Maayo nga Personal nga Dagway

ANG imo personal nga dagway madamo sang ginasugid tuhoy sa imo. Samtang si Jehova nagatulok sa tagipusuon, ang mga tawo masami nagahinakop gikan “sa kon ano ang makita sang mga mata.” (1 Sam. 16:7) Kon matinlo ka kag nakapamustura sing maayo, mahimo maghinakop ang iban nga may pagtahod ka sa imo kaugalingon, kag mabuyok sila sa pagpamati sa imo. Ang imo nagakaigo nga pamayo magapabanaag man sing paborable sa organisasyon nga imo ginatiglawas kag sa pagtamod sang imo mga tagpalamati sa Dios nga imo ginasimba.

Mga Panuytoy nga Maaplikar. Ang Biblia wala magpahamtang sing madamo nga kasuguan tuhoy sa personal nga dagway. Apang nagahatag ini sing balanse nga mga prinsipio nga makabulig sa aton sa pagdesisyon sing maayo. Ang importante sa sini tanan amo ang kamatuoran nga ‘ginahimo naton ang tanan nga butang sa kahimayaan sang Dios.’ (1 Cor. 10:31) Ano nga mga prinsipio ang nadalahig may kaangtanan sa aton personal nga dagway?

Una, ginapalig-on kita sang Biblia nga mangin matinlo, sa aton lawas kag sa aton pamayo. Sa iya Kasuguan sa dumaan nga Israel, may mga ginpatuman si Jehova tuhoy sa katinlo. Halimbawa, kon ang mga saserdote nagaalagad, dapat sila maligo kag maglaba sang ila mga panapton sa gintalana nga mga tion. (Lev. 16:​4, 24, 26, 28) Ang mga Cristiano wala na sa idalom sang Mosaikong Kasuguan, apang ang mga prinsipio sa sini maaplikar gihapon. (Juan 13:10; Bug. 19:8) Ilabi na kon magkadto kita sa duog sang pagsimba ukon nagapakigbahin sa ministeryo sa latagon, ang aton lawas, ang aton ginhawa, kag ang aton panapton dapat nga matinlo agod indi mabahuan ang iban sa aton. Ang mga nagapamulongpulong ukon nagapakigbahin sa mga pasundayag sa kongregasyon dapat magpahamtang sing maayo nga halimbawa sa sini nga bahin. Ang paghatag sing igtalupangod sa aton personal nga dagway nagapakita sing pagtahod kay Jehova kag sa iya organisasyon.

Ikaduha, ginapalig-on kita sang Biblia nga palambuon ang kaugdang kag kaligdong. Ginpalig-on ni apostol Pablo ang Cristianong mga babayi nga “magpamuni . . . nga may kaugdang kag kaligdong, indi nga may sinalapid nga buhok kag bulawan ukon mga perlas ukon malahalon nga mga panapton, kundi sa paagi nga nagakaigo sa mga babayi nga nagapangangkon nga nagasimba sa Dios.” (1 Tim. 2:​9, 10) Ang kaugdang kag kaligdong importante man sa pamayo kag pamustura sang mga lalaki.

Ang isa ka tawo nga maugdang nagahalong nga indi masaklaw sing di-kinahanglanon ang iban kag indi maghatag sing di-nagakaigo nga atension sa iya kaugalingon. Ang kaligdong nagaresulta sa paghantop, ukon sa maayo nga paghukom. Ang tawo nga nagapakita sini nga mga kinaiya may pagkabalanse nga resulta sang pagtahod sa diosnon nga mga talaksan. Ang pagpakita sini nga mga kinaiya wala nagasikway sang matahom nga pagpamayo kundi nagabulig sa aton nga mangin makatarunganon sa aton dagway kag likawan ang sobra nga mga estilo sang pamayo kag pamustura. (1 Juan 2:16) Luyag naton iaplikar ini nga mga prinsipio yara man kita sa duog sang pagsimba, nagapakigbahin sa ministeryo sa latagon, ukon nagapakigbahin sa iban nga mga hilikuton. Bisan ang aton ginasuksok nga panapton kada adlaw dapat magpabanaag sing kaugdang kag kaligdong. Sa eskwelahan ukon sa aton ulubrahan, may mga kahigayunan nga makapanaksi kita sing di-pormal. Bisan pa mahimo nga ang aton pamayo indi kaangay sa kon nagatambong kita sa mga miting, mga kombension, kag mga asambleya, ang aton panapton dapat gihapon mahipid, matinlo, kag maugdang.

