Ang Pagkasuod sa Dios Nagbulig sa Akon sa Pagbatas

WALA ako sing interes sa relihion. Ang tanan nga organisado nga relihion daw salimpapaw para sa akon. Wala ako sing nakita nga may nahimo ini nga maayo sa mga tawo, luwas nga nagahimo ini sa ila nga ihig-ihigon ang iban. Talipuspusan sang dekada 60 sadto. Ang presidente sang E.U. ginpatay, kag linibo ang nagkalamatay sa inaway sa Vietnam. Magamo ang kalibutan. Ang akon mismo pangabuhi nagakalusod. Paano bala nga may isa ka Dios nga nagaulikid sa akon ukon sa katawhan?

Beinte-siete anyos ako, minyo nga may duha ka magagmay nga kabataan, kag nagatrabaho sing bug-os tion sa isa ka mental nga institusyon sang ang akon kaingod nagsugod sa pagpakigsugilanon sa akon nahanungod sa Biblia. Sing makatilingala, namati ako. Naghambal sia nahanungod sa ginatawag niya nga katapusan nga mga adlaw. Tuhay ang iya ginahambal, kag luyag ko ang mga sabat. Ginbilinan niya ako sing libro nga natig-uluhan Ang Kamatuoran nga Nagadul-ong sa Kabuhi nga Dayon. Ginbasa ko ini sa isa ka gab-i, gintan-aw ang tanan nga mga kasulatan, kag nasapwan ang akon kaugalingon nga nagapalibog, ‘Nakita ko na gid bala ang kamatuoran?’

Kon nakita ko na ini, may problema. Natawo ako sa isa ka Judiyong panimalay, may isa ka Judiyo nga bana kag duha ka magagmay nga kabataan, kag Judiyong mga kaparyentehan. Nahibaluan ko nga maakig sila kon ako mangin isa ka Saksi ni Jehova. Indi ko luyag saklawon ang akon panimalay sing dikinahanglanon; dapat gid ako mangin sigurado. Ginbasa ko sing maukod ang literatura sang Biblia. Sa sulod sang isa ka semana nakombinsi ako nga amo ini ang kamatuoran. Dapat ko ini tun-an. Gani nagsugod ako sa pagtuon upod sa mga Saksi ni Jehova. Sa sulod sang mga senimana nagbantala ako sa tanan. Nalipay ako sa paghibalo nga ang ngalan gali sang Dios amo si Jehova, nga nagaulikid sia sa akon kag sa katawhan, kag nga ang kabuhi nga walay katapusan sa paraiso nga duta posible. Ginbawtismuhan ako sang Hunyo 12, 1970.

Subong sang ginpaabot ko, ang akon panimalay kag subong man ang akon mga umagad kag mga ugangan naakig sing daku, kag ang iban nagsikway sa akon. Ang akon bana mga tinuig nga nagtuon sa pulupanag-on apang wala gid mangin isa ka tumuluo. Apang, ang akon kabataan nangin mga Saksi ni Jehova. Kutob sa ginsuguran, luyag ko mangin bug-os tion nga ministro, nga nagabantala sa mga ganhaan sang maayong balita sang Ginharian sang Dios. Apang nagadaku ang akon pamilya kag ang akon bana indi tumuluo. Bisan pa bug-os tion ako nga nagatrabaho, naembargo ang amon duha ka balay, kag pila ka beses nga wala kami sing mapuy-an. Mabudlay gid ang pangabuhi.

