Kapitulo 6

Ang Hulusayon nga Dapat Atubangon sang Tanan nga Tinuga

1. (a) Ano nga hulusayon ang ginpautwas ni Satanas sa Eden? (b) Paano yadto nga hulusayon ginpahangop sang iya ginsiling?

SANG magsugod ang pagrebelde sa Eden isa ka serioso nga hulusayon ang ginpautwas nga nagaapektar sa tanan nga tinuga. Sang magpalapit kay Eva, ginpahangop ni Satanas nga sia kag ang iya bana ginadingutan. Sia namangkot: “Matuod gid bala nga ang Dios nagsiling nga dili kamo dapat magkaon gikan sa tagsa ka kahoy sang katamnan?” Si Eva nagsabat nga tuhoy lamang sa isa ka kahoy nga ang Dios nagsiling: “Dili kamo magkaon sa sini, dili, dili kamo magtandog sini agod nga indi kamo mapatay.” Sa sina ginsumbong ni Satanas si Jehova sing pagbinutig nga nagasiling nga ang kabuhi ni Eva kag ni Adan wala nasandig sa pagtuman sa Dios. Nagsiling sia nga ang Dios nagadingot sa iya mga tinuga sing mga butang nga maayo​—⁠ang ikasarang sa pagtukod sang ila kaugalingon nga mga talaksan sa kabuhi. “Dili kamo mapatay nga totoo,” siling ni Satanas. “Kay ang Dios nakahibalo nga sa adlaw nga magkaon kamo sa sini magamuklat ang inyo mga mata kag mangin kaangay kamo sa Dios, nga nakakilala sing maayo kag malaut.” (Gen. 3:​1-5) Ginpapati ni Satanas si Eva nga magaayuhan sia kon maghimo sia sang iya kaugalingon nga mga desisyon. Paagi sa pagpahangop, ginhangkat niya didto ang kinamatarong sang Dios sa paggahom kag ang Iya paagi sang paggahom. Ang hulusayon nga ginpautwas nagadalahig sang pagkasoberano sa uniberso.

2. Ano kuntani ang nag-amlig sa unang tawhanon nga mag-asawa?

² Ang gugma kay Jehova nag-amlig kuntani kay Eva. Ang pagtahod sa pagkaulo sang iya bana nagpugong kuntani sa iya sa paghimo sing sala. Apang ang iya lamang ginhunahuna amo ang iya mapuslan sa madali. Ang butang nga gindumilian nangin halandumon sa iya mga mata. Nalimbungan sing bug-os sang pangatarungan ni Satanas, ginlalis niya ang sugo sang Dios. Nian gin-ulamid niya si Adan. Bisan pa wala malimbungan sang binutig ni Satanas, sia man nagpakita sing daku nga kakulang sing apresasyon sa gugma sang Dios. Ginsikway niya ang pagkaulo ni Jehova kag nagbuylog sa iya asawa sa pagrebelde.​—⁠Gen. 3:​6; 1 Tim. 2:​13, 14.

3. (a) Ano pa nga hulusayon ang may suod nga kaangtanan sa pagsalakay ni Satanas sa pagkasoberano ni Jehova? (b) Sin-o ang naapektohan sini?

³ Ang pagsalakay ni Satanas sa pagkasoberano ni Jehova wala magdulog sa natabo sa Eden. Ang iya daw kadalag-an ginsundan sang iya pagduhaduha sa katutom sang iban kay Jehova. Nian nangin ikaduha ini nga hulusayon nga may suod nga kaangtanan sa nauna. Ang iya hangkat naglakip sa mga anak ni Adan kag sa tanan nga espiritu nga mga anak sang Dios, bisan sa hinigugma nga panganay nga anak ni Jehova. Sang kaadlawan ni Job, nagsiling si Satanas nga ang mga nagaalagad kay Jehova nagahimo sini, indi bangod ginahigugma nila ang Dios kag ang iya paagi sang paggahom, kundi bangod sang makagod nga mga rason. Nagpangatarungan sia nga, kon pabudlayan, sila tanan magapadaug sa makagod nga mga handum. Husto bala sia?​—⁠Job 1:​6-12; 2:​1-6; Bug. 12:10.

