaon sang saserdote paagi sa iya tudlo ang iban nga dugo sini kag ibutang ini sa mga sungay sang halaran sang dulot nga sinunog, kag ibubo niya ang tanan nga nabilin nga dugo sini sa tiilan sang halaran. 31 Kuhaon niya ang tanan nga sapay sini, subong nga ginakuha ang sapay sang halad sa pag-ambitanay, kag paasuhon ini sang saserdote sa halaran nga ang kahumot sini makapahamuot kay Jehova; kag ang saserdote magahimo sing pagtumbas para sa iya sala, kag patawaron sia. 32 “‘Apang kon maghalad sia sing isa ka kordero bilang dulot tungod sa sala, dapat sia magdala sing kordero nga babayi nga wala sing diperensia. 33 Itungtong niya ang iya kamot sa ulo sang dulot tungod sa sala kag ihawon ini bilang dulot tungod sa sala sa duog diin ginaihaw ang dulot nga sinunog. 34 Kuhaon sang saserdote paagi sa iya tudlo ang iban nga dugo sang dulot tungod sa sala kag ibutang ini sa mga sungay sang halaran sang dulot nga sinunog, kag ibubo niya ang tanan nga nabilin nga dugo sini sa tiilan sang halaran. 35 Kuhaon niya ang tanan nga sapay sini pareho sang pagkuha sa sapay sang tinday nga karnero nga lalaki nga halad sa pag-ambitanay, kag paasuhon ini sang saserdote sa halaran sa ibabaw sang mga dulot nga ginasunog sa kalayo para kay Jehova; kag ang saserdote magahimo sing pagtumbas para sa sala nga nahimo niya, kag patawaron sia.
5 “‘Kon ang isa ka tawo makasala bangod nabatian niya ang panawagan sa publiko sa pagtestigo kag saksi sia ukon nakita niya ukon nabatian niya ang tuhoy sini, apang wala niya ginsugid ini, manabat sia tungod sini nga sala. 2 “‘Ukon kon ang isa ka tawo makatandog sing bisan ano nga indi matinlo, patay nga lawas sang indi matinlo nga ilahas nga sapat, patay nga lawas sang indi matinlo nga mahagop nga sapat, ukon sang indi matinlo nga nagapanong nga mga sapat, nakasala na sia kag mangin indi matinlo sia bisan pa wala niya ini mahibaluan. 3 Ukon kon ang isa ka tawo wala makahibalo nga nakatandog sia sing bisan ano nga kahigkuan sang tawo, bisan ano nga butang nga nagahimo sa iya nga indi matinlo, kag sa ulihi nahibaluan niya ini, nakasala sia. 4 “‘Ukon kon ang isa ka tawo padasudaso nga magpanumpa sa paghimo sing isa ka butang, maayo man ukon malain, kag wala sia makahibalo sini, apang sa ulihi narealisar niya nga nagpanumpa sia sing padasudaso, nakasala sia.
NOBIEMBRE 23-29
MGA BAHANDI SA PULONG SANG DIOS | LEVITICO 6-7
“Halad Bilang Pagpasalamat”
(Levitico 7:11, 12) “‘Amo ini ang kasuguan tuhoy sa halad sa pag-ambitanay nga ihalad sang bisan sin-o kay Jehova: 12 Kon ihalad niya ini bilang pagpasalamat, ihalad niya upod sa halad sa pagpasalamat ang korte-pulseras nga mga tinapay nga wala sing lebadura nga ginsamuan sing lana, ang manipis nga mga tinapay nga wala sing lebadura nga ginpalhitan sing lana, kag ang nasamo sing maayo nga pino nga harina nga ginhimo nga korte-pulseras nga mga tinapay nga ginsamuan sing lana.
Ang mga Leksion nga Matun-an Naton sa Libro sang Levitico
9 Ikaduha nga leksion: Ginaalagad naton si Jehova bangod gusto naton pasalamatan sia. Matun-an naton ini nga leksion samtang ginabinagbinag naton ang parte sa halad sa pag-ambitanay nga ginahimo sang mga Israelinhon sang una. Sa libro sang Levitico, matun-an naton nga makahalad ang isa ka Israelinhon sang halad sa pag-ambitanay “bilang pagpasalamat.” (Lev. 7:11-13, 16-18) Indi kinahanglan nga himuon niya ini, pero nagahalad sia bangod gusto niya ini himuon. Kinabubut-on ini nga ginahimo sang isa bangod palangga niya ang iya Dios, nga si Jehova. Ang karne sang ginhalad nga sapat kaunon sang isa nga naghalad, sang iya pamilya, kag sang mga saserdote. Pero may mga parte sang sapat nga para lang kay Jehova. Ano ini?
