Ang mga Miting Nagabulig sa mga Pamatan-on

¹ Ang isa ka dalagita nagsiling: “Kon kaisa nagahunahuna ako nga ang mga pamatan-on may labing mabudlay nga tion sa kabuhi. Ginapalibutan kami sang mga tawo nga nagapakighilawas, nagadroga, kag nagainom.” Amo bala sina ang imo balatyagon? Kon amo, ano sa banta mo ang makabulig sa imo nga mabatuan ining malain nga mga impluwensia? Kinahanglan mo ang pagtuo, ang mabakod nga pagtuo sa pagkamatarong sang dalanon ni Jehova, kay kon wala ina “imposible nga mapahamut-an sia sing maayo.” (Heb. 11:6) Ang pagtambong sa mga miting sang kongregasyon magabulig sa imo nga mapabakod ang imo Cristianong pagtuo kag determinasyon nga likawan ang malain.

² Ang mga Miting May Madamo nga Mahatag sa Imo: Paano ang manamit nga pagkaon upod sa mahirop nga mga abyan nangin makalilipay? Indi bala ang kombinasyon sang manamit nga pagkaon kag sang makalilipay nga pag-inupdanay sa isa ka maaliwanay nga palibot? Ti, ang aton mga miting nagahatag sing amo sini ka makalilipay nga eksperiensia, apang sa espirituwal nga kahulugan.

³ Ang mga butang nga ginahambalan sa mga miting makapalig-on, halin sa mga butang may kaangtanan sa adlaw-adlaw nga mga problema sa kabuhi tubtob sa mga pagtuon sa makawiwili nga mga tagna sang Biblia. Ang praktikal nga mga instruksion nga ginahatag nagatudlo sa imo kon paano magkabuhi sing labing maayo kag kon paano atubangon ang mga hangkat sa imo. Ang mga kaupdanan nga masapwan sa mga miting amo ang labing maayo bisan diin, kag ang espirituwal nga palibot makalilipay kag wala sing katalagman. (Sal. 133:1) Indi katingalahan nga ang isa ka dalagita nagsiling: “Nagaeskwela ako sa bug-os nga adlaw, kag nagapahuyang ini sa akon. Apang ang mga miting subong sang mauyahon nga duog sa desyerto, diin ginapapagsik ako agod maatubang ang masunod nga adlaw sa eskwelahan.” Ang isa pa nagsiling: “Nasapwan ko nga ang suod nga pagpakig-upod sa iban nga nagahigugma kay Jehova nagabulig sa akon nga magpabilin nga suod sa iya.”

⁴ Paagi sa pagpalista sa Teokratikong Eskwelahan sa Pagministro, matun-an mo nga tipunon ang impormasyon sa Biblia, himuon ini nga isa ka pamulongpulong, kag nian ihatag ini sa paagi nga daw nagapakighambal lamang sa tumalambong sa Kingdom Hall. Handurawa lamang ang kapuslanan nga ginhanas ka agod matudlo sing malantipon ang nagaluwas-kabuhi nga mga kamatuoran sa Pulong sang Dios! Diin pa matigayon sang mga pamatan-on ang amo sini ka hamili nga paghanas?

⁵ Kon Paano Matigayon ang Pinakadaku nga Kapuslanan sa mga Miting: Agod matigayon ang pinakadaku nga kapuslanan sa mga miting, tatlo ka importante nga butang ang nadalahig. Ini amo ang paghanda, pagpakigbahin, kag pag-aplikar.

⁶ Maghanda para sa Sini: Magtalana sing regular nga tion sa paghanda para sa mga miting. Indi pagtuguti nga kuhaon sang hilikuton sa eskwelahan, part-time nga trabaho, ukon kalingawan ang tion nga kinahanglan mo agod marepaso sing abanse ang materyal nga binagbinagon sa tagsa ka miting. Nagabulig ini agod matigayon ang maayo nga rutina. Labing importante sa tanan amo ang pagsunod sa iskedyul sang semanal nga pagbasa sing Biblia para sa Teokratikong Eskwelahan sa Pagministro. Pila lamang ka minuto kada adlaw ang kinahanglan agod mabasa kag mapamalandungan ang gintangdo nga mga kapitulo. Magtalana sing tion agod handaan ang Pagtinuon Sang Kongregasyon sa Libro kag ang Pagtinuon sa Lalantawan. Ginahimo ini sang iban sa di-magkubos isa ukon duha ka adlaw antes sining mga miting. Kon posible, himua man ini para sa mga bahin nga ginaiskedyul sa Miting sa Serbisyo kada semana.

⁷ Makigbahin sa Sini: Ang Biblia nagasiling nga sa edad nga 12, si Jesus nakit-an sa templo, nga nagapamati, nagapamangkot, kag nagahatag sing mga sabat. (Luc. 2:​46, 47) Buot silingon, bug-os gid sia nga nadalahig. Makabenepisyo ka sing labi sa mga miting kon manikasog ka nga makigbahin sa sini.​—⁠Hulu. 15:⁠23.

⁸ Kinahanglan gid nga magkonsentrar ka sa ginatudlo sa mga miting. Kon kaisa, ang pagpamati sa isa ka pamulongpulong mas mabudlay sangsa paghatag sini. Ngaa? Ang imo hunahuna mahimo nga maglagaw kon may nagahambal. Paano mo ini mabatuan? Paagi sa pagkuha sing mga nota. Isulat ang importante nga mga punto nga luyag mo tan-awon sa ulihi. Ang pagkuha sing nota magabulig sa imo nga huptan ang imo hunahuna nga nagakonsentrar sa programa. Subong man, tan-awa ang mga kasulatan, kag sundi ini samtang ginabasa sang humalambal.

⁹ Dugang pa, himua nga tulumuron nga makapakigbahin sa tagsa ka pamangkot-kag-sabat nga pagbinagbinag sa mga miting. Labi pa ikaw nga makabenepisyo kon ginahunahuna mo sing maayo ang luyag mo ihambal. Ang Hulubaton 15:​28 nagasiling: “Ang tagipusuon sang matarong nagapamalandong agod makasabat.”

¹⁰ Iaplikar ang Imo Natun-an: Ang katapusan nga tikang amo ang pat-uron nga ang imo natun-an ‘nagapanghikot sa imo.’ (1 Tes. 2:13) Samtang ginaaplikar mo ang maayo nga mga punto nga natun-an mo sa tagsa ka miting, labi ka nga magasuod kay Jehova nga Dios. Mangin matuod sia sa imo, kag maagom mo ang daku nga kalipay kag kaayawan samtang “padayon [ka] nga nagalakat sa kamatuoran,” ginahimo ini nga imo.​—⁠3 Juan 4.

¹¹ Pamatan-on nga mga utod nga lalaki kag babayi, samtang regular kamo nga nagahanda para sa mga miting, nagapakigbahin sa sini, kag nagaaplikar sang inyo natun-an, malipay kamo sing bug-os sa mga miting. Sa amo man nga tion, matigayon ninyo ang tanan nga benepisyo gikan sa sini. Ang inyo pagtuo magabakod, subong man ang inyo pamat-od nga magpabilin nga matutom sa inyo langitnon nga Amay, si Jehova.​—⁠Sal. 145:⁠18.