Isa ka bes ang amon balay bulutungon na bangod sang indi pagbayad sa utang. Dapat kami maghalin sa sina nga balay pagkaudto sang Domingo, apang wala kami sing makadtuan. Ginhimo ko ang tanan nga masarangan ko, kag sang ulihi sang Sabado sang aga, isa ka adlaw antes, ginpamat-od ko nga himuon ang ginsiling ni Jesus sa Mateo 6:33​—pangitaa anay ang Ginharian kag maghulat kay Jehova sa pag-aman sang mga butang nga ginakinahanglan ko. Nagguwa ako sa latagon. Nadumduman ko nga naghibi ako bangod sang kahuol nga tuga sang kahimtangan, apang sa sulod sang lima ka minuto nag-ayo ang akon pamatyag. Pirme ko nasapwan nga ang pagbantala may positibo gid nga epekto sa akon; nagakalipatan ko ang akon problema, kag ang espiritu ni Jehova nagahupot sa akon nga malipayon kag mapatubason kag nagahatag sing kahulugan sa akon kabuhi. Ti, pagpauli ko sina nga adlaw, wala gihapon kami sing makadtuan, apang maayo na ang akon pamatyag.

Sina nga gab-i nakabaton kami sing tawag gikan sa ahensia sang real estate nga nagatatap sang amon mga kinahanglanon. Alas 11:30 s.g. na, kag ang ahente sang real estate nabalaka gid katama nga wala kami sing masayluhan amo kon ngaa ginpangitaan niya kami sing maistaran sing temporaryo tubtob mahanda na ang balay nga amon kuluhaon. Gani ginsaylo kami sang akon kaupdanan nga mga Saksi sa sadto nga balay sang Domingo. Nag-istar kami didto, ang amon pagkabutang yara gihapon sa mga kahon, sa tatlo ka semana kag sang ulihi nagsaylo kami sa amon balay sang mahanda na ini. Indi ini mahapos, apang gin-aman ni Jehova ang amon mga kinahanglanon. Nagpabakod gid ini sing daku sa akon kag nagpalig-on sang akon pagtuo. Kaangay gid ini sang ginsiling ni Hari David sa Salmo 37:25: “Nangin pamatan-on ako, kag karon tigulang na, apang wala ako makakita nga ang matarong ginpabayaan, ukon ang iya kaliwat nga nagapakilimos sing kalan-on.”

Indi ginagasto sing maalamon ang kuwarta sang pamilya. Kon kaisa ako ang nagauyat sang kuwarta agod husayon ang mga problema. Gintilawan ko nga salbahon ang amon pag-asawahay sa sining mga tinuig, bangod labi na sang akon gugma kay Jehova kag sang iya pagtamod sa kahimusan sang pag-asawahay, kag nagalaum ako nga magabag-o ang akon bana kag magasulod sa kamatuoran.

Pirme ko ginpangamuyo ang nahanungod sa pagregular payunir, kag nag-auxiliary payunir ako sa tanan nga kahigayunan.a Nakahibalo ako nga ang pagbantala amo ang pinakamaayo kag pinakaimportante nga paagi sa paggamit sang akon kabuhi. Ginahigugma ko si Jehova kag luyag ko sia alagaron sa bug-os nga kalag. Ginahigugma ko man ang katawhan kag luyag ko sila buligan. Naapresyar ko gikan sa akon mismo mabudlay nga pangabuhi kon daw ano ka mapuslanon ang mga prinsipio sang Biblia kag nakahibalo ako nga kinahanglan sang mga tawo ang paglaum nga ginaaman sang Ginharian. Apang nahadlok ako nga basi indi makalampuwas ang akon panimalay kon indi ini matadlong. Haluson kami makalampuwas.

