“Subong Kalig-on sa Igang sang Gibraltar”

Nagatindog sing mataas gikan sa mainit, asul nga dagat sang Mediterraneo tubtob sa kataason nga 426 metros, ang Igang sang Gibraltar malig-on gid tulukon. Sa isa ka matin-aw nga adlaw, gikan sa mga kilometro sa palibot sa nabagatnan sang Espanya kag gikan sa Morocco, tabok sa Mediterraneo, madali nga makita sang isa ang taliwis nga putukputukan sang Gibraltar.

Ang maragtas sang Gibraltar nagsugod sadtong mga panahon sang ang dumaan nga mga marinero, sa pagpati nga ang duta matapan, nagdumdom nga kon maglabay sila sa Estritso sang Gibraltar mahulog sila sa bibi sang kalibutan kag kadadalman sang kalaglagan. Ginpatihan man ini nga isa sang Mga Haligi ni Hercules, ang isa pa amo ang Jebel Musa sa Ceuta, sa baybayon sang Aprika sa tabok sang estritso. Ang mito nagsiling nga gintunga sang dios nga si Hercules ang mga bukid.

Utang sang siudad sang Gibraltar ang pagluntad sini sa mga Arabo nga naghalin sa Nakatundan nga Aprika sang ikawalo nga siglo C.E. kag sang ulihi ginpatok nila ang siudad sang 1160. Ang ngalan nga Gibraltar naghalin sa Arabiko nga ngalan nga Djabal-Tarik, ukon Bukid sang Tarik. Si T̩āriq ibn Ziyād isa anay ka lider sang mga Arabo nga naglutos sa katapusan nga hari sang mga Goth sang 711 C.E.

Gin-agaw sang mga Espanyol ang Gibraltar sang 1462, apang nadula nila ini sa mga Britaniko sang 1704. Tubtob sa karon, nagapabilin ini nga isa sang katapusan nga mga estasyon sang Emperyo sang Britanya anay. Apang ang Igang sang Gibraltar isa gihapon ka simbulo sang butang nga malig-on kag permanente.

Duha ka kongregasyon (Ingles kag Espanyol) sang mga 120 ka Saksi ni Jehova sa Gibraltar ang nagatanyag sing saad nga paggahom sang Ginharian sang Dios sa mga taga-Gibraltar, isa ka saad nga mas malig-on sa Igang!—Tito 1:1, 2; Hebreo 6:17-19.