Ang Ila Reaksion sa Hulusayon

4. Ngaa madamo nga tawo ang wala magsakdag sa pagkasoberano ni Jehova?

⁴ Wala ginpanghiwala ni Jehova ang posibilidad nga ang iban magabuylog kay Satanas sa pagrebelde. Sa kamatuoran sang ginhatag niya ang paghukom sa Eden, ang Dios nagpatuhoy sa ila nga magahuman sa ‘binhi sang man-ug.’ (Gen. 3:​15) Ang mga Fariseo nga nagplano sa pagpatay kay Jesus kag si Judas Iscariote, nga nagluib kay Cristo, nalakip sa ila sini. Wala lamang sila maghimo sing sayop nga tikang kundi ginhungod nila ini. Nahibaluan nila kon ano ang husto, apang hungod nga nagpamatok sila kay Jehova kag sa iya mga alagad. Apang dimaisip nga iban pa nga wala magsunod sa mga kinahanglanon ni Jehova ang naghikot nga wala sing hinalung-ong.​—⁠Binu. 17:​29, 30.

5. (a) Indi subong ni Eva, paano gintamod sang mga matutom kay Jehova ang iya pulong? (b) Paano ginpamatud-an ni Noe ang iya katutom, kag paano kita makabenepisyo gikan sa iya halimbawa?

⁵ Tuhay sa ila tanan sini amo ang mga lalaki kag mga babayi sang pagtuo nga nagtuon nahanungod sa ila Manunuga kag ginpamatud-an nila ang ila katutom sa iya subong Soberano. Nagtuo sila sa Dios. Nahibaluan nila nga ang ila kabuhi nasandig sa ila pagpamati sa iya kag sa pagtuman sa iya. Si Noe subong sina nga tawo. Gani, sang ang Dios nagsiling kay Noe, “Ang katapusan sang tanan nga unod nag-abot sa atubangan nakon . . . Himo ka sing arka,” nagsunod si Noe sa sugo ni Jehova. Ang iban nga mga tawo sadtong adlaw, walay sapayan nga ginpaandaman sila, nagpadayon sa ila normal nga pagsinalayo sa kabuhi subong nga daw wala sing butang nga tumalagsahon nga matabo. Apang si Noe nagtukod sing isa ka daku nga arka kag nangin masako sa pagbantala sa iban nahanungod sa matarong nga mga dalanon ni Jehova. Suno sa rekord, “Si Noe naghikot suno sa tanan nga ginsugo sang Dios sa iya. Amo gid sini ang iya ginhimo.”​—⁠Gen. 6:​13-22; tan-awa man ang Hebreo 11:​7 kag 2 Pedro 2:5.

6. (a) Paano pa makilala ang mga nagahupot sing integridad? (b) Paano ginpakita ni Sara ini nga mga kinaiya, kag sa anong paagi makabenepisyo kita gikan sa iya halimbawa?

⁶ Ang daku nga pagtahod sa prinsipio sang pagkaulo, upod ang personal nga gugma kay Jehova, nangin talalupangdon man sa tunga sang mga nagahupot sing integridad. Indi sila kasubong ni Eva, nga nag-una sa iya bana. Ukon subong ni Adan, nga nagsikway sa sugo ni Jehova. Si Sara, nga asawa ni Abraham, nagpakita sining maayo nga mga kinaiya. Indi lamang sa iya panghambal kundi sa iya man tagipusuon si Abraham iya “ginuo.” Dugang pa, personal nga ginhigugma niya si Jehova kag sia isa ka babayi sang pagtuo. Upod kay Abraham, sia “naghulat sa siudad [Ginharian sang Dios] nga may matuod nga mga sadsaran, nga ang manunukod kag manugbuhat sini nga siudad amo ang Dios.”​—⁠1 Ped. 3:​5, 6; Heb. 11:​10-16.

7. (a) Sa idalom sang anong mga kahimtangan nga ginsakdag ni Moises ang pagkasoberano ni Jehova? (b) Paano ang iya halimbawa makahatag sing benepisyo sa aton?

