Kapitulo 18
Katutom sa Kitaon nga Organisasyon sang Dios Karon
SA SALMO 16:10 nasulat ini: “Indi mo pagbayaan ang akon kalag sa Sheol. Indi ka magtugot nga ang imo matutom makakita sing kaduluntan.” Kag sa Salmo 50:5 nasulat ini: “Tipuna sa akon sing tingob ang akon mga matutom, ang mga nagpakigkatipan sa akon sa halad.” Ang mga nagpakigkatipan kay Jehova amo bala ang magahatag sing “halad”? Indi, ining mga matutom wala nagahimo sing indibiduwal nga “halad,” sang ila kaugalingon, nga nagahalad sang ila undanon nga mga lawas agod makapakigkatipan sa Dios.
2 Paano, nian, ginahimo ang pagpakigkatipan? Paagi sa “halad” sang isa nga “matutom” nga ang iya kalag wala ginpabay-an sa Sheol kundi ginbanhaw gikan sa minatay. Gin-aplikar ni apostol Pedro ang mga pulong sang Salmo 16:10 kay Jesucristo kag nagpadayon sa pagsiling: “Sia [David] nagpanganinaw kag nagpamulong sang pagkabanhaw sang Cristo, nga wala sia pagpabayai sa Hades ukon ang iya unod ginpaagom sing kaduluntan. Ining Jesus ginbanhaw sang Dios.”—Binuhatan 2:25, 27, 31, 32.
3 Ining ginbanhaw nga si Jesus amo ang Manugpatunga sang bag-ong katipan, kag ang iya halad amo ang sadsaran sang bag-ong katipan. (Hebreo 9:15, 17) Gani sin-o ang tipunon suno sa sugo sa Salmo 50:5? Mga disipulo sila ni Jesus nga yara sa bag-ong katipan bangod sang iya halad. Bangod sang pagpasalamat sa sining wala sing tupong nga halad, dapat sila mapahulag sa pagpamatuod sang ila katutom sa iya.
4 Sang gintukod ang Ginharian ni Jehova sa langit sang 1914, ang mga pungsod nagpamatok sa sina nga Ginharian paagi sa pagpakig-away sa nahauna nga kalibutanon nga inaway, kag gintugutan ini sang Dios. (Salmo 2:1, 2) Si Satanas nga Yawa nagtinguha sa paggamit sadtong inaway sa kalibutan sa paglaglag sa kitaon nga bahin sang organisasyon ni Jehova. Nagmadinalag-on sia sa pagpabilanggo sa presidente sang Watch Tower Bible and Tract Society sa pederal nga bilangguan sa Atlanta, Georgia. Pito pa ka tiglawas sang Sosiedad ang nabilanggo upod sa iya.
5 Bangod sang paghingabot, ang ulong-talatapan sang Sosiedad sa Brooklyn, Nueva York, ginsaylo sa isa ka ginaarkilahan nga tinukod sa Pittsburgh, Pennsylvania. Ginhimo ini agod padayunon ang pagbalhag sa magasin nga Watch Tower. Ang langitnon nga paghimaya sa mga matutom ginpaabot sa wala madugay. Apang ang mga nagkalabilin naghibi samtang ginahunahuna nila ang ginpigos kag gin-utod nga kahimtangan sang organisasyon ni Jehova.—Salmo 137:1.
Katutom sa Tion sang Pagkabilanggo
6 Nagapakita sing katutom sa organisasyon ni Jehova sa tion sang iya pagkabilanggo, ang presidente sang Watch Tower Society, si J. F. Rutherford, sang Disiembre 25, 1918, nagpadala sing pinasahi nga sulat kay J. A. Bohnet, isa ka ginasaligan nga alagad man ni Jehova. Ginpadala ini sa iya sa opisina sang Sosiedad sa Pittsburgh. Ginsulat ni Rutherford ang masunod:
7 “Bangod wala ako magkompromiso sa Babilonia, kundi matutom nga nagtinguha sa pag-alagad sa akon Ginuo, ginbilanggo ako, nga akon ginapasalamatan. . . . Pasulabihon ko pa ang Iya kahamuot kag yuhum kag mangin bilanggo, sang sa magkompromiso ukon magpadaug sa Sapat kag mangin hilway kag dayawon sang bug-os nga kalibutan. Isa ka ginpakamaayo kag matahom nga eksperiensia nga mag-antos bangod sa matutom nga pag-alagad sa Ginuo. Sa Ginharian pakahamilion naton ang yuhum sang Amay labaw sa tanan nga butang. Dapat ini mangibabaw sa hunahuna sang tagsa ka anak sang Dios. Nalangkag kita sa paghiusa nga magahimo sa aton nga Isa didto. Malipayon ako, apang nalangkag ako nga makita kamo liwat. Malapit na ang kombension kag ang tuigan nga miting. Kabay nga ang espiritu ni Cristo magpuno sang tagipusuon sang tagsa nga magtambong . . .
