Ang Nagakaigo nga Pamayo Nagapakita sing Pagtahod sa Dios
1. Paano naton mapabutyag ang aton apresasyon sa nagapakari nga distrito nga kombension?
1 Sa dili madugay pribilehiyo naton nga mangin bisita ni Jehova sa 2003-2004 nga “Himayaa ang Dios” Distrito nga Kombension. Mapinasalamaton gid kita kay Jehova nga gin-agda niya kita sa sining bugana nga kapiestahan sa espirituwal! Sarang naton mapakita ang aton pagtahod sa iya kag ang aton apresasyon sa iya mga aman sa espirituwal paagi sa aton pamayo kag pamustura.—Sal. 116:12, 17.
2. Ngaa importante nga mangin matinlo kita kag mahipid sing pamustura?
2 Matinlo kag Mahim-ong: Ang aton panagway dapat magpakita sang mga talaksan sang aton Dios, nga matinlo kag mahim-ong. (1 Cor. 14:33; 2 Cor. 7:1) Ang aton lawas, buhok, kag mga kuko dapat matinlo, kag dapat mahipid kita. Ang indi mahipid nga pamustura amo ang kinaandan karon. Apang, indi buot silingon nga bangod ang isa ka artista ukon bantog sa isport indi mahipid dapat indi man mangin mahipid ang isa ka Cristiano. Kon sundon naton ang uso, mabudlayan ang mga tawo nga makita ang kinatuhayan sa ulot sang mga nagaalagad sa matuod nga Dios kag sang mga wala nagaalagad sa iya.—Mal. 3:18.
3. Paano naton mapat-od nga ang aton panagway nahisuno sa laygay sa 1 Timoteo 2:9, 10?
3 Pamayo nga Nagakabagay sa Cristianong mga Ministro: Sang si apostol Pablo nagsulat sa Cristianong manugtatap nga si Timoteo, nagpalig-on sia nga ang “mga babayi magpamuni sing panapton nga nagakaigo nga may kaugdang kag kaligdong, . . . paagi sa mga buhat nga maayo, nga bagay sa mga babayi nga nagapakadiosnon.” (1 Tim. 2:9, 10) Kinahanglan ang maayo nga paghunahuna agod mapat-od nga ang aton mga panapton nagakaigo. Ang mga panapton dapat mangin mahipid, matinlo, kag maugdang—indi masaw-a ukon nagapukaw sing balatyagon.—1 Ped. 3:3.
4, 5. Ano nga mga paandam ang dapat pamatian sang Cristianong mga lalaki kag mga babayi?
4 Nagpaandam man si Pablo tuhoy sa sobra nga estilo sang “sinalapid nga buhok ukon bulawan ukon mga mutya ukon panapton nga malahalon.” (1 Tim. 2:9) Ang pagkabalanse sa paggamit sing alahas, koloreti, kag iban pa nga mga puni isa ka maalamon nga dalanon nga dapat sundon sang Cristianong mga babayi.—Hulu. 11:2.
5 Ang prinsipio sang laygay nga ginhatag ni Pablo sa Cristianong mga babayi naaplikar man sa Cristianong mga lalaki. Dapat likawan sang mga utod nga lalaki ang mga estilo nga nagapakita sang panghunahuna sang kalibutan. (1 Juan 2:16) Halimbawa, sa pila ka kadutaan ang halog katama nga mga panapton popular, apang ini nga estilo indi nagakabagay sa isa ka ministro sang Dios.
6. Ngaa dapat naton huptan ang isa ka mataas nga talaksan sa aton pamayo kag pamustura kon nagalakbay pakadto kag halin sa kombension, samtang sa kombension, kag pagkatapos sang mga sesyon kada adlaw?
6 Sa mga Hilikuton Pagkatapos Sang Programa: Kon nagatambong sa programa, kalabanan sang kauturan may maayo gid nga halimbawa sa pagpamayo kag pagpamustura. Apang, ginapakita sang mga report nga ang pila nagapabaya kon nagalakbay pakadto kag halin sa kombension ukon kon nagahimo sing iban nga hilikuton pagkatapos sang mga sesyon. Sa pagkamatuod, ang aton personal nga panagway—sa tion man sang programa ukon sa iban nga tion—nagaimpluwensia kon paano ginatamod sang iban ang katawhan sang Dios. Bangod ginatakod naton ang aton badge card sa kombension, dapat kita pirme magpanapot nga nagakaigo sa Cristianong mga ministro. Masami ini nagaresulta sa pagdayaw sang iban sa aton kag nagabukas sa pagpanaksi.—1 Cor. 10:31-33.
7. Ano ang epekto sa iban sang aton nagakaigo nga pamayo kag pamustura?
7 Subong nga ang mainabyanon nga yuhum nagapatahom sang aton nawong, ang nagakaigo nga pamayo kag pamustura nagahatag man sing dignidad sa mensahe nga aton ginadala kag sa organisasyon nga aton ginarepresentar. Ang pila nga magaobserbar sa aton sa “Himayaa ang Dios” nga mga Distrito nga Kombension sini nga tuig mahimo mamangkot kon ngaa tuhay kita kag mahimo magsiling sa ulihi: “Magaupod kami sa inyo, kay nabatian [kag nakita] namon nga ang Dios nagaupod sa inyo.” (Zac. 8:23) Kabay nga ang kada isa sa aton magpakita sing pagtahod kay Jehova paagi sa aton pamayo kag pamustura.
[Kahon sa pahina 5]
Ipakita ang Talahuron nga Panagway
▪ Kon nagalakbay
▪ Sa kombension
▪ Sa mga hilikuton pagkatapos sang programa