Pamangkot

◼ Ano nga pamayo kag pamustura ang nagakabagay kon nagabisita sa mga puluy-an Bethel kag sa mga pasilidad sang sanga?

Kon magbisita kita sa Bethel, sa tuyo man nga mag-tour sa mga pasilidad ukon sa pagduaw sa mga katapo sang pamilya Bethel, “ang aton pamustura kag paggawi dapat nga mangin kaangay sa ginapaabot kon nagatambong sa mga miting para sa pagsimba sa Kingdom Hall.” (om 131) Apang, naobserbahan nga nangin kaswal katama ang pamayo sang pila ka kauturan kon nagaduaw sa mga sanga talatapan. Indi ina nagakaigo kon nagaduaw sa sining mga pasilidad. Ang aton panagway dapat nga huwaran, naareglar-sing-maayo kag maugdang, nga nagapabanaag sang pagkadesente kag dignidad nga takus sa mga alagad ni Jehova nga Dios.​—1 Tim. 2:​9, 10.

Importante gid ini katama kay ginapanilagan kita sang mga indi Saksi kon nagaduaw kita sa mga puluy-an Bethel kag sa mga pasilidad sang sanga. Ining mga nagapanilag mahimo magpasad sang ila opinyon tuhoy sa katawhan sang Dios kag sa iya organisasyon sa kon ano ang ila nakita. Maayo nga pahanumdumon naton ang aton mga estudyante sa Biblia kag ang iban pa nga nagaplano nga magduaw, sang importansia sang nagakaigo nga pamayo kag pamustura. Magapasalamat gid ang pamilya Bethel kon himuon mo ini.

Subong Cristianong mga ministro, dapat halungan naton nga ang aton panagway indi makapasandad. (2 Cor. 6:​3, 4) Sa baylo, paagi sa aton husto nga paggawi, kabay nga “mapunihan [naton pirme] ang panudlo sang aton Manluluwas, ang Dios, sa tanan nga butang.”​—Tito 2:​10.