Kapitulo 1

Bugna—Ang Makalilipay nga Talipuspusan Sini!

1. Paano naton nahibaluan nga luyag sang Dios nga magmalipayon kita?

ANG BUGNA KAY JUAN—ginadala sining makahalawathawat nga tulun-an sang Biblia ang balaan nga rekord sa makalilipay nga talipuspusan. Ngaa makasiling kita “makalilipay”? Kay man, ang Awtor sang Biblia ginalaragway subong “malipayon nga Dios,” nga nagatugyan sing “mahimayaon nga maayong balita” sa mga nagahigugma sa iya. Luyag niya nga magmalipayon man kita. Sa amo, sa panugod pa lang ang Bugna nagapasalig sa aton: “Malipayon ang nagabasa . . . sang mga pulong sini nga tagna.” Sa katapusan nga kapitulo sini ginasugiran kita: “Malipayon ang bisan sin-o nga nagatuman sang mga pulong sang tagna sining linukot.”—1 Timoteo 1:11; Bugna 1:3; 22:7.

2. Ano ang dapat naton himuon agod makasapo sing kalipay sa tulun-an sang Bugna?

² Ano ang himuon naton agod makasapo kita sing kalipay sa tulun-an sang Bugna? Dapat naton hibaluon ang kahulugan sang maathag nga mga tanda, ukon mga simbulo sa sini, kag maghikot nahisanto sa sini. Sa dili na lang madugay ang magamo nga maragtas sang katawhan magadangat sa malaglagon nga talipuspusan, kon ang Dios kag si Jesucristo magahukom na sa malaut nga sistema karon, kag buslan ini sing “isa ka bag-ong langit kag isa ka bag-ong duta,” nga sa diin bisan ‘ang kamatayon madula na.’ (Bugna 21:1, 4) Indi bala nga luyag naton tanan nga magpuyo sa sinang bag-ong kalibutan, nga may matuod nga paghidait kag kalig-unan? Matuman ini kon palig-unon naton ang aton pagtuo paagi sa pagtuon sa Pulong sang Dios, lakip ang makapahulag nga tagna sang Bugna.

Apokalipsis—Ano Ini?

3. Ano ang pagdumdom sang madamo nga tawo nga kahulugan sang Apokalipsis kag Armagedon?

³ Indi bala ginatawag man nga Apokalipsis ang Bugna? Amo sini, kay ang “bugna” amo ang Hiligaynon sang a·po·kaʹly·psis sa Griegong teksto. Ginaangot sang madamo nga tawo ang Apokalipsis sa kalaglagan sang kalibutan paagi sa inaway nuklear. Sa isa ka siudad sa Texas, E.U.A., diin madamo nga armas nuklear ang ginahimo, ang relihioso nga mga tawo nagasiling anay, “Kami ang una nga malaglag.” Suno sa report, ang mga klerigo sa sadto nga duog “kumbinsido nga ang Armagedon indi lamang di-malikawan kundi malapit na gid, kag ang katapusan nga pag-away sang mga puersa sang maayo kag malain, sang Dios kag ni Satanas, mahanabo subong isa ka kalaglagan nuklear.”a

4. Ano ang matuod nga kahulugan sang tinaga nga “apokalipsis,” kag ngaa ang katapusan nga tulun-an sang Biblia nagakaigo nga gintig-uluhan “Ang Bugna”?

⁴ Apang ano gid ang apokalipsis? Bisan pa ang mga diksionaryo nagalaragway sini paagi sa paggamit sing mga termino subong sang “isa ka nagahilapit nga kalaglagan sang kalibutan,” ang Griegong a·po·kaʹly·psis nagakahulugan sing “pagbuyagyag” ukon “pagbugna.” Busa, nagakaigo nga ang katapusan nga tulun-an sang Biblia gintig-uluhan nga “Ang Bugna.” Masapwan naton diri nga indi ini isa ka mensahe tuhoy sa natalana na nga kalaglagan sang kalibutan, kundi isa ka pagbugna sang mga kamatuoran gikan sa Dios nga dapat magpalambo sa aton tagipusuon sing isa ka masanag nga paglaum kag di-mationg nga pagtuo.

5. (a) Sin-o ang malaglag sa Armagedon, kag sin-o ang makalampuwas? (b) Anong matahom nga palaabuton ang nagahulat sa mga makalampuwas sa Armagedon?

⁵ Matuod, ang Armagedon ginalaragway sa katapusan nga tulun-an sang Biblia subong “inaway sang dakung adlaw sang Dios nga Labing Gamhanan.” (Bugna 16:14, 16) Apang tuhay gid ini sa kalaglagan nuklear! Ina nga kalaglagan mahimo gid nga magakahulugan sang pagkalaglag sang tanan nga kabuhi sa duta. Sa baylo, ang Pulong sang Dios nagahatag sing makalilipay nga pasalig nga ang malaglag lamang amo ang malaut nga mga kasumpong sang Dios—paagi sa mga puersa nga kontrolado sang Dios. (Salmo 37:9, 10; 145:20) Ang isa ka dakung kadam-an sang mga tawo, gikan sa tanan nga pungsod, makalampuwas sa talipuspusan sang paghukom sang Dios sa Armagedon. Pagkatapos sina, bantayan sila kag tuytuyan ni Cristo Jesus padulong sa kabuhi nga walay katapusan sa paraiso nga duta. Luyag mo bala mangin isa sa ila? Makalilipay nga ginapakita sang Bugna nga mahimo ikaw mangin isa sa ila!—Bugna 7:9, 14, 17.

Pagtukib sa Balaan nga mga Likom

6. Sa nagligad nga mga tinuig, ano nga mga libro ang ginbalhag sang mga Saksi ni Jehova sa paghatag sing kapawa sa Bugna?

⁶ Sang 1917, ginbalhag sang Watch Tower Society ang libro nga The Finished Mystery. Isa ini ka bersikulo-por-bersikulo nga komentaryo tuhoy sa mga tulun-an sang Ezequiel kag Bugna sa Biblia. Kag, samtang ang mga hitabo sa kalibutan nagapadayon sa pagpadayag bilang katumanan sang tagna sa Biblia, ang sibu gid sa tion nga duha-ka-tomo nga libro nga natig-uluhan Light ginsulat, kag ginpagua sang 1930. Naghatag ini sing sibu sa tion nga pagtuon sa Bugna. Ang kapawa nagpadayon sa ‘pagsilak sa matarong,’ amo kon ngaa sang 1963, ginbalhag sang mga Saksi ni Jehova ang 704-pahina nga libro nga “Babylon the Great Has Fallen!” God’s Kingdom Rules! Detalyado gid nga ginasaysay sini ang maragtas sang pagbangon kag pagkapukan sang Babilonia nga Daku, ang bug-os kalibutan nga emperyo sang butig nga relihion, kag ang katapusan sini nagabinagbinag sang ulihi nga siam ka kapitulo sang Bugna. Samtang ‘ang banas sang matarong nagapamanagbanag,’ ilabi na tuhoy sa hilikuton sa sulod sang kongregasyon, nagsunod sang 1969 ang 384-pahina nga tomo nga “Then Is Finished the Mystery of God,” nga nagbinagbinag sang nahauna nga 13 ka kapitulo sang Bugna.—Salmo 97:11; Hulubaton 4:18.

7. (a) Ngaa gin-aman sang mga Saksi ni Jehova ini nga libro tuhoy sa Bugna? (b) Ano nga mga bulig sa pagtudlo ang ginaaman sa libro para sa kaayuhan sang mga bumalasa?

⁷ Ngaa nagbalhag sing isa pa ka libro tuhoy sa Bugna kag gin-imprinta karon sa Hiligaynon? Ang kalabanan sang impormasyon nga nabalhag na tuman gid ka detalyado, kag indi posible nga badbaron ini kag ibalhag sa bug-os nga kalibutan sa madamo nga lenguahe. Busa, nakita nga nagakaigo nga mag-aman sing isa ka libro tuhoy sa Bugna sa isa lamang ka tomo kag sa isa ka porma nga madali maimprinta sa madamo nga lenguahe. Dugang pa, ginhimuslan ang kahigayunan nga mag-aman sa sini nga tomo sing mga bulig sa pagtudlo, lakip ang mga laragway, mga tsart, kag mga sumaryo, nga makabulig sa mga bumalasa nga mahangpan sing maathag ang makakulunyag nga kahulugan sining dalayawon nga tagna.

8. Ano ang daku pa nga rason kon ngaa ginbalhag ini nga libro?

⁸ Ang daku pa nga rason kon ngaa ginbalhag ini nga libro amo ang kinahanglanon nga makigdungan sa kamatuoran karon. Si Jehova padayon sa paghatag sing daku pa nga kapawa tuhoy sa kahulugan sang iya Pulong, kag mapaabot naton nga ang aton paghangop sa Bugna, upod sa iban pa nga mga tagna, magasanag samtang nagahilapit kita sa dakung kapipit-an. (Mateo 24:21; Bugna 7:14) Importante gid nga mahibaluan naton ini. Subong sang ginsulat ni apostol Pedro tuhoy sa balaan nga tagna: “Maayo ang inyo ginahimo sa paghatag sing igtalupangod sa sini nga subong sang isa ka suga nga nagasiga sa duog nga madulom, tubtob ang adlaw magpamanagbanag kag ang kabugwason magsubang sa inyo mga tagipusuon.”—2 Pedro 1:19.

9. (a) Upod sa iban pa nga mga tagna, ano ang ginapakita sang Bugna nga tugahon sang Dios? (b) Ano ang bag-ong kalibutan, kag paano ka maluwas padulong sa sini?

⁹ Ang Bugna nagadugang sing pamatuod sa madamo pa nga mga tagna sang Biblia, nga nagapakita nga si Jehova nga Dios may katuyuan nga magtuga sing bag-ong mga langit kag bag-ong duta. (Isaias 65:17; 66:22; 2 Pedro 3:13; Bugna 21:1-5) Ang mensahe sini una nga ginapatuhoy sa hinaplas nga mga Cristiano, nga ginbakal ni Jesus paagi sa iya dugo agod maggahom kaupod niya sa bag-ong mga langit. (Bugna 5:9, 10) Apang, ining maayong balita magapalig-on man sa pagtuo sang minilyon nga nagapaabot sing kabuhi nga walay katapusan sa idalom sang Ginharian ni Cristo. Isa ka bala sa ila? Kon amo, palig-unon sang Bugna ang imo paglaum nga magpuyo sa Paraiso, subong bahin sang bag-ong duta, kag makabenepisyo sa lapnag nga paghidait, mapagros nga lawas, kag bugana gid nga mga aman sang Dios nga wala sing katapusan. (Salmo 37:11, 29, 34; 72:1, 7, 8, 16) Kon luyag mo maluwas padulong sa sinang bag-ong kalibutan, hilingagawon gid, huo, kinahanglan, nga talupangdon mo ang maathag nga paglaragway sang Bugna sa maragtason nga talipuspusan nga malapit na karon.—Sofonias 2:3; Juan 13:17.

[Nota]

[Retrato sa pahina 7]