Mga Mina sa Duta—Isa ka Bilog Globo nga Katalagman
LINIBO sang inosente nga mga lalaki, mga babayi, kag kabataan sa kapin sa 60 ka pungsod ang ginahalitan, kag ang iban ginapatay, kada bulan sang mga mina sa duta. Ginabanta nga kapin nga mga tawo ang napatay ukon nahalitan sang mga tawo nga nagapangita sining mga mina sang sa kemikal, biolohiko, kag nuklear nga inaway. Suno sa nagapanalawsaw nga organisasyon nga Human Rights Watch, mga 30,000 ka tawo ang nahalitan sang mga mina sa Cambodia lamang.
Ining gamay nga mga bomba ginlubong sa duta sa tion sang nanuhaytuhay nga mga inaway, kag ang kalabanan sini wala gid mapanguha. Ginabanta nga mga 100 milyones sini ang nalubong sa kapin sa 60 ka pungsod. Sarang ini maglupok paagi lamang sa isa ka tapak sang tiil kag masami ini ginagamit sa tion sang inaway bangod barato lang ini kag epektibo gid. Ang isa ka sahi nagabili lamang sing $3 (U.S.). Ang isa pa, nga nagapahulag sa 700 ka asero nga mga boletas kag makapatay sa distansia nga 50 ka yarda, nagabili lamang sing $27. Daku gid ang pagkinahanglan sa sini, report sang The New York Times, nga 48 ka pungsod karon ang nagahimo kag nagabaligya sing 340 ka nanuhaytuhay nga sahi sang mga mina. Kag kapin pa ang ginalubong kada adlaw sangsa masapwan sang mga operasyon nga nagapangita sining nalubong nga mga mina agod indi na ini maglupok sing aksidente.
Ang pagpangita sa nalubong nga mga mina mabudlay kag magasto, kay madamo nga hangaway ang wala nagahupot sing rekord kon diin nila ginpanglubong ang mga mina; kag ang mga mina karon ginahuman na sang kahoy, plastik, kag sang iban pa nga materyales nga indi mamutikan sang metal nga makina nga ginagamit sa pagpangita sini. Ang senador sang E.U. nga si Patrick Leahy, nga nagpangabay sang pagdumili sa pag-eksport sining mga hinganiban, nagsiling: “Sa Netherlands, ang mga tawo nagakapatay gihapon bangod sa mga bomba nga ginpanglubong sang mga Aleman sang Inaway Kalibutanon II. Hunahunaa kon daw ano ini ka grabe pa sa Afghanistan, Cambodia, Angola, Bosnia kag sa tanan nga iban pa nga mga pungsod nga ginlubngan sing madamo nga mina.”
Ang nagapakari lamang nga bag-ong kalibutan sang Dios ang magalubad sina nga mga problema. Ang iya Pulong nagasaad: “[Ang Dios] nagapatunong sang mga inaway tubtob sa ukbong sang duta. Ginabali niya ang pana kag ginautod niya ang bangkaw; ginasunog niya sa kalayo ang mga kangga [sa inaway].”—Salmo 46:9.