Nahamuot Bala si Cristo sa Krismas?

SA MADAMO nga bahin sang duta, kinaandan nga makita ang Belen (danyag sang pagkatawo ni Jesus) kon Krismas. Sa masami nagalakip ini sing husto nga kadakuon sang lapsag nga si Jesus sa pasungan, upod kanday Maria, Jose, mga manugpahalab, Mago, kag pila ka baka. Nahamuot bala si Cristo sa sina nga mga pasundayag kon Krismas?

Ang matuod, ang pagkanagakaigo sang Belen mainit nga gindebatehan, kag ginbaisan pa gani sa atubangan sang Korte Suprema sang Estados Unidos. Sang nagligad nga Disiembre, ang Time nga magasin nagreport: “Bangod sang desisyon sang Korte Suprema sang maaga nga bahin sini nga tuig, gindekorasyonan man ang publiko nga mga parke kag ang mga tinukod sang pila ka munisipyo sing mga Belen sini nga Krismas nga sang una nag-untat sa pagpasundayag sini samtang ang hulusayon ginabaisan pa.”

Apang, ang matuod, ginabaisan pa gihapon kon bala legal nga butangan sing Belen ang pagkabutang sang pangulohan. “Ang desisyon sang Korte Suprema,” siling sang Time, “napaslawan sa paghusay sang hulusayon.” Sa liwat sini nga tuig, sa patas nga 4 sa 4 nga desisyon tuhoy sa pagkalegal sang Belen sa Scars­dale, Nueva York, ang Korte Suprema napaslawan sa paghatag sing maathag nga direksion.

Nagasakdag sang Cristianismo?

Ang mga manugpamatok sa Belen, nga nagalakip sa Amer­i­can Civ­il Lib­er­ties Un­ion, nagpangatarungan nga ang mga pasundayag para sa Krismas daw isa ka pagsakdag sa relihion kag gani supak sa konstitusyon. Apang ang kolumnista nga si Bill Hall, nga nagsulat sa Seattle Post-Intelligencer, nagaprotesta nga ang Krismas wala gid nagasakdag sang Cristianismo:

“Sa diin magkuha ang Amer­i­can Civ­il Lib­er­ties Un­ion sing binuang nga ideya nga ang Krismas isa ka Cristianong selebrasyon? Madula ina nga ideya kon maglagaw ka sa bisan diin nga sentro sang balaklan sa Amerika.

“Ang Krismas wala sing kaangtanan sa Cristianismo. Ang Krismas isa ka pagano nga selebrasyon sang manggad, kakagud kag pagkahakugan.

“Ang Cristianismo, sa kabaliskaran, isa ka halos patay na nga relihion nga napasad sa mga panudlo sang isa ka Jesucristo. Isa yadto ka relihion nga nagpadaku sang kaalwan, gugma, pagbatas kag walay kasingki. . . .

“Apang ang ACLU naglumpat sa wala sing sadsaran nga konklusyon—ayhan bangod sang pag-anggid sa ngalan—nga ang Krismas kag ang Cristianong mga iglesia karon may yara gid kaangtanan sa masaligan kag orihinal nga Cristianismo. . . .

“Ang ACLU nagahimo sing kinaandan nga sayop sa pagpati nga ang Krismas isa ka kinahanglanon nga Cristianong selebrasyon nga ginasaulog man sang Amerikano nga mga pagano. Ang matuod amo ang kabaliskaran. Ang kalabanan nga nagasaulog sang Krismas amo ang mga tawo nga wala nagasimba. Isa gid ini ka kinalipay sang mga pagano.”

Ang Krismas isa bala ka “kinalipay sang mga pagano”? Matuod bala ina? Indi bala ang Krismas amo ang kaadlawan ni Cristo?

Kay Sin-o Kaadlawan?

Indi, indi ini kaadlawan ni Cristo. “Ang adlaw sang pagkatawo ni Cristo indi mapat-od gikan sa B[ag-ong] T[estamento], ukon, sa pagkamatuod, gikan sa bisan anong rekord,” paathag sang Cyclopedia of Biblical, Theological, and Ecclesiastical Literature. Isa ka butang ang pat-od, si Cristo wala matawo sang Disiembre 25. Sang matawo sia, ang mga manugpahalab didto sa latagon sa kagab-ihon nga nagapahalab sang ila mga panong, nga indi nila paghimuon sa tion sang mabugnaw nga kagab-ihon sang Disiembre.—Lucas 2:6-8.