(Levitico 7:13-15) Ihalad niya ang iya halad upod sa korte-pulseras nga mga tinapay nga may lebadura kag sa iya mga halad sa pag-ambitanay bilang pagpasalamat. 14 Ihalad niya kay Jehova ang isa halin sa tagsa ka dulot bilang sagrado nga bahin; mangin iya ini sang saserdote nga nagawisik sing dugo sang mga halad sa pag-ambitanay. 15 Ang karne sang iya mga halad sa pag-ambitanay bilang pagpasalamat kaunon sa adlaw nga ginahalad niya ini. Indi sia magbilin sini tubtob sa aga.
Mga Halad nga Nagpahamuot sa Dios
15 Ang isa pa ka boluntaryo nga halad amo ang halad-sa-paghidait, nga ginlaragway sa Levitico kapitulo 3. Ang ngalan sarang man mabadbad subong “halad sang mga dulot sa paghidait.” Sa Hebreo, ang tinaga nga “paghidait” nagakahulugan indi lamang sang kahilwayan sa inaway ukon gamo. “Sa Biblia, nagakahulugan ini sini, kag subong man sang kahimtangan ukon kaangtanan nga may paghidait sa Dios, kabuganaan, kasadya, kag kalipay,” siling sang libro nga Studies in the Mosaic Institutions. Sa amo, ang mga halad-sa-paghidait gindulot, indi agod maangkon ang paghidait upod sa Dios, subong nga daw nagauloulo sa iya, kundi agod ipabutyag ang pasalamat ukon saulugon ang ginpakamaayo nga kahimtangan nga may paghidait upod sa Dios nga ginaagom sang mga ginakahamut-an niya. Ang mga saserdote kag mga nagdulot nagkaon sang halad sa tapos ang dugo kag tambok madulot kay Jehova. (Levitico 3:17; 7:16-21; 19:5-8) Sa matahom kag simbuliko nga paagi, ang nagdulot, mga saserdote, kag si Jehova nga Dios nagsaluhay sa pagkaon, nga nagapahangop sang mahidaiton nga kaangtanan nga nagaluntad sa tunga nila.
(Levitico 7:20) “‘Apang kon ang isa ka tawo nga indi matinlo magkaon sing karne sang halad sa pag-ambitanay, nga para kay Jehova, dapat patyon ina nga tawo.
Mga Halad sang Pagdayaw nga Nagapahamuot kay Jehova
8 Kamusta naman ang tawo nga nagadulot? Ang Kasuguan nagasiling nga ang bisan sin-o nga nagakari sa atubangan ni Jehova dapat nga matinlo kag walay dagta. Ang isa nga nadagtaan tungod sa bisan ano nga rason dapat anay magdulot sing halad-tungod-sa-sala ukon halad-tungod-sa-paglapas agod mapasag-uli ang iya matinlo nga tindog sa atubangan ni Jehova agod ang iya halad-nga-sinunog ukon halad-sa-paghidait mangin kalahamut-an sa Iya. (Levitico 5:1-6, 15, 17) Busa, nahangpan bala naton ang importansia sang pirme nga paghupot sing matinlo nga tindog sa atubangan ni Jehova? Kon luyag naton nga ang aton pagsimba mangin kalahamut-an sa Dios, dapat kita mangin maabtik sa pagtadlong sa bisan ano man nga paglapas sa mga kasuguan sang Dios. Dapat kita mangin maabtik sa pagtigayon sang hatag-Dios nga mga paagi para sa bulig—ang “tigulang nga mga lalaki sang kongregasyon” kag ang “nagatumbas nga halad para sa aton mga sala,” si Jesucristo.—Santiago 5:14; 1 Juan 2:1, 2.
