Ang Pagtamod sang Biblia

Magpatawad kag Dayon Kalimtan​—Posible Bala Ini?

“PATAWARON KO ANG KALAUTAN NILA, KAG INDI NA PAGDUMDUMON NAKON ANG ILA SALA.”​—JEREMIAS 31:34.

GINAPAKITA sinang mga tinaga nga ginrekord ni manalagna Jeremias ang pagkatalalupangdon sang kaluoy ni Jehova: Kon nagapatawad sia, ginakalimtan niya. (Isaias 43:25) Ang Biblia nagdugang sa pagsiling: “Subong nga si Jehova nagpatawad sa inyo, amo man ang himuon ninyo.” (Colosas 3:13) Gani subong mga Cristiano dapat ilugon naton ang pagpatawad ni Jehova.

Apang, nagautwas ang pila ka importante nga mga pamangkot. Kon si Jehova nagapatawad, wala na gid bala niya ginadumdom ang aton mga sala? Kag kon kita nagapatawad, dapat bala naton kalimtan sa kahulugan nga indi na naton madumduman pa? Masiling bala nga kon wala naton ginkalimtan sa sinang paagi, wala kita nagapatawad sa pagkamatuod?

Kon Paano si Jehova Nagapatawad

Ang pagpatawad nagalakip sa pagdula sang kaakig. Kon si Jehova nagapatawad, ginahimo niya ini sing bug-os.a Si salmista David nagsulat: “Dili sia [Jehova] magsabdong sing dalayon, kag dili sia maghupot sang iya kaakig sa gihapon. Subong sa kalayo sang sidlangan sa katundan, amo kalayo ang iya pagpahilayo sa aton sang aton mga paglalis. Kaangay sang amay nga nagakaawa sa iya mga anak, sa amo si Jehova nagakaawa sa mga nagakahadlok sa iya.”​—Salmo 103:​9, 12, 13.

Ang bug-os nga pagpatawad sang Dios ginapaathag sing dugang sa Binuhatan 3:19: “Busa hinulsol kamo, kag magliso agod mapanas ang inyo mga sala.” Ang ekspresyon ‘agod mapanas’ naghalin sa Griegong berbo nga (e·xa·leiʹpho) nga nagakahulugan “pahiran, panason.” (Tan-awa ang Bugna 7:17; 21:4.) Ang The New International Dictionary of New Testament Theology nagapaathag: “Ang pagtamod nga ginpabutyag diri sang berbo ukon sa bisan diin man mahimo nga amo ang pagpahining sa kadaygan sang wax writing-tablet agod magamit liwat ([ipaanggid] ang ‘pagtinlo sa pisara’).” Kon nagahinulsol kita sang aton mga sala, ginatinluan ni Jehova ang aton rekord. Nagakahulugan bala ina nga wala na niya ginadumdom ang aton mga sala? Binagbinagon naton ang isa ka halimbawa nga narekord sa Biblia.

Sang nakighilahi si Hari David upod kay Batseba kag nagtinguha sang ulihi nga ihinago paagi sa pagpapatay sang iya bana, ginpadala ni Jehova si manalagna Natan sa pagsabdong kay David. (2 Samuel 11:​1-17; 12:​1-12) Ano ang resulta? Naghinulsol sing sinsero si David, kag ginpatawad sia ni Jehova. (2 Samuel 12:13; Salmo 32:​1-5) Ginkalimtan bala ni Jehova ang mga sala ni David? Wala gid! Ang manunulat sang Biblia nga sanday Gad kag Natan nagrekord sang ulihi sing bug-os nga hitabo sa tulun-an sang 2 Samuel (natapos sang mga 1040 B.C.E.) wala madugay antes sang kamatayon ni David.

Gani ang rekord, ukon ang handumanan, sang mga sala ni David​—subong man ang rekord sang iya paghinulsol kag sang pagpatawad ni Jehova​—nagapabilin, para sa benepisyo sang mga bumalasa sang Biblia tubtob karon nga adlaw. (Roma 15:4; 1 Corinto 10:11) Sa katunayan, sanglit “ang pulong ni Jehova [subong ginaunod sa Biblia] nagapadayon sa gihapon” ang rekord sang sala ni David indi gid malipatan!​—1 Pedro 1:25.

Paano, nian, masiling nga ginatinluan ni Jehova ang pisara kon sinsero nga nagahinulsol kita sang aton mga sala? Paano naton hangpon ang mga pinamulong ni Jehova: ‘Patawaron ko ang kalautan nila, kag indi na pagdumdumon nakon ang ila sala’?​—Jeremias 31:34.

