Wala Gid Sila Mangampo sa Akon

NATAWO ako sang 1943 sa Rubottom, Oklahoma, U.S.A. Halin sang bata, bayolente na ako. Sang manuggradweyt na ako sa hayskul, nagsugod ako sa pag-inom. Si Tatay mapintas man kag palainom amo nga nagbarkadahay kami. Nagakadto kami sa mga klab kag mga party para mag-inom kag mangita gamo.

Ginpangasawa ko si Shirley sang 1966 kag may duha kami ka bata nga sanday Angela kag Shawn. Pero palahubog gihapon ako. Para madugangan ang akon kita, nagtanom ako kag nagbaligya sing marijuana. Nangin bouncer man ako sa isa ka bar gani makapagusto gid ako inom kag panakit. Wala gid ako sing ginakahadlukan. Wala man ako sing labot sa ginabatyag sang iban.

“Indi Gid Na Sila Pagdalha Diri!”

Ang pakaisa ni Shirley nagsaylo sa California sa diin nakatuon sia sa Biblia kag nangin Saksi ni Jehova. Pagpauli niya sa Oklahoma, ginsugid niya ang iya natun-an kay Shirley kag naintiendihan dayon ni Shirley nga amo ini ang kamatuoran. Sang matun-an na ni Shirley sing maayo ang Biblia, nagdesisyon sia nga mangin Saksi, kag nagpabawtismo sang 1976. Indi ko gusto mag-entra sa iya relihion. “Indi gid na sila pagdalha diri!” siling ko. “Indi na magsaler sa akon.”

Padayon gid nga ginsunod ni Shirley ang mga prinsipio sa Biblia kag padayon man niya ako nga ginpalangga. Antes sila magkadto sang amon kabataan sa ila Cristiano nga pagtilipon sa Kingdom Hall ginahagad gid niya ako nga mag-upod sa ila. Si Angela masiling, “Dad, nami gid tani kon maupod ka man sa amon.”

Bangod nadalahig ako sa ilegal nga mga butang, pirme ako may pusil. Kon kaisa inadlaw ako nga indi makapauli, gani problemado ang amon pag-asawahay. Kon magpauli ako, nagatambong ako sa pagtilipon nanday Shirley para mauloulohan sia. Maayo gid ang pagtratar sa akon sang mga Saksi, kag daw may punto ang ila mga panudlo.

Sang ulihi, gintanyagan ako sang isa ka elder nga magtuon sa Biblia. Nagpasugot ako. Pero daw wala gid sing epekto sa akon ang amon ginatun-an bangod nagaupod gihapon ako sa akon mga barkada. Nahibaluan ini sang elder gani ginpakita niya sa akon ang mga prinsipio sa Biblia parte sa mga katalagman sang malain nga kaupdanan. (1 Corinto 15:33) Bisan pa halin sa Biblia ang iya laygay, naakig ako, nag-untat sa pagtuon, kag mas naglala pa gid. Nasakitan gid si Shirley kag ang mga bata bangod sang akon bugal!

“Palangga Ka Man Gihapon Namon”

Sang 1983, nakabaton ako sang masubo nga balita. Napatay ang akon hinablos nga suod gid sa akon. Daku gid ang epekto sini sa akon amo nga gin-usisa ko liwat ang akon kabuhi. Narealisar ko nga indi maayo ang akon ginahimo sa akon asawa kag pamilya—ang mga tawo nga importante gid sa akon. Diri nagsugod ang akon pagbag-o. Sa lubong sang akon hinablos, gin-agbayan ako sang tigulang nga Saksi nga si John kag ginsilingan, “Gusto ko lang mabal-an mo nga palangga ka man gihapon namon.” Amo gid ini ang pagpabakod nga kinahanglan ko. Pagkaaga gintawgan ko si John nga gusto ko magtuon liwat sa Biblia, kag gusto ko na himuon ang mga pagbag-o nga dapat dugay ko na ginhimo.