Pagkutkot sing Espirituwal nga mga Hiyas
(Levitico 6:13) Padayon nga padabdabon ang kalayo sa halaran. Indi ini dapat mapatay.
it-1-E 833 ¶1
Kalayo
Ang koneksion sini sa tabernakulo kag sa templo. Ang kalayo bahin sang pagsimba sa tabernakulo kag sang ulihi sa templo. Kada aga kag sa ulot sang duha ka gab-i, ang mataas nga saserdote magasunog sang incienso sa halaran sang incienso. (Ex 30:7, 8) Ginapatuman sang kasuguan sang Dios nga ang kalayo sa halaran sang dulot nga sinunog dapat padayon nga nagadabdab. (Le 6:12, 13) Suno sa tradisyon sang mga Judiyo, madamo sa ila ang nagapati nga ang kalayo sa halaran sadto milagruso nga ginapadabdab sang Dios, pero wala ini ginasupurtaran sang Kasulatan. Suno sa nahauna nga instruksion ni Jehova kay Moises, ang mga anak nga lalaki ni Aaron ‘magabutang sing kalayo sa halaran kag iplastar nila sing maayo ang mga kahoy sa kalayo’ antes ibutang ang dulot sa halaran. (Le 1:7, 8) Ginhimo ini sa tapos maordenahan ang kahimusan sang pagkasaserdote sang panimalay ni Aaron, kag gani nahalad na ang mga dulot para sa pag-ordena. Sa sina nga tion, ang kalayo halin kay Jehova, nga mahimo halin sa panganod sa ibabaw sang tabernakulo, naglamon sa dulot sa ibabaw sang halaran. Ini nga kalayo, wala ginpadala sang Dios para padabdabon ang gatong sang halaran kundi para sa ‘pagsunog sang dulot nga sinunog kag sang mga sapay sa halaran.’ Gani, ang kalayo nga nagadabdab sa halaran indi lang ang kalayo halin sa Dios kundi pati na ang kalayo nga yara na nga daan sa halaran. (Le 8:14–9:24) Amo man sini ang natabo sa tion sang dedikasyon sang templo. Ginlamon sang kalayo ang mga dulot sa tapos makapangamuyo si Solomon.—2Cr 7:1; tan-awa man ang Huk 6:21; 1Ha 18:21-39; 1Cr 21:26 para sa iban pa nga halimbawa sang paggamit ni Jehova sang kalayo para batunon ang mga dulot sang iya mga alagad.
(Levitico 6:25) “Isiling mo kay Aaron kag sa iya mga anak, ‘Amo ini ang kasuguan tuhoy sa dulot tungod sa sala: Ihawon ninyo ang dulot tungod sa sala sa atubangan ni Jehova sa duog diin ginaihaw ang dulot nga sinunog. Balaan gid ini nga butang.
si-E 27 ¶15
Libro sang Biblia Numero 3—Levitico
15 (3) Ang dulot tungod sa sala ginapatuman kon ang isa nakahimo sing wala gintuyo, ukon indi hungod nga sala. Ang klase sang sapat nga ihalad depende kon kay sin-o sala ang ginatumbasan—kon bala iya sang saserdote, sang katawhan sa kabilugan, sang pangulo, ukon sang isa ka ordinaryo nga tawo. Indi pareho sa kinabubut-on nga dulot nga sinunog kag dulot sa pag-ambitanay para sa mga indibiduwal, ang dulot tungod sa sala dapat gid ihatag.—4:1-35; 6:24-30.