Dugang pa, ang Luteranong ministro nga si John C. McCol­lis­ter nagsulat sa iya bag-o nga libro nga The Christian Book of Why: “Ang tanan nga mga Cristiano anay nagpati nga ang pagselebrar sang tanan nga kaadlawan (bisan sang kaadlawan sang Ginuo) isa ka kinabatasan sang mga pagano. Sa panikasog nga painon ang ila kaugalingon gikan sa tanan nga mga buhat sang pagano, ang unang mga Cristiano nagdumili sa pagpain sing petsa nga nagatanda sang pagkatawo ni Jesus.”

Sa diin, kon amo, maghalin ang pagsaulog sing Krismas kon Disiembre 25? Ang libro nga Celebrations—The Complete Book of American Holidays ni Rob­ert J. ­Myers nagasabat: “Sa wala pa ang pagsaulog sing Krismas, ang Disiembre 25 sa kalibutan sang mga Romano amo ang Natalis Solis Invicti, ang Kaadlawan sang Indi Mabihag nga Adlaw. Ini nga piesta, nga ginahiwat sa tapos sang winter sol­stice sa Juliano nga kalendaryo, para sa kadungganan sang Adlaw nga Dios, nga si Mith­ras.”

“Wala labot sa impluwensia ni Mith­ra,” padayon ni ­Myers, “nagpanghikot man ang iban pa nga puersa sang mga pagano.” Ang mga Romano nagsaulog sang magaris nga piesta sang Saturnalia sa talipuspusan nga bahin sang Disiembre, kag, suno sa paathag ni ­Myers: “Sang ulihi ginpasulod sang klero ang baliskad nga kalibutan sang Saturnalia sa Iglesia.” Indi katingalahan nga ang libro nga Christmas Customs Around the World nagareport: “Ginpakita sang mga Puritano ang ila pagtamay sa sining pagano nga piesta paagi sa pagplano sing lakas nga pagpangabudlay para sa sini nga adlaw kag pagpalibot sing sugo nga nagadumili sang pagsaulog sing Krismas”!

Nahamuot Bala si Cristo?

‘Apang tuman ka estrikto sang mga Puritano,’ mahimo ipamatok sang iban, ‘kag amo man ang unang mga Cristiano. Sa karon ang Krismas nagapadungog na kay Cristo.’ Amo gid bala? Si Cristo pirme nga nagtindog para sa kamatuoran, apang ang Krismas nagasakdag sang kabutigan. (Juan 14:6) ‘Amo ina ang kaadlawan ni Cristo,’ siling sang mga manunudlo sa eskwelahan kag sang mga klerigo. Apang indi ina matuod! ‘Dalhan kamo ni Santa ­Claus sing mga regalo kon mabuot kamo.’ Apang indi ina matuod! Binagbinaga, man ang mga Belen.

Madamo sini ang nagapakita sa mga Mago, ukon mga astrologo, upod kay Jesus sang matawo sia. Apang ang Biblia nagasiling nga sang mag-abot ang mga astrologo, si Jesus indi na lapsag kundi isa na ka bata nga nagapuyo sa balay. (Mateo 2:7-11) Nagapati gid bala ikaw nga si Cristo nahamuot sa sini nga selebrasyon nga nagapatiko sang kamatuoran?

Apang, labi pa ka serioso, amo ang butig nga impresyon nga ginahatag sang Krismas nga si Cristo isa lamang ka wala sing mahimo nga lapsag. Ang isa ka bata nga babayi nga nagatan-aw sang Belen nabatian nga namangkot sa iya iloy: “Nagdaku bala si Jesus?” Ngaa namangkot sia? “Bueno,” sia nagsabat, “wala gid sia magdaku kutob sang makita ko sia sang nagligad nga tuig!” Kag amo gid sina nga impresyon ang ginabilin sang Krismas, nga si Cristo isa ka wala sing mahimo nga bata, indi ang nagagahom nga Hari nga amo na sia karon, isa nga sa dili madugay magadula sang tanan nga pagkadimatarong sa duta.—Salmo 2:9, 12; 110:1, 2; Bugna 12:5; 19:15, 16.

