Ang Dalan Pabalik sa Paraiso
BANGOD sang pagkalangkag sang tawo sa Paraiso kag sang diutay kag daku nga paninguha nga ilugon ini, ang isa magahunahuna nga sa karon ang duta dapat paraiso na gid. Apang indi subong sini.
Gin-una, sa baylo, sang katawhan ang kakagod, nga sa masami amo ang nagapangibabaw nga nagaresulta sa kahalitan sang palibot kag sang nanuhaytuhay buhi nga mga butang. Nagapati nga ang magadaug amo ang materyal nga manggad, madamo nga tawo ang nadulaan na sing paglaum nga ining duta mangin isa ka Edeniko nga paraiso. Sa baylo, ginalauman nila ang kabuhi sa langit sa tapos sang kamatayon subong amo lamang ang ila ginalauman nga Paraiso. Ining pagtamod nagapahangop nga, una, ang aton tawhanon nga pagkalangkag sa Eden mapaslawan sing dayon kag, ikaduha, ginpabay-an sang Dios ining planeta sa kabuangan kag kakagod sang tawo. Matuod bala ini? Ano gid ang yara sa palaabuton? Kag diin naton matigayon ina nga palaabuton?
Paraiso—Sa Langit Ukon sa Duta?
Halos 2,000 ka tuig sang una, sang nagapakighambal sa isa ka mahinulsulon nga kawatan nga nalansang sa tupad niya, si Jesucristo nagsiling: “Mangin kaupod ka nakon sa Paraiso.” (Lucas 23:43) Buot bala silingon ni Jesus nga ang kawatan magakadto sa langit kaupod niya? Indi.
Wala gani ina sa hunahuna sadtong malaut nga tawo. Ngaa wala? Bangod mahimo nga nahibaluan niya ang ginasiling sang Hebreong Kasulatan, nga nasulat na sang iya adlaw, subong sang sa una nga bahin sang Salmo 37:29: “Ang mga matarong magapanag-iya sang duta.” Gintudlo ni Jesus ina man nga kamatuoran, nga nagasiling: “Malipayon ang mga malum-ok sing panghunahuna, kay panublion nila ang duta.” (Mateo 5:5) Nagahisanto ining kasulatan sa ginatawag sing kinaandan nga Pangamuyo sang Ginuo, nga nagasiling: “Paghimuon ang imo kabubut-on, subong sang sa langit, amo man sa duta.”—Mateo 6:9, 10.
Ang Biblia nagatudlo nga gintuga sang Dios ang duta, indi ang langit, subong puluy-an para sa tawhanon nga pamilya. Ang iya Pulong nagasiling nga ‘wala [niya] pagtugaha [ang duta] sa wala sing pulos’ kundi ‘ginhuman ini agod puy-an.’ (Isaias 45:18) Tubtob san-o? “Ginpasad niya ang duta sa malig-on nga mga duog sini; indi ini mationg tubtob sa walay latid nga tion, ukon sing dayon.” (Salmo 104:5) Huo, “ang duta magapabilin tubtob sa walay latid nga tion.”—Manugwali 1:4.
Katuyuan sang Dios para sa kalabanan sang mga nagaalagad sa iya nga himuon ining duta nga mangin puluy-an nila sing dayon. Talupangda kon paano ang Pulong sang Dios, ang Biblia, nagakomento sa sini. Ang Salmo 37:11 nagatagna: “Ang mga mahagop magapanag-iya sang duta, kag masapwan gid nila ang ila daku nga kalipay sa kabuganaan sang paghidait.” Tubtob san-o? Ang Salmo 37:29 nagasiling: “Ang mga matarong magapanag-iya sang duta, kag magapuyo sila sa sini sing dayon.” Sa amo nga tion matuman ang kasulatan nga nagasiling: “Ginahumlad mo [Dios] ang imo kamot kag ginabusog ang handum sang tagsa ka buhi nga butang,” kon sayuron, ang handum nga nagahisanto sa kabubut-on sang Dios.—Salmo 145:16.
Kamusta naman ang mga wala nagahandum sa paghimo sang kabubut-on sang Dios? Ang Hulubaton 2:21, 22 nagasiling: “Ang mga matadlong amo ang magapuyo sa duta, kag ang mga disalawayon amo ang magapabilin sa sini. Tuhoy sa mga malauton, pagautdon sila gikan sa duta; kag tuhoy sa mga maluib, pagagabuton sila sa sini.”
Napasag-uli nga Paraiso
Sa indi madugay karon, hukman sang Dios ining malaut nga kalibutan. (Mateo 24:3-14; 2 Timoteo 3:1-5, 13) Apang luwason sang Dios ang “isa ka dakung kadam-an” sang katawhan sa sinang nagapakari nga kalaglagan pasulod sa bag-ong kalibutan nga iya himuon.—Bugna 7:9-17.
Nian, tuytuyan sang Dios ang makalilipay nga hilikuton sang iya tawhanon nga mga sakop nga himuon ang bug-os nga duta nga isa ka paraiso nga puluy-an para sa katawhan. Ang Biblia nagasaad: “Ang kamingawan kag ang duta nga kigas magakasadya, kag ang desyerto magakalipay kag magapamulak subong sang rosa. . . . Kay ang mga tubig magaguwa sa kahanayakan, kag ang mga ilig sa desyerto.”—Isaias 35:1, 6.
