Mgpabilin nga Mapagros—Ang Natural nga Paagi

Sang koresponsal sang Magmata! sa Pepublika Pederal sang Alemanya

SANG mag-untat sia sa pagpanigarilyo, nagtambok si Shirley. Bangod determinado ang iya bana nga dulaon ang iya daw bata nga pigura, namat-od sia nga dapat sila magjogging agod mangin mapagros. Sa amo, upod sa minilyon pa sang nagligad nga tinuig, ginsugdan nila ang isa ka programa sa pagpauswag sang ila panglawas.

Kaangay sang mga tawo sang iban nga mga pungsod, ang mga Aleman karon mabinalak-on gid sa ila lawas. Ginapakita ini sang mga 4,200 ka mga klab para sa pagpakorte ukon sa pagpapagros sa lawas diri sa Alemanya. Mga babayi ang halos katunga sang mga katapo, gani indi makapakibot nga sa tatlo ka tuig nga sunodsunod ang babayi nga nagapanguna sa kalibutan sa pagpakorte sa lawas, ukon sa “pagpaestilo sa lawas,” Aleman.

Para sa ila nga maluyag magpabilin nga mapagros paagi sa pagsunod sa prinsipio nga “ang imo ginakaon nagapakita kon ano ikaw,” ang Alemanya nagatanyag sing kapin sa 2,700 ka balaligyaan sing pangpapagros nga pagkaon kag 1,000 pa ka ginatawag nga bio-shop, nga nagabaligya sing mga pagkaon nga wala gingamitan sing mga kemikal uon kemikal nga mga abono. Kag, sa pagkamatuod, may bahin man ang pungsod sa mga banwahanon nga nagapati nga ang bitamina nga mga pildora importante sa ila lawas.

Ining nanuhaytuhay nga paagi sa pagpapagros ginapasad sa natural nga paagi sa pagpugong sa balatian sa baylo sang pagbulong sini. Apang ano kon mapaslawan ang natural nga paagi? Nian madamo nga Aleman ang nagaliso sa natural nga paagi sang pagbulong.

Lawas, Ayuha ang Imo Kaugalingon!

Upod sa ortodokso ukon klasikal nga porma sang pagpamulong, ang Europa nagatanyag sing nanuhaytuhay nga mga herbalist, naturopath, kag iban pa nga mga manugbulong nga nagarekomendar sing tal-us nga mga metodo sang pagbulong. Ang natural nga mga remedyo nga ginaresita nila, sa baylo nga ginatuyo sa pagdula sa mga sintoma, ginatuyo sa pagpalig-on kag sa pagsakdag sa mga pagpanghikot sang lawas kag sa mga sistema sini sa pagdepensa agod nga maayo sang lawas ang iya kaugalingon.

Ang isa ka dyurnalista nagsulat kasan-o lang: “Kapin kag kapin nga pasyente ang nagaliso sa mga ikasarang sa pagpaayo sang mga tanom.” Apang, may kaangtanan sa sini mahimo talupangdon nga madamo sang natural nga mga remedyo, subong sang digitalis, nga gikan sa mga dahon sang foxglove, ang sarang na karon mapatubas sing sentitiko. Sa Kamatuoran, ang bulong nga ginpatubas sing sentitiko mahimo nga may kapin nga kapuslanan. Sa pagkamatuod, indi tanan sang natural nga mga sustansya, wala sing halit. Halimbawa,, binagbinaga ang opio kag hemlock, kag ang makahililo nga uhong.

Apang, makatarunganon lamang silingon nga ang mga katalagman sang madamo sang modernong medikal nga mga terapiya nahangpan na karon sing kapin. Sa masami ang ila katalagman mas daku sang sa natural nga mga remedyo, ang isa ka kilala nga halimbawa amo ang bulong nga thalidomide. Ang mga bulong masami nga may lamita nga mga epekto, gani ang halit sinang lamita nga mga epekto dapat binagbinagon sing mahalungon batok sa mga kaayuhan sini.

Ginasiling nga karon ang kada ikatlo nga bulong nga ginabaligya sa Alemanya nahuman sang natural nga mga elemento sa baylo sang mga kemikal. Ining huyog ginsakdag sang nahaunang ginang anay sang Alemanya. Si Dr. Veronica Carstens, isa mismo ka internist, nagsiling: “Wala ako nagapamatok sa klasikal nga pagbulong. Apang nasapwan ko nga ang natural nga paagi sang pagbulong ekselente nga suplemento sang klasikal nga pagbulong.”

