Ang Labing Maayong Gobierno​—⁠Malapit Na!

KON wala sing gobierno may yara anarkiya. Gin-ilustrar ini sa liwat kag liwat sang ang kusog sang kasuguan kag kahim-ong nagwelga ukon wala makapanghikot. Ang resulta? Ang malinapason nga minoridad naghimulos sang kahimtangan sa pagpang-ati. Nagatudlo ini sa kamatuoran nga ang tawo indi makapuyo sa isa ka mahim-ong nga katilingban kon wala sing gobierno sa pagpatuman sang kasuguan kag kahim-ong para sa kaayohan sang tanan.

Apang ang iban magasabat nga kon may yara gobierno masami nga may yara tuhay nga sahi sang pagpang-ati​—⁠ang mga politiko kag daku nga negosyo nagapanguwarta pasad sa ila impluwensia. Ang pagpanghamham, pagpanguwarta sa gobierno, kag ang kagarukan kinaandan nga mga buhat sa politika. Ang dalagku nga kontrata sang gobierno ginahatag sa napaboran nga “mga abyan” sa negosyo. Gani, madamu nga tawo ang napaslawan sa politika kag sa mga politiko, kag wala na gani nagabotar. Ngaa? Ang isa ka rason amo nga sa masami ang gobierno wala makagarantiya sing katarungan kag pagkapalareho para sa tanan.

Ngaa sa masami, walay sapayan sang maayong mga tulumuron kag mga manifesto para sa kaayohan sang tawo, ang politika napamatod-an nga mabahinbahinon kag malaglagon sa tawhanon nga kabuhi?

Natago nga Impluwensia sa Likod sang Politika

Sa pagsabat sini nga pamangkot dapat naton balikan ang maragtas kapin sa 1,950 ka tuig sang una sa isa ka bukid sa Palestina. Natabo didto ang isa ka tumalagsahon nga paghambalanay nga amo ang yabi sa paghangop sa hulusayon tuhoy sa tawhanon nga pagginahom. Buot na sadto sugdan ni Jesucristo ang iya pagministeryo sa publiko. Si Satanas, ang puno nga karibal sang Dios sa paggahom sa uniberso, naghimulos sang kahigayunan sa pagtilaw kay Jesus sa panikasog nga bungkagon ang iya integridad. Ang kasaysayan nagasugid sa aton nga si Satanas “nagpakita [kay Jesus] sang tanan nga ginharian sa kalibutan [sa isa ka palanan-awon] kag sang ila himaya, kag nagsiling sia sa iya: ‘Tanan ini nga butang ihatag ko sa imo kon magyaub ka kag magsimba sa akon.’”​—⁠Mateo 4:​8, 9.

Sa walay katapusan nga kaayohan sang katawhan, ginsikway ni Jesus ang tanyag. Apang ano ang ginasugid sa aton sining importante nga engkuwentro nahanungod kay Satanas kag sa sistema sang kalibutan, ang “tanan nga ginharian sa kalibutan”? Nga si Satanas amo ang dimakita nga “manuggahom sining kalibutan.” (Juan 12:​31; 14:​30; 16:​11) Sa amo si apostol Juan nagsulat: “Nahibaloan ta nga kita mga anak sang Dios kag ang nabilin nga bahin sang kalibutan sa palibot naton yara sa idalom sang gahom kag pagkontrol ni Satanas.”​—⁠1 Juan 5:​19, The Living Bible.

Busa ang malaut nga espiritu ni Satanas amo ang nagalatom sa politikal nga sistema sang kalibutan. Sia ang matuod nga ginahalinan sang mga prinsipio nga gintipon ni Mach­iavel­li. Si Satanas amo “ang espiritu nga nagapanghikot karon sa tunga sang rebelde nga mga sakop sang Dios” kay sia “ang kumander sang espirituwal nga mga kagamhanan sang hangin.”​—⁠Efeso 2:​2, The New English Bible.

Ang iban mahimu nabudlayan sa pagbaton nga may yara isa ka malaut, dimakita espirituwal nga gahom nga nagapahikot sa politikal nga mga manuggahom sang kalibutan. Apang yabi ini sa paghangop sang kabug-osan nga laragway nga ginapresentar sang Biblia tuhoy sa isa ka pagbangigay may kaangtanan sa pagkasoberano sa uniberso. (Bugna 12:​7-9) Gingamit ni Satanas ang politika sa pagbahinbahin sa katawhan kag sa pagpahilayo sang igtalupangod sang tawo gikan sa matuod nga paglaum sa napasag-uli nga matarong nga paggahom, nga amo, ang Ginharian nga pangulohan sang Dios paagi kay Cristo.​—⁠Mateo 4:​23; 9:35.

