Ang Pagtamod sang Biblia

Ang Imo Pamayo kag Pamustura—Importante Bala Ini sa Dios?

“Subong nga ang indese nagasugid sa kaundan sang libro, . . . amo man ang naguwa nga dagway kag panapton, sang lalaki ukon babayi, nagahatag ini sa aton sing palatandaan sang iya panimuot.”​—⁠Ingles nga manunulat sing drama nga si Philip Massinger.

SANG ikatlo nga siglo C.E., ang manunulat sang simbahan nga si Titus Clemens naghimo sing isa ka malaba nga listahan sang mga pagsulundan tuhoy sa pamayo kag pamustura. Ang mga puni kag maluho ukon maduagon nga mga tela gindumilian. Indi dapat paglugumon sang mga babayi ang ila buhok ukon “palhitan ang ila mga guya sing makagalanyat malalangon nga mga butang,” buot silingon, “pagpangoloreti.” Ang mga lalaki ginasugo nga magpagunting sang ila buhok bangod “ang malip-ot nga buhok . . . nagapakita nga ang lalaki talahaon,” apang ang bungot indi dapat pagbarbasan, kay “nagahatag [ini] sa nawong sing dignidad kag amaynon nga awtoridad.”a

Siniglo sang ulihi, ang lider sang Protestante nga si John Calvin nagpasar sing kasuguan nga nagasambit sing duag kag sahi sang panapton nga dapat isuksok sang iya mga sumulunod. Wala ginakahamut-an ang alahas kag laso, kag mahimo mabilanggo ang babayi bangod sa “daw imoral” nga pagkupyor sang iya buhok.

Bangod sining sobra nga mga pagtamod, nga ginsakdag sang relihioso nga mga lider sa sulod sang mga tuig, nagpalibog ang madamo sinsero nga tawo, Importante gid bala sa Dios kon ano ang akon ginasuksok? Wala bala niya ginakahamut-an ang pila ka moda ukon ang paggamit sing mga koloreti? Ano ang ginatudlo sang Biblia?

Isa ka Personal nga Butang

Sing makawiwili, subong sang narekord sa Juan 8:​31, 32, nagsiling si Jesus sa iya mga disipulo: “Kon magpabilin kamo sa akon pulong, . . . mahibaluan ninyo ang kamatuoran, kag ang kamatuoran magahilway sa inyo.” Huo, ang kamatuoran nga gintudlo ni Jesus gintuyo sa paghilway sa mga tawo gikan sa mapiguson nga mga lulan nga gintuga sang tradisyon kag butig nga mga panudlo. Gindesinyo ini sa pagpasulhay sa mga “ginabudlayan kag ginabug-atan.” (Mateo 11:28) Wala gid sing handum si Jesus ukon ang iya amay nga si Jehova nga Dios, nga kontrolon ang kabuhi sang mga tawo tubtob sa kasangkaron nga ang mga indibiduwal indi na makamatumato kag makapangatarungan sa personal nga mga butang. Luyag ni Jehova nga mangin hamtong sila nga katawhan nga “paagi sa paggamit nahanas ang ila mga ikasarang sa paghantop nga makilala ang husto kag sayop.”​—⁠Hebreo 5:⁠14.

Busa, ang Biblia wala nagahatag sing detalyado nga kasuguan tuhoy sa pamayo kag pamustura ukon sa paggamit sing mga kosmetiko, luwas lamang sa pila ka espesipiko nga ginapatuman sang Mosaikong Kasuguan sa mga Judiyo tuhoy sa pamayo nga gintuyo agod buligan sila nga magpain gikan sa palibot nga mga pungsod kag sa ila imoral nga impluwensia. (Numeros 15:​38-​41; Deuteronomio 22:⁠5) Sa sulod sang Cristianong kahimusan, ang pamayo kag pamustura isa ka personal nga pagpili.

Apang, wala ina nagapahangop nga ang Dios wala nagasapak sa aton ginasuksok ukon nga ‘ang bisan ano lang puwede.’ Sa kabaliskaran, ang Biblia may makatarunganon nga mga panuytoy nga nagapabanaag sa pagtamod sang Dios sa pamayo kag pamustura.

