Si Jesucristo—Sin-o Sia?
“BISAN ang madamo nga tawo nga indi mga Cristiano nagapati nga Sia isa ka daku kag maalam nga manunudlo. Isa gid sia sa labing maimpluwensia nga mga tawo nga nabuhi.” (The World Book Encyclopedia) Sin-o “Sia”? Amo si Jesucristo, ang tagtukod sang Cristianismo. Kilala mo bala sia? Naapektuhan bala niya ang imo kabuhi?
Ang mga hitabo sa ministeryo ni Jesus narekord sa Biblia sa apat ka maragtason nga sinulatan nga ginatawag Mga Ebanghelyo. Daw ano ka matuod ining mga kasaysayan? Sa tapos ini mausisa, ang kilala nga istoryador nga si Will Durant nagsulat: “Nga ang pila ka simple nga mga tawo sang isa ka kaliwatan nag-imbento sing tuman ka gamhanan kag makagalanyat nga personalidad, tuman kataas nga moralidad kag tuman ka makaimpluwensia nga palanan-awon tuhoy sa paghiliutod sang mga tawo, mangin isa ka milagro nga labi pa nga indi mapatihan sangsa bisan ano nga narekord sa Mga Ebanghelyo.”
Apang, para sa minilyon ka tawo sa Sidlangan kag sa iban pa nga mga duog, indi kilala si Jesucristo. Ayhan nagapati sila nga nagluntad sia, apang wala sila nagahunahuna nga may kahilabtanan sia sa ila kabuhi. Ang iban nagasikway kay Jesus subong indi salapakon bangod sang nahimo sang mga nagapangangkon nga sumulunod niya. ‘Ginhulugan nila sing bomba atomika ang Nagasaki,’ siling sang iban sa Japan, ‘isa ka siudad nga mas madamo ang mga Cristiano sangsa kalabanan nga siudad sa Japan.’
Apang, basulon mo bala ang doktor sa balatian sang pasyente kon wala ginsunod sang pasyente ang reseta sang doktor? Maathag nga indi. Madugay na ginasikway sang mga tawo sa Cristiandad ang reseta ni Jesus sa paglandas sang ila mga problema sa adlaw-adlaw. Gani sa baylo nga sikwayon si Jesus bangod sang ginatawag nga mga Cristiano, nga wala nagasunod sa iya mga ginatudlo, ngaa indi mo tilawan nga hibaluon kon sin-o sia? Usisaa ang Biblia, kag tan-awa kon sin-o gid si Jesus kag kon paano pa gani niya mabag-o ang imo kabuhi.
Gugma—Ang Iya Reseta
Si Jesucristo isa ka daku nga manunudlo nga nagkabuhi sa Palestina sang halos 2,000 ka tuig nga nagligad. Diutay lamang ang nahibaluan tuhoy sa iya pagkabata. (Mateo, kapitulo 1 kag 2; Lucas, kapitulo 1 kag 2) Sang mag-30 anyos ang iya edad, ginsugdan ni Jesus ang iya ministeryo sa “pagpanaksi sa kamatuoran.” (Juan 18:37; Lucas 3:21-23) Ang apat ka istoryador sang kabuhi ni Jesus nagabinagbinag labi na sang iya dayag nga ministeryo, ang katapusan nga tatlo ka tuig kag tunga nga bahin sang iya pagkabuhi sa duta.
Sa tion sang iya ministeryo, ginsugid niya sa iya mga disipulo ang sekreto sa paglubad sang nanuhaytuhay nga problema sa ila kabuhi. Ano yadto nga sekreto? Amo ang gugma. Sa isa sa bantog gid nga mga sermon sa maragtas, nga gintawag Sermon sa Bukid, gintudluan ni Jesus ang iya mga disipulo kon paano magpakita sing gugma sa mga isigkatawo. Sia nagsiling: “Busa, ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila.” (Mateo 7:12) Ini nga prinsipio ginatawag nga Bulawanon nga Sulundan. Ang “mga tawo” nga ginpatuhuyan diri ni Jesus nagalakip bisan sa mga kaaway sang isa. Sa amo gihapon nga sermon, sia nagsiling: “Padayon nga higugmaa ang inyo mga kaaway kag ipangamuyo ang mga nagahingabot sa inyo.” (Mateo 5:44) Indi bala nga malubad sini nga gugma ang madamo sang mga problema nga ginaatubang naton karon? Amo sini ang pagpati sang Hindu nga lider nga si Mohandas Gandhi. Ginbalikwat sia nga nagsiling: “Kon mag-ugyunay [kita] sa mga panudlo nga ginpamulong ni Cristo sa sining Sermon sa Bukid, malubad naton ang mga problema . . . sang bug-os nga kalibutan.” Ang mga panudlo ni Jesus tuhoy sa gugma, kon iaplikar, makapaayo sang mga balatian sang katawhan.
