Kapitulo 12
Nadalahig Ikaw sa Isa ka Importante nga Hulusayon
1, 2. (a) Ngaa ang paagi sang imo pagkabuhi importante gid sa imo? (b) Sa kay sin-o pa ini importante, kag ngaa?
IMPORTANTE gid kon paano ikaw nagakabuhi. Magakahulugan ini para sa imo sing malipayon ukon masubo nga palaabuton. Amo ini sa ulihi ang magapamat-od kon bala magataliwan ikaw upod sining kalibutan ukon maluwas sa katapusan sini pasulod sa matarong nga bag-ong kahimusan sang Dios nga sa diin mahimu ikaw mabuhi sing dayon.—1 Juan 2:17; 2 Pedro 3:13.
2 Apang indi lamang ikaw ang naapektohan sang kon paano ka nagakabuhi. Nadalahig ang iban. Ang imo ginahimu nagaapektar man sa ila. Halimbawa, kon buhi ang imo mga ginikanan, ang imo ginahimu makadala sa ila sing kadungganan ukon kahuluy-an. Ang Biblia nagasiling: “Ang maalam nga anak nagahimu sing amay nga malipayon, kag ang anak nga buangbuang amo ang kabug-atan sang iya iloy.” (Hulubaton 10:1) Labi pa ka importante, ang imo pagkabuhi nagaapektar kay Jehova nga Dios. Makapahalipay ini sa iya ukon makapasubo sa iya. Ngaa? Bangod sang isa ka importante nga hulusayon nga sa diin nadalahig ikaw.
MANGIN MATUTOM AYHAN ANG MGA TAWO SA DIOS?
3. Ano ang hangkat ni Satanas kay Jehova?
3 Ining hulusayon ginpautwas ni Satanas nga Yawa. Ginpautwas niya ini sang mahaylo niya sanday Adan kag Eva sa paglapas sa sugo sang Dios kag sa amo nagbuylog sa iya sa pagrebelde batok sa Dios. (Genesis 3:1-6) Naghatag ini kay Satanas sang iya ginabatyag nga mga sadsaran sa paghangkat kay Jehova: ‘Nagaalagad sa imo ang katawhan bangod sang ila makuha sa imo. Hatagi lamang ako sing kahigayunan kag patalikuron ko sa imo ang bisan sin-o.’ Bisan pa wala sa Biblia ining mga pulong, maathag nga daw subong sini ang ginhambal ni Satanas sa Dios. Ginapakita ini sa tolon-an nga Job sang Biblia.
4, 5. (a) Sin-o si Job? (b) Ano ang natabo sa langit sang adlaw ni Job?
4 Si Job isa ka tawo nga nabuhi sang madamu nga siglo sa tapos sang pagrebelde sa katamnan sang Eden. Isa sia ka matarong kag matutom nga alagad sang Dios. Apang importante bala sa Dios ukon kay Satanas nga si Job matutom? Ginapakita sang Biblia nga amo sini. Ginasugid sini sa aton ang pagpakigkita ni Satanas kay Jehova sa isa ka pagtinipon sa langit. Talupangda ang tema sang ila paghambalanay:
5 “Karon may adlaw sang nag-abot ang mga lalaking anak sang Dios sa pag-atubang kay Jehova, kag si Satanas man nag-abot sa tunga nila. Nian si Jehova nagsiling kay Satanas: ‘Diin ka maghalin?’ Si Satanas nagsabat: ‘Gikan sa paglibotlibot sa duta, kag sa paglakatlakat sa sini.’ Kag si Jehova nagsiling kay Satanas: ‘Natalupangdan mo bala ang akon alagad nga si Job, nga wala sing kaangay sa iya sa duta, tawo nga himpit kag matarong, nga mahadlukon sa Dios kag nagalikaw sa malaut?’ ”—Job 1:6-8.