Sa sinang magasangkad nga Paraiso, wala na sing tiggulutom, kaimulon, mga slum, walay puluy-an nga mga tawo, ukon bugana sa krimen nga mga duog. “May bugana nga uyas sa duta.” (Salmo 72:16) “Ang kahoy sang latagon magapamunga, kag ang duta magapatubas.” (Ezequiel 34:27) “Magapatindog sila sing mga balay kag puy-an sila; kag magatanom sila sing mga ulubasan kag magakaon sang bunga nila. Indi sila magpatindog kag iban ang magapuyo; indi sila magtanom kag iban ang magakaon.” (Isaias 65:21, 22) “Magalingkod sila, ang tagsa ka tawo sa idalom sang iya ubas kag sa idalom sang iya higuera, kag wala sing magapakurog sa ila.”—Miqueas 4:4.
Kon Ngaa ang Pila Magakadto sa Langit
Mahimo batunon sang kalabanan nga tawo nga ginakalangkagan nila ang isa ka dutan-on nga paraiso. Natural lamang ina, kay wala gid gintanom sang Dios sa ila hunahuna ang pagkalangkag sa langit; indi gani nila mahanduraw kon ano ang kabuhi sa langit. Halimbawa, sa pagpakighambal sa iya ministro sang Church of England, si Pat, bisan pa isa ka debotado nga katapo sang simbahan, nagsiling: “Wala gid ako nagahunahuna nga mapalangit. Indi ko luyag magkadto, kag ano man abi ang himuon ko didto?”—Ipaanggid ang Salmo 115:16.
Matuod, ginatudlo sang Biblia nga ang isa ka limitado nga kadamuon sang mga tawo, 144,000, magakadto sa langit. (Bugna 14:1, 4) Ginapaathag man sini kon ngaa: “Ginhimo mo sila nga isa ka ginharian kag mga saserdote sa aton Dios, kag sila magagahom subong mga hari sa duta.” (Bugna 5:9, 10) Upod sa ila Hari, si Jesucristo, sila ang magahuman sa “ginharian,” ang bag-o nga langitnon nga panguluhan sang duta, nga ginapangamuyo sang mga Cristiano. Dumalahan sining panguluhan ang bug-os nga pagpabag-o sa duta kag sa katawhan.—Daniel 2:44; 2 Pedro 3:13.
Apang, sanglit ang handum nga magkabuhi sa langit indi natural sa mga tawo, ang isa ka tumalagsahon nga pagpanghikot sang espiritu sang Dios “nagasaksi” sa 144,000 agod nga mabatyagan nila ining pinasahi nga “mataas nga pagtawag.” (Roma 8:16, 17; Filipos 3:14) Apang, maathag nga indi kinahanglan ina nga pagpanghikot sang balaan nga espiritu sa katawhan sa kabilugan bangod ang ila dayon nga puluy-an mangin sa paraiso nga duta.
Ginahanda sang Espirituwal nga Paraiso ang Dalan
Paano makalipikar ang isa para sa dayon nga kabuhi sa Paraiso sa duta? “Ini nagakahulugan sing kabuhi nga walay katapusan,” siling ni Jesus, “ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Ginaangot ang malinong nga relasyon sang mga tawo sa ihibalo sang Dios, ang Isaias 11:9 nagasiling: “Indi sila magahalit ukon maglaglag sa bug-os ko nga bukid nga balaan; kay ang duta matugob gid sang ihibalo ni Jehova subong nga ang mga tubig nagatabon sang dagat.”—Ipaanggid ang Isaias 48:18.
Ining ihibalo, sa pagkamatuod, indi pagtuon lamang sa mga katunayan. Nagaimpluwensia ini sa personalidad sang isa kag nagapalambo sing diosnon nga mga kinaiya, subong sang “gugma, kalipay, paghidait, pagkamainantuson, pagkalulo, pagkaayo, pagtuo, pagkalum-ok sing panghunahuna, pagpugong sa kaugalingon.” (Galacia 5:22, 23) Nagatinguha ang mga Saksi ni Jehova nga palambuon ining mga kinaiya, kag sa amo, bisan karon, subong pagpakamaayo yara sila sa isa ka matahom espirituwal nga paraiso.—Isaias 65:13, 14.
Daw ano ka tuhay ang ila espirituwal nga kahimtangan kon ipaanggid sa kalibutan, nga labi kag labi nga nagatugdang sa pagkadidiosnon kag kagarukan! Apang, sa indi madugay, ining malaut nga kalibutan laglagon sang Dios. Samtang wala pa ina, ginaagda kamo sang mga Saksi ni Jehova sa pagduaw—huo, sa pag-usisa—sa espirituwal nga paraiso nga ila ginapuy-an. Pamatud-i para sa inyo kaugalingon nga bisan karon gid si Jesus, ang dikitaon nga langitnon nga Hari, malinong nga nagatuytoy sa palaabuton nga mga pumuluyo sinang bag-ong kalibutan sa makitid nga dalan padulong sa dutan-on nga Paraiso kag dayon nga kabuhi!—Mateo 7:13, 14; Bugna 7:17; 21:3, 4.
[Retrato sa pahina 8]
Ang mga makalampuwas sa katapusan sining kalibutan magapakigbahin sa paghimo sa duta nga mangin paraiso