8 “Daku pa ang hilimuon. Isa ka daku nga pabor nga makapakigbahin sa sini. Sila lamang nga nagahigugma sa Iya sing daku gid ang matutom kag sa amo padunggan. . . . Sa wala pa inang makalilipay nga adlaw dapat ihatag ang maid-id nga panaksi. . . . Ang nagligad nga mga metodo kag mga paagi indi magasibu sa mga kinahanglanon, apang ang Ginuo sa Iya maayong paagi magaaman. . . . Nalipay ako nga ining eksperiensia sa bilangguan gintigana sa amon sa baylo nga kay Utod Russell. Labaw sa bisan anong tion ginadumtan ko gid karon ang kalautan kag ginahigugma ang pagkamatarong kag nalangkag ako sa pagbulig sa iban. . . . Malapit na ang kadalag-an sang Sion.”
Ang Organisasyon sang Dios Amo ang Ila “Pinasulabi nga Kalipay”
9 Bisan pa ang mga alagad ni Jehova gintawag sa kalibutan subong dimatutom, traidor, kag indi patriotiko, wala nila pagpakamalauta ang organisasyon ni Jehova. Nagdumili sila sa pagkompromiso sa idalom sadto nga pag-ipit. Pasulabihon pa nila nga madula ang paggamit sa ila tuo nga kamot ukon mangin apa sang sa kalimtan ang organisasyon sang Dios kag indi na maghimo sini nga ila “pinasulabi nga kalipay.”—Salmo 137:5, 6.
10 Ang mga kaaway ni Jehova malaut nga nagkalipay sa buhat nga ginhimo batok sa dutan-on nga mga tiglawas sang iya unibersal nga organisasyon. Apang ang mga alagad ni Jehova nagpangamuyo sa pag-abot sang iya pagtimalos bangod sining tanan nga insulto batok sa iya organisasyon. Ginsunod nila ang mga pulong nga ginpamulong sang salmista tuhoy sa dumaan nga Edom: “Dumduma, O Jehova, batok sa mga anak ni Edom ang adlaw sang Jerusalem, nga sila nagasiling: ‘Laglaga sia! Laglaga sia tubtob sa iya sadsaran!’” (Salmo 137:7; Galacia 4:26) A, indi, ginahigugma gid ni Jehova ang iya tulad-asawa nga organisasyon nga indi niya pagkalimtan ang ginasiling kag ginahimo sang mga bahin sang organisasyon sang Yawa batok sa mga matutom sang iya dutan-on nga organisasyon.
11 Sa naguwa nga panagway sadtong tion, ang politikal nga kadampig sang Babilonia nga Daku naglaglag sa kitaon nga organisasyon ni Jehova “tubtob sa iya sadsaran.” Wala gid sila magpaabot nga makita ini nga magbangon gikan sa yab-ok padulong sa bug-os kalibutan nga organisasyon nga amo ini karon.
Ang Kalipay sang Iya Manugtimalos
12 Gingamit ni Jehova ang Persianhon nga manuggahom nga si Ciro sa paghilway sa iya katawhan gikan sa dumaan nga kagamhanan sa kalibutan nga Babilonia. Apang sa pinakabug-os nga kahulugan sini, si Ciro indi amo ang ginapatuhuyan sang nagahingapos nga mga pulong sang Salmo 137, nga nagapatuhoy sa Babilonia nga Daku, ang bug-os kalibutan nga emperyo sang dimatuod nga relihion: “O babayi nga anak sang Babilonia nga pagalaglagon, malipayon ang magabalos sa imo subong sang ginhimo mo sa amon. Malipayon ang nagakuha kag nagabunggo sang imo mga magamay sa igang.”—Salmo 137:8, 9.