6. Anong hulusayon ang ginapakita sang Biblia nga nagluntad sang adlaw ni Job?
6 Ngaa ginsambit ni Jehova kay Satanas nga si Job matarong nga tawo? Maathag nga may yara hulusayon kon bala magpabilin si Job nga matutom kay Jehova ukon indi. Hunahunaa ang ginpamangkot sang Dios, “Diin ka maghalin?” kag ang sabat ni Satanas, “Gikan sa paglibotlibot sa duta kag sa paglakatlakat sa sini.” Ining pamangkot kag ang sabat ni Satanas nagapakita nga gintugutan ni Jehova si Satanas sa paghimu sang iya panghangkat nga mapatalikod niya sa Dios ang bisan sin-o. Bueno, ano ang ginsabat ni Satanas sa pamangkot ni Jehova nahanungod sa pagkatutom ni Job?
7, 8. (a) Sa anong rason siling ni Satanas nga nagaalagad si Job sa Dios? (b) Ano ang ginhimu ni Jehova agod mahusay ang hulusayon?
7 “Nian nagsabat si Satanas kay Jehova: ‘Nahadlok bala si Job sa Dios sa wala sing pulos? Wala mo bala sia pagkudali palibot kag sa iya balay kag sa tanan nga iya, sa tagsa ka luyo? Ginpakamaayo mo ang kinabudlayan sang iya mga kamut, kag ang iya pagkabutang nagdugang sa duta. Apang untaya karon ang imo kamut kag tandoga ang tanan nga iya kag tan-awa kon indi ka niya pagsumpaon sa imo nawong.’ ”—Job 1:9-11.
8 Sa iya sabat ginhatag ni Satanas ang rason sang katutom ni Job sa Dios. ‘Si Job nagaalagad sa imo,’ siling ni Satanas, ‘bangod sang mga butang nga imo ginahatag sa iya, indi bangod ginahigugma ka niya.’ Nagreklamo man si Satanas nga indi matarong ang paggamit ni Jehova sa iya daku nga gahom. ‘Ginaamligan mo sia,’ siling niya. Gani, agod mahusay ang hulusayon, si Jehova nagsabat: “Yari karon, ang tanan nga iya yara sa imo gahom. Lamang dili mo pag-untayon ang imo kamut sa iya kaugalingon!”—Job 1:12.
9. Anong pag-antos ang ginpahanabo ni Satanas kay Job, kag ano ang resulta?
9 Ginpaantos sa gilayon ni Satanas si Job. Ginpapatay niya ukon ginpakawat ang tanan nga kasapatan ni Job. Nian ginpahanabo niya nga mapatay ang 10 ka anak ni Job. Nadula ni Job ang halos tanan nga butang, apang nagpabilin sia nga matutom kay Jehova. Wala niya pagsumpaa ang Dios. (Job 1:2, 13-22) Apang indi pa ini ang katapusan nga natabo.
10. Ano ang nagapakita nga wala mag-ampo si Satanas?
10 Nagpakigkita liwat si Satanas upod sa iban nga mga anghel sa atubangan ni Jehova. Sa liwat ginpamangkot ni Jehova si Satanas kon natalupangdan niya ang katutom ni Job kag nagsiling: “Ginahuptan pa niya sing malig-on ang iya pagkatarong.” Nian si Satanas nagsabat: “Panit sa panit, kag ang tanan nga iya sang tawo ihatag niya tungod sa iya kabuhi. Untaya karon ang imo kamut, kag tandoga ang iya tul-an kag ang iya unod kag tan-awa kon indi ka niya pagsumpaon sa imo nawong.”—Job 2:1-5.
11. (a) Ano pa nga mga pagtilaw ang ginpahanabo ni Satanas kay Job? (b) Ano ang resulta?
