Ginaagda Ikaw sang Dios nga Mangin Abyan Niya

Luyag sang Dios nga mangin abyan ka niya. Nahunahuna mo na bala nga mahimo ikaw mangin abyan sang labing daku nga Persona sa uniberso? Si Abraham, nga nagkabuhi sang una, gintawag nga abyan sang Dios. (Santiago 2:23) Ang iban pa nga ginsambit sa Biblia nangin abyan man sang Dios kag nakabaton sing daku nga pagpakamaayo. Sa karon, ang mga tawo gikan sa tanan nga bahin sang duta nangin mga abyan sang Dios. Ikaw man mahimo mangin abyan sang Dios.

Mas maayo nga mangin abyan ikaw sang Dios sangsa mangin abyan ikaw sang bisan sin-o nga tawo. Wala gid ginapaslaw sang Dios ang iya mainunungon nga mga abyan. (Salmo 18:25) Mas maayo nga mangin abyan ikaw sang Dios sangsa madamo nga manggad. Kon mapatay ang isa ka manggaranon nga tawo, ang iya kuwarta nagakadto sa iban. Apang, ang mga abyan sang Dios may bahandi nga indi makuha ni bisan sin-o.—Mateo 6:19.

Mahimo punggan ikaw sang iban nga mga tawo sa pagtuon tuhoy sa Dios. Mahimo ini himuon bisan sang pila sang imo mga abyan kag pamilya. (Mateo 10:36, 37) Kon kadlawan ka sang iban ukon pahugon, pamangkuta ang imo kaugalingon, ‘Sin-o ang luyag ko pahamut-an—ang mga tawo ukon ang Dios?’ Hunahunaa ini: Kon may magsiling sa imo nga untatan mo ang pagkaon, matuman ka bala? Sa pagkamatuod indi! Dapat ka magkaon agod mabuhi. Apang mahimo sang Dios nga mabuhi ikaw sing dayon! Gani indi gid pagtuguti ang bisan sin-o nga punggan ikaw sa pagtuon kon paano ikaw mangin abyan sang Dios.—Juan 17:3.