Kon Paano ni Jehova Ginakalimtan

Ang Hebreong berbo nga ginbadbad “pagdumdumon nakon” (isa ka porma sang za·kharʹ) wala nagakahulugan sang pagdumdom lamang sa nagligad. Suno sa Theological Wordbook of the Old Testament, mahimo ini magakahulugan sang “pagsambit, pagsugid, pagsaysay, pagpahibalo, pagpanawag, pagsaulog, pagsumbong, pagtu-ad.” Ang Theological Dictionary of the Old Testament nagadugang: “Sa pagkamatuod, sing masami, ang [za·kharʹ] nagapahangop sang isa ka hulag ukon ginagamit upod sa mga berbo sang paghulag.” Gani, sang magsiling si Jehova sa iya malinapason nga katawhan nga “dumdumon [niya] ang ila kalautan,” buot niya silingon nga magahulag siya batok sa ila pagkadimahinulsulon. (Jeremias 14:10) Sa kabaliskaran, sang si Jehova nagsiling, ‘Indi ko na pagdumdumon ang ila mga sala,’ ginapasalig niya kita nga kon ginapatawad niya ang aton mga sala, indi na niya pagdumdumon pa agod isumbong, pakamalauton ukon silutan kita.

Paagi kay manalagna Ezequiel, ginpaathag ni Jehova kon ano ang kahulugan nga sia nagapatawad kag dayon ginakalimtan: “Apang kon ang isa ka malauton, magtalikod sa tanan niya nga sala nga nahimo kag magbantay sang tanan nakon nga palatukuran kag maghimo sang suno sa kasuguan kag katadlungan, sa pagkamatuod magakabuhi sia. Indi sia mapatay. Ang tanan nga kalautan nga iya nahimo​—indi na pagadumdumon batok sa iya. Sa pagkamatarong nga nahimo niya magakabuhi sia.” (Ezequiel 18:​21, 22; 33:​14-16) Huo, kon ginapatawad ni Jehova ang mahinulsulon nga makasasala, ginatinluan niya ang pisara kag ginakalimtan sa kahulugan nga indi siya maghulag batok sa isa nga nakasala bangod sang nagligad nga kasal-anan sa ulihi nga tion.​—Roma 4:​7, 8.

Subong dihimpit, indi gid kita makapatawad sing himpit kasubong ni Jehova; mas mataas ang iya hunahuna kag dalanon sangsa aton. (Isaias 55:​8, 9) Nian, sa anong kasangkaron, nga ginapaabot kita nga makatarunganon sa pagpatawad kag dayon kalimtan kon makasala ang iban sa aton?

Kon Paano Kita Makapatawad kag Dayon Kalimtan

Ang Efeso 4:32 nagapanugyan nga ‘magpinatawaray sa isa kag isa.’ Suno sa lexikograpo nga si W. E. Vine, ang Griegong tinaga nga ginbadbad ‘magpinatawaray’ (kha·riʹzo·mai) nagakahulugan sang “paghatag sing bug-os nga kahamuot.” Kon ang nahimo nga sala diutay lamang, mahimo nga indi kita mabudlayan sa pagpatawad. Ang pagdumdom nga kita man dihimpit makabulig sa aton nga paumuran ang kasaypanan sang iban. (Colosas 3:13) Kon kita nagapatawad, dulaon naton ang pagkaakig, agod ang aton kaangtanan sa nakasala indi mahalitan sing dayon. Sa ulihi, ang handumanan sinang diutay nga sala mahimo nga madula.

Nian, paano kon nakasala sing grabe ang iban sa aton, nagapaantos sing tuman sa aton? Sa serioso nga mga kaso, kaangay sang incesto, paglugos, kag plano nga pagpatay, ang pagpatawad mahimo magdalahig sing pila ka nanuhaytuhay nga pagbinagbinag. Matuod ini ilabi na kon wala ginabaton ang sala, wala nagahinulsol, kag wala nagapangayo sing pasaylo ang nakahimo sang sala.b (Hulubaton 28:13) Si Jehova mismo wala nagapatawad sa dimahinulsulon, batinggilan nga makasasala. (Hebreo 6:​4-6; 10:26) Kon madalom ang natuga nga halit, mahimo nga indi gid kita magmadinalag-on nga kalimtan sing bug-os kon ano ang natabo. Apang, maumpawan kita sa pasalig nga sa palaabuton nga bag-ong kalibutan, “ang una nga mga butang indi na pagdumdumon, ukon mag-abot sa tagipusuon.” (Isaias 65:17; Bugna 21:4) Nian, ang bisan ano nga aton madumduman indi na magpabatyag sa aton sing tuman nga kasaklaw ukon kasakit nga mahimo nabatyagan naton sa karon.