Pagbasa sa Biblia
(Levitico 6:1-18) Nagsiling si Jehova kay Moises: 2 “Kon ang isa ka tawo makasala kag indi matutom kay Jehova bangod sang pagdaya niya sa iya isigkatawo tuhoy sa isa ka butang nga gintugyan ukon ginpatago sa iya, ukon nagapangawat sia ukon nagadaya sa iya isigkatawo, 3 ukon makakita sia sing butang nga nadula kag magbinutig sia tuhoy sa sini, kag magpanumpa sia sing binutig nga wala sia sing nahimo nga sala, amo ini ang himuon niya: 4 Kon nakasala sia, iuli niya ang butang nga iya ginkawat, ginkilkil, ginkuha paagi sa pagdaya, ang butang nga gintugyan sa iya, ukon ang nadula nga butang nga nakita niya, 5 ukon ang bisan anong butang nga tuhoy sini nagpanumpa sia sing binutig, kag bayaran niya ang bug-os nga kantidad sini, kag dugangan niya ini sing 20 porsiento sang kantidad sini. Ihatag niya ini sa tag-iya sa adlaw nga mapamatud-an nga nakasala sia. 6 Magdala sia sa saserdote sang iya dulot tungod sa kasal-anan para kay Jehova sing isa ka karnero nga lalaki nga wala sing diperensia suno sa husto nga bili sini, bilang dulot tungod sa kasal-anan. 7 Ang saserdote maghimo sang pagtumbas para sa iya sala sa atubangan ni Jehova, kag patawaron sia sa ginhimo niya nga tungod sini nakasala sia.” 8 Nagsiling pa si Jehova kay Moises: 9 “Sugua si Aaron kag ang iya mga anak, kag isiling mo sa ila, ‘Amo ini ang kasuguan tuhoy sa dulot nga sinunog: Ang dulot nga sinunog magapabilin sa kalayo sa ibabaw sang halaran sa bug-os nga gab-i tubtob sa aga, kag ang kalayo padayon nga magadabdab sa halaran. 10 Isuksok sang saserdote ang iya opisyal nga bayo nga linen kag ang iya karsonsilyo nga linen bilang tabon sa iya lawas. Dayon kuhaon niya ang abo sang dulot nga sinunog nga ginsunog sang kalayo sa halaran kag ibutang niya ini sa tupad sang halaran. 11 Dayon ubahon niya ang iya mga bayo kag magsuksok sia sing iban nga mga bayo, kag dalhon niya ang abo sa matinlo nga duog sa gua sang kampo. 12 Padayon nga magdabdab ang kalayo sa halaran. Indi ini dapat mapatay. Gatungan ini sang saserdote sing kahoy kada aga kag iplastar sa ibabaw sini ang dulot nga sinunog, kag paasuhon niya sa sini ang mga sapay sang halad sa pag-ambitanay. 13 Padayon nga padabdabon ang kalayo sa halaran. Indi ini dapat mapatay. 14 “‘Amo ini ang kasuguan tuhoy sa dulot nga uyas: Kamo nga mga anak ni Aaron amo ang maghalad sini kay Jehova sa atubangan sang halaran. 15 Ang isa sa ila magkuha halin sa dulot nga uyas sing isa ka hakop nga pino nga harina nga may lana kag sing tanan nga olibano sa dulot nga uyas, kag paasuhon niya ini sa halaran bilang makapahamuot nga kahumot nga isa ka pahanumdom nga halad para kay Jehova. 16 Ang mabilin sa sini kaunon ni Aaron kag sang iya mga anak. Kaunon nila ini nga mga tinapay nga wala sing lebadura sa balaan nga duog. Kaunon nila ini sa luwang sang tolda nga tilipunan. 17 Indi ini paglutuon nga may lebadura. Ginahatag ko ini bilang parte nila halin sa mga dulot nga sinunog sa kalayo para sa akon. Balaan gid ini nga butang, pareho sang dulot tungod sa sala kag pareho sang dulot tungod sa kasal-anan. 18 Ang tagsa ka lalaki nga mga anak ni Aaron magakaon sini. Amo ini ang ila permanente nga parte sa tanan ninyo nga kaliwatan, halin sa mga dulot nga sinunog sa kalayo para kay Jehova. Ang tanan nga magtandog sa sini mangin balaan.’”
NOBIEMBRE 30–DISIEMBRE 6
MGA BAHANDI SA PULONG SANG DIOS | LEVITICO 8-9
“Pamatuod sang Pagpakamaayo ni Jehova”
(Levitico 8:6-9) Gani ginpapalapit ni Moises si Aaron kag ang iya mga anak kag ginpapaligo sila. 7 Pagkatapos sini, ginpasuksok niya kay Aaron ang malaba nga bayo, ginwagkusan sia sing paha, ginpasuksok sa iya ang wala-pako nga bayo kag ang efod, kag ginwagkus niya sing maayo ang hinabol nga paha para sa efod. 8 Dayon ginpasuksok niya sa iya ang tabon sa dughan kag ginbutang sa tabon sa dughan ang Urim kag ang Tumim. 9 Dayon ginbutang niya ang turbante sa iya ulo, kag gintakod niya sa atubangan sang turbante ang mahining nga pidaso nga bulawan, ang balaan nga tanda sang pagdedikar, suno sa ginsugo ni Jehova kay Moises.
