Ang Pagtamod sang Biblia
Kon Ngaa ang Teolohiya sa Paghilway Indi ang Sabat
Ang teolohiya sa paghilway bag-o nga ideya. Ginpautwas ini sang nagligad nga duha ka dekada sang Romanong Katoliko nga mga pari sa Bagatnan nga Amerika nga napaslawan bangod sang daku nga kaimulon sa madamo sang ila mga panong. Nagbatyag sila nga ang paghambal lamang sa imol kaayo nahanungod sa espirituwal nga mga butang wala gid nagabulig sa ila. Sa baylo, sila, ang mga klero, nagbatyag nga kinahanglan nila nga sakdagon ang radikal nga mga pagbalhin sa katilingban agod ang mga tawo magauswag sa espirituwal. Ginsakdag pa gani sang iban ang rebolusyon.
Matuod, indi malain ang luyag nga pauswagon ang kahimtangan sang mga imol. Si Jesus mismo nagbatyag sing daku nga kaluoy sa katawhan sang panahon niya. Aton mabasa: “Sang nakita niya ang mga kadam-an naluoy sia sa ila, kay ginalapyo sila kag nag-alaplaag subong sang mga karnero nga walay manugpahalab.” (Mateo 9:36) Sa pagkamatuod, si Jesus nagsaad sing kahilwayan sa mga nagahulag sa iya mga pulong, nagasiling: “Kamo makakilala sang kamatuoran, kag ang kamatuoran magahilway sa inyo.” (Juan 8:32) Gani ang teolohiya sa paghilway bala ang paagi sang Biblia para mabuligan sang isa ka Cristiano nga ministro ang mga imol?
Isa ka Sayop nga Teoriya
Indi, bangod sang madamo nga rason. Una, ang nahauna nga responsabilidad sang isa ka Cristiano nga ministro amo ang espirituwal nga kaayuhan sang iya panong, kag wala sing pamatuod nga kon mag-ayo ang talaksan sa pagkabuhi sang imol nga tawo, labi sia nga mahuyog sa pag-uswag sa espirituwal. Sa pagkamatuod, ang mas manggaranon nga mga pungsod sang aminhan nga Amerika kag Europa, walay sapayan sang ila mataas nga talaksan sa pagkabuhi, nag-antos gikan sa mabug-at nga mga problema sa espirituwal. Ang pagkadibunayag, imoralidad, pag-abuso sa kabataan kag sa mga tigulang, kag kakagud—sa pagsambit sa pila lamang—lapnag. Kag sa iban nga lugar ang interes sa Dios patay.—2 Timoteo 3:1-5.
Dugang pa, ang teolohiya sa paghilway indi amo ang ginhimo ni Jesus sa pagbulig sa mga imol, kag si Jesus amo ang Dakung Huwaran para sa matuod nga mga Cristiano. (1 Pedro 2:21) Sang si Jesus yari sa duta, nagkabuhi sia sa tunga sang mga tawo nga sakop sang kolonyal nga gahom kag nag-antos sa kamot sang madaya nga mga manugsukot sang buhis. Ang labing wala sing inugpangapin sa tunga nila masami nga nabiktima sang sakon nga mga katapo sang nagagahom nga klase. (Mateo 22:21; Lucas 3:12, 13; 20:46, 47) Apang, si Jesus wala mag-entra sa pagteoriya sa politika ukon sosyal nga pagtublag agod pauswagon ang ila kahimtangan. Sa baylo, ginbantala niya “ang maayong balita sang ginharian.”—Mateo 4:23.
Sa katapusan, ang mga ministro sang relihion nga nagapauswag sang teolohiya sa paghilway nagapangita sing politikal nga solusyon sa problema nga malubad lamang sa paagi sang Dios. Bisan pa nga ang ila teoriya ginatawag nga teolohiya, wala ini napasad sa Biblia. Si Jesus nagsilng: “Sila indi iya sang kalibutan, subong nga ako indi iya sang kalibutan.” (Juan 17:16) Imposible ang pagpalig-on sa politikal nga aktibismo kag indi mangin “bahin sang kalibutan.”—Santiago 4:4.
Ano Gid ang Magabulig sa mga Imol?
Sa pagkamatuod, kon ang mga teologo sa paghilway wala sing espirituwal nga mensahe nga may kapuslanan sa imol kaayo, masiling naton nga nagabantala sila sing sayop nga mensahe. Si Jesus nakabulig sing daku sa mga nagpamati nga imol sang panahon niya, kag amo man sina ang ginahimo sang mga Saksi ni Jehova samtang nagapakigbahin sila sa pagbantala sang “maayong balita sang ginharian.”—Mateo 24:14.