11 Bilang sabat, gintugutan ni Jehova si Satanas sa paghimu sang luyag niya himuon kay Job, apang ang Dios nagsiling: ‘Indi sia pagpatya.’ (Job 2:6) Gani ginpaantos ni Satanas si Job sing ita ka mbkangilidlis nga balatian. Daku gid ang pag-bntos ni Job amp kon ngaa nangamuyo sia nga mapatay. (Job 2:7; 14:13, 14) Ang iya mismo asawa nagkontra sa iya, kag nagsiling: “Sumpaa ang Dios kag panginmatay!” (Job 2:9) Apang wala ina paghimua ni Job. “Tubtob nga mapatay ako indi ko pag-isikway gikan sa akon ang akon pagkatadlong!” siling niya. (Job 27:5) Nagpabilin si Job nga matutom sa Dios. Gani napamatod-an nga sala si Satanas sa iya hangkat nga si Job nagaalagad lamang sa Dios bangod sang materyal nga benepisyo kag indi bangod sang gugma. Ginpakita man nga indi mapatalikod ni Satanas ang tanan gikan sa pag-alagad sa Dios.
12. (a) Anong sabat sa hangkat ni Satanas ang ginhatag ni Job sa Dios? (b) Ano ang ginpamatod-an sang katutom ni Jesus sa Dios?
12 Ano sa banta mo ang ginbatyag ni Jehova sa katutom ni Job? Nalipay gid sia! Ang Pulong sang Dios nagapalig-on: “Anak ko, magmaalam ka, kag pasadyaha ang akon tagipusuon, agod nga masabat ko sia nga nagapakahuya sa akon.” (Hulubaton 27:11) Si Satanas ang nagapakahuya kay Jehova. Kag ginpasadya ni Job ang tagipusuon sang Dios bangod sang iya katutom. Naghatag ini sing sabat sa bugalon nga pagpakahuya ukon hangkat ni Satanas nga ang mga tawo indi mag-alagad sa Iya sa idalom sang pagtilaw. Madamu pa ang naghatag sa Dios sina nga sabat. Ang labing daku nga huwaran amo ang himpit nga tawo nga si Jesus. Nagmatutom sia sa Dios walay sapayan sang tanan nga pagtilaw kag pag-antos nga ginpahanabo ni Satanas sa iya. Nagapamatuod ini nga ang himpit nga tawo nga si Adan nakahimu man sini kon luyag niya, kag nga ang Dios matarong sa pagkinahanglan sing bug-os nga pagkamatinumanon gikan sa tawo.
SA DIIN KA NAGATINDOG?
13. (a) Ano ang kaangtanan sa hulusayon sang imo paagi sang pagkabuhi? (b) Paano naton mapahalipay ang Dios ukon mapasakit ang iya buot?
13 Kamusta ang imo kabuhi? Ayhan hunahunaon mo nga indi importante ang kon paano ka nagakabuhi. Apang importante ini. Nahibaloan mo man ukon indi, ginasakdag sini ang bahin sang Dios sa hulusayon ukon ang bahin ni Satanas. Nagaulikid sa imo si Jehova, kag luyag niya makita ikaw nga nagaalagad sa iya kag mabuhi sing dayon sa paraiso nga duta. (Juan 3:16) Sang magrebelde sa Dios ang mga Israelinhon, nasaklaw sia ukon nagsakit ang iya buot. (Salmo 78:40, 41) Ang imo bala pagkabuhi nagapahalipay sa Dios ukon nagapasakit sa iya buot? Sa pagkamatuod, agod mapahalipay ang Dios dapat mo ton-an ang iya mga sugo kag tumanon ini.
14. (a) Tuhoy sa seksuwal nga relasyon, anong kasugoan ang dapat naton tumanon agod mapahalipay ang Dios? (b) Ngaa isa ka krimen ang paglapas sinang kasugoan?
14 Ang panguna nga tuyo ni Satanas amo nga hayluhon ang mga tawo sa paglapas sa kasugoan sang Dios tuhoy sa paggamit sa ila mga ikasarang sa pagpabuad, kag sa iya kahimusan sang pag-asawahay kag pamilya. Ang kasugoan sang Dios sa pag-amlig sang aton kalipay nagasiling nga ang indi kasal nga mga tawo indi dapat maghulid, kag nga ang mag-asawa indi dapat makigrelasyon sa sekso upod sa iban luwas sa iya bana ukon asawa. (1 Tesalonica 4:3-8; Hebreo 13:4) Kon ang sugo sang Dios ginalapas, masami nga mabun-ag ang mga anak nga wala sing mga ginikanan nga nagahigugma kag nagakinahanglan sa ila. Mahimu nga magpaaborsion pa ang mga iloy, ginapatay ang mga anak sa wala pa sila matawo. Dugang pa, madamu sang nagapakighilawas ang ginatapikan sing makangilidlis nga mga balatian sa sekso nga makahalit sa mga anak nga mahimu ibun-ag nila. Isa ka pagluib, isa ka krimen batok sa Dios, ang makigrelasyon sa sekso upod sa isa nga indi ka kasal. Si Job nagsiling: “Kon ang akon tagipusuon naganyat sa babayi, kag nagahulat ako nga nagapanago sa puertahan sang akon kaingod . . . malaut ina, isa ka krimen nga sililotan.”—Job 31:1, 9, 11, The New American Bible.
15. (a) Kon makahimu kita sing pagpakighilawas, sin-o ang aton ginapahamut-an? (b) Ngaa maalamon nga tumanon ang kasugoan sang Dios?
15 Indi kita dapat makibot nga ining ginagamhan sang Yawa nga kalibutan nagahimu nga daw normal kag husto para sa imo nga makigrelasyon sa sekso upod sa tawo nga indi ka kasal. Apang kon himuon mo ini, sin-o ang imo ginapahamut-an? Si Satanas, indi si Jehova. Agod mapahalipay ang Dios, dapat ikaw “maglikaw sa pagpakighilawas.” (1 Corinto 6:18) Matuod, indi pirme mahapos ang magmatutom sa Dios. Indi ini nangin mahapos para kay Job. Apang dumduma, maalamon nga tumanon ang kasugoan sang Dios. Magamalipayon ka karon kon himuon mo ini. Apang, labi ka importante, sakdagon mo ang bahin sang Dios sa hulusayon kag mapahalipay mo sia. Kag pakamaayuhon ka niya sing kabuhi nga walay katapusan sa kalipay sa duta.
16. (a) Paano si Job ginpakamaayo bangod sang iya katutom? (b) Ano ang masiling sa halit nga ginapahanabo ni Satanas, subong sang pagpatay sa 10 ka anak ni Job?
16 Matuod, ginpaimol ni Satanas si Job kag napatay ang iya 10 pa ka anak. Wala sing duhaduha nga nangin daku nga kadulaan ini kay Job. Apang sang magmatutom si Job, ginpakamaayo sia sang Dios sing doble sa iya napanag-iyahan anay sa wala pa sia gintilawan ni Satanas. Nangin amay man si Job sa 10 ka anak. (Job 42:10-17) Dugang pa, mapat-od naton nga ang 10 ka anak ni Job nga ginpatay ni Satanas mabuhi liwat sa pagkabanhaw sang mga patay. Sa pagkamatuod, wala sing halit ukon kalamidad nga ginatugot kay Satanas nga pahanabuon nga indi matadlong sang aton mahigugmaon nga Amay, si Jehova, sa iya sibu nga tion.
17. Ngaa importante gid ang aton paagi sang pagkabuhi?
17 Gani dumduma pirme nga importante gid kon paano ikaw nagakabuhi. Importante ini labi na kay Jehova nga Dios kag kay Satanas nga Yawa. Amo sini bangod nadalahig ikaw sa hulusayon kon bala ang tawo mangin matutom sa Dios ukon indi.
[Piktyur sa pahina 106]
Ginsabat ni Job ang hangkat ni Satanas nga wala sing bisan sin-o ang magapabilin nga matutom sa Dios sa idalom sang pagtilaw
[Piktyur sa pahina 110]
Ang paghimu sing seksuwal nga relasyon upod sa isa nga indi ka kasal isa ka krimen batok sa Dios
[Piktyur sa pahina 111]
Sa katutom ni Job, ginpakamaayo sia ni Jehova sing labaw sa iya napanag-iyahan anay