Sa pagkamatuod, wala kita nagapamayo tanan sing palareho. Wala kita ginapaabot nga mangin amo sini. Ang mga tawo may nagkalainlain nga luyag, kag nagakaigo gid ini. Apang ang mga panuytoy sang Biblia dapat pirme iaplikar.

Ginpakita ni apostol Pedro nga ang pamayo nga naangot sa “tinago nga pagkatawo sang tagipusuon” importante pa sangsa estilo sang buhok kag naguwa nga mga panapton. (1 Ped. 3:​3, 4) Kon ang aton tagipusuon puno sang gugma, kalipay, paghidait, kaayo, kag pagtuo nga napasad sing malig-on, mangin espirituwal nga mga panapton naton ini nga nagapadungog gid sa Dios.

Ikatlo, ginapalig-on kita sang Biblia nga binagbinagon kon bala ang aton dagway mahipid. Sa 1 Timoteo 2:9, ginsambit ang “panapton nga nagakaigo.” Bisan pa ang ginpatuhuyan ni apostol Pablo amo ang pamayo sang mga babayi, amo man nga prinsipio ang naaplikar sa mga lalaki. Ang isa ka butang nga naareglar sing maayo mahipid kag mahim-ong. Manggaranon man kita ukon indi, sarang naton mapahipid ang aton dagway.

Ang isa sang una nga mga bahin sang personal nga dagway nga matalupangdan sang iban amo ang aton buhok. Dapat ini mangin mahipid, ukon nahusay sing maayo. Ang lokal nga kinabatasan kag pinanubli may epekto sa estilo sang buhok sang mga tawo. Sa 1 Corinto 11:​14, 15, masapwan naton ang laygay ni apostol Pablo tuhoy sa mga estilo sang buhok, nga maathag nga nagapatuhoy sa sining duha ka butang. Apang, kon ang estilo sang buhok sang isa ka tawo nagapakita nga nagatinguha sia nga mangin kaangay sa tuhay nga sekso, supak ini sa mga prinsipio sang Biblia.​—Deut. 22:5.

Para sa mga lalaki, ang isa ka mahipid nga personal nga dagway mahimo maglakip sang pagpamarbas. Sa mga duog diin ang may mga bungot ginatamod nga talahuron, ang bisan sin-o nga may yara sini dapat maghupot sini nga naguntingan sing mahipid.

Ikap-at, ang aton dagway indi dapat magpabanaag sang gugma sa kalibutan kag sa mga dalanon sini. Si apostol Juan nagpaandam: “Indi ninyo paghigugmaa ang kalibutan ukon ang mga butang man sa kalibutan.” (1 Juan 2:15-17) Madamong makasasala nga kailigbon ang yara sa sini nga kalibutan. Lakip sa sini ginsambit ni Juan ang kailigbon sang makasasala nga unod kag ang pagpadayawdayaw sang pagkabutang sang isa. Ginapatalupangod man sang Kasulatan ang espiritu sang pagrebelde, ukon pagsupak sa awtoridad. (Hulu. 17:11; Efe. 2:2) Ini nga mga kailigbon kag mga panimuot masami nga ginapakita sang mga tawo sa ila pamayo kag pamustura. Subong resulta, ang ila dagway mahimo nga mangin di-maugdang, makapukaw sing balatyagon, malaw-ay, baraghal, pasapayan, ukon taramhak. Subong mga alagad ni Jehova, ginalikawan naton ang mga estilo nga nagapabanaag sining di-Cristiano nga mga dalanon.

Sa baylo nga ilugon ang kalibutan, daw ano kaayo nga ang maayo nga halimbawa sang hamtong sa espirituwal nga mga lalaki kag mga babayi sa Cristianong kongregasyon amo ang mag-impluwensia sa imo pamayo kag pamustura! Ang lamharon nga mga lalaki nga nagalaum nga mangin mga humalambal sa publiko sa pila ka adlaw makapanilag sa pamayo sadtong kalipikado na sa pagpamulongpulong sa publiko. Ang tanan makatuon gikan sa halimbawa nga ginapahamtang sang mga indibiduwal nga matutom nga nagapakigbahin sa dayag nga pagministeryo sa madamo nga tinuig.​—1 Tim. 4:12; 1 Ped. 5:​2, 3.

