Takus Bala Ini sa Katalagman?

ANG Newsweek sang Agosto 10, 1987, may panghapin nga “The Face of AIDS—One Year in the Epidemic.” Sa 12 ka pahina may mga retrato sang kapin sa 300 ka biktima sang AIDS sa Estados Unidos. Diutay lamang ini nga bahin sang kapin sa 30,000 sa Estados Unidos nga napatay sa AIDS tubtob sa karon. Apang, sa dimagkubos 17 sa mga retrato ang nakatigayon sang ila AIDS paagi sa gintayhon nga dugo ukon dugo nga mga produkto subong sang linibo pa.

Ang sampol nga mga kabangdanan sang AIDS sa sining mga kaso amo: “Napadayag sa may virus nga dugo sa tion sang operasyon,” “Natapikan bangod sang pagtayhon sang 1983,” “Natapikan bangod sang pagtayhon, ginlatnan niya ang iya bana kag anak nga lalaki,” “Ang dugo nga gintayhon naghatag sa iya sing AIDS,” “Nakatigayon sing AIDS gikan sa dugo nga gintayhon sa tion sang operasyon sang 1981,” “Hemophiliac; ang iya anak nga lalaki napatay bangod sa AIDS kag ang iya asawa may ARC [AIDS Related Complex],” “Nakatigayon sia sing AIDS gikan sa dugo nga gintayhon, kag nag-antos sia sing tatlo ka tuig nga kasakit, paralisis kag amat-amat nga pagkabulag.”

Sa isa ka kaso, ang 13 ka bulan nga lapsag “napatay, subong sang iya iloy, bangod sa mahigko nga dugo nga gintayhon.” Ang dos-anyos nga bata nga babayi “gintayhunan sing dugo sa tapos matawo” kag napatay sa AIDS.

Bangod sining maathag nga mga katalagman, ngaa ginapilit gihapon sang pila ka awtoridad ang pagtayhon sing dugo sa adulto nga mga Saksi ni Jehova kag sa ila mga bata? Sa kalabanan nga kaso, may yara tal-us nga mga bulong, kag malipay gid ang mga Saksi ni Jehova sa pagkoopear sa bisan anong terapiya nga wala nagasupak sa pagdumili sang Dios batok sa sayop nga paggamit sa dugo.—Levitico 17:11, 12; Binuhatan 15:28, 29.

[Laragway sa pahina 31]

Mga bata, nga bangod sa gintayhon nga dugo, napatay sa AIDS