⁷ Mga 430 ka tuig sa tapos ginbiyaan ni Abraham ang iya dutang natawhan, ginsakdag ni Moises ang pagkasoberano ni Jehova sa atubangan ni Paraon sang Egipto. Indi nga si Moises masinaligon sa kaugalingon. Sa kabaliskaran, ginduhaduhaan niya ang iya ikasarang sa paghambal sing talunsay. Apang gintuman niya si Jehova. Upod ang pagsakdag ni Jehova kag sa bulig sang iya utod nga si Aaron, gindul-ong ni Moises ang pulong ni Jehova kay Paraon. Si Paraon may matig-a nga buot. Bisan ang iban sang mga anak sang Israel nagmulay kay Moises. Apang matutom nga ginhimo ni Moises ang tanan nga butang nga ginsugo sa iya ni Jehova, kag paagi sa iya ang Israel naluwas gikan sa Egipto.​—⁠Ex. 7:​6; 12:​50, 51.

8. (a) Ano ang nagapakita nga ang katutom kay Jehova nagadalahig sing kapin pa sa paghimo sang espisipiko nga ginpasulat sang Dios? (b) Paano ang apresasyon sa sini nga sahi sang katutom makabulig sa aton nga iaplikar ang 1 Juan 2:​15?

⁸ Ang mga matutom kay Jehova wala nagpangatarungan nga ang lamang nga kinahanglanon amo ang magsunod sa letra sang kasuguan, ang magtuman lamang sa ginsulat sang Dios. Sang ginhaylo sang asawa ni Potipar si Jose nga manghilahi upod sa iya, wala pa sadto sing nasulat nga sugo gikan sa Dios nga espisipiko nga nagdumili sang panghilahi. Apang pasad sa nahibaluan ni Jose nahanungod sa pag-asawahay nga kahimusan nga ginpatok ni Jehova sa Eden, nahibaluan niya nga ang seksuwal nga relasyon upod sa asawa sang iban nga lalaki indi kalahamut-an sa Dios. Indi interesado si Jose sa pagtilaw kon tubtob diin kutob sia tugutan sang Dios subong sang ginahimo sang mga Egiptohanon. Ginsakdag niya ang mga dalanon ni Jehova paagi sa pagpamalandong sa mga pagpakig-angot sang Dios sa katawhan kag dayon matarong nga gin-aplikar niya ang iya nahantop nga amo ang kabubut-on sang Dios.​—⁠Gen. 39:​7-12; ipaanggid ang Salmo 77:​11, 12.

9. Paano ang Yawa sulitsulit nga napamatud-an nga butigon sa iya panumbungon nga ginpautwas niya sang adlaw ni Job?

⁹ Bisan pa mabaskog nga ginabutang sa pagtilaw, ang mga nakakilala gid kay Jehova wala nagatalikod sa iya. Si Satanas nagsiling nga kon madula ni Job ang iya mga pagkabutang ukon kon tandugon ang iya lawas, bisan sia nga ginakahamut-an ni Jehova magatalikod sa Dios. Apang ginpamatud-an ni Job nga ang Yawa butigon, kag ginhimo niya ini bisan pa wala sia makahibalo kon ano ang kabangdanan sang tanan nga kalamidad nga nag-abot sa iya. (Job 2:​3, 9, 10) Sa pagtinguha gihapon nga pamatud-an ang iya ginsiling, ginpahanabo ni Satanas sang ulihi nga pahugon sang isa ka naakig nga hari sang Babilonia ang tatlo ka pamatan-on nga Hebreo nga mapatay sila sa kalayuhon nga hurno kon indi sila magyaub sa pagsimba sa atubangan sang isa ka larawan nga ginpatindog sang hari. Napilitan sa pagpili sa ulot sang sugo sang hari kag sang sugo ni Jehova batok sa idolatriya, malig-on nga ginpahibalo nila nga alagdon nila si Jehova kag sia ang ila Supremo nga Soberano. Ang mas hamili sa ila sang sa kabuhi amo ang katutom sa Dios.​—⁠Dan. 3:​14-18.