(Levitico 8:12) Pagkatapos sini, ginbubo niya ang iban nga inughaplas nga lana sa ulo ni Aaron kag ginhaplasan sia agod mapakabalaan sia.
it-1-E 1207
Pag-ordena
Ginhugasan ni Moises si Aaron kag ang mga anak niya nga sanday Nadab, Abihu, Eleazar, kag Ithamar (ukon, ginsugo niya sila nga manghugas). Gingamit niya ang tubig sa saway nga labador sa luwang kag ginpasuksok kay Aaron ang panapton sang mataaas nga saserdote. (Nu 3:2, 3) Ining matahom nga panapton nagapakita nga ginhatagan si Aaron sang pinasahi nga responsibilidad kag palangakuan. Dayon ginhaplasan ni Moises ang tabernakulo, ang tanan sini nga kasangkapan kag kagamitan, kag ang halaran para sa dulot nga sinunog, lakip ang labador kag ang mga suludlan nga ginagamit upod sa sini. Gani, nangin balaan ini tanan, kag napain para sa eksklusibo nga paggamit kag pag-alagad sa Dios. Sang ulihi, ginhaplasan ni Moises si Aaron sang lana paagi sa pagbubo sini sa iya ulo.—Le 8:6-12; Ex 30:22-33; Sa 133:2.
(Levitico 9:1-5) Sang ikawalo nga adlaw, gintawag ni Moises si Aaron kag ang iya mga anak kag ang mga gulang sang Israel. 2 Nagsiling sia kay Aaron: “Magkuha ka sing tinday nga baka nga wala sing diperensia para sa dulot tungod sa sala kag sing karnero nga lalaki nga wala sing diperensia para sa dulot nga sinunog, kag ihalad ini sa atubangan ni Jehova. 3 Apang isiling mo sa mga Israelinhon, ‘Magkuha kamo sing isa ka kanding nga lalaki para sa dulot tungod sa sala, kag sing isa ka tinday nga baka kag isa ka tinday nga karnero nga lalaki, nga ang kada isa nagaedad sing isa ka tuig kag wala sing diperensia, para sa dulot nga sinunog. 4 Magkuha man kamo sing isa ka toro nga baka kag isa ka karnero nga lalaki para sa mga halad sa pag-ambitanay nga ihalad sa atubangan ni Jehova, kag sing dulot nga uyas nga ginsamuan sing lana, kay subong nga adlaw magapakita si Jehova sa inyo.’” 5 Gani gindala nila ini tanan sa atubangan sang tolda nga tilipunan suno sa ginsugo ni Moises. Dayon ang bug-os nga katilingban nagpalapit kag nagtindog sa atubangan ni Jehova.
it-1-E 1208 ¶8
Pag-ordena
Sa ikawalo nga adlaw, bangod nasangkapan na sing bug-os kag naordenahan, sa nahauna nga tion nagpangalagad ang mga saserdote, (nga wala sing bulig ni Moises), para sa pagtumbas sa sala sang pungsod sang Israel, indi lang tungod sang ila pagkamakasasala kundi sang ila bag-o lang nga paglapas parte sa bulawan nga tinday, nga wala gid nagpahamuot kay Jehova. (Le 9:1-7; Ex 32:1-10) Sang manugtapos na sila sa ila una nga pagpangalagad bilang bag-o lang naordenahan nga mga saserdote, ginpakita ni Jehova ang iya kahamuot kag pagkompirmar sa ila palangakuan paagi sa pagpadala sing kalayo nga naglamon sa nabilin nga halad sa halaran. Pat-od nga ini nga kalayo naghalin sa haligi nga panganod nga yara sa ibabaw sang tabernakulo.—Le 9:23, 24.
(Levitico 9:23, 24) Sang ulihi, nagsulod si Moises kag si Aaron sa tolda nga tilipunan, dayon naggua sila kag ginpakamaayo ang katawhan. Nakita sang tanan nga katawhan ang himaya ni Jehova, 24 kag may kalayo nga naghalin kay Jehova kag ginsunog sini ang dulot nga sinunog kag ang mga sapay sa halaran. Sang makita ini sang tanan nga katawhan, nagsinggit sila kag nagyaub.