Ikalima, sa pagpamat-od kon ano ang nagakaigo, dapat naton dumdumon nga “bisan si Cristo wala magpahamuot sa iya kaugalingon.” (Roma 15:3) Ang panguna nga ginkabalak-an ni Jesus amo ang paghimo sang kabubut-on sang Dios. Gin-una man ni Jesus ang pagbulig sa iban sangsa iya personal nga kaayuhan. Kon tuhoy sa pila ka estilo sang pamayo kag pamustura, kon may yara balagbag sa ulot naton kag sang mga tawo diin kita nagaalagad karon, ano ang aton himuon? Ang pag-ilog sa mapainubuson nga espiritu nga ginpakita ni Cristo makabulig sa aton nga makapamat-od sing maalamon. Si apostol Pablo nagpahamtang sing prinsipio: “Sa bisan ano nga paagi wala kami nagahatag sing bisan ano nga kasandaran.” (2 Cor. 6:3) Bangod sini, mahimo nga isikway naton ang mga estilo sang buhok ukon mga panapton nga mahimo bangdan sang indi pagsapak sang mga tawo nga luyag naton panaksihan.

Postura. Ang maayong personal nga dagway nagalakip man sang nagakaigo nga postura. Sa pagkamatuod, indi pareho ang pagdala naton sang aton kaugalingon, kag wala naton ginatinguhaan nga magsunod sa isa ka sulundan. Apang, talalupangdon nga suno sa ginapakita sang Biblia, ang pagtindog sing tadlong nagapaalinton sang personal nga dignidad kag pagkapositibo. (Lev. 26:13; Luc. 21:28) Walay sapayan, bangod sang tinuig nga pagtrabaho nga nagakuko ukon bangod sang katigulangon ukon pagluya sa pisikal, ang isa ka utod mahimo nga indi makatindog sing tadlong ukon kinahanglan nga may masandigan. Apang sa mga makasarang sa paghimo sini, ginarekomendar ang pagtindog sing tadlong kon nagahambal sa iban agod indi magpaalinton sang nagapasapayan nga panimuot ukon nga daw ginaluyahan ka. Sing kaanggid, bisan pa indi sayop ang paghamboy kon kaisa sang humalambal sa podyum, mas maayo nga impresyon ang mapaalinton sa mga tagpalamati kon indi sia magsandig sa podyum.

Mahipid nga Kagamitan. Indi lamang ang aton personal nga dagway ang dapat mangin matinlo kag mahipid kundi dapat man mangin matinlo kag mahipid ang aton mga kagamitan sa ministeryo.

Tan-awa ang imo Biblia. Indi posible nga ang tanan sa aton makatigayon sing bag-o nga Biblia kon ang aton ginagamit magdaan na. Walay sapayan, bisan ano man ka daan ang aton Biblia, dapat makita nga ginahalungan ini.

Sa pagkamatuod, madamo sing paagi ang pag-areglar sang bag nga ginagamit sa pagbantala, apang dapat mangin mahipid ini. Nakakita ka na bala sing nagakalahulog nga mga papel gikan sa Biblia sang ginapangita sang isa ka manugbantala ang isa ka kasulatan agod basahon sa tagbalay ukon ayhan sang ang isa ka utod nagapamulongpulong sa kongregasyon? Natublag ka, indi bala? Kon ang mga papel nga ginasal-ot sa Biblia nagatublag, mahimo nga ang pagtago sini sa iban nga duog makapahipid sang imo kagamitan. Hisayri man, nga ang pagbutang sang Biblia ukon sang relihioso nga mga publikasyon sa salog ginatamod nga indi gid matinahuron sa pila ka kultura.

Ang maayo nga personal nga dagway dapat mangin importante sa aton. May epekto man ini sa kon paano kita ginatamod sang iban. Apang labaw sa tanan, ginahatagan naton ini sing daku nga igtalupangod bangod luyag naton nga ‘punihan ang panudlo sang aton Manluluwas, ang Dios, sa tanan nga butang.’​—Tito 2:10.