10. Subong dihimpit nga mga tawo, paano naton mapamatud-an nga matutom gid kita kay Jehova?

¹⁰ Magahinakop bala kita pasad sa sini nga agod magmatutom kay Jehova dapat mangin himpit ang isa ka tawo, kag ang isa nga nagasayop napaslawan sing bug-os? Indi gid! Ang Biblia espisipiko nga nagasugid nahanungod sa pila ka beses nga pagsayop ni Moises. Wala mahamuot si Jehova, apang wala niya pagsikwaya si Moises. Bisan pa ang mga apostoles nangin huwaran sa madamong bahin, may yara man sila mga kaluyahon. Ang katutom nagakinahanglan sing padayon nga pagtuman gikan sa tagipusuon. Apang, bangod sang aton napanubli nga pagkadihimpit, nahamuot si Jehova kon indi naton hungdon nga sikwayon ang iya kabubut-on sa bisan ano nga butang. Kon, bangod sang aton kaluyahon, madalahig kita sa paghimo sing sala, importante nga kita mangin mahinulsulon sing sinsero kag indi ini himuon nga isa ka batasan. Sa amo aton ginapakita nga ginahigugma gid naton ang ginasiling ni Jehova nga maayo kag ginadumtan naton ang ginasiling niya nga malaut. Pasad sa aton pagtuo sa nagatumbas-sala nga bili sang halad ni Jesus, makatigayon kita sing matinlo nga tindog sa atubangan sang Dios.​—⁠Amos 5:​15; Binu. 3:​19; Heb. 9:14.

11. (a) Sin-o sa mga tawo ang naghupot sing himpit nga diosnon nga debosyon, kag ano ang ginpamatud-an sini? (b) Paano kita mabuligan sang iya ginhimo?

¹¹ Walay sapayan, indi bala posible para sa mga tawo ang himpit nga diosnon nga debosyon? Sa sulod sang mga 4,000 ka tuig ang sabat sa sini nangin isa ka “balaan nga tinago.” (1 Tim. 3:​16) Si Adan, bisan pa gintuga nga himpit wala magpahamtang sing himpit nga halimbawa sa diosnon nga debosyon. Sin-o ang nakahimo sini? Wala sing isa sa iya makasasala nga mga anak. Si Jesucristo lamang ang tawo nga nakahimo sini. Ang nahimo ni Jesus nagpamatuod nga si Adan, nga yara sa mas maayo nga kahimtangan, mahimo kuntani nga nakahupot sing himpit nga integridad kon luyag niya. Ang sayop wala sa gintuga sang Dios. Busa si Jesucristo amo ang halimbawa nga dapat naton ilugon indi lamang sa pagkamatinumanon sa mga sugo sang Dios kundi sa personal man nga debosyon kay Jehova, ang Soberano sang Uniberso.

Ano ang aton personal nga sabat?

12. Ngaa dapat kita pirme mangin alisto sa aton panimuot sa pagkasoberano ni Jehova?

¹² Ang kada isa sa aton dapat mag-atubang sa unibersal nga hulusayon. Indi naton malikawan ini. Kon kita dayag nga nagsiling nga dampig kita kay Jehova, ginapuntariya kita ni Satanas. Ginaipit niya kita gikan sa tanan nga direksion kag padayon sia nga magahimo sini tubtob sa katapusan sang iya malaut nga sistema sang mga butang. Indi naton dapat pahugakan ang aton pagbantay. (1 Ped. 5:8) Ang aton paggawi nagapakita kon sa diin kita nagatindog may kaangtanan sa supremo nga hulusayon.

13. (a) Ano nga butang nahanungod sa ginhalinan sang pagbutig kag pagpangawat ang dapat magpahulag sa aton nga likawan ini? (b) Sabta ang mga pamangkot sa katapusan sini nga parapo, sing isa-isa, tuhoy sa mga kahimtangan nga nagapahuyog sa mga tawo sa paghimo sina nga mga sala.

¹³ Indi naton matamod ang indi matutom nga paggawi subong indi salapakon bangod lamang kinaandan ini sa kalibutan. Ang paghupot sing integridad nagakinahanglan nga iaplikar naton ang matarong nga mga dalanon ni Jehova sa tanan nga butang sang kabuhi. Sa pag-ilustrar, binagbinaga ang masunod:​

(1) Naggamit si Satanas sing butig agod idul-ong ang aton una nga mga ginikanan sa sala. Sia ang nangin “amay sang kabutigan.” (Juan 8:44)

Sa idalom sang anong mga kahimtangan kon kaisa ang mga pamatan-on nagakapaslawan nga mangin maminatud-on sa ila mga ginikanan? Ngaa importante nga likawan ini sang Cristianong mga pamatan-on? (Hulu. 6:​16-19)

Ano nga mga buhat sa negosyo ang mahimo nga magapakilala sa isa ka tawo upod sa “amay sang kabutigan” sa baylo nga upod sa Dios sang kamatuoran? (Miq. 6:​11, 12)

Kon magtinikal kita nahanungod sa aton kaugalingon, sayop bala ina kon wala sing iban nga mahalitan? (Sal. 119:​163; ipaanggid ang Binuhatan 5:​1-11.)

