Ang Pagtamod sang Biblia

Batok Bala si Apostol Pablo sa mga Babayi?

“ANG mga panudlo ni [apostol] Pablo ginagamit subong sadsaran sang madamo nga pag-ihig-ihig sa mga babayi sa sulod sang Cristiano nga . . . iglesia.” Amo ang ginsiling ni Hukom Cecilie Rushton sang Auckland, New Zealand, sa isa ka report nga ginpresentar sang maaga nga bahin sang 1993 sa Commonwealth Law Conference sa Cyprus. “Ang Iya Sulat kay Timoteo,” dugang niya, “nagapahayag sang iya panghunahuna: ‘Apang wala ko ginatugutan ang babayi nga magtudlo, ukon mag-agaw sang awtoridad sa ibabaw sang lalaki, kundi maghipos.’ ”​—1 Timoteo 2:​12, King James Version.

Sang magsulat si Pablo tuhoy sa papel ukon kahimtangan sang mga babayi, personal nga opinyon lamang bala niya ang ginapabutyag, ukon sia bala gin-inspirar sang Dios? Kon tamdon sa kabilugan, nagapakita gid bala ang mga sulat ni Pablo sing pag-ihig-ihig sa mga babayi? Sa anong konteksto naaplikar ang mga pulong ni Pablo kay Timoteo nga nabalikwat sa ibabaw?

Ang mga Kredensial ni Pablo

Sa 27 ka libro sang Cristianong Griegong Kasulatan, 14 ang ginsulat ni Pablo. Ang nagapamatuod nga ang balaan nga espiritu nagapanghikot sa iya amo ang iya milagruso nga ikasarang sa paghambal sing madamo nga hambal. Dugang pa, nakasaksi sia sing labaw sa kinaugali nga mga palanan-awon. (1 Corinto 14:18; 2 Corinto 12:​1-5) Ang iya nagasakripisyo sang kaugalingon, bug-os kalag, kag mahigugmaon nga huwaran nagpausbong sing isa ka hugot nga higot sang utudnon nga paghigugmaanay sa ulot niya kag sang iya Cristianong mga kadungan. (Binuhatan 20:​37, 38) Ang iya mga sinulatan, lakip ang iya ginsiling nahanungod sa mga babayi, isa ka bahin sang “bug-os nga Kasulatan . . . nga ginbugna sang Dios kag mapuslanon sa pagpanudlo.”​—2 Timoteo 3:16.

Ang mga Babayi sa mga Sulat ni Pablo

Bugana ang ebidensia sa tanan nga sinulatan ni Pablo nga ginakilala niya kag ginataha ang mga babayi. Sing sulit-sulit, ginapatuhuyan niya sila sa ila nanuhaytuhay nga mga papel sa kongregasyon kag sa pamilya. Sa isa sang iya mga sulat, ginpaanggid niya ang maayong mga kinaiya sang isa ka Cristianong manugbantay sa mga kinaiya nga ginapakita sang isa ka nagabatiti nga iloy.​—1 Tesalonica 2:7.

Madamo sang Cristianong kauturan nga babayi sang apostol, nga ginhingadlan sa iya mga sulat, ang ginhatagan niya sang iya mainit nga komendasyon. Lakip sa iya mga panamyaw sa mga katapo sang kongregasyon sa Roma amo ang mga panamyaw nga ginpatuhoy sing espesipiko sa pila ka mga babayi nga “nagapangabudlay sing lakas sa Ginuo.” (Roma 16:12) Tuhoy kay Eudias kag Sintique, ginpalig-on niya ang kauturan nga lalaki sa Filipos nga ‘padayon nga buligan ining mga babayi nga nagpangabudlay upod sa akon sa maayong balita.’ (Filipos 4:3) Sa iya sulat kay Timoteo, ginkilala ni Pablo ang huwaran nga pagtuo sang lola sadtong pamatan-on nga lalaki nga si Loida kag sang iya iloy, nga si Eunice.​—2 Timoteo 1:5.

Sa pihak nga bahin, may yara bala pamatuod kon ano ang ginbatyag sang Cristianong kauturan nga babayi ni Pablo tuhoy sa iya? Sing mapinasalamaton, nagpamatuod sia tuhoy kay Aquila kag Prisca, ang mag-asawa nga iya ginpakigsuuran, nga indi lamang si Aquila kundi pati man ang iya asawa, nga si Prisca, ang “nagpakatalagman sang ila kabuhi tungod sa [iya] kalag.”​—Roma 16:​3, 4.

Pag-ihig-ihig Bala sa mga Babayi?