Nagsinggit Ako, Nalagyo ang Manuglugos

Nian may butang nga natabo sa akon kabuhi nga naghatag sa akon sing pagtuo nga si Jehova pirme magaaman kag magaatipan sa akon. May tawo nga nagsulod sa akon balay kag nagtinguha sa paglugos sa akon. Nagsalakay sia samtang nagakatulog ako, kag sang pagbugtaw ko, ginpahog niya ako nga patyon kon magsinggit ako kag maghulag. Bisan pa hinadlukan, ginbuligan ako ni Jehova nga magkalma kag maghunahuna sa pagpangamuyo kag sa pagtulutimbang kon ano ang pinakamaayo nga himuon. Nahibaluan ko ang ginasiling sang Biblia nahanungod sa pagsinggit, apang nagbatyag man ako nga basi patyon niya ako kon magsinggit ako, kag nian ang akon kabataan magabugtaw, kag patyon niya sila. Nakita ko ang akon ngalan nga nagguwa sa mga pahibalo nahanungod sa mga napatay kag nangamuyo nga amligan ni Jehova ang akon kabataan kon mapatay ako. Bisan pa amo sina, ginhimo ko ang ginasiling sang Biblia​—nagsinggit ako. (Deuteronomio 22:​26, 27) Ang manuglugos nagpalagyo. Abi ko mapatay ako sadto nga gab-i. Nagsuod pa gid ako kay Jehova.

Naghalin ako sa akon trabaho kag nagsugod sa pagregular payunir sang 1975. Anom ka tuig ako nga nagpayunir, kag ang akon bana ang nagbayad sang mga balayran. Makapasubo nga nagmasakit ako sing diabetes sa hoben pa nga edad kag naggrabe gid ako sang isa ka bes. Agod makabatas, padayon ako nga nagsalig sing labi pa kay Jehova. Walay sapayan sang akon mga kahimtangan, amo yadto ang pinakamalipayon kag pinakamapatubason nga mga tuig nga naagom ko tubtob sina nga tion. Ginpakamaayo ako ni Jehova sing madamong estudyante sa Biblia nga nag-uswag padulong sa bawtismo. Ang iban nangin mga payunir mismo.

Nian, sang 1980, ang amon pangabuhi naguba. Nagbulagay kami sang akon bana. Indi mapahamtang ang akon kabataan, gani gintinguhaan ko nga salbahon sa liwat ang amon pag-asawahay, apang wala magkooperar ang akon bana. Sa sining punto, nahibaluan ko nga tion na para magkuha sing Makasulatanhon nga diborsio. Ang epekto sang iya pagbiya makahalapay gid para sa akon kabataan.

Nagtinguha ako gihapon nga padayunon ang akon pagpayunir sini nga tion kag nahimo ko ini sa mga isa ka tuig. Apang, ang akon anak nga babayi, bangod indi makaagwanta sa kahimtangan, nagsugod sa pagrebelde batok sa tanan, lakip sa akon kag sa kamatuoran. Nag-untat ako sa pagpayunir sini nga tion bangod sang iya pagginawi. Nagkasubo gid ako sing daku; nautod ang akon ginakapyutan agod mabuhi. Nagbatyag ako nga nagaisahanon, nga daw nadula ang tanan luwas si Jehova.

Sini nga tion nga si Jehova nag-aman sing duha ka mahal nga kauturan nga lalaki nga nagbulig sa akon sing labi pa sa nahibaluan nila. Ang isa amo ang manugtatap sa sirkito, kag ang isa pa amo ang gulang sa pihak nga kongregasyon nga nakahibalo sang amon kahimtangan, kay sia ang nagtuon sa akon bana. Daku gid ang akon pagpasalamat kay Jehova tungod sining dulot nga mga tawo. Pirme ko gid sila nga pakamahalon.

Wala madugay pagkatapos sadto, sa tuman pa ka bata nga edad, ang akon anak nga dalaga nagminyo sa tagaguwa. Nagpasubo ini sa pamilya kag labi pa nga nalugaw-an kami. Pagkatapos sadto ang akon anak nga lalaki nagkinaugalingon. Pirme ko ginpangamuyo kay Jehova nga buligan niya ang akon panimalay nga makalampuwas sa kamatuoran. Hamili gid sila sa akon, kag ang lamang nga butang nga luyag ko gid amo nga magpabilin sila kay Jehova. Amo sini ang pirme ko nga ginapangamuyo sa sulod sang akon pagkabuhi sa kamatuoran. Ina nga tion mas malain sangsa bug-os nga 20 ka tuig nga minyo para sa akon​—kag kalain gid sini. Apang, nakahibalo ako nga sa bisan paano si Jehova magabulig sa akon nga mabatas ini, kag bisan ano man ang bili, dapat ko himuon ang iya kabubut-on.