Ano ining maayong balita? Para sa panahon naton, amo ini ang kamatuoran nga ang Ginharian sang Dios natukod na sa mga langit kag sa dili madugay magakuha sang tanan nga kalautan kag pamigos gikan sa duta. (Bugna 11:15, 18) Sa sining paagi, ang Ginharian sang Dios magalubad sing dayon sang mga problema sa kaimulon kag pamigos. Nagahambal tuhoy sa epekto sang paggahom sang Ginharian sang Dios, ang Biblia nagasiling: “Pahiran niya ang tagsa ka luha sa mga mata nila, kag wala na sing kamatayon, ukon kalisud ukon paghibi ukon kasakit pa. Kay ang nahaunang mga butang nagtaliwan.” (Bugna 21:4) Daw ano ka tumalagsahon nga palaabuton para sa mga matarong sing tagipusuon!
Apang paano mabuligan sining kamatuoran nahanungod sa Ginharian sang Dios ang imol nga katawhan karon? Ti, dumduma nga si Jesus nagsiling: “Kamo makakilala sing kamatuoran kag ang kamatuoran magahilway sa inyo.” (Juan 8:32) Ang kamatuoran nagabulig sa isa sa pag-agom sing kahilwayan gikan sa nakasala nga konsiensia, sing kahilwayan gikan sa kahadlok sa buwas-damlag, kag sing kahilwayan gikan sa relihioso nga disparatis.
Dugang pa, ang tawo nga nakahibalo sining kamatuoran nakatigayon sing duha pa ka gamhanan kaayo nga mga Abyan. Ang isa amo si Cristo Jesus, nga nagagahom na karon subong Hari sang Ginharian sang Dios. Ang isa pa amo si Jehova nga Dios mismo, nga tuhoy sa iya ang Biblia nagasiling: “Itungtung kay Jehova ang imo lulan, kag sia magalay-ay sa imo. Indi sia magtugut nga malingkang ang matarong.” (Salmo 55:22) Bisan pa kon ang imol nga tawo nagakabuhi sa idalom sang mapiguson nga sistema sa politika ukon pangabuhi, ining duha ka maluluy-on nga mga Abyan nagabulig sa iya nga makalandas paagi sa Cristianong kongregasyon.
Sing dugang, ang paghulag sa kamatuoran nahanungod sa Ginharian sang Dios nagadul-ong sa isa ka tawo nga madula ang malain nga mga batasan kag magamit sing maayo ang bisan anong manggad niya. Indi, ang imol nga tawo wala nagamanggaranon bangod sang pagkabuhi sing Cristianong kabuhi. Apang kon ginauna niya ang Ginharian sang Dios kag nagakabuhi nahisuno sa Iya matarong mga mga talaksan, sa bisan paano ang pisikal nga mga kinahanglanon sa kabuhi ginaaman. Subong gid ini sa ginsaad ni Jesus: “Padayon nga pangitaa anay ang ginharian kag ang iya pagkamatarong, kag ining tanan iban pa nga butang idugang sa imo.”—Mateo 6:33.
Ang dumaan nga si Hari David naghatag sing makalilipay nga pamatuod sa kon paano ang Dios nagaulikid sa Iya kaugalingon. Nagsiling sia: “Nangin pamatan-on ako, kag karon tigulang na, apang wala ako makakita nga ang matarong ginpabayaan, ukon ang iya kaliwat nga nagapakilimos sing kalan-on.” (Salmo 37:25) May yara dimaisip nga mga halimbawa sa tunga sang mga Saksi ni Jehova karon ang nagapamatuod sini.
Busa, sa baylo nga mangita sing temporaryo nga paumpaw paagi sa tawhanon nga teoriya kag mga teolohiya, ang tanan, lakip na ang mga imol, ginapalig-on sa pag-agom sa tunay gid nga mga benepisyo nga nagahalin sa pag-alagad sa Dios. Yadtong nagahimo sini nagaugyon kay apostol Pablo nga “ang diosnon nga debosyon mapuslanon sa tanan nga butang, nga may saad sang kabuhi karon kag sa palaabuton.”—1 Temoteo 4:8.
[Piktyur sa pahina 17]
Ang pagginahom sang Ginharian sang Dios amo lamang ang solusyon sa kaimulon sang kalibutan