Daw ano ka madinalag-on si Satanas! Paagi sa iya paghingalit sa nabahinbahin nga politika kag nasyonalismo gingamit niya ang mga tawo nga “nagbayaw sa estado subong balaan . . . ukon nagkilala sini subong martsa sang Dios sa maragtas.” Para sa iban, ang “pagsimba sa estado subong personipikasyon sang espiritu sang pungsod kinahanglanon para sa katumanan sang destinasyon sang pungsod.” (Ideas in Conflict, Edward Burns) Ang Nazi Alemanya amo ang halimbawa sini. “Wala gid sing bisan ano nga ginsakdag sing tuman subong sang pagsimba sa Nazismo kag sa Pangulo sini,” siling ni Propesor Palm­er. Bisan sa karon ang mga politiko nagagamit sini gihapon nga kasangkapan sa pagpauswag sang ila ambisyon, apang sa kahalitan sang katawhan. Bangod sang politikal nga interes sa kaugalingon, ang posible nga kalaglagan nagaatubang sa aton.

Ano ang makabutong sa tawo gikan sa bibi sang nuklear nga kapahamakan? May yara porma sang gobierno nga makapahiusa sa katawhan? Ano ang kinahanglanon agod ang tanan nga tawo magmatutom sa isa ka matarong nga gobierno?

Paghidait kag Paghiusa​—⁠Paano?

Ang istoryador nga si Edward ­Burns nagsulat: “Ang pagkontrol kag ang pagbuhin sang nasyonalismo, kag ang pagtal-us sa sini sing isa ka epektibo nga organisasyon sa bug-os nga kalibutan, wala duhaduha nga isa sang labing mabudlay nga mga problema sang modernong mga tion.” (Italiko amon.) Ang iban nga mga hunahuna nagpangalapkap sa pagpangita sing sabat sa pagtinguha sang tawo sing paghiusa. Ang Espanyol-Amerikano nga pilosopo nga si ­George Santayana “wala sing nakita nga iban nga paagi sa pagdula sang inaway luwas sa pagtuga sing isa ka bug-os uniberso nga gobierno nga may ikasarang sa pagpatuman sang iya kabubut-on sa tanan nga estado sang duta. Wala sing Liga de Nasyones ukon Nasyones Unidas ang makahimu sini.”​—⁠Italiko amon.

Ngaa ang mga politiko wala makalab-ot sining tulumuron nga isa ka gobierno sa bug-os nga uniberso? Ang isa ka rason amo ang parokyal nga nasyonalismo nga nagabalabag sa dalanon. Suno sa isa ka istoryador: “Ang pagkontrol ukon pagdula sini sa bisan anong paagi nga wala sing pagtudlo sing tawhanon nga pag-ululutod mangin mabudlay gid tubtob ang aton kalibutan dugang pa nga ginasalakay sang mga dumot kag mga kahadlok.” (Italiko amon.) Ang awtor nga si H. G. ­Wells nagpangatarungan: “Kinahanglanon gid nga ang ordinaryo nga hunahuna sang rasa dapat maghunahuna sing paghiusa sang katawhan, kag ang ideya tuhoy sa katawhan subong isa ka pamilya dapat itudlo kag ipahangop sa bug-os nga uniberso.”​—⁠Italiko amon.

Posible bala inang edukasyon nga programa? Indi lamang ini posible; matuod gid ini! Sa diin? Sa tunga sang pila ka milyon ka mga Saksi ni Jehova sa 203 ka pungsod kag kadutaan. Ini sila nagbalhin na sang ila tagipusuon kag hunahuna. Kag, ginaimpluwensiahan man sang mga Saksi ni Jehova ang kapin sa apat ka milyon ka kaupod. Ano na nga mga pagbalhin ang ila nahimu? Ang espiritu nga napasad sa Cristianong gugma ginpatubas sa tunga nila nga natungod sa lainlain nga pungsod. Ginbiyaan na nila ang nasyonalismo nga “may kaangtanan sa rasismo, parokyalismo, pagdampigdampig, pagkaestrikto, paghingabot, kag pagkapanatiko.”​—⁠­Ideas in Con­flict, pahina 502.

Daan na nga ginpahangop sang Biblia ining daku nga hilikuton sa pagtudlo para sa sining kaliwatan. Si Jehova naghatag sing pasalig paagi sa iya manalagna nga si Isaias nga “ang tanan mo nga anak tudluan ni Jehova, kag mangin daku ang paghidait sang imo mga anak.” (Isaias 54:​13) Magapadayon ini tubtob ang bug-os nga duta “matugob sang pagkilala kay Jehova subong nga ang mga tubig nagatabon sang dagat.”​—⁠Isaias 11:9.