Si Dr. Carstens mabaskog nga nagapalig-on sa mga doktor nga mangin pamilyar sa duha ka sahi sang pagbulong kag rumpagon ang lambay nga madugay na nagatunga sa duha. Maathag nga may mga resulta ini. Ang pagtuon nga ginhimo sa University of Freiburg sa pagsugod sining dekada nagpahayag nga 60 porsiento sang tanan nga Aleman nga mga doktor ang talagsa ukon regular nga nagaresita sing natural nga mga remedyo kon ginabatyag nila nga ang klasikal nga bulong indi kinahanglanon. Ining kadamuon, sa kamatuoran, mahimo nga dugangan pa tubtob sa halos 100 porsiento kay ginakilala sang kalabanan sang medikal nga mga doktor ang kinaiya sang whirlpool therapy nga sa diin nagakatabo ang halit sa mahumok nga mga tisyo, mga maskulo, kag mga lanitlanit.

Sa amo, ang ginareport karon nga mga makabulong nga mga kinaiya sang goldenrod, kulitis, ahos, balm, juniper berries, kag kaangay sina ginasakdag. Ginahimo nga tsa ukon hampol ukon ginagamit ang duga, ginabaton nga wala ini nagadala sing hinali nga paumpaw nga kon kaisa ginahimo sang ginatawag nga milagro nga mga bulong, apang sa dimagkubos wala ini sing lamita nga mga epekto nga kabalak-an sang isa. Nahisanto ini sa prinsipio sang medisina nga “primo non nocere” (“una anay wala sing halit”).

Tubig—May Kapin Pa Bala ka Natural?

Ang paggamit sing tubig subong bulong ukon pangtapna sa balatian nga terapiya, subong sang health resort ukon spa, isa man ka natural nga paagi sa pagpapagros. Sa sini, suno sa Aleman nga semanal nga pamantalaan nga Der Spiegel, ang mga Aleman “may daku nga biya sa tanan, kay indi makita sa iban nga lugar ang nanuhaytuhay nga mga spa, nga makapapagros, makapaayo, kag makatapna.” Talupangda nga sa Alemanya ang ginapadaku sa mga spa, amo ang panglawas, indi ang paglingawlingaw ukon pagbakasyon. Nahisanto ini sa ginahalinan sini. Ang mga spa nagkuha sang ila ngalan gikan sa Spa, Belgium, isa ka paliguan nga bantog anay kag kilala sa natural nga tubig sini nga may mineral.

Sang 1985 halos isa sa walo ka tawo nga nagapuyo sa Alemanya ang naghinguyang sing pila ka tion sa isa sining health resort ukon may bulong nga mga paliguan. Ang iban naggasto para sa ila kaugalingon, apang bangod sang siguro sa panglawas sa Alemanya madamo ang nakaagi sini sa diutay nga bili. Sa pagkamatuod, limitado ang terapiya nga ginabayaran sang siguro sa panglawas, subong man ang kasunson nga matigayon ini.

Ang isa ka popular nga pagbulong nga nagapadaku sang paggamit sa tubig amo ang Kneipp nga terapiya. Gintukib ini ni Sebastian Kneipp kapin sa isa ka gatos ka tuig ang nagligad sa isa ka diutay nga siudad sa bagatnan-nakatundan sang Munich. Ang Kneipp nga terapiya ginatanyag karon sang madamo nga spa sa bug-os nga Europa, kag bisan ang Hapon makatigayon sa dili madugay sang iya unauna gid nga Kneipp nga health resort. Indi ini makapakibot bangod sang pagpadaku sa pisikal nga kapagros sa Hapon, subong ginasambit sa Pebrero 22, 1987, nga guwa sang Awake!”

Ang Hydrotheraphy, nga sa amo ginpasad ang Kneipp nga terapiya, “amo ang pagbulong sa balatian ukon diperensya paagi sa paggamit sing tubig,” kag mahimo ini sa nanuhaytuhay nga porma: whirlpool, shower, pagpaligo, ehersisyo sa idalom sang tubig, masahe, mainit kag mabugnaw nga hampol, sa pagsambit sing pila lamang. Ang Kneipp nga terapiya ginpasad sa ideya nga ang tubig epektibo (1) sa pagtunaw ukon sa pagdula sang makahililo nga mga deposito nga nagapugong sang nagakaigo nga pag-ilig sang dugo, (2) sa pagdula sining mga hilo, kag (3) sa pagpabakod sa organismo.

Sa amo, ang Australian Family Physician sa Disiembre 1984 nga guwa sini nagsiling nga ang ‘hydrotherapy’ ukon ehersisyo sa mainit nga tubig, isa ka teknik nga ginagamit sa pagbulong kag sa pagkontrol sa reumatiko, neurolohiko kag ortopediko nga mga kahimtangan.’ Kag ang magasin sa medisina sang Rusya nga Akush Ginekol, 1982, nagreport tuhoy sa ‘pagnormal sang ikasarang sa pagpanganak sang babayi sa tapos mabulong sa health resort.’

