Ang Pagtamod sang Biblia

“Ang Bilugon sang Disiplina”​—Karaan Na Bala Ini?

“Ang kabuangan naputos sa tagipusuon sang bata; ang bilugon sang disiplina nagapahilayo sini sa iya.”—Hulubaton 22:15

“Ang bisan anong pisikal nga pagsilot nagasakit sang balatyagon kag indi ini dapat pagtugutan.”​—Parents Anonymous.

ANG pagsambit sang Biblia sa “bilugon sang disiplina” nagapukaw sang mainit nga baisay. Halangpunon ini, kay kada tuig linibo ka kabataan ang nagakapatay subong direkta nga resulta sang pisikal nga pagsakit sang ginikanan. Ayhan amo sini kon ngaa ang isa ka komentaryo sang Biblia nagalaragway sing sayop sang pagtugot sang Biblia sa pisikal nga pagsilot subong isa lamang ka “opinyon pasad sa kultura sang mga tawo nga nagakabuhi sang panahon sang Biblia.”

Apang ang opinyon pasad sa kultura wala nagbugna sang Biblia​—ang Dios amo ang nagbugna. (2 Timoteo 3:16) Indi bala makatarunganon ang mga komento sini tuhoy sa “bilugon sang disiplina”? Importante nga usisaon naton ang “bilugon” sa iya konteksto. Sa pag-ilustrar: Ang isaisa ka bahin sang jigsaw puzzle wala sing pulos. Sa tapos lamang masugponsugpon ini tanan kag makita sang isa ang bug-os nga laragway. Sa kaanggid, ang “bilugon” isa lamang ka bahin sang puzzle. Agod makita ang bug-os nga laragway, dapat naton ipaigo ang “bilugon” sa iban pa nga mga prinsipio sang Biblia may kaangtanan sa disiplina.

Isa ka Timbang nga Pagtamod

Ginaugyunan bala sang Biblia ang pisikal nga pagsilot lamang? Binagbinaga ang masunod nga laygay:

• “Indi pagpaakiga ang imo mga anak.”

• “Indi pagtadlunga sing sobra ang imo anak, ukon basi makuha mo ang tanan gikan sa ila.”

‘Mas rasonable ina sang sa laygay sang Biblia,’ mahimo isiling sang iban. Apang ini amo ang laygay sang Biblia. Ginrekord ini sa Efeso 6:4 (The New Jerusalem Bible) kag Colosas 3:​21 (Phillips).

Huo, ang pagtamod sang Biblia rasonable. Ginakilala sini nga ang pisikal nga pagsilot indi pirme ang labing epektibo nga paagi sa pagtudlo. Ang Hulubaton 8:​33 nagasiling, “Pamatii ang disiplina” indi, ‘Batyaga ang disiplina.’ Kag ginapakita sang Hulubaton 17:​10 nga “ang isa ka badlong nagadukot sing madalom pa sa mahangpunon sang sa isa ka gatos ka lapdus sa buangbuang.” Dugang pa, ang Deuteronomio 11:​19 nagarekomendar sing nagatapna nga disiplina, nagahimulos sang dipormal nga mga higayon sa pagpatudok sang mga prinsipio sa moral sa ila mga anak. Busa, ang pagtamod sang Biblia sa disiplina timbang.

Kamusta ang “Bilugon”?

Apang, ang Biblia nagasambit sang “bilugon” sang disiplina. (Hulubaton 13:​24; 22:​15; 23:​13, 14; 29:15) Paano ini hangpon?

Ang tinaga nga “bilugon” ginbadbad gikan sa Hebreong tinaga nga sheʹvet. Sa mga Hebreo, ang sheʹvet nagakahulugan sa isa ka lipak ukon tungkod, subong sang ginagamit sang isa ka manugbantay. Sa sining konteksto ang bilugon sang disiplina nagapanugda sing mahigugmaon nga panuytoy, indi sing kapintas.​—Salmo 23:4.

