Pamangkot sang mga Pamatan-on . . .

Cristianong mga Miting—Ngaa Dapat Tambungan?

“Ginapasimba ako sang akon mga ginikanan,” siling ni Christiaan, isa ka pamatan-on nga lalaki sa pungsod sang Suriname. “Pirme ko ginahandum nga kuntani mag-ulan sing mabaskog kon Domingo sang aga, agod nga makapabilin ako sa balay. Apang,” dugang niya nga may pagyuhom, “daw subong bala nga nagaulan lamang halin sa Lunes tubtob Sabado.”

“Pagligad sang malip-ot nga tion tinak-an ako sa mga serbisyo sa simbahan. Sang makakita ako sing kahigayunan sa pag-untat, wala ko ini pagpalampasa.”

Si Christiaan indi tumalagsahon. Ang mga klerigo sa bug-os nga kalibutan nagapanganduhoy tuhoy sa kakulang sing interes sang mga pamatan-on sa relihioso nga mga serbisyo. Si Simote Vea, isa ka kleriko gikan sa isla sang Tonga sa Pasipiko nagsiling: “Ang kadamuon sang mga pamatan-on nga nagatambong sa mga simbahan . . . nagadiutay.”

Apang, ngaa nagakapaslawan ang dalagku nga mga simbahan sa pagganyat sa mga pamatan-on? Si Lorine Tevi, katapo sang World Council of Churches, nagbaton: “Ang labing kinahanglanon amo ang edukasyon . . . Dapat maton-an sang mga iglesia nga ang teolohiko nga edukasyon dapat maghambal sa tanan.”

“Husto ina,” ugyon ni Christiaan. “Madamo nga pamatan-on ang nagakalangkag sa maathag nga edukasyon sa Biblia. Apang, sa baylo nga ihatag ina nga kinahanglanon, ang iglesia nagapabilin sa daan nga mga rito.” Si Annie, edad 13, nagdugang: “Ang iglesia madamo nga pag-amba apang diutay sing maton-an.” Ang 18-anyos nga si Barbara nanganduhoy man sa kakulang sing edukasyon sa iglesia. “Isa ka adlaw,” siling niya, “ginhatagan ako sang pastor sing mga drowing ni Jesus. Ginsilingan niya ako nga koloran ini. Amo yadto ang sebisyo!”

Indi katingalahan, nian, nga madamo nga pamatan-on ang napaslawan sa mga serbisyo sang iglesia. Apang, nagakahulugan bala ini nga tanan nga relihiosong mga miting isa ka uyang sang tion? Sa kabaliskaran, ang mga pamatan-on nga ginbalikwat diri nagsugod sa pagtambong liwat sa relihioso nga mga miting! Ang rason? Natukiban nila ang ginreport sang magasin nga U.S. Catholic sang nagligad nga pila ka tuig: “Ang bisan diin nga Kingdom Hall nagatanyag sing kapin . . . nga edukasyon sa isa ka bulan sang sa ginahimo sang kalabanan nga Katoliko na mga parokya sa bug-os nga tuig.”

Mga Kingdom Hall—Makapabugnaw nga Tuhay

Mga Kingdom Hall? Huo, amo ini ang mga duog tilipunan sang mga Saksi ni Jehova, ang mga manugpanagtag sining magasin. Ang surbe nga ginhimo sa pungsod sang Suriname nagpakita nga mga isa sa tagsa ka tatlo ka tawo nga nagatambong sa mga miting didto ang sa ulot sang edad nga 12 kag 20! Amo man sa madamo pa nga kabataan—madamo nga pamatan-on ang nagatambong sa mga miting sa Kingdom Hall.

Si Christiaan nagapaathag kon ngaa naganyat sia sang mga miting didto: “Nahamuot ako nga pirme ginagamit ang Biblia. Ang tanan nga ginahambal ginapamatud-an gikan sa sini. Ang mga miting kaangay sang eskwelahan!” Sa pagkamatuod, ang Kingdom Hall may kurso sang lima ka semanal nga miting nga nagahanas sa mga Cristiano sa pagbasa, sa pagtudlo, kag sa pag-aplikar sang Biblia. Masapwan mo nga ang mga miting didto makapabugnaw nga tuhay sa mga serbisyo sang mga simbahan.