Ang Iya Gugma nga Ginpakita sa Buhat
Ginbuhat ni Jesus ang iya gintudlo. Gin-una niya ang mga kaayuhan sang iban sangsa iya kaugalingon kag nagpakita sing gugma paagi sa buhat. Sang isa ka adlaw, madamo gid nga tawo ang gintudluan ni Jesus kag sang iya mga disipulo, amo nga wala sila makahigayon sa pagkaon. Nakita ni Jesus nga kinahanglan “magpahuway sing diutay” ang iya mga disipulo, gani naglakat sila agod magkadto sa isa ka baw-ing nga duog. Apang gin-unahan sila sang kadam-an kag nagahulat na didto. Ano ang himuon mo kon ikaw si Jesus? Ti, nagbatyag si Jesus sing ‘kaluoy sa ila’ kag ‘gintudluan sila sing madamo nga butang.’ (Marcos 6:30-34) Ginpahulag sia sining tudok nga kaluoy nga buligan ang iban.
Nakabulig si Jesus sa iban indi lamang sa espirituwal nga pagpanudlo. Naghatag man sia sing praktikal nga bulig. Halimbawa, ginpakaon niya ang 5,000 ka lalaki (wala labot sa mga babayi kag mga kabataan) nga nahapunan sa pagpamati sa iya sang isa ka adlaw. Sa isa pa ka hitabo sang ulihi, 4,000 ang ginpakaon niya. Sa nauna nga okasyon, lima ka bilog nga tinapay kag duha ka isda ang gingamit niya kag, sa naulihi, pito ka bilog nga tinapay kag pila ka magamay nga isda. (Mateo 14:14-21; 15:32-38; Marcos 6:35-44; 8:1-9) Mga milagro? Huo, naghimo sia sing mga milagro sadto.
Madamo man nga balatianon ang gin-ayo ni Jesus. Gin-ayo niya ang mga bulag, ang mga piang, ang mga aruon, kag ang mga bungol. Ti, nagbanhaw pa gani sia sing mga patay! (Lucas 7:22; Juan 11:30-45) Sang isa ka bes, nakitluoy sa iya ang isa ka aruon: “Kon luyag mo lang, matinluan mo ako.” Ano ang reaksion ni Jesus? “Gin-untay niya ang iya kamot kag gintandog sia, kag nagsiling sa iya: ‘Luyag ko. Magmatinlo ka.’ ” (Marcos 1:40, 41) Napahulag si Jesus sang mabaskog nga handum nga buligan sila. Paagi sa sini nga mga milagro, ginpakita niya ang iya gugma para sa mga nagaantos.
Mabudlay bala patihan? Apang ginhimo ni Jesus ang kalabanan sang iya mga milagro sa publiko. Bisan gani ang iya mga kasumpong, nga nagtinguha sa pagpangita sing sayop sa iya sa tanan nga tion, indi makapanghiwala sang katunayan nga naghimo sia sing mga milagro. (Juan 9:1-34) Luwas pa, may katuyuan ang iya mga milagro. Nakabulig ini sa mga tawo agod makilala si Jesus subong ang isa nga ginpadala sang Dios.—Juan 6:14.
Ang malip-ot lamang nga pagbinagbinag sang mga panudlo ni Jesus kag sang iya kabuhi nagatandog sang aton balatyagon nga higugmaon sia kag ilugon ang iya gugma. Apang, indi lamang sa sining paagi maapektuhan ni Jesus ang imo kabuhi. Indi lamang sia isa ka daku nga manunudlo nga nagtudlo sing gugma. Ginpakita niya nga antes sia mangin tawo nagaluntad na sia subong ang bugtong nga Anak sang Dios. (Juan 1:14; 3:16; 8:58; 17:5; 1 Juan 4:9) Pagkatapos mangin tawo nagpadayon sia gihapon sa pagluntad, nga nagahimo sa iya nga dugang pa nga may kabilinggan sa imo. Ginapakita sang Biblia nga si Jesus ginbanhaw kag karon nagalingkod sa trono subong Hari sa Ginharian sang Dios. (Bugna 11:15) Si Jesus nagsiling: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3; 20:31) Sa pagkamatuod, ang pagkuha sing ihibalo tuhoy kay Jesucristo mahimo magkahulugan sang dayon nga kabuhi sa Paraiso! Paano ina mahimo? Ngaa indi mo tilawan nga magtuon sing dugang tuhoy kay Jesus kag tan-awon kon paano “ang gugma ni Cristo nagatiklod sa aton” nga ilugon sia? (2 Corinto 5:14) Malipay ang mga Saksi ni Jehova sa pagbulig sa imo.—Juan 13:34, 35.
Luwas kon lain ang ginapakita, ang tanan nga kinutlo sa Biblia ginbadbad gikan sa New World Translation of the Holy Scriptures.