‘Pagbato sa Huyog nga Mangin Maiyaiyahon’
● ANG Gibraltar, nga nahamtang sa punta sang nabagatnan nga bahin sang Iberian Peninsula, may magamo nga kasaysayan kag madamo na nga beses nga ginsakop kag ginsalakay. Pero sang isa ka Sabado sang Oktubre 2008, ini nga lugar mahidaiton nga “ginsalakay” sang halos isa ka libo ka Espanyol. Nagkadto sila diri agod magpatindog sing Kingdom Hall nga mangin tilipunan sang mga Saksi ni Jehova sa Gibraltar.
Ang chief minister sang gobierno nagsiling sa Magmata! nga gin-abiabi gid sa Gibraltar ang halos isa ka libo ka tawo nga nagtrabaho sa sini nga proyekto. Nagsiling sia nga “nakahatag ini sing kaayuhan sa komunidad.” Nagdugang pa sia nga “ginadayaw gid ang mga Saksi ni Jehova bangod sila lang ang nakadala sa Gibraltar sang pinakamadamo nga tawo para magtrabaho sa isa lang ka proyekto, kag mga boluntaryo pa sila tanan.”
Sa umpisa pa lang, ginsakdag na sang gobierno ini nga proyekto, kag ginhatagan nila ang mga Saksi sing maayo nga lugar para patindugan sang ila tilipunan. Ngaa ginhimo ini sang gobierno?
“Nagapati ako nga ang pagkadiosnon may maayo gid nga epekto sa isa ka komunidad,” paathag sang chief minister. “Ang tanan nga relihion sa Gibraltar ginhatagan sang kasuguan sing kahilwayan sa pagsimba, gani katungdanan sang gobierno nga tugutan ang mga hilikuton sang mga relihion. Isa pa, ang paghatag sa mga Saksi sing lugar para patindugan sang ila tilipunan makabulig sa mga pumuluyo.
“Dapat naton batuan ang huyog nga mangin maiyaiyahon,” siling pa niya. “Ginpakita sang inyo malipayon nga mga boluntaryo nga posible ini.”
Bisan pa naatrasar ang pagsugod sang trabaho bangod sang bagyo, ang Kingdom Hall natapos pagka-Lunes, nga amo ang ikatlo nga adlaw sang proyekto. “Madamo nga boluntaryo ang nagpabilin pa gid sing isa ka adlaw agod makompleto ang proyekto,” paathag ni Secundino Nogal, nga amo ang nagadumala sa proyekto. “Anad na kami sa pag-atubang sa mga problema. Kinahanglan namon pasibuon ang amon pamaagi sang pagpatindog. Pero labaw sa tanan, dapat likawan ang pagkamaiyaiyahon, amo kon ngaa nangin malipayon kami sa sini nga hilikuton.”a
[Nota]
a Ang pamantalaan didto nga Gibraltar Chronicle, nagreport: “Sang mga adlaw nga nagawaswas ang bagyo, ang mga Saksi ni Jehova sa Gibraltar . . . nagpatindog sang ila templo [Kingdom Hall] sa bulig sang tuman kadamo nga boluntaryo kag natapos ini sa sulod lang sang tatlo ka adlaw.”