Kon binagbinagon mo ang mga nagakatabo kon Krismas, paano mahamuot si Cristo? “Ang mga alkoholiko kag ang ila mga pamilya nabudlayan sa sini nga tion bangod ang espiritu sang Krismas masami nga nagaguwa paagi sa mga botelya,” report sang Times. “Kag ang agi sang lipstik nga makita sa pagpauli gikan sa sinalusalo sa opisina nagatublag sa minilyon pa.” Huo, ang Krismas wala magbalhin gikan sa pagkagaris sini sang una nga mga adlaw.

Ang libro nga Curiosities of Popular Customs, ni Wil­liam S. ­Walsh, nagsiling: “Walay sapayan sang pagpakamalaut sang maalam kag maligdong, ang Krismas sang una nga mga adlaw masami nga nagapatubas sing pinakagrabe nga mga sinalusalo, mga kinagansal kag mga kalaw-ayan, sang Bac­cha­na­lia kag sang Saturnalia. . . . Sa pagkamatuod, ang magaris nga mga kinagansal sang panahon sang Krismas sang dumaan nga mga tion daw indi mapatihan.”

Kon hunahunaon mo, ayhan magaugyon ka sa opinyon nga ginpautwas sang Disiembre sa The Sunday Express, isa ka pamantalaan sa Bagatnan nga Aprika. “Tion ini liwat sang tuig,” umpisa sang artikulo, “nga ang espiritu sang sinalusalo nagapangibabaw kag ang relihioso nga mga tawo nagasiling: ‘Ibalik naton si Cristo sa Krismas.’

“Sanglit wala dira si Cristo sang ginsuguran, nagakaigo gid nga kuhaon ang bisan ano nga pagpatuhoy sa Iya kag islan ang ngalan sang Krismas.

“Ngaa bulingan ang ngalan ni Cristo paagi sa tanan nga komersialismo, sobra nga pagkaon kag pag-inum kag kinagansal?”

Ano ang Imo Himuon?

Sa pagkamatuod, wala nahamuot si Cristo sa Krismas. Ginapakahuy-an sini sia kag ang iya mga panudlo. Gani ano ang imo himuon sa sining panahon sang tuig?

Ang ginbalikwat kaina nga pamantalaan sa Bagatnan nga Aprika nagpanugda: “Sa baylo mangin bunayag kita kag ibalik ang Krismas sa pagano nga sinalusalo subong sang ginsuguran sini kag magrelaks kag magkalipay sa mga pagsalusalo kag pagkinalipay upod ang tanan nga puni sang Krismas kag sang magaris nga pagsinalusalo—nga wala nagapakunokuno nga ginasaulog naton ang pagkatawo ni Cristo.”

Matuod, mahimo nga indi ina salimpapaw, apang nahamuot bala si Cristo sa magaris kag pagano nga mga sinalusalo, kon bala ginahimo ini sa iya ngalan ukon indi. (2 Corinto 6:14-18) Gani kon luyag mo gid nga mahamuot sa imo si Cristo, ano ang imo himuon? Ang kolumnista nga si Bill Hall, nga ginbalikwat kaina, nagasabat: “Ang bisan sin-o nga matuod nga Cristiano—nagapati nga may pila pa sa ila nga nabilin—dapat maglikaw sa pagpakig-upod sa kalibutanon, modernong selebrasyon nga nakilal-an subong Krismas.”

Ginahimo gid ina sang mga Saksi ni Jehova bisan diin. Wala sila nagapakigbahin sa pagsaulog sing Krismas bangod luyag gid nila nga matigayon ang kahamuot sang ila langitnon nga Hari, si Jesucristo. Kag nagatinguha sila sa pagkabuhi nahisuno sa iya mga panudlo, indi lamang sa pinasahi nga mga okasyon kundi sa kada adlaw sang tuig. Kon amo man sina ang imo handum, malipay ang mga Saksi ni Jehova sa pagbulig sa imo nga matuman ini.

[Laragway sa pahina 12]

Ginatudlo bala sang mga Belen ang kamatuoran nahanungod kay Cristo?