Sa iban nga kahimtangan, ayhan kinahanglan kita maghimo sing una nga tikang sa paghusay sang mga bagay, ayhan mahimo paagi sa pagpakighambal sa nakasala, antes kita makapatawad. (Efeso 4:26) Sa sining paagi mahusay ang bisan anong dipaghangpanay, mahimo ang nagakaigo nga pagpasaylo, kag mahatag ang kapatawaran. Kamusta naman ang kinahanglanon nga kalimtan ini? Ayhan indi naton malipatan sing bug-os kon ano ang nahimo, apang sarang naton malimtan sa kahulugan nga wala naton ginahuptan ang malain nga buot batok sa nakasala ukon ginasulit-sulit ang natabo. Wala naton ginapanugidsugid ini, ukon ginalikawan sing bug-os ang nakasala. Walay sapayan, mahimo magligad ang malawig nga tion para mapasag-uli ang aton kaangtanan sa nakasala, kag mahimo nga indi na naton matigayon ang kasubong nga pagkasuod sang una.

Binagbinaga ang isa ka ilustrasyon: Pananglitan ginsugid mo ang isa ka personal gid nga bagay sa isa ka masaligan nga abyan, kag nahibaluan mo sang ulihi nga ginapanugidsugid niya ini sa iban, nga ginkahuya mo kag ginkasaklaw sing daku. Ginpalapitan mo sia agod hambalan ini, kag nahanusbo gid sia; nangayo sia sing pasaylo kag sing kapatawaran. Pagkabati sang iya sinsero nga pagpangayo sing pasaylo, napahulag ang imo tagipusuon sa pagpatawad sa iya. Madali mo bala malipatan ang natabo? Indi gid; walay duhaduha mangin maalamon ka na sa pagsugid sa iya sa ulihi. Apang ginpatawad mo sia; wala mo na ginabalikbalik ang mga bagay sa iya. Wala ka nagahupot sing kaakig, ukon nagasugidsugid sini sa iban. Mahimo nga indi mo na luyag makigsuod sa iya kasubong sang una, apang ginahigugma mo sia gihapon subong imo Cristianong utod.​—Ipaanggid ang Hulubaton 20:19.

Ano, nian, kon walay sapayan sang imo mga panikasog sa paghusay sang mga bagay, wala ginabaton sang nakasala ang iya kasaypanan kag wala nagapangayo sing pasaylo? Makapatawad ka bala sa paagi nga dulaon na lang ang kaakig? Ang pagpatawad sa iban wala nagakahulugan nga ginapasapayanan ukon ginapakadiutay naton ang ila nahimo. Ang kaakig mabug-at nga lulan; makakontrol ini sang aton hunahuna, makadula sang aton kalinong. Ang paghulat sang pagpangayo sing pasaylo nga indi mahanabo, magahimo lamang sa aton nga magbatyag sing dugang nga kabang-awan. Subong resulta, ginapahanugutan naton ang nakasala nga magkontrol sang aton balatyagon. Sa amo, kinahanglan nga patawaron naton ang iban, ukon paligaron ang kaakig, indi lamang sa ila benepisyo kundi para man sa aton agod makapadayon kita sa pagkabuhi nga indi matublag sini.

Indi pirme mahapos ang magpatawad sa iban. Apang kon may sinsero nga paghinulsol, sarang naton mailog ang pagkamapinatawaron ni Jehova. Kon ginapatawad niya ang mahinulsulon nga mga malauton, ginadula niya ang kaakig​—ginatinluan niya ang pisara kag ginakalipatan sa amo nga indi na niya pagdumdumon yadtong mga sala batok sa ila sa ulihi. Mahimo man naton madula ang kaakig kon mahinulsulon ang nakasala. Apang, may kahigayunan nga indi kita obligado sa pagpatawad. Wala sing biktima sang sobra dimatarong ukon mapintas nga inagihan ang dapat piliton sa pagpatawad sa dimahinulsulon nga makasasala. (Ipaanggid ang Salmo 139:​21, 22.) Apang sa iban nga kaso kon ang iban nakasala sa aton, makapatawad kita sa kahulugan nga dulaon na ang kaakig, kag magakalipat sa kahulugan nga indi magbuhat sing bisan ano batok sa aton utod sa ulihi.

[Mga footnote]

[Retrato sa Pahina 14]

Si Jose kag ang iya mga utod