Kon Paano Maagom ang Labi Pa nga Kalipay Gikan sa mga Miting
1 Ang mga miting kinahanglanon sa aton espirituwal nga kaayuhan. Ang kalipay nga matigayon naton gikan sa sini ginaangot sing direkta sa kon ano ang aton ginahimo sa wala pa, sa tion, kag sa tapos sang mga miting. Paano naton mabuligan ang aton kaugalingon kag ang iban pa nga mahuptan ang daku nga kalipay sa pagtambong sa mga miting?
2 Sa Wala Pa ang mga Miting: Ang paghanda may direkta nga epekto sa kalipay nga matigayon naton gikan sa mga miting. Kon nakahanda kita sing maayo, mas mahuyog kita sa pagpamati kag sa pagpakigbahin. Dugang pa, ang bisan ano man nga asaynment sa mga miting nga mabaton naton dapat handaan sing maayo sa tuyo nga mapaalinton ang impormasyon sing sibu suno sa mga instruksion kag mahuptan ang interes sang tumalambong. Dapat kita mag-ensayo sing maayo. Kon nagapakigbahin kita sa mapagsik kag makapalig-on nga mga miting nga nagabenepisyo sa tanan, ang aton personal nga pag-uswag madayag kag matigayon naton ang daku pa nga kalipay.—1 Tim. 4:15, 16.
3 Sa Tion sang mga Miting: Ang pagkomento sa mga miting makabulig sa aton nga magkalipay sa sini sing labi pa. Ang mga bahin nga nagakinahanglan sang pagpakigbahin sang tumalambong dapat tamdon subong personal nga mga asaynment para sa tagsatagsa sa kongregasyon. Ang malip-ot kag direkta-sa-punto nga mga komento masunson nga labi ka epektibo. Ang malip-ot nga pagsugid sing makapalig-on nga mga eksperiensia makapalig-on kag makapapagsik gid, kag dapat kita mangin alisto nga ilakip ini kon nagakaigo sa programa. (Hulu. 15:23; Binu. 15:3) Kon nagahatag sing bahin sa miting, dapat kita maghambal sing mapagsik kag makahalaylo, nagahimo sini nga makawiwili, realistiko, kag praktikal.
4 Sa Tapos sang mga Miting: Ang pagpakighambal sing mainayuhon sa iban, pagtamyaw sing mainabyanon, kag pagpaambit sing pila ka importante nga mga punto nga ginbinagbinag sa mga miting magabenepisyo sa aton tanan. Paagi sa pagpabutyag sang aton kalipay nga makita ang mga bata, mga tigulang, kag mga bag-uhan nga nagapakigbahin nagapatudok sang aton gugma sa paghiliutod. Sa baylo nga mulayon ang iban nga mahimo nga wala makatambong sa mga miting, dapat naton ipaambit sa ila ang aton kalipay sa pagtambong, sa amo ginapalig-on sila sa pagtambong.—Heb. 10:24, 25.
5 Indi naton pagdingutan ang aton kaugalingon sining kinahanglanon nga aman nga magpalig-unay. (Roma 1:11, 12) Paagi sa mahunahunaon nga pagpanikasog sing hanuot, sarang naton tanan mahuptan ang kalipay sa pagtambong sa Cristianong mga miting.