Ang sheʹvet masunson ginagamit sing simbuliko sa Biblia, nga nagarepresentar sa awtoridad. (2 Samuel 7:​14; Isaias 14:5) Kon nagapatuhoy sa awtoridad sang ginikanan, ang “bilugon” wala lamang nagapatuhoy sa pisikal nga pagsilot. Nagalakip ini sang tanan nga dagway sang disiplina, nga sa masami indi kinahanglan nga mangin pisikal. Kag kon ginapadapat ang pisikal nga disiplina, sa masami bangod ang iban nga mga metodo napamatud-an nga indi madinalag-on. Ang Hulubaton 22:​15 nagasiling nga ang kabuangan “naputos” (“naangkla”, NJB; “natudok,” The New English Bible) sa tagipusuon sang isa nga nagabaton sang pisikal nga disiplina. Labi pa sa binatabata nga kabuangan ang nadalahig.

Paano Dapat Ipadapat ang Disiplina?

Sa Biblia, ang disiplina dalayon nga ginaangot sa gugma kag kalulo, indi sa kaakig kag kapintas. Ang batid nga manuglaygay dapat “magmalulo sa tanan, . . . mapainumuron, nagasaway nga may pagpaubos sang mga kasumpong niya.”​—2 Timoteo 2:​24, 25.

Busa, ang disiplina indi isa ka pagpautwas sing balatyagon sang ginikanan. Sa baylo, isa ini ka paagi sa pagtudlo. Bangod sina, dapat ini magtudlo sa nakasala nga bata. Kon ginapadapat sa kaakig, ang pisikal nga disiplina nagatudlo sing sayop nga leksion. Nagatuman ini sang kinahanglanon sang ginikanan, indi sang iya sang bata.

Dugang pa, ang epektibo nga disiplina may mga dulunan. “Tudluan ko ikaw sa talaksan,” siling ni Jehova sa iya katawhan sa Jeremias 46:28. Labi na ka importante nga dumdumon ini kon nagapadapat sing pisikal nga disiplina. Ang pagbunggo ukon pagyugyog sa lapsag sarang makadul-ong sa halit sa utok ukon bisan sa kamatayon.a Ang paghimo sing labaw sa gintuyo nga katuyuan sang disiplina​—ang pagtadlong kag ang pagtudlo​—mahimo magadul-ong sa pag-abuso sa bata.b

Ang Biblia Wala Nagasakdag sang Abuso

Antes tadlungon ang iya katawhan, si Jehova nagsiling: “Dili ka mahadlok . . . kay nagaupod ako sa imo.” (Jeremias 46:28) Ang disiplina indi dapat magbilin sa bata sang balatyagon nga ginbayaan. Sa baylo, ang bata dapat magbatyag nga ang ginikanan ‘nagaupod sa iya’ subong isa ka mahigugmaon kag masinakdagon nga pagpalig-on. Kon ang pisikal nga disiplina ginahunahuna nga kinahanglanon, ang bata dapat makahangop kon ngaa. Ang Hulubaton 29:​15 nagasiling nga “ang bilugon kag ang pagbadlong nagahatag sing kaalam.”

Masubo nga kamatuoran nga madamo sa karon ang nagagamit sang “bilugon” sang awtoridad sang ginikanan sing abusado. Apang, wala sing makita nga sala sa timbang nga mga prinsipio sa Biblia. (Ipaanggid ang Deuteronomio 32:5.) Kon binagbinagon naton ang “bilugon” sa iya konteksto, makita naton nga ginagamit ini sa pagtudlo sa kabataan, indi sa pag-abuso sa ila. Subong sa iban nga mga butang, ang Biblia napamatud-an nga “mapuslanon sa pagpanudlo, sa pagsabdong, sa pagsaway, sa paghanas sa pagkamatarong.”​—2 Timoteo 3:16.

[Mga footnote]

[Picture Credit Line sa pahina 16]

The Bettman Archive