“Dili pagsabdunga sing matigdas ang isa ka mas gulang nga lalaki. Sa baylo, kabiga sia subong isa ka amay, ang mas bata nga mga lalaki subong mga utod, ang mas gulang nga mga babayi subong mga iloy, ang mas bata nga mga babayi subong mga utod nga may bug-os nga kaputli.” (1 Timoteo 5:​1, 2) Wala bala ining mga pulong ni Pablo kay Timoteo nagapabanaag sing pagtahod sa kababayin-an? Ginhatagan ni Pablo sing pareho nga dungog ang mga lalaki kag mga babayi sa sulod sang Cristianong kongregasyon. “Walay Judio ukon Griego,” sulat niya, “walay ulipon ukon hilway, walay lalaki ukon babayi; kay kamo tanan isa sa paghiusa kay Cristo Jesus.”​—Galacia 3:28.

Bilang pagtahod sa ginhatag-sang-Dios nga mga papel sa pag-asawahay, si Pablo nagsulat: “Magpasakop ang mga asawa sa ila mga bana subong nga sa Ginuo, kay ang bana amo ang ulo sang iya asawa subong nga si Cristo man amo ang ulo sang kongregasyon, kay sia ang manluluwas sini nga lawas.” (Efeso 5:​22, 23; ipaanggid ang 1 Corinto 11:3.) Huo, nagakatuhay ang mga papel sang bana kag sang asawa, apang wala ini nagapahangop nga ang isa ka tiayon mas kubos. Ang mga papel nagabuligay, kag ang pagtuman sang tagsa sini nga papel isa ka hangkat nga mangin para sa kaayuhan sang pamilya kon matuman. Dugang pa, ang pagkaulo sang bana indi dapat mangin mapiguson ukon dimahigugmaon. Si Pablo nagpadayon: “Dapat mangin mahigugmaon ang mga bana sa ila mga asawa subong sang ila kaugalingon nga mga lawas,” handa sa paghimo sing dalagku nga mga pagsakripisyo para sa ila. (Efeso 5:​28, 29) Dapat tumanon sang mga anak ang amay kag iloy.​—Efeso 6:​1, 2.

Dapat man talupangdon ang mga pulong ni Pablo tuhoy sa pagkasuod sang mag-asawa. Wala sing pagdampig-dampig nga si Pablo nagsulat: “Ihatag sang bana sa iya asawa ang nagakaigo; kag subong man sang asawa sa bana. Ang asawa walay gahom sa iya kaugalingon nga lawas, kundi ang bana; subong man ang bana walay gahom sa iya kaugalingon nga lawas, kundi ang asawa.”​—1 Corinto 7:3, 4.

“Babayi . . . Dapat Maghipos”

Tuhoy sa mga pulong ni Pablo sa 1 Timoteo 2:​12, nga ginbalikwat sa nagabukas nga parapo, ang iya bala pagsakdag sa ‘paghipos’ sang babayi naghalin sa maihig-ihigon nga panimuot batok sa mga babayi? Indi! Ang ginpangabay nga ‘paghipos’ amo ang tuhoy sa pagpanudlo kag pagpakita sing espirituwal nga awtoridad sa sulod sang kongregasyon, bilang pagsunod sa una nasambit nga kaangtanan sang lalaki kag babayi nga ginhatag sang Diosa

Wala ini nagakahulugan nga ang mga babayi indi mangin mga manunudlo sang diosnon nga kamatuoran. Ginpalig-on ni Pablo ang mas gulang nga mga babayi nga mangin “mga manunudlo sang kon ano ang maayo” sa mas bata nga mga babayi. Sa pagsunod sa huwaran nanday Eunice kag Loida, nga nagtudlo kay Timoteo, dapat hanason sang Cristianong mga iloy ang ila mga anak sa diosnon nga mga paagi. (Tito 2:​3-5; 2 Timoteo 1:5) Sa karon, sa mga kongregasyon sang mga Saksi ni Jehova, ginatos ka libo ka Cristianong mga babayi ang nagasapo sing espirituwal nga kaayawan sa pagsunod sang mga huwaran nanday Eudias kag Sintiche sa pagbantala sing maayong balita sing dayag kag sa paghimo sing mga disipulo nga mga lalaki kag mga babayi.​—Salmo 68:11; Mateo 28:20; Filipos 4:​2, 3.

Sa amo, ano sa banta mo? Ang mga sinulatan bala ni Pablo, kon tamdon sa kabilugan, nagapamatuod sa panumbungon nga ini nagaihig-ihig sa mga babayi?

[Mga footnote]