“May Kaugdang kag Kaligdong Sang Hunahuna”

Si apostol Pablo nagsulat nga ang Cristianong mga babayi dapat “magpuni sang ila kaugalingon sing panapton nga nagakaigo, nga may kaugdang kag kaligdong sang hunahuna, indi sang mga estilo sang sinalapid nga buhok kag bulawan ukon perlas ukon malahalon kaayo nga panapton.” Sing kaanggid, naglaygay si Pedro sing batok sa “naguwa nga pagpanalapid sing buhok kag pagsuksok sing mga puni nga bulawan.”​—⁠1 Timoteo 2:9; 1 Pedro 3:⁠3.

Ginapakita bala nanday Pedro kag Pablo nga dapat likawan sang Cristianong mga babayi kag mga lalaki ang pagpauswag sang ila dagway? Indi gid! Sa katunayan, ang Biblia nagasambit sa matutom nga mga lalaki kag babayi nga naggamit sing mga alahas ukon kosmetiko nga mga lana kag mga pahumot. Antes sia mag-atubang kay Hari Asuero, nagpatahom gid si Ester nga naglakip sing mahumot nga lana kag masahe. Kag si Jose ginpanaptan sing mapino nga lino kag sing kulintas nga bulawan.​—⁠Genesis 41:42; Exodo 32:​2, 3; Ester 2:​7, 12, 15.

Ang prase nga “kaligdong sang hunahuna,” subong sang paggamit ni Pablo, nagabulig sa aton nga mahangpan ang laygay. Ang orihinal nga tinaga sa Griego nagapahangop sing kalmado nga buot kag pagkontrol sa kaugalingon. Nagapahangop ini sang maligdong nga pagtamod sa kaugalingon, wala nagakuha sing dikinahanglanon nga atension. Ang iban nga badbad sang Biblia nagbadbad sining tinaga subong “mainandamon,” “maalamon,” “matinahuron,” ukon “may pagpugong sa kaugalingon.” Ining kinaiya importante nga kinahanglanon para sa Cristianong mga gulang.​—⁠1 Timoteo 3:⁠2.

Gani, sa pagsiling sa aton nga ang aton pamayo kag pamustura dapat mangin maugdang kag nagakaigo, ginapalig-on kita sang Kasulatan nga likawan ang sobra nga mga estilo nga mahimo magpasaklaw sa iban kag magdala sing kahuy-anan sa aton kag sa Cristianong kongregasyon. Sa baylo nga hatagan sing atension ang ila dagway paagi sa pisikal nga pagpamuni, yadtong may daku nga pagtahod sa Dios dapat magpakita sing kaligdong sa hunahuna kag hatagan sing daku nga importansia ang “sekreto nga pagkatawo sang tagipusuon sa dimadinulunton nga panapton sang malinong kag malulo nga espiritu.” Ini, hinakop ni Pedro, “may daku nga balor sa mga mata sang Dios.”​—⁠1 Pedro 3:⁠4.

Ang mga Cristiano mga ‘talan-awon sang kalibutan.’ Dapat mahibaluan nila ang impresyon nga ginahatag nila sa iban, ilabi na may kaangtanan sa sugo nga dapat nila ibantala ang maayong balita. (1 Corinto 4:9; Mateo 24:14) Busa, indi nila luyag nga ang bisan anong butang, lakip ang ila dagway, makatublag sa iban sa pagpamati sa sinang importante nga mensahe.​—⁠2 Corinto 4:⁠2.

Bisan pa ang mga estilo nanuhaytuhay sa kada lugar, ang Biblia nagahatag sa mga indibiduwal sing maathag, makatarunganon nga mga panuytoy nga makabulig sa ila sa pagpili sing maalamon. Basta ginasunod sang mga tawo ining mga prinsipio, hilway kag mahigugmaon nga ginatugutan sang Dios ang tanan sa pagpili sang ila naluyagan nga pamayo kag pamustura.

[Mga footnote]