Ang Kneipp nga terapiya epektibo gid kono sa pagbulong sang balatian sa tagipusuon kag kaugatan kag sang diperensya sang sistema nerbios. Epektibo man ini sa pagbulong sang palanakit sa likod paagi sa daw alimpulos nga tubig ukon pag-ehersisyo lamang sa banyera sang mainit ukon mabugnaw nga tubig. sa kamatuoran, mahimo gani masiling nga si Kneipp abanse sing madamo nga dekada sang iya tion, kay ginakilala sang modernong medisina ang kapuslanan sang hydrotherapy, nga ginapakita sang bisan diin nga guwa sang Indexus Medicus.

Ang Die Kneipp Kur (Ang Kneipp nga pagbulong), ni Lothar Burghardt, nagsiling nga “sa tapos sang pagpabulong sa health resort, ang kadamuon sang mga adlaw sang pagpalya bangod sang balatian nagnubo sing kapin sa 60%. Nagakahulugan ini sing pagkinot sa ginabayad para sa balatian . . . kag dugang pa nga hinimuan. Sa tapos sang pagpabulong sa health resort, ang pag-inom sing bulong nagnubo sing daku (sing mga dos tersia). . . . Ang ekonomiko kag sosyal nga mga sientipiko sa nanuhaytuhay nga mga pungsod, nakatukib nga sa tagsa ka Mark nga ginapuhunan sa pagpabulong sa health resort, tatlo ka Mark ang ginakinot sa posible nga balatian.”

Ang puno nga medikal nga opisyal anay, nga si Fritz Allies, nagsiling: “Ang bili sang pagtener sa health resort ginabayaran sang kompanya sa siguro sa panglawas sang pasyente ukon sang pension nga ginahatag sang Alemanya, kag mahimo nga nagalab-ot tubtob sa madamong linibo ka DM [deutsche mark] para sa tagsa ka pasyente. Ang kuwarta nga ginagasto ginapaabot nga mangin mapuslanon sa pagligad sang tion. Ginalauman nga ang pasyente makatrabaho sing kapin subong resulta sang pagbulong kag busa makabayad sa siguro para sa panglawas, sa baylo nga magbaton sing benepisyo para sa balatian ukon maaga nga pension.”

Ang mga kompanya sang siguro indi gid matamod subong madali madaya ukon may ginadampigan kon tuhoy sa mga terapiya nga nagapanaad sing mga benepisyo para sa panglawas. Sa amo, ang DAK Magazin, nga ginbalhag sang isa ka kilala nga Aleman nga kompanya sa siguro, naghambal sa Marso 1987 nga guwa sini: “Ang apat ka semana sang aktibo nga paghanas sa kapagros sa pagbulong nga ginhimos sang DAK nagdala sing halos indi mapatihan nga pag-uswag sang kapagros.”

Ang naghatag sing kaanggid man sini nga pamatuod amo ang Aleman nga balasahon sa medisina nga Münchener Medizinische Wochenschrift, nga nagreport: “Sang nagligad nga mga duha ka tuig gin-usisa namon ang 100 ka report sa tapos mabulong sa health resort. Sa 88% sining mga kaso, ginpamatud-an sang mga doktor sa health resort ang positibo nga resulta.”

Paandam

Ang pagkaon sing nagakaigo kag sing haganhagan, bastante nga pahuway kag ehersisyo, pati ang paghaklo sing preska nga hangin, daku nga mga bulig sa pagpabilin nga mapagros. Ang mga health resort, nga nagatinguha sa pag-aman sing palibot nga wala sing kahuol kag kapiot, masami nga nagatanyag sini nga mga kaayuhan kag kapin pa. Kon kaisa ang pagtener sa sina nga health resort makabulig pa gani sa pagbalhin sang pagsinalayo sa kabuhi, subong sang kon malandas ang bisyo nga pagpanigarilyo. “Ang bulong,” siling ni Rita Süssmuth, ministro sa kapagros sang Republika Pederal sang Alemanya, “isa ka daku nga pagbalhin para sa madamo nga tawo sa pagpakig-angot sa ila kaugalingon kag mahimo nga magdul-ong sa mas maayo kag mas pabor sa kapagros nga estilo sang pagkabuhi.”

Apang, dapat batunon nga ang tagsa ka metodo sang pagpabilin nga mapagros may posible nga mga katalagman. Ang iban nga mga bulong, kemikal ukon natural, mahimo magtuga sing indi maayo nga lamita nga mga epekto, bisan pa ginainom sing nagakaigo. Ang indi nagakaigo nga mga pagkaon mahimo magdul-ong sa indi balanse nga pagkaon. Kag ang sobra nga ehersisyo, ukon ang sayop nga sahi sang ehersisyo, mahimo tunaan sang pagbanog sang siko, pagbanog sang tikod, ukon pagpalanakit sang likod—wala labot sa tion nga ginauyangan.

