Ngaa Magtuo kay Jesucristo?

“BISAN ang madamo nga tawo nga indi mga Cristiano nagapati nga isa Sia ka daku kag maalam nga manunudlo. Isa gid sia sa labing maimpluwensia nga mga tawo nga nagkabuhi.” (The World Book Encyclopedia) Sin-o “Sia”? Amo si Jesucristo, ang tagtukod sang Cristianismo.

Apang, walay sapayan sang ginasiling sang insiklopedia, para sa minilyon ka tawo sa Sidlangan kag sa bisan diin, si Jesucristo indi kilala, ayhan isa lamang ka ngalan nga mahimo madumduman nila gikan sa mga libro sa hayskul. Bisan gani sa mga simbahan sang Cristiandad, may mga teologo kag mga klerigo nga nagasiling nga indi gid naton kilala si Jesus kag nagaduhaduha sa pagkamaminatud-on sang apat ka nagaluntad nga kasaysayan sang iya kabuhi (ang mga Ebanghelyo) nga masapwan sa Biblia.

Mahimo ayhan nga ginpalsipikar sang mga manunulat sang Ebanghelyo ang istorya sang kabuhi ni Jesus? Indi gid! Ang bantog nga istoryador nga si Will Durant, sa tapos mausisa ang mga rekord sang Ebanghelyo, nagsulat: “Nga ang pila ka simple nga mga tawo sang isa ka kaliwatan nag-imbento sing tuman ka gamhanan kag makagalanyat nga personalidad, tuman kataas nga moralidad kag tuman ka makaimpluwensia nga palanan-awon tuhoy sa paghiliutod sang mga tawo, mangin isa ka milagro nga labi pa nga indi mapatihan sangsa bisan ano nga narekord sa mga Ebanghelyo. Pagkatapos sang duha ka siglo sang Higher Criticism ang kabilugan nga paglaragway sang kabuhi, kinaiya, kag panudlo ni Cristo, nagpabilin nga maathag gid, kag nagahuman sing labing makawiwili nga bahin sang maragtas sang tawo sa Nakatundan.”

Apang, may mga nagasikway kay Jesucristo subong indi salapakon bangod sang ginhimo sang mga nagapangangkon nga sumulunod niya. ‘Ginhulugan nila sing bomba atomika ang Nagasaki,’ siling sang iban sa Japan. ‘Kag mas madamo ang mga Cristiano sa Nagasaki sangsa kalabanan nga siudad sa Japan.’ Apang mabasol mo bala ang doktor sa balatian sang pasyente kon wala ginasunod sang pasyente ang panugyan sang doktor? Madugay na nga ginasikway sang kalabanan nga tawo nga nagapangangkon nga Cristiano ang reseta ni Jesus sa paglandas sa mga balatian sang katawhan. Apang, naghatag si Jesus sing remedyo para sa aton mga problema sa adlaw-adlaw subong man para sa mga kalisdanan sang katawhan sa bug-os nga kalibutan. Amo kon ngaa ginaagda namon kamo nga basahon ang masunod nga artikulo kag tan-awa kon ano sia anay nga sahi sang tawo.