Si Jesus nagsiling man subong bahin sang tanda sang katapusan nga mga adlaw sining politikal, komersial, relihioso nga sistema: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:​14) Amo ini ang kabangdanan sang maid-id nga kampanya sa edukasyon nga ginahimu sang mga Saksi ni Jehova sa balay kag balay sa sining ika-20 nga siglo. Ginabantala nila ang Ginharian nga pangulohan nga sa dili madugay magahikot gikan sa mga langit sa “pagdugmok kag pagpapas sa sining tanan [karon politikal] nga ginharian, kag ini magapadayon tubtob sa walay katubtuban.”​—⁠Daniel 2:44.

Ano ang Yara sa Malapit nga Palaabuton?

Apang, sa wala pa ang teokratikong Ginharian nga gobierno ni Cristo makakontrol sang bug-os nga duta, ang pila ka mga hitabo dapat matabo, suno sa tagna sang Biblia. Ang tolon-an nga Bugna nagapakilala sang mga karakter. Amo ini sila:​

“Ang babayi . . . ‘Babilonia nga Daku, ang iloy sang mga makihilawason.’” (Bugna 17:​3-5) Ginalaragway niya ang bug-os kalibutan nga emperyo sang dimatuod nga relihion nga nagaimpluwensia sa madamung “katawhan kag kadam-an kag mga pungsod kag mga hambal.”​—⁠Bugna 17:15.

“Ang mapula nga sapat nga mapintas” nga nagapasakay sa babayi. Ining sapat, ang laragway sang daku pa nga “sapat nga mapintas” nga ginsambit kaina sa Bugna nga ginhatag kay Juan, nagasimbulo sa internasyonal nga organisasyon nga nagatipon sa mga tiglawas sang halos tanan nga politikal nga sistema sining kalibutan. Sang primero amo ini ang Liga de Nasyones. Karon amo ini ang Nasyones Unidas. Isa ini ka paghimbon batok sa Ginharian sang Dios. Nagatuyo ini sa paghimu sang mahimu lamang sang Ginharian sang Dios​—⁠pagpaluntad sing permanente nga paghidait.​—⁠Bugna 13:​1, 2, 15; 17:​3, 8; 20:4.

Karon ano nga mga hitabo ang dapat matabo sa dili madugay? Ang Bugna nagapasalig sa aton nga ang “mapula nga sapat nga mapintas” kag ang mga nagauyat sing politikal nga gahom “magadumot sa bigaon kag magahapay sa iya kag . . . magasunog sa iya sing bug-os sa kalayo.” (Bugna 17:​16) Ano ang ginapatimaan sini? Nga ang politikal nga mga elemento, nga ginlaragway sang Nas­yones Unidas, magaliso batok sa bug-os kalibutan nga emperyo sang dimatuod nga relihion agod laglagon ini. Apang nagakahulugan man ini nga sila sa ulihi magaliso batok sa matuod nga mga tiglawas sang Ginharian sang Dios paagi kay Cristo, nga amo, ang mga Saksi ni Jehova.a Ano ang mangin resulta?

Magapukaw ina sing reaksion gikan sa mga langit, gikan sa ‘isa nga nagasakay sa kabayo nga maputi nga nagahukom kag nagapakig-away sa pagkamatarong,’ kon sayoron, “Ang Pulong sang Dios,” si Cristo Jesus. (Bugna 19:​11-16) Sa amo masapwan sang mga pungsod ang ila kaugalingon nga nagaatubang sa inaway nga Armagedon sang Dios. (Bugna 16:​16) Ining matarong nga inaway batok kay Satanas kag sa iya “kalibutan” mangin amo ang katapusan sang tanan politikal nga mga sistema. Sundan ini sang pagpasag-uli sing teokratikong paggahom sa ibabaw sang bug-os nga duta. Ang duta ipasag-uli sa isa ka paraiso nga kahimtangan kag puy-an sang mga mahagop nga nagahimu sang kabubut-on sang Dios. Ang malaglagon nga politika madula na sa duta.​—⁠Salmo 2:​2, 9; 37:29.

Bangod sang maathag nga dayag nga kapaslawan sang tanan politikal nga mga sistema sa pagpaayaw sa daku nga mga kinahanglanon sang katawhan, indi ka bala dapat magpaabot sa gobierno nga makapaayaw sa tanan nga katawhan? Bangod sang pagkahilingagawon sang mga tion nga aton ginakabuhian, ginaagda namon kamo sa pagpakigkita sa mga Saksi ni Jehova sa inyo duog agod usisaon sing dugang pa ang pamatuod nga nagapakita nga ang Ginharian nga gobierno sang Dios malapit na.​—⁠Lucas 21:​25-33.

[Footnote]

[Retrato sa pahina 12]

Bangod sang politikal nga interes sa kaugalingon, ang posible nga kalaglagan nagaatubang sa aton

[Retrato sa pahina 13]

“Ang ideya tuhoy sa katawhan subong isa ka pamilya dapat itudlo kag ipahangop sa bug-os nga uniberso.”​—⁠H. G. ­Wells