Sa gihapon, madamo nga pamatan-on ang mahimo indi interesado sa ideya sang bisan ano nga eskwelahan. Bisan ang iban sang mga pamatan-on nga ginpadaku sang Cristianong mga ginikanan mahimo nga madulaan sing apresasyon sa Cristianong mga miting, nagareklamo nga ‘makatalaka’ ini, ‘tuman kalawig,’ ukon ang paghimo sing iban nga butang—subong sang pagtan-aw sing telebisyon—mas makawiwili. Ngaa, nian, ang isa ka pamatan-on dapat magpain sing tion gikan sa kalingawan kag pag-eskwela agod makatambong sa Cristianong mga miting?

Mga Miting—Isa ka Kasangkapan Agod Magpabilin nga Mapagros sa Pagtuo

Si apostol Pablo nagsiling isa ka bes nga ‘kon wala sing pagtuo imposible nga mapahamut-an [ang Dios].’ (Hebreo 11:6) Sa amo ginlaygayan niya ang mga Cristiano nga magpabilin nga “malig-on sa pagtuo.” (Tito 2:2) Nagakaigo bala ining laygay para sa mga pamatan-on karon? Amo gid sa pagkamatuod! Amo sini ang ginsiling sang isa ka 15-anyos nga lin-ay: “Kon kaisa ginahunahuna ko nga ang mga pamatan-on may pinakamabudlay nga tion sa kabuhi. Yara kami sa palibot sang mga tawo nga nagahimo sing pagpakighilawas, nagadroga, kag nagainom.” Mapamatukan mo bala ining mabaskog nga mga impluwensia paagi sa ‘pagpain sang imo kaugalingon’ gikan sa kaupod nga mga Cristiano? (Hulubaton 18:1) Indi.

Busa ang Cristianong mga miting nagahatag sing isa ka importante nga kinahanglanon. Nagabulig ini sa imo ‘sa pagpabilin nga “malig-on sa pagtuo”! Si Tertullian, isa ka tumuluo sang ikaduha nga siglo, nagsiling: “Nagatipon kami agod basahon ang amon sagrado nga mga sinulatan . . . paagi sa sagrado nga mga pulong ginapalig-on namon ang amon pagtuo.” Sa karon man, ang mga miting sa Kingdom Hall ‘makapalig-on sang imo pagtuo’ kag makapabakod sa imo. Indi katingalahan, nian, nga ang mga Cristiano ginsugo: “Mangin malig-on kita kag indi mationg sa pagtuad sang aton paglaum, . . . wala nagapalayo sa aton mga miting, subong sang ginahimo sang iban.”—Hebreo 10:23-25, The New English Bible.

Mga Miting—Makalilipay kag Makagalanyat

Apang, sa sining dag-on sang mataas nga teknolohiya, madamo nga pamatan-on ang nagapangayo nga indi lamang tudluan kundi lingawon. Kag matuod, ang mga miting sa Kingdom Hall indi isa ka pagpasundayag sa entablado. Apang, wala ini ngakahulugan nga ang programa makatalaka kag indi makawiwili. Binagbinaga: Ano ang nagahimo sa pagkaon nga makalilipay? Indi bala amo ang masustansya kag lainlain nga pagkaon, ang makalilipay nga mga kaupod sa lamesa, kag ang masulhay nga atmospera? Ti, pat-od nga nalab-ot sang Cristianong mga miting ining mga talaksan para sa pagkalipay:

Masustansya kag Lainlain: Ang lima ka miting nagaaman sing balanse nga espirituwal nga pagkaon—halin sa laygay para sa pamilya tubtob sa pagtuon sa mga tagna. Lainlain? Ti, ang mga pamulongpulong kag ang mga paghinun-anon sang grupo masami nga ginalakipan sing mga interbyu kag buhi nga mga pasundayag. Madumduman sang 15-anyos nga si Janet ang iya nahauna nga miting: “Sa tunga sang miting ginsilingan ko ang akon iloy, ‘Mapauli na kita.’ Ginkapoy ako sa pagpungko. Apang nian ang mga tigulang kag mga bata nagbuslanay sa paghambal gikan sa plataporma. Naluyagan ko yadto kag nagpabilin ako tubtob natapos.”