Madumduman ko pa ang isa ka hitabo. Payunir pa ako sadto, kag wala kami sing kuwarta apang nagakinahanglan ako sing mga $70 agod makatibawas sa semana kag may inugplete pakadto sa trabaho pagkadason nga semana. Nagtrabaho ako sing duha ka adlaw subong temporaryo nga empleyado. Sa masami, mga isa pa ka semana ang hulaton ko agod makuha ang akon suweldo​—mga $40. Wala ako sing kuwarta para sa pagkaon, labi na para sa transportasyon. Pagkasunod nga gab-i nagtuon ako sing Biblia upod sa isa ka babayi nga naghatag sa akon sing plete para sa subway.

Biernes pagkadason nga aga. Naglakat ako sa pagkuha sing sulat, kag may duha ka sulat. Ang isa amo ang tseke nga ginahulat ko sa madason nga semana. Nakalab-ot ini sa banko sa Siudad sang Nueva York kag gindeposito ini sang banko sa akon kuwenta sa wala pa tatlo ka adlaw. Natingala ako. Nagakinahanglan gihapon ako sing $29 ukon $30 agod makatibawas. Sa ikaduhang sobre yara ang isa ka tseke nga $29, ang kinahanglan ko gid. Ang makatilingala gid nahanungod sini amo nga sang Pebrero sina nga tuig, ginhatagan ako sing regalo sang gobierno para sa asayte sa pagpainit sang akon balay. Agosto na karon, kag namat-od sila nga nakautang sila sa akon sing $29​—Agosto, para sa pagpainit? Ngaa magahunahuna sila nga may utang sila sa akon, kag ang asayte sa Agosto labi pa ka makatilingala? Nagpabakod gid ini sang akon pagtuo!

Indi ang Materyal nga mga Butang ang Sabat

Nagsugod ako sa pagtrabaho sing bug-os tion kag nakatuon sa paggamit sing kompyuter sa mga trabaho nga ginsudlan ko. Ang tinuig nga wala ako magpayunir mabudlay gid katama. Bisan pa maayo ang akon trabaho kag may pinansial nga kalig-unan kag materyal nga mga butang, indi ako malipayon. Ang akon kabataan nagkinaugalingon na kag may mabudlay gid nga mga problema. Ang akon anak nga dalaga nagabalik sa kamatuoran apang may mga problema gihapon. Ang akon anak nga lalaki may mga problema man. Pagligad sang pila ka tion, nabatyagan ko nga ang ginapakabahandi ko gid nga kaangtanan kay Jehova nagakadula. Nabatyagan ko nga amat-amat ako nga nagapahilayo gikan kay Jehova bisan pa nga wala sing makakita sini. Nagatambong ako sa tanan nga mga miting, nagatuon, nagaguwa sa latagon, apang indi ini bastante. Gintilawan ko nga mag-upod-upod sa akon mga abyan, apang wala man ini makabulig.

Nagsugod ako sa pagkaluoy sa akon kaugalingon. Gintan-aw ko ang akon kaugalingon kag nagpanghunahuna. Indi bala nga takus ako sa labi pa nga butang? Sing maathag, amo gid sadto ang luyag ni Satanas. Sa nahauna nga tion, nabatyagan ko nga nangin mahuyugon ako sa akon mga kaupdanan sa trabaho. Ginsiling ko sa akon kaugalingon, ‘Ti, bantalaan ko sila.’ Kag ginbantalaan ko sila matuod. Apang sa sulod nabatyagan ko nga ang akon tagipusuon nagasugod sa pagpasapayan sang mga butang nga indi dapat. Ang problema indi ang mga butang sa guwa nakon. Kundi ako lamang. Indi ako makapalagyo gikan sa akon nahanas sa Biblia nga konsiensia. Nangamuyo ako kay Jehova.