13 Sin-o ang mangin “malipayon”? Nagalaragway bala ang “malipayon” sa simbuliko nga “napulo ka sungay” nga yara sa ulo sang “sapat nga mapintas,” nga ginasakyan sang dumaan nga makihilawason nga sistema sang relihion nga may daku nga pagpadayaw sa madugay na gid nga tion? Wala, bangod ang politikal nga mga manuglaglag sang bug-os kalibutan nga emperyo sang dimatuod nga relihion indi magahimo sini agod maghatag sing dalan para sa putli nga pagsimba sa matuod nga Dios. Indi nila paghimuon ini para sa himaya sang Dios sang Biblia. Paano, nian, sila mangin amo ang “malipayon” nga ginsambit sang salmista?
14 Ang politikal nga mga kagamhanan sining kalibutan indi magahimo sing batok sa relihion nga buhat bangod sang gugma sa mga sumilimba ni Jehova. Ngaa indi? Bangod ang mga Saksi ni Jehova magasablag sa ila pagpatubas sing kalibutan nga wala sing dios. Gani ang politikal nga mga kagamhanan mga instrumento lamang nga gamiton sang Dios sang mga Saksi sa pagtuman sang iya kaugalingon nga katuyuan.—Bugna 17:17.
15 Sa amo, bisan pa ining politikal nga mga kagamhanan direkta nga gamiton sa paglaglag sa bug-os kalibutan nga emperyo sang dimatuod nga relihion, si Jehova nga Dios gid ang nagapahulag sa ila. Paano? Ginagamit niya ang iya nagahari nga Anak, ang Daku pa nga Ciro, si Jesucristo. Sa amo, si Jesucristo nga nagagahom sa Ginharian amo ang “malipayon” nga gintagna sang salmista!
16 Samtang amligan ni Jehova ang iya mga matutom, sia, sa malaragwayon nga kahulugan, magadakop sa tagsatagsa sang relihioso nga “mga anak” sang katulad-makihilawason nga sistema sang dimatuod nga panudlo kag dugmukon sila batok sa isa ka butang nga daw kaangay sa “igang”—ang indi magpadaug nga Ginharian ni Jehova nga Dios paagi kay Jesucristo.
17 Sang yari sia sa duta, ginhaplasan si Jesus sing espiritu sang iya balaan nga Sumalakdag indi lamang “sa pagbantala sang tuig sang maayong kabubut-on ni Jehova” kundi sa pagbantala man sang “adlaw sang pagtimalos sang Dios naton.” (Isaias 61:1, 2; Lucas 4:16-21) Sa aton tion, sa sulod sang “katapusan nga mga adlaw” sining sistema sang mga butang, ginapabantala ni Jehova sa iya matutom nga mga alagad “ang adlaw sang pagtimalos sang Dios naton” sa bug-os napuy-an nga duta subong paandam sa tanan nga pungsod. Sa sining pagbantala ang nagkalabilin ginbuylugan sang nagadamo nga “dakung kadam-an” sang tulad-karnero nga mga disipulo ni Jesucristo, subong napanan-aw sa Bugna 7:9-17.
18 Ini sila tanan, ang nagkalabilin kag ang “dakung kadam-an,” nagtuman sa sugo sang anghel sa Bugna 18:4. Nagguwa sila gikan sa Babilonia nga Daku. Ngaa hilingagawon ina nga buhat? Bangod dapat sila magpalagyo gikan sa Babilonia nga Daku sa wala pa ang iya relihioso nga “mga anak” dugmukon kag laglagon paagi sa “sapat nga mapintas” kag sang iya “napulo ka sungay” antes ang Armagedon. Ining mga matutom magaambit sa kalipay sang Daku pa nga Ciro, si Jesucristo. Magabuylog sila sa mga langit sa pagsiling: “Dayawa si Jah, kamo nga katawhan! Ang kaluwasan kag himaya kag gahom iya sang aton Dios, kay ang iya mga paghukom matuod kag matarong. Ginhukman niya ang dakung makihilawason nga babayi nga nagdagta sang duta sang iya pagkamakihilawason.”—Bugna 19:1, 2; ipaanggid ang Jeremias 51:8-11.
19 Kutob sang 1919 naghimo si Jehova sing “daku nga butang” para sa iya katawhan. (Salmo 126:1-3) Bangod sining pagpakadaku sa iya gahom sa paghilway, nga nagapakita nga sia “ang matutom nga Dios,” ang nahilway nga nagkalabilin malipayon gihapon sa tagipusuon. (Deuteronomio 7:9) Malipayon gid sila, apang may yara daku pa nga kalipay nga nagahulat sa ila. Matabo ini kon sila makabuylog sa kalipay sang Daku nga Ciro, ang nagagahom nga Monarka, si Jesucristo, sa tion nga dugmukon niya ang tanan nga “mga anak” sang yawan-on nga organisasyon.