Makalilipay nga mga kaupod: Sa tapos makatambong sa iya nahauna nga miting, ang lin-ay nga taga-Nicaragua, nga nagahingalan kay Carolina, nagsiling: ‘Nagdayaw ako sa bata nga mga katapo. Mainabyanon sila kag matinahuron.’ Huo, sa Kingdom Hall makakita ikaw sing ‘maayo kag makalilipay’ nga mga kaupod. (Salmo 133:1) Sa amo ang 16-anyos nga si Anita nagsiling: “Sa Kingdom Hall, nakakita ako sing matuod nga mga abyan.”

Masulhay nga atmospera: “Kon kaisa nagapalibog ako nahanungod sa isa ka problema sa bug-os nga adlaw,” siling ni Simeon, edad 14. “Apang sa Kingdom Hall, malipatan ko ini. Nagabatyag ako sing kalinong sa sulod ko.” Ang Cristianong mga miting nagpabanaag sing espiritu sang Dios nga kalipay kag paghidait. (Filipos 4:4-7) Kag baliskad sa sobra sa desinyo kag malinong, artipisyal nga atmospera sang madamo nga simbahan, ang mga Kingdom Hall simple sa desinyo kag may masulhay nga atmospera. Ang lamharon nga si Barbara nagsiling: “Masulhay ang pamatyag ko sa Kingdom Hall.”

Isa ka Duog sa Pagtuon

Apang, kapin ka importante sa atmospera, amo ang imo maton-an sa pagtambong sa mga miting sa Kingdom Hall. Sa pag-ilustrar, binagbinaga ang isa lamang sa lima ka miting, ang Teokratikong Eskwelahan sa Ministeryo. Ginpatok ini sang 1943 agod hanason ang mga Cristiano sa arte sang paghambal sa publiko. Isa ini ka internasyonal nga eskwelahan, nga ginpatok sa tanan nga kongregasyon sang mga Saksi ni Jehova sa bug-os nga kalibutan, kag nagatanyag ini sing palareho nga edukasyon. Ang mga estudyante nagabaton sing pareho nga paghanas kon bala sila mga lalaki ukon mga babayi, itom ukon puti, manggaranon ukon imol—sa wala sing bayad!

Ang una nga libro amo ang Biblia. Ang sangkol nga mga instruktor nagatudlo sa mga estudyante kon paano magtipon kag pasangkaron ang impormasyon tuhoy sa Biblia, kag dayon ipresentar ini sa isa ka nagapakighambal nga paagi. Ang libro nga natig-uluhan Theocratic Ministry School Guidebooka ginagamit man may kaangtanan sa eskwelahan. Ang 38 ka tolon-an sini nagakobre sing mga topiko subong sang “Working Up an Outline,” “Sense Stress and Modulation,” kag nagatudlo sing nagakigo nga diksion, pagmitlang, kag komposisyon. Sang gintanyag sang isa ka pamatan-on nga nagahingalan kay Terri ining libro sa iya instruktor sa Speech Class, ginsilingan niya ang iban nga mga estudyante: “Sa tapos sang lima ka semana sang klase, ginhatagan niya ako sang ulihi sing libro kon paano dumalahan ang isa ka klase sa speech sing nagakaigo!”

Handurawa ang ikasarang mo nga makatindog ka sa atubangan sang isa ka grupo kag magtudlo sing Biblia—nga may kalantip kag kasangkol! Isa lamang ini sang mga benepisyo nga matigayon mo kon magtambong ka sa mga miting sa Kingdom Hall. Idugang sa sina ang maayong asosasyon nga matigayon mo didto, kag madali mo mahangpan kon ngaa ang regular nga pagtambong sa mga miting importante gid sa pagpakaon sang imo pagtuo sa Dios kag sa iya anak. “Sia nga nagatuo,” pahanumdom sa aton ni Jesus, “may kabuhi nga walay katapusan.”—Juan 3:36.

Ginalauman namon, nian, nga ining malip-ot nga pagpaathag nagpukaw sang imo gana nga magsugod sa pagtambong sa mga miting kon wala mo pa maumpisahi ini. Apang, ano kon nagatambong na ikaw? Nian ang pamangkot amo, Madamo ka bala sing naton-an sa sining mga miting subong amo ang nagakadapat? Ipaathag ini sang palaabuton nga guwa.

[Footnote]

[Piktyur sa pahina 21]

Ang mga miting sa Kingdom Hall naghatag sing mga kahigayunan para sa mga pamatan-on sa pagpakigbahin sing aktibo