Ang pagduaw sa health resort sa pagpabulong nagatuga man sing katalagman sa malain nga mga kaupod. Bangod malayo sa puluy-an kag sa pamilya may kapin nga tion nga mahinguyang sang sa kinaandan, ang isa ka tawo mahapos nga masulay sa paghinguyang sini sing indi maalamon. Ginailustrar ini sang ginsiling sang isa ka babayi nahangungod sa iya pagtener sa isa ka health resort: “Kon ang tatlo ka semana nga wala sing trabaho—kag wala ang imo bana—indi bakasyon, nian ano ini? Ang siutay ng aromansa bahin sang pagbulong.”

Apang nasapwan sang mga tawo nga nagahandum sa paghupot sing Cristianong mga talaksan sa moralidad kag paggawi nga ang dayag nga pagpakighambal sa iban nahanungod sa Ginharian sang Dios nagaamlig sa ila gikan sa mga tawo nga may maduhaduhaan nga mga pagtamod ukon mga motibo. Sa kamatuoran, sa liwat kag liwat ang Cristianong mga saksi ni Jehova nga nabulong sa spa nakatigayon sing dakung kadalag-an sa pagpanaksi kag sa pagpahamtang sing mga Biblia kag mga literatura sa Biblia. Ang kaalam gikan sa hitaas nagapakita nga ang mga may-asawa indi dapat magkadto sa spa luwas kon upod ang ila tiayon.

Apang, kon bala yara sa puluy-an nga nagahigda sa katre bangod sang balatian ukon sa ospital ukon sa spa, sa pagkamatuod mas makalilipay nga hunahunaon ang mga kalipay sang palaabuton nga kapagros sang sa magkumodkumod sa kabudlayan sang mga balatian karon. “Ang matahom nga mga pulong subong sang uludlan sang dugos,” siling sang hulubaton sa Biblia, “matam-is sa kalag kag ikaayo sa mga tul-an.”—Hulubaton 16:24.

Kinahanglan ang Pagkabalanse!

“Ang malain sa pagtinguha pirme nga tipigan ang kapagros sang lawas amo nga mabudlay gid ini himuon nga indi mapierdi ang kapagros sang hunahuna.” Amo sini ang ginsulat sang Ingles nga awtor nga si G. K. Chesterton sang nagligad nga kalim-an ka tuig. Mahimo ipaathag inang mga pulong sa pagsiling nga ang paghatag sing sobra nga igtalupangod sa pisikal nga kapagros sang isa ka pat-od nga may makahalalit nga epekto sa espirituwalidad sang isa.

Huo, madali gid nga mabuyo ang isa sa duha ka bahin sang pagpasobra. Ang kalabanan nga tawo wala nagasapak sang ila panglawas, kag ang mga nagasapak, masami nga nagapasobra. Ang sekreto amo ang mangin balanse. Buot silingon mangin realistiko. Dumduma, man, nga ang epektibo sa isa mahimo nga indi epektibo sa iban, nga bangod sining rason ginasiling nga ‘ang karne sang isa ka tawo hilo naman sang lain nga tawo.’ Dapat dumdumon sang isa nga, sa karon, ang himpit nga panglawas imposible. Indi mangin dibalanse, isa ka sahi sang ‘apostol sang kapagros,’ nga nagabantala sang imo paagi sa pagpabilin nga mapagros subong ang katapusan nga pulong sa pagpabilin nga mapagros ukon paagi sa paghimo sini nga labing importante nga butang sa kabuhi.

Ang Manunuga sang katawhan, si Jehova nga Dios, nagapasalig sa aton nga sa iya nagapakari nga bag-ong kalibutan “wala sing pumuluyo ang magasiling: ‘Nagamasakit ako.’” (Isaias 33:24) Apang agod makatigayon sing kabuhi sa sinang bag-ong sistema, dapat kita anay magpakita sing pagtuo sa Dios kag magpalapit sa iya paagi sa halad nga gawad sang iya Anak, nga si Jesucristo. (Binuhatan 4:12; Hebreo 7:25; 11:6) Daw ano ka malipayon sila nga mabuhi tubtob makita ina nga tion, nga ang pagpabilin nga mapagros mangin amo ang labing natural nga butang sa kalibutan!

[Footnote]

Wala ginasakdag sang Magmata! ang bisan anong partikular nga terapeutiko na metodo.

[Blurb san pahina 22]

“Ang bili sang pagtener sa health resort kinaandan nga ginabayaran sang kompanya sa siguro para sa panglawas sang pasyente ukon sang Aleman nga pension”

[Mga piktyur sa pahina 20, 21]

Terapiya sa Aleman nga health spa

[Credit Line]

Kurverwaltung Bad Salzschlirf

[Credit Line]

Kurverwaltung Bad Camberg

[Credit Line]

Kurverwaltung Bad Camberg