Kon ang isa nadalahig sa serioso nga sala, ngaa importante nga indi ini pagtabunan paagi sa pagbinutig? (Hulu. 28:​13)

(2) Sang maghikot si Eva kag dayon si Adan nahisuno sa pagsulay ni Satanas nga maghimo sang ila kaugalingon nga mga desisyon tuhoy sa kon ano ang maayo kag malaut, ang una nga butang nga ila ginhimo amo nga ginkuha nila ang butang nga indi ila. Nangin mga kawatan sila.

Indi bala malain ang pagpangawat kon ang isa ka tawo nagakinahanglan sini ukon kon ang isa nga ginkawatan may bugana nga butang? (Hulu. 6:​30, 31; 1 Ped. 4:​15)

Indi bala ini tanto kalain kon isa ini ka kinaandan nga buhat sa duog nga aton ginapuy-an ukon kon ang butang nga ginkawat diutay lamang? (Roma 12:​2; Efe. 4:​28; Luc. 16:​10)

14, 15. (a) Sa katapusan sang Isa ka Libo ka Tuig nga Paghari ni Cristo, ano nga pagtilaw ang magaabot sa tanan nga katawhan? (b) Paano ang aton ginahimo karon makaapektar sang mangin resulta sa aton sa amo nga tion?

¹⁴ Sa tion sang Isa ka Libo ka Tuig nga Paghari ni Cristo, si Satanas kag ang iya mga demonyo mangin sa kadadalman, nga indi makaimpluwensia sa kadam-an. Daw ano ina nga paumpaw! Apang pagkatapos sang isa ka libo ka tuig, paguwaon sila sa diutay nga tion. Si Satanas kag ang mga nagasunod sa iya magaipit sa “mga balaan,” ang ginpasag-uli nga katawhan nga nagahupot sang ila integridad. Sia magasalakay subong sang sa inaway batok sa “hinigugma nga siudad,” ang langitnon nga Bag-ong Jerusalem, paagi sa pagtinguha nga papason ang pagkamatarong nga ginpasad sini sa duta.​—⁠Bug. 20:​7-10.

¹⁵ Mahimo gid nga, subong sang sa nagligad, si Satanas magagamit sing limbong, upod ang pagganyat sa kakagod kag bugal, agod hayluhon ang mga tawo sa mga buhat sang pagkadimatutom kay Jehova. Kon pribilehiyo naton nga mangin buhi sa amo nga tion, ano ang aton mangin personal nga reaksion? Mangin sa diin ang aton tagipusuon tuhoy sa unibersal nga hulusayon? Sanglit ang tanan nga katawhan himpit na sa amo nga tion, ang bisan ano nga buhat sang pagkadimatutom mangin hungod kag magaresulta sa dayon nga kalaglagan. Gani agod mangin matutom kita sa amo nga tion, daw ano ka importante nga palambuon naton karon ang batasan sa pagsunod sing maabtik kag positibo sa bisan anong sugo nga ginahatag sa aton ni Jehova, kon bala paagi sa iya Pulong ukon paagi sa iya organisasyon! Sa paghimo sini, ginapakita naton ang aton matuod gid nga debosyon sa iya subong ang Soberano sang Uniberso.

Repaso nga Paghinun-anon

● Ano ang daku nga hulusayon nga dapat atubangon sang tanan nga tinuga? Paano kita nadalahig?

● Ano ang talalupangdon nahanungod sa mga paagi nga ang tagsatagsa sang mga lalaki kag mga babayi nga ginpakita sa pahina 49 nagpamatuod sang ila integridad kay Jehova?

● Ngaa importante nga maghalong kita sa adlaw-adlaw sa pagpadungog kay Jehova paagi sa aton paggawi?

[Mga piktyur sa pahina 49]

GINSAKDAG NILA ANG PAGKASOBERANO NI JEHOVA

Noe

Sara

Moises

Jose

Job

Paano Kita Makabenepisyo sa Ila Huwaran?