Ang mga Leksion nga Matun-an Naton sa Libro sang Levitico
13 Ikap-at nga leksion: Ginapakamaayo ni Jehova ang dutan-on nga bahin sang iya organisasyon. Binagbinaga ang natabo sang ginpatindog ang tabernakulo sa tiilan sang Bukid Sinai sang 1512 B.C.E. (Ex. 40:17) Naghiwat si Moises sang seremonya sa pagtangdo kay Aaron kag sa iya mga anak nga lalaki bilang mga saserdote. Nagtipon ang pungsod sang Israel para makita nila ang mga saserdote nga maghimo sang ila pinakauna nga paghalad sang mga sapat. (Lev. 9:1-5) Paano ginpakita ni Jehova nga ginasakdag niya ang bag-o nga gintangdo nga mga saserdote? Samtang ginapakamaayo nanday Aaron kag Moises ang katawhan, ginsunog sing bug-os sang kalayo halin kay Jehova ang halad sa halaran.—Basaha ang Levitico 9:23, 24.
Pagkutkot sing Espirituwal nga mga Hiyas
(Levitico 8:6) Gani ginpapalapit ni Moises si Aaron kag ang iya mga anak kag ginpapaligo sila.
Ngaa Kinahanglan Naton Mangin Balaan?
6 Ang ginapatuman nga pisikal nga katinlo sa mga saserdote sang Israel may kahulugan para sa katawhan ni Jehova karon. Ang aton mga ginatun-an sa Biblia masami nga nakatalupangod sa katinlo sang aton mga duog sang pagsimba, subong man sang aton mahipid kag disente nga pamayo. Pero ang katinlo sang mga saserdote nagabulig sa aton nga marealisar nga ang bisan sin-o nga nagataklad sa mataas nga bukid sang pagsimba kay Jehova dapat may “matinlo nga tagipusuon.” (Basaha ang Salmo 24:3, 4; Isa. 2:2, 3) Dapat naton ihatag ang aton sagrado nga pag-alagad sa Dios upod ang matinlo nga hunahuna kag tagipusuon subong man ang matinlo nga lawas. Gani kinahanglan ang pirme nga pag-usisa sa kaugalingon, kay mahimo ang iban nagakinahanglan sing daku nga mga pagbag-o agod mangin balaan. (2 Cor. 13:5) Halimbawa, mahimo pamangkuton sang isa ka bawtismado nga hungod nga nagatan-aw sing pornograpiya ang iya kaugalingon, ‘Ginapamatud-an ko bala ang akon kaugalingon nga balaan?’ Dayon, kinahanglan niya mangayo sing bulig agod mauntat inang malain nga buhat.—Sant. 5:14.
(Levitico 8:14-17) Dayon gindala niya ang baka nga dulot tungod sa sala, kag gintungtong ni Aaron kag sang iya mga anak ang ila kamot sa ulo sang baka nga dulot tungod sa sala. 15 Gin-ihaw ini ni Moises kag paagi sa iya tudlo nagkuha sia sing dugo kag ginpalhit ini sa tanan nga sungay sang halaran kag ginpaputli niya ang halaran, apang ginbubo niya ang nabilin nga dugo sa tiilan sang halaran. Sa sini nga paagi ginpakabalaan niya kag gintinluan ini. 16 Pagkatapos sini, ginkuha niya ang tanan nga sapay sa tinai, ang sapay sa atay, ang duha ka batobato kag ang sapay sini, kag ginpaaso ini ni Moises sa halaran. 17 Dayon ginpasunog niya sa gua sang kampo ang nabilin nga parte sang baka, ang panit, ang karne, kag ang ipot sini, suno sa ginsugo ni Jehova kay Moises.