20 Minilyon sang “mga bihag” anay sang Babilonia nga Daku ang nabuligan na sa pagpalagyo gikan sa sinang napamatbatan na nga relihiosong organisasyon sa wala pa ang masingki nga kalaglagan sini. Ang resulta amo ang “dakung kadam-an” sang “iban nga mga karnero.” Sila sa karon nagadamo, sa bug-os nga duta, sing kapin sa 3,000,000, nga wala sing latid ang kadamuon sang luwason pa gikan sa kalaglagan sang bug-os kalibutan nga emperyo sang dimatuod nga relihion. Bilang katutom sa organisasyon ni Jehova, nagaambit sila sa kalipay sang nagkalabilin paagi sa pagbuylog sa ila sa pagbantala sang adlaw sang pagtimalos ni Jehova batok sa relihioso nga Babilonia nga Daku.
21 Indi, nian, magkompromiso sa sinang bug-os kalibutan nga emperyo sang dimatuod nga relihion. Indi magbalik sa iya sa sining mga adlaw sang iya pagkalusod. Kabay nga buligan pa naton ang madamo sa masarangan naton nga bihag sang Babilonia nga Daku sa pagguwa gikan sa sinang napamatbatan nga sistema sa wala pa ang makalilipay nga kadalag-an sang Daku pa nga Ciro.
[Mga Pamangkot sa Pagtinuon]
1, 2. Paano hangpon ang kasulatan sa Salmo 50:5?
3. Sin-o ang ginatipon suno sa sugo sa Salmo 50:5, kag ngaa dapat sila pahulagon sa pagpamatuod nga matutom sa Dios?
4, 5. (a) Ano ang kadalag-an ni Satanas nga Yawa sa tion sang nahaunang kalibutanon nga inaway sa iya panikasog nga laglagon ang kitaon nga organisasyon ni Jehova? (b) Sa diin ginsaylo ang ulong-talatapan sang Sosiedad, kag ngaa? (c) Sa modernong adlaw nga katumbas sang Salmo 137:1, ano ang emosyonal nga kahimtangan, ukon disposisyon, sang matutom nga nagkalabilin sang ginhunahuna nila ang nahalitan nga kahimtangan sang organisasyon sang Dios?
6-8. Sa tion sang iya pagkabilanggo, paano si presidente J. F. Rutherford sang Sosiedad, nagpakita sing katutom sa organisasyon ni Jehova?
9. Anong panimuot sang salmista ang ginpabanaag sang nabilanggo nga mga tiglawas sang Sosiedad?
10, 11. (a) Ano ang ginpangamuyo sang matutom nga nagkalabilin, kag ano nga mga pulong sang salmista ang ginsunod nila tuhoy sa Edom? (b) Ano ang nahimo sang mga kaaway sang kitaon nga organisasyon ni Jehova, kag ano ang wala gid ginpaabot sang mga kaaway?
12. (a) Sin-o ang nangin manughilway sang nabihag nga katawhan ni Jehova sa dumaan nga Babilonia, kag nagapatuhoy bala sa iya ang Salmo 137:8, 9 sa pinakabug-os nga kahulugan? (b) Ano ang gintagna sining mga bersikulo nahanungod sa manugtimalos sang dutan-on nga organisasyon sang Dios?
13, 14. Ngaa ang isa nga “malipayon” sa Salmo 137:8, 9 indi mahimo nga nagapatuhoy sa politikal nga mga kagamhanan nga magalaglag sa Babilonia nga Daku?
15. Sin-o gid ang magapahulag sa politikal nga mga kagamhanan, kag paagi kay sin-o?
16. Paano laglagon ni Jehova ang “mga anak” sang Babilonia?
17. (a) Suno sa Isaias 61:1, 2, ano ang ibantala ni Jesus sa tapos sia mahaplasan sing espiritu sang Dios? (b) Paano karon ginahimo ang pagbantala?
18. Sa anong kalipay magaambit ang mga matutom sang Dios?
19. Ano nga kalipay ang ginaagom karon sang matutom nga nagkalabilin, kag anong daku pa nga kalipay ang nagahulat sa ila?
20. Sin-o pa ang nagaambit sa kalipay sang hinaplas nga nagkalabilin, kag ngaa?
21. Ano dapat ang mangin panimuot naton sa Babilonia nga Daku kag sa iya mga bihag?