Pamangkot

◼ Ano nga sahi sang panapton ang nagakaigo kon magduaw kita sa mga pasilidad nga ginagamit sa pag-alagad kay Jehova?

Ang mga Kingdom Hall, Assembly Hall, puluy-an Bethel, kag ang mga sanga talatapan sa bug-os nga kalibutan, pinasahi nga mga tinukod nga ginagamit sa pag-alagad kay Jehova. Ini nga mga tinukod simple, matinlo, namentinar sing maayo kag may dignidad. Tuhay gid ini sa masami nga makita naton sa kalibutan ni Satanas. Gani dapat man makilala nga ang mga nagaduaw sa mga pasilidad para sa pagsimba kay Jehova mga sumilimba niya nga nagahimo sang iya kabubut-on.

Bangod mga Cristiano kita, ‘ginarekomendar naton ang aton kaugalingon subong mga ministro’ sa tanan nga paagi, lakip na sa sini ang aton nagakaigo kag mahipid nga pamayo kag pamustura. (2 Cor. 6:3, 4) Dapat man kita maggawi sing nagakaigo. Sa tanan nga tion, dapat desente kag may dignidad ang aton pamayo kag pamustura bangod mga alagad kita ni Jehova nga Dios. Dapat amo gid sini, ilabi na kon magduaw kita sa mga pasilidad sa ulong talatapan sa New York kag sa mga sanga sa bug-os nga kalibutan.

Sa pagbinagbinag sang importansia sang nagakaigo nga pamayo kag pamustura, ang Organisado sa Paghimo sang Kabubut-on ni Jehova nagsiling nga dapat mangin matinlo kag maugdang ang aton pamayo kag pamustura kon nagapamalaybalay kag kon nagatambong sa Cristianong mga miting. Nian ang pahina 138, parapo 3 nagsiling: “Dumduma nga ang ngalan nga Bethel nagakahulugan sing ‘Balay sang Dios.’ Gani, ang aton pamayo, pamustura, kag paggawi dapat nga kaanggid sa ginapaabot sa aton kon nagatambong kita sa mga miting para sa pagsimba sa Kingdom Hall.” Ining mataas nga talaksan dapat sundon sang mga manugbantala nga nagaduaw sa Bethel gikan sa malapit kag sa malayo nga mga lugar. Sa amo, mapakita sang mga bisita ang nagakaigo nga apresasyon kag pagtahod.—Sal. 29:2.

Ang aton mga pamayo dapat magpakilala sa aton subong “nagapangangkon nga nagasimba sa Dios.” (1 Tim. 2:10) May positibo nga impluwensia ang maugdang nga pamayo sa kon paano ginatamod sang iban ang matuod nga pagsimba kay Jehova. Apang, natalupangdan nga may pila ka kauturan nga ang panapton indi pormal, indi mahipid kag indi talahuron kon magkadto sa mga pasilidad nga ginagamit sa pag-alagad kay Jehova. Ini nga sahi sang pamayo indi nagakaigo para sa mga Cristiano sa bisan ano man nga tion. Sa tanan nga bahin sang aton kabuhi bilang mga Cristiano, luyag naton sundon ang mataas nga talaksan kag himuon ang tanan nga butang para sa himaya sang Dios agod makita sang mga tawo nga tuhay kita sa kalibutan.—Roma 12:2; 1 Cor. 10:31.

Gani kon magduaw ka sa ulong talatapan sa New York ukon sa iban pa nga mga pasilidad sang sanga ukon magbakasyon sa mga lugar malapit diri, pamangkuta ang imo kaugalingon: ‘Ang akon bala panapton kag pamustura maugdang, matinlo, kag talahuron kaangay sang duog nga akon kadtuan? Madayaw bala sini ang Dios nga akon ginasimba? May masandad bala sa akon hitsura?’ Kabay nga ‘sa tanan nga butang mapunihan naton ang panudlo sang aton Manluluwas, ang Dios’ paagi sa aton pamayo kag pamustura!—Tito 2:10.