it-2-E 437 ¶3
Moises
Ginhimo sang Dios si Moises nga manugpatunga sang Kasuguan nga katipan sa Israel, isa ka pinasahi nga posisyon nga wala pa gid sing tawo nga nakatigayon sa atubangan sang Dios magluwas kay Jesucristo, ang Manugpatunga sang bag-o nga katipan. Ginwisikan ni Moises sang dugo sang ginhalad nga mga sapat ang libro sang katipan, nga nagarepresentar kay Jehova bilang isa ka “partido,” kag ang katawhan (pat-od nga ginrepresentar sang gulang nga mga lalaki) bilang isa man ka “partido.” Ginbasa niya ang libro sang katipan sa mga tawo, nga nagsabat, “Handa kami nga himuon kag tumanon ang tanan nga ginsiling ni Jehova.” (Ex 24:3-8; Heb 9:19) Bilang manugpatunga, ginhatagan sing pribilehiyo si Moises nga dumalahan ang paghimo sang tabernakulo kag sang mga kagamitan sini, kag ang Dios mismo amo ang naghatag sa iya sing sulundan. Pribilehiyo man niya nga ordenahan ang kamimusan sang pagkasaserdote, kag haplasan sing pinasahi nga lana ang tabernakulo kag si Aaron bilang mataas nga saserdote. Dayon, gindumalahan niya ang pinakauna nga pag-alagad sang bag-o lang gin-ordenahan nga pagkasaserdote.—Ex kap 25-29; Le 8, 9.
Pagbasa sa Biblia
(Levitico 8:31–9:7) Dayon nagsiling si Moises kay Aaron kag sa iya mga anak: “Lagaa ninyo ang karne sa puertahan sang tolda nga tilipunan, kag kaunon ninyo ini didto kag ang tinapay sa alat nga ginagamit para sa pag-orden sa saserdote, suno sa ginsugo sa akon, ‘Si Aaron kag ang iya mga anak magakaon sini.’ 32 Sunugon ninyo ang mabilin nga karne kag tinapay. 33 Indi kamo magpalayo sa puertahan sang tolda nga tilipunan sa sulod sang pito ka adlaw, tubtob sa adlaw nga matapos ang mga adlaw sang pag-orden sa inyo, kay magalawig sing pito ka adlaw ang pag-orden sa inyo subong mga saserdote. 34 Nagsugo si Jehova nga himuon namon ang ginhimo namon sa sini nga adlaw agod makahimo kami sing pagtumbas para sa inyo sala. 35 Magpabilin kamo sa puertahan sang tolda nga tilipunan sa adlaw kag gab-i sa sulod sang pito ka adlaw, kag himuon ninyo ang ginapahimo sa inyo ni Jehova, agod indi kamo mapatay; kay amo ini ang ginsugo niya sa akon.” 36 Ginhimo ni Aaron kag sang iya mga anak ang tanan nga ginsugo ni Jehova paagi kay Moises.
9 Sang ikawalo nga adlaw, gintawag ni Moises si Aaron kag ang iya mga anak kag ang mga gulang sang Israel. 2 Nagsiling sia kay Aaron: “Magkuha ka sing tinday nga baka nga wala sing diperensia para sa dulot tungod sa sala kag sing karnero nga lalaki nga wala sing diperensia para sa dulot nga sinunog, kag ihalad ini sa atubangan ni Jehova. 3 Apang isiling mo sa mga Israelinhon, ‘Magkuha kamo sing isa ka kanding nga lalaki para sa dulot tungod sa sala, kag sing isa ka tinday nga baka kag isa ka tinday nga karnero nga lalaki, nga ang kada isa nagaedad sing isa ka tuig kag wala sing diperensia, para sa dulot nga sinunog. 4 Magkuha man kamo sing isa ka toro nga baka kag isa ka karnero nga lalaki para sa mga halad sa pag-ambitanay nga ihalad sa atubangan ni Jehova, kag sing dulot nga uyas nga ginsamuan sing lana, kay subong nga adlaw magapakita si Jehova sa inyo.’” 5 Gani gindala nila ini tanan sa atubangan sang tolda nga tilipunan suno sa ginsugo ni Moises. Dayon ang bug-os nga katilingban nagpalapit kag nagtindog sa atubangan ni Jehova. 6 Nagsiling si Moises: “Amo ini ang ginsugo ni Jehova nga himuon ninyo, agod makita ninyo ang himaya ni Jehova.” 7 Dayon nagsiling si Moises kay Aaron: “Magpalapit ka sa halaran kag ihalad ang imo dulot tungod sa sala kag ang imo dulot nga sinunog, kag maghimo ka sing pagtumbas para sa imo sala kag para sa sala sang imo panimalay. Ihalad mo man ang dulot sang katawhan, kag maghimo ka sing pagtumbas para sa ila sala, suno sa ginsugo ni Jehova.”