Nagtrabaho ako sing bug-os tion. Kinahanglan ko bayaan ang materyal nga kalig-unan nga gintukod ko. Tatlo ka oras ako nga nagabiyahe pakadto-pakari halin sa Long Island pakadto sa Wall Street. Daku gid nga tion! Subong man, ang pagpakig-angot sa kalibutanon nga mga tawo sa tren wala magpauswag sang akon kahimtangan. Nagsugod ako sa pagpakigsugilanon sa mga gulang kag sa pagkadto sa mga asambleya sa mga talipuspusan sang semana agod buligan ako nga magkonsentrar sa importante nga mga butang. Sa nahauna nga tion sa akon kabuhi, indi kinahanglan nga magkabalaka ako sa materyal nga mga butang, gani ngaa luyag ko karon nga maghimakas liwat? Pagligad sang isa ka tuig nga pagpangamuyo, pagbinagbinag sing maayo kon bala dapat ko bag-uhon ang akon kahimtangan, ginhimo ko ini.

Nagsaylo ako sa Brooklyn Heights. Ginduaw ko ang kongregasyon kag nakahibalo ako nga ang espirituwalidad didto amo gid ang ginakinahanglan ko. Tuman kadamo nga matutom nga mga Saksi, nga nagabantala sing bug-os tion sa madamo nga tinuig​—nagpabatyag ini sa akon nga daw tagadiri ako. Sa sulod sang anom ka bulan ginbayaan ko ang akon karera kag nagpayunir. Nagtrabaho ako sing part-time, kag sang 1984, gintangdo liwat ako subong isa ka regular payunir.

Sa mga tinuig, si Jehova naghatag sa akon sing makatilingala nga mga pagpakamaayo, subong man sing madamo, madamong hamili nga leksion. Gintinguhaan ko nga magpabilin nga positibo kag magkuha sing leksion sa tagsa ka pagtilaw. Indi makahuluya ang makaagom sing mga problema; nagasulod ang sala sa indi paggamit sang mga prinsipio sang Biblia sa paglubad sini. Diri sa Brooklyn, wala ako sing problema nga kaangay sang naunang mga tinuig ko sa kamatuoran. Indi na problema ang kuwarta. Indi na problema ang ditumuluo nga bana. Nabulong na ang akon tagipusuon. Ginbulahan ako sing madamong espirituwal nga kabataan.

Apang yara pirme ang bag-ong mga problema kag mga hangkat. Sang 1987 ang akon anak nga lalaki, si Marc, nagmasakit sa emosyon kag nag-antos sing daku nga kapung-aw, apang ginbuligan kami ni Jehova nga malandas ini. Nagatinguha na karon si Marc kag aktibo sa kongregasyon. Ang akon anak nga babayi, si Andrea, nagbalik sa kamatuoran kag nagpabawtismo kag ginapadaku niya ang iya mga anak sa kamatuoran. Sanglit madasig kita nga nagahinampot sa dakung kapipit-an, ginapaabot ko nga magapadayon ang mga problema kag ayhan magabug-at pa, apang si Jehova pirme magabulig sa amon bisan ano man nga mga sablag ukon mga hangkat ang magaabot.

Sa pagkamatuod, ginbuligan ako ni Jehova nga makatigayon sing malipayon gid kag mapatubason nga kabuhi. Ginahulat ko ang paghinguyang sang nabilin sini sa pagpabilin nga suod sa iya kag sa paghimo sang iya kabubut-on.​—Panugiron ni Marlene Pavlow.

[Mga footnote]

[Piktyur sa pahina 23]

Si Marlene Pavlow, bug-os tion nga manugbantala sang maayong balita sang Ginharian