Sang una nga pagtuon namon, gin-istoryahan namon ang parte sa pangamuyo kag ginsilingan ko si John nga tilawan ko ini. Sang masunod nga adlaw, nagpangita ako sing legal nga obra, pero wala gid ako sing nakita. Samtang nagadrayb ako sang akon pickup, nangamuyo ako sing matunog, “Jehova, kon luyag mo nga magtener ako diri, hatagi ako sing obra.” Sa hunahuna ko, ‘Binuang ini kay nagadrayb ako kag nagaistorya sa akon kaugalingon.’ Maathag nga wala pa gid magtubo ang akon pagtuo sa Dios bilang “nagapamati sang pangamuyo,” kag kadamo pa sang dapat ko matun-an parte sa pangamuyo. (Salmo 65:2) Pero katingalahan nga nabaton ako sa obra sang masunod nga adlaw!

Sugod sadto, pirme na ako nagapangamuyo sing serioso. Kag pirme man ako ginapakamaayo ni Jehova. Nagapati na ako sa Dios sadto, pero ang akon mga eksperiensia nagbulig sa akon nga mangin matuod ang ginasiling sang 1 Juan 5:14: “Bisan ano ang pangayuon naton suno sa iya kabubut-on, nagapamati sia sa aton.” Naeksperiensiahan ko nga ginasabat ni Jehova ang akon mga pangamuyo, gani nagdugang pa gid ang akon gugma sa iya kag pagsalig sa iya panuytoy.—Hulubaton 3:5, 6.

Sang nagtambong na ako liwat sa Cristianong mga pagtilipon, gin-abiabi ako sang mga Saksi. Dugang pa, nakita ko man nga matuod gid nga ‘nagahigugmaanay sila sing hanuot gikan sa tagipusuon,’ kag natandog gid ako sini. (1 Pedro 1:22) Napamatud-an ko man nga matuod gid ang ginasiling sang Hulubaton 13:20: “Maglakat upud sa maalam nga mga tawo kag manginmaalam ka, apang ang kaupdanan sang mga buangbuang magaantus.”

Tinuig nga ginpabudlayan kag ginsakit ko ang balatyagon sang akon pamilya, pero subong ginatinguhaan ko nga mangin mahidaiton kag mas maayo nga bana kag amay. Mas mahapos naman ako istoryahon. Gintuman ko man ang laygay sang Biblia nga “ang mga bana dapat maghigugma sang ila asawa subong sang ila kaugalingon nga lawas” kag ang mga amay dapat ‘indi magpaakig sa ila mga anak, agod indi sila maluyahan sing buot.’—Efeso 5:28; Colosas 3:21.

Maayo gid ang akon pagbag-o para sa akon pamilya. Ginpamatud-an gid sini ang ginsiling ni Jesus sa Mateo 5:3 nga, “Malipayon ang mga mahunahunaon sang ila espirituwal nga kinahanglanon.” Nasapwan ko na gid man ang matuod nga kalipay!

Sang Hunyo 1984, gin-interbyu ang amon bata nga si Angela sa asembleya sang mga Saksi ni Jehova. Ginsugid niya kon ano ako sadto kag ang mga pagbag-o nga akon ginhimo. Nagsiling sia nga nalipay gid sia nga makita nga nagapungko ako sa unahan upod sa mga balawtismuhan sina nga adlaw.

Nagapasalamat gid ako nga wala nangampo si Jehova sa mga tawo nga pareho ko! Nagapasalamat man ako kay Shirley kag sa amon mga bata nga wala gid sila nangampo sa akon. Subong isa ka Cristiano, ginasunod gid ni Shirley ang ginasiling sang 1 Pedro 3:1: “Mga asawa, magpasakop kamo sa inyo bana, agod ang bisan sin-o nga wala nagatuman sa pulong, madaug sila nga wala sing pulong paagi sa paggawi sang ila asawa.” Bangod sang iya katutom, pagpasensia, kag maayo nga paggawi sa mga tinuig nga malain ang akon ginahimo, nabuligan ako nga matun-an ang kamatuoran kag magbag-o.

Sugod sang nabawtismuhan ako, ginahimo ko gid sia nga halimbawa para palig-unon ang mga may indi Saksi nga tiayon nga indi gid mangampo. “Sa husto nga tion,” siling ko sa ila, “gamiton ni Jehova ang gahom sang iya Pulong, ang Biblia, kag ang inyo maayo nga paggawi para buligan ang inyo tiayon nga magbag-o bisan pa daw imposible ini.”