Paano Ka Mangin Abyan sang Dios?

1, 2. Sin-o ang pila ka abyan ni Jehova?

SIN-O ang gusto mo nga mangin abyan? Ang isa nga nanamian mo gid. Ang tawo nga nagasahuay gid kamo, mabuot, kag may manami nga mga batasan.

² Nagapili si Jehova nga Dios sing pila ka tawo para mangin abyan niya. Halimbawa, ang isa sa abyan ni Jehova amo si Abraham. (Isaias 41:8; Santiago 2:23) Nanamian man si Jehova kay David. Nagsiling sia nga si David “isa ka tawo nga kalahamut-an sa [iya] tagipusuon.” (Binuhatan 13:22) Kag si propeta Daniel “hamili [ukon, importante] gid” kay Jehova.—Daniel 9:23.

3. Ngaa nangin abyan ni Jehova si Abraham, si David, kag si Daniel?

³ Paano nangin abyan ni Jehova si Abraham, si David, kag si Daniel? Nagsiling si Jehova kay Abraham: “Nagpamati ka sa akon tingog.” (Genesis 22:18) Nagapakig-abyan si Jehova sa mga mapainubuson nga nagatuman sa iya. Bisan ang isa ka pungsod puede mangin abyan niya. Nagsiling si Jehova sa pungsod sang Israel: “Tumana ninyo ako, kag mangin Dios ninyo ako, kag mangin katawhan ko kamo.” (Jeremias 7:23) Gani para mangin abyan mo si Jehova, dapat mo man sia tumanon.

GINAPROTEKSIONAN NI JEHOVA ANG IYA MGA ABYAN

4, 5. Paano ginaproteksionan ni Jehova ang iya mga abyan?

⁴ Ang Biblia nagasiling nga nagapangita sing paagi si Jehova “agod ipakita ang iya kusog para sa ila nga ang tagipusuon bug-os sa iya.” (2 Cronica 16:9) Sa Salmo 32:8, nagpromisa si Jehova sa iya mga abyan: “Hatagan ko ikaw sing paghangop kag tudluan ko ikaw sang dalanon nga dapat mo laktan. Laygayan ko ikaw samtang nagatulok ako sa imo.”

⁵ May gamhanan kita nga kaaway nga indi gusto nga mangin abyan kita sang Dios. Pero gusto kita proteksionan ni Jehova. (Basaha ang Salmo 55:22.) Bilang mga abyan ni Jehova, nagaalagad kita sa iya sing bug-os tagipusuon. Bisan pa may mga kabudlayan, mainunungon kita gihapon sa iya. Kag pareho sa salmista may pagsalig man kita kay Jehova. Nagsulat sia: “Bangod yara sia sa akon tuo nga kamot, indi ako malingkang [ukon, matublag].” (Salmo 16:8; 63:8) Paano kita ginapunggan ni Satanas sa pagpakig-abyan sa Dios?

ANG AKUSASYON NI SATANAS

6. Ano ang mga akusasyon ni Satanas parte sa mga tawo?

⁶ Natun-an naton sa Kapitulo 11 nga ginkuestyon ni Satanas si Jehova. Gin-akusahan niya si Jehova nga butigon kag indi kuno maayo nga manuggahom kay wala niya ginpasugtan si Adan kag si Eva nga magdesisyon kon ano ang husto kag sala. Ginatudluan man kita sa libro sang Job sa Biblia nga gin-akusahan man ni Satanas ang mga tawo nga gusto mangin abyan sang Dios. Nagsiling sia nga nagaalagad lang sila sa Dios kay may makuha sila sa Iya, indi kay palangga nila Sia. Nagsiling man si Satanas nga mapatalikod niya ang bisan sin-o sa Dios. Tun-an naton subong ang parte kay Job kag kon paano sia ginproteksionan ni Jehova.

7, 8. (a) Ano ang pagtan-aw ni Jehova kay Job? (b) Ano ang ginsiling ni Satanas parte kay Job?

⁷ Sin-o si Job? Maayo sia nga tawo nga nagkabuhi sang mga 3,600 ka tuig na ang nagligad. Nagsiling si Jehova nga sadto nga tion wala sing tawo nga pareho kay Job. Ginarespeto gid niya ang Dios, kag akig gid sia sa malain. (Job 1:8) Matuod gid sia nga abyan ni Jehova.

⁸ Nagsiling si Satanas nga nagaalagad lang si Job kay may makuha sia sa Dios. Nagsiling si Satanas kay Jehova: “Indi bala nga ginaamligan mo sia kag ang iya panimalay kag ang tanan nga yara sa iya? Ginpakamaayo mo ang iya mga binuhatan, kag ginpadamo ang iya kasapatan sa duta. Apang untaya ang imo kamot kag kuhaa ang tanan nga yara sa iya, kag pat-od gid nga sikwayon ka niya.”—Job 1:10, 11.

9. Ginpasugtan ni Jehova si Satanas nga himuon ang ano?

⁹ Gin-akusahan ni Satanas nga nagaalagad lang si Job bangod sang iya makuha kay Jehova. Nagsiling man si Satanas nga mapauntat niya si Job sa pag-alagad kay Jehova. Wala nag-ugyon si Jehova kay Satanas, pero ginpasugtan Niya si Satanas nga tilawan si Job kon bala nagaalagad si Job kay Jehova bangod palangga niya Sia.

ANG PAGTILAW NI SATANAS KAY JOB

10. Ano ang mga pag-atake ni Satanas kay Job, kag ano ang reaksion ni Job?

¹⁰ Una, ginkawat ukon ginpamatay ni Satanas ang tanan nga kasapatan ni Job. Dayon ginpatay ni Satanas ang halos tanan nga alagad ni Job. Naubos ang tanan nga pagkabutang ni Job. Sa katapusan, ginpatay ni Satanas ang pulo ka kabataan ni Job paagi sa bagyo. Pero nangin mainunungon gihapon si Job kay Jehova. “Sa pihak sang tanan nga natabo sa iya, wala makasala si Job ukon magbasol sa Dios.”—Job 1:12-19, 22.

11. (a) Ano pa ang ginhimo ni Satanas kay Job? (b) Ano ang reaksion ni Job?

¹¹ Wala nag-untat si Satanas. Ginhangkat niya ang Dios: “Haliti ang iya tul-an kag unod, kag pat-od gid nga sikwayon ka niya.” Gani ginhatagan ni Satanas si Job sang tama gid kasakit nga balatian. (Job 2:5, 7) Pero nag-unong gihapon si Job kay Jehova. Nagsiling sia: “Tubtob mapatay ako, indi ko pag-isikway ang akon integridad!”—Job 27:5.

12. Paano napamatud-an ni Job nga butigon si Satanas?

¹² Wala nakahibalo si Job parte sa mga akusasyon ni Satanas ukon kon ngaa grabe gid ang iya pag-antos. Abi niya si Jehova ang rason sang iya mga problema. (Job 6:4; 16:11-14) Pero, nangin mainunungon gihapon si Job kay Jehova. Gani sigurado gid nga si Job wala nagaalagad bangod lang may makuha sia kay Jehova. Abyan sia sang Dios bangod palangga niya Sia. Indi gid matuod ang tanan nga akusasyon ni Satanas!

13. Ano ang resulta kay nangin mainunungon si Job?

¹³ Bisan pa wala nakahibalo si Job kon ano ang nagakatabo sa langit, nangin mainunungon gihapon sia sa Dios kag ginpamatud-an nga malain gid katama si Satanas. Ginpadyaan ni Jehova si Job kay nangin mainunungon sia nga abyan.—Job 42:12-17.

GINAAKUSAHAN KA MAN NI SATANAS

14, 15. Ano ang akusasyon ni Satanas sa tanan nga tawo?

¹⁴ Makatuon ka sang importante nga mga leksion sa natabo kay Job. Subong, ginaakusahan man kita ni Satanas nga nagaalagad lang kita kay Jehova bangod sang aton makuha sa Iya. Sa Job 2:4, nagsiling si Satanas: “Ihatag sang tawo ang tanan nga yara sa iya tungod sa iya kabuhi.” Gani indi lang si Job ang gin-akusahan ni Satanas nga nagaalagad bangod may makuha sia sa Dios, kundi kita tanan. Ginatos ka tuig sang ulihi sa tapos mapatay si Job, ginainsulto gihapon ni Satanas si Jehova kag ginaakusahan ang iya mga alagad. Halimbawa, sa Hulubaton 27:11, aton mabasa: “Magmaalam ka, anak ko, kag pasadyaha ang akon tagipusuon, agod masabat ko sia nga nagayaguta [ukon, nagainsulto] sa akon.”

¹⁵ Puede mo pilion nga tumanon si Jehova kag mangin abyan Niya, para pamatud-an nga butigon si Satanas. Bisan pa kinahanglan mo maghimo sing daku nga pagbag-o para mangin abyan sang Dios, amo ini ang pinakamaayo mo nga himuon! Serioso gid ini nga desisyon. Nagsiling si Satanas nga indi ka mangin mainunungon sa Dios kon may mga problema. Ginadayaan niya kita para indi kita mangin mainunungon sa Dios. Paano?

16. (a) Ano ang mga paagi ni Satanas para pauntaton ang mga tawo sa pag-alagad kay Jehova? (b) Ano ang ginahimo sang Yawa para pauntaton ka sa pag-alagad kay Jehova?

¹⁶ Madamo sing paagi si Satanas para punggan kita sa pagpakig-abyan sa Dios. Nagaatake sia pareho “sang nagangurob nga leon, nga nagapangita sing tulukbon.” (1 Pedro 5:8) Amo nga indi ka na matingala kon ang imo mga abyan, mga miembro sang pamilya, ukon ang iban magpugong sa imo nga magtuon sa Biblia kag himuon ang husto. Mahimo magbatyag ka nga daw ginaatake ka.a (Juan 15:19, 20) Nagapakunokuno man si Satanas nga “anghel sang kapawa.” Gani mahimo niya kita dayaan para indi magtuman kay Jehova. (2 Corinto 11:14) Ang isa pa ka paagi ni Satanas para pauntaton kita sa pag-alagad kay Jehova amo nga ginapapati niya kita nga indi kita takus sa pag-alagad sa Dios.—Hulubaton 24:10.

TUMANA ANG MGA SUGO NI JEHOVA

17. Ngaa nagatuman kita kay Jehova?

¹⁷ Kon ginatuman naton si Jehova, ginapamatud-an naton nga butigon si Satanas. Ano ang makabulig sa aton? Ang Biblia nagasiling: “Higugmaa si Jehova nga inyo Dios sa bug-os ninyo nga tagipusuon kag sa bug-os ninyo nga kalag kag sa bug-os ninyo nga kusog.” (Deuteronomio 6:5) Nagatuman kita kay Jehova bangod palangga naton sia. Samtang mas ginapalangga naton si Jehova, mas mapahulag kita nga tumanon ang tanan nga ginapahimo niya sa aton. Si apostol Juan nagsulat: “Amo ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at.”—1 Juan 5:3.

18, 19. (a) Ano nga mga butang ang ginsiling ni Jehova nga indi naton paghimuon? (b) Ngaa masiling naton nga wala ginapahimo sa aton ni Jehova ang indi naton masarangan?

¹⁸ Pero ano nga mga butang ang ginasiling ni Jehova nga indi naton paghimuon? Mabasa mo ang pila ka halimbawa sa kahon nga “Likawi ang mga Ginakaugtan ni Jehova.” Basi magpensar ka nga ang iban diri daw indi man gid malain. Pero kon basahon mo ang mga bersikulo sa Biblia kag pamensaran ini sing maayo, maintiendihan mo kon ngaa dapat tumanon ang kasuguan ni Jehova. Mapahulag ka man sini nga bag-uhon ang imo kabuhi. Bisan pa kon kaisa mabudlay, ang paghimo sini nga mga pagbag-o makahatag sa imo sing kalinong kag kalipay kay nangin mainunungon ka nga abyan sang Dios. (Isaias 48:17, 18) Ngaa masiling naton nga posible ini?

¹⁹ Wala ginapahimo ni Jehova sa aton ang indi naton masarangan. (Deuteronomio 30:11-14) Bilang matuod nga Abyan, mas kilala niya kita sangsa pagkilala naton sa aton kaugalingon. Nahibaluan niya ang aton mga ikasarang kag mga kaluyahon. (Salmo 103:14) Ginapalig-on kita ni apostol Pablo: “Ang Dios matutom, kag indi sia magtugot nga sulayon kamo labaw sa inyo masarangan, apang kon mag-abot ang pagsulay magahimo man sia sang lulutsan agod mabatas ninyo ini.” (1 Corinto 10:13) Makasalig kita nga hatagan kita ni Jehova sang kusog para himuon ang husto. Hatagan ka niya sang “gahom nga labaw sa kinaandan” para mabatas mo ang mga kabudlayan. (2 Corinto 4:7) Sang naeksperiensiahan ini ni Pablo, nagsiling sia: “Sa tanan nga butang may kusog ako paagi sa isa nga nagapabakod sa akon.”—Filipos 4:13.

HIMUA ANG MGA BUTANG NGA MAKAPAHALIPAY SA DIOS

20. Ano nga mga kinaiya ang dapat mo ilugon, kag ngaa?

²⁰ Kon gusto naton mangin abyan ni Jehova, dapat naton untatan ang mga butang nga ginasiling ni Jehova nga sala. Pero may dapat pa kita himuon. (Roma 12:9) Ginahimo man sang mga abyan sang Dios ang mga butang nga nagapahalipay sa iya. Mabasa naton ini sa Salmo 15:1-5. (Basaha.) Ginailog sang mga abyan ni Jehova ang iya mga kinaiya kag nagapakita sing “gugma, kalipay, paghidait, pagkamapinasensiahon, maayo nga kabubut-on, kaayo, pagtuo, kalulo, kag pagpugong sa kaugalingon.”—Galacia 5:22, 23.

21. Ano ang makabulig sa imo nga mapakita ang mga kinaiya nga nagapahalipay sa Dios?

²¹ Ano ang makabulig sa imo nga mapakita ining maayo nga mga kinaiya? Dapat mo tun-an ang mga nagapahalipay kay Jehova paagi sa regular nga pagbasa kag pagtuon sing Biblia. (Isaias 30:20, 21) Kon himuon mo ini, mas palanggaon mo pa gid si Jehova, kag mapahulag ka pa gid nga tumanon sia.

22. Ano ang resulta kon magtuman kita kay Jehova?

²² Ang pagbag-o nga kinahanglan mo himuon sa imo kabuhi mapaanggid sa pag-uba sang daan nga bayo kag pagsuksok sang bag-o nga bayo. Ang Biblia nagasiling nga dapat “[ubahon mo] ang daan nga personalidad” kag isuksok ang “bag-o nga personalidad.” (Colosas 3:9, 10) Bisan pa mabudlay ini, kon magbag-o kita kag magtuman kay Jehova, nagpromisa sia nga “daku ang padya” nga ihatag niya sa aton. (Salmo 19:11) Huo, dapat naton pilion nga magtuman kay Jehova kag pamatud-an nga butigon si Satanas. Mag-alagad kay Jehova, indi bangod sa pagpakamaayo sa palaabuton, kundi bangod palangga mo sia. Sigurado nga mangin matuod ka gid nga abyan sang Dios!