Ang Libro sang Bugna—Ano ang Kahulugan Sini?
Ang sabat sang Biblia
Ang ngalan sang libro sang Biblia nga Bugna naghalin sa Griego nga tinaga nga A·po·kaʹly·psis, nga nagakahulugan sing “Pagbuyagyag” ukon “Pagpahayag.” Ginabuyagyag sini ang mga butang nga natago kag ginapahayag ang mga hitabo nga matabo pa sa palaabuton. Madamo nga tagna sa sini ang wala pa natuman.
Sumaryo sang libro sang Bugna
Introduksion.—Bugna 1:1-9.
Mensahe ni Jesus sa pito ka kongregasyon.—Bugna 1:10–3:22.
Palanan-awon parte sa Dios sa iya trono sa langit.—Bugna 4:1-11.
Nagasundanay nga mga palanan-awon:
Pito ka pat-in.—Bugna 5:1–8:6.
Pito ka trumpeta, ang katapusan nga tatlo nagapahayag sang kailo.—Bugna 8:7–14:20.
Pito ka yahong, ang kada isa may unod nga kalalat-an, nga nagarepresentar sang paghukom sang Dios nga iula sa duta.—Bugna 15:1–16:21.
Palanan-awon parte sa paglaglag sa mga kaaway sang Dios.—Bugna 17:1–20:10.
Palanan-awon parte sa mga pagpakamaayo sang Dios sa langit kag duta.—Bugna 20:11–22:5.
Konklusion.—Bugna 22:6-21.
Mga paagi para maintiendihan ang libro sang Bugna
Ang kahulugan sini positibo, indi makahaladlok ukon makakulugmat sa mga nagaalagad sa Dios. Para sa madamo, ang tinaga nga “apokalipsis” naangot sa grabe nga kalaglagan. Pero ang umpisa kag katapusan sang libro sang Bugna nagasiling nga mangin malipayon ang mga nagabasa, nagahangop, kag nagatuman sang mensahe sini.—Bugna 1:3; 22:7.
Ang Bugna naggamit sing madamo nga “tanda” ukon simbulo, nga indi dapat paghangpon sing literal.—Bugna 1:1.
Madamo nga importante nga persona, butang, ukon simbulo sa libro sang Bugna ang ginsambit na nga daan sa Biblia:
Jehova—“ang Dios sa langit” kag Manunuga sang tanan nga butang.—Deuteronomio 4:39; Salmo 103:19; Bugna 4:11; 15:3.
Jesucristo—“ang Kordero sang Dios.”—Juan 1:29; Bugna 5:6; 14:1.
Satanas nga Yawa—kaaway sang Dios.—Genesis 3:14, 15; Juan 8:44; Bugna 12:9.
Babilonia nga Daku—pareho sa Babilonia sadto (Babel), ang kaaway ni Jehova nga Dios kag sang iya katawhan kag ang ginahalinan sang kabutigan nga ginatudlo sang mga relihion.—Genesis 11:2-9; Isaias 13:1, 11; Bugna 17:4-6; 18:4, 20.
“Ang dagat”—malaut nga mga tawo nga nagapamatok sa Dios.—Isaias 57:20; Bugna 13:1; 21:1.
Mga bahin nga naangot sa tabernakulo sadto nga ginagamit sa pagsimba sa Dios—lakip ang kaban sang katipan, salaming nga dagat (labador para hinawan), mga suga, incienso, kag halaran.—Exodo 25:10, 17, 18; 40:24-32; Bugna 4:5, 6; 5:8; 8:3; 11:19.
Mabangis nga mga sapat—nagasimbulo sa mga gobierno sang tawo.—Daniel 7:1-8, 17-26; Bugna 13:2, 11; 17:3.
Numero nga may simbuliko nga kahulugan.—Bugna 1:20; 8:13; 13:18; 21:16.
Ang mga palanan-awon matuman sa “adlaw sang Ginuo,” nga nagsugod sang 1914 sang gintukod ang Ginharian sang Dios kag naggahom si Jesus bilang Hari. (Bugna 1:10) Gani, mapaabot naton nga ang bug-os nga katumanan sang Bugna matabo sa aton panahon.
Para maintiendihan ang libro sang Bugna, kinahanglan man naton ang mga butang nga makabulig sa aton nga maintiendihan ang iban nga libro sang Biblia. Nalakip sa sini ang kaalam halin sa Dios kag ang bulig halin sa mga nakaintiende na sini.—